Read Yamano Máà 6 Bible Online

Máà 6 - Yamano bible

Máà 6

¹Zízɛ̀ e gó lɛ̀ e kɛ yía mɔ̀, e ló e dìè pà. Wà là tòà-píé-mìà wáà lò.

²Fĩ́ĩ́-dɔ-lùò káa, Zízɛ̀ e gbɛ̃̀ áà pɛ zɔ̃̀ɔ̃̀ mia lɛ̀ɛ o zì Wálà-kàa wì. Míá o kɛ yía, o kɛ búnùzɛ̀. Lɛ̀ o wɔ̃́ lɛ́ e kɛ à gèepìàa maa, o lé e pa, wáà gèè, “Mɛ́ɛ lɛ́ gɔ̃́ e kéa e wɔ̃́ sùua sɔ̀lɔ̀ ɓo yí? Gíkã́ sùu kpɛɛ̀ lɛ́ à nɔɔ̀ lɛ à lɛ̀ɛ ɓe? Zi sùu kpɛɛ̀ lɛ́ è wɔ̃́ kpàlé-kpàlézɛ̀ kɛ̀á ɓe?

³Ḿ gɔ̃̀, yílí-nyá-mì lɛ́ gɔ̃́ɛɛ ká? Zeĩ́a, ḿ gɔ̃̀, à lòóò lɛ́ Melé ká, ɛ̃́ɛ̃́ à lèe-gé nì lɛ́ e Zĩ́ĩ̀ wà Zózɛ̀, ɛ̃́ɛ̃́ Zúdà wà Sáímɔ̀ o ká? Ḿ gɔ̃̀, à lúlɔ̀ nì ó ko píé zèe?” À mɔ́ɔ̀ wɔ̃̀ mɔ̀ɔ, òó gbaa à naa Zízɛ̀ ká.

⁴Zízɛ̀ a gèe o lɛ̀ɛ, “Óò ɓɛ̀lɛyà nɔ dɔ̀-Wálà-lé-là-mì lɛ̀ɛ lɛ̀ nɔ́ɔ fé-fé mɔ̀, kɛɛ lɛ̀ nɔ́ òó nɔ à lɛ̀ɛ yía, lɛ́ e à pà káa. E bɛ̀i, à mìà nì wà à píé-kɛ́ì-mìà nì lɛ́ òó nɔ à lɛ̀ɛ.”

⁵Zízɛ̀ lɛ̀ɛ́ gbaa bɛ̀i à mɔ̀ é wɔ̃́ kpàlézɛ̀ gbɛɛ kɛ yí. Wɔ̃́ nɔ́ a kɛ yía, lɛ́ à kɔ̀ a kpɔ́ yáá-mìà wɛ́lɛ́ ɓéĩ́ là, lɛ́ o laa ká.

⁶À lé e pa, ɓii à pà-mìà òó gbaa o zò dɔ à mɔ̀. Zízɛ̀ e ló gbaa pɛ́lɛ kélé kélé yí píé pɛ zɔ̃̀ɔ̃̀ mia lɛ̀ɛ ká.

⁷E bɛ̀i, e là tòà-píé-mìà vũ̀ doó wɛ́lɛ́ pèèlɛɛ súo kɛ o kíe là, áà o vɔ̀ píé pèèlɛ pèèlɛ. E yíkɛ̀ gáàa nɔ o lɛ̀ɛ ó kɛá pɛ yɔɔ vɔ̀ là.

⁸E o pã́ã́ ɓo, áà gèè o lɛ̀ɛ weeá kélɛ̀, “Yékɛ̀ pɛ gbɛɛ é kɛ ka kɛ̀lɛ̀, káà lòá táá e kília mɔ̀, kɛɛ pɛ nɔ́ è bɛ̀i kɛɛ̀ ka kɛ̀lɛ̀ɛ, lɛ́ e tɔ́ kpeĩ̀. Yékɛ̀ ká ló belè, ɛ̃́ɛ̃́ gbòṹ, wà pɛlèe nɔ́ɔ fé dò ká kà bá yí.

⁹Kà kà sàkpà yà, yékɛ̀ ká sɔ pèèlɛ dà e kíe là.”

¹⁰E bɛ̀i, a gèe o lɛ̀ɛ, “Ká yé mia ò lo ka wɔ̀lɔ̀ kpɔ́ɔ̀ à wìa, kà tó à wì é tó kíli ka gò pɛ́lɛ e kília yí lùò é ɓɔ.

¹¹Kɛɛ lɛ̀ lɛ́ kà lo lóò yi, lɛ́ mia òó o kɔ̀ yà ka wì, ɛ̃́ɛ̃́ ó o tóó dɔ ka wéè mɔ̀ɔ, ká kɛ̀á gópìà yia, kà ka gã̀ yí zɛ, kɛɛ mùnú lɛ́ e tó à mɔ̀ yia, é gó à mɔ̀. Lɛ́ɛ̀ lo kɛɛ̀ wɔ̃́ wa kɛ ka káa kélá ká.”

¹²Lɛ̀ e kɛ kília, o wɛ̀lɛ̀, wáà lò. O ló, wáà lò à gèeá sí lòũ̀ ká kélɛ̀ lɛ sɛ̀ mia ó o sɔ̃̀ɔ̃ yɔɔ mɛ́ vɔ̀ɔ.

¹³O pɛ yɔɔ búnùzɛ̀ ɓo mia píé. Ɛ́ɛ̃́ zéniía, o nyɔ́nɔ́ táá yáá-mìà búnùzɛ̀ là, wáà là.

¹⁴Hɛ́lɔ̀, lɛ́ e kɛ sɛ́lɛ́ e kília líé-sí-mì káa, e wɔ̃́ e kília làṹ ma. Ƃii Zízɛ̀ tɔ́ e kɛ ɓɔpìà. Mia gbṹũ̀ wa gèe, “Zɔ̃̀ɔ̃́ lɛ́ e kɛ mia bàtáì-kɛ-mì káa, aà wɛ̀lɛ̀ ga kɛ̀lɛ̀. Pɛ́ à kɛ̀ lɛ́ yíkɛ̀ gáàa sùua lɛ à yí, áà yɛɓo kɛ̀ à káa lɛ́ ɓɛ.”

¹⁵Kɛɛ mia dò wa gèe, “Ìláyà lɛ.” E bɛ̀i, mia dò wa gèe, “Dɔ̀-Wálà-lé-là-mì lɛ́ à ká. Lɛ kélɛ̀ dɔ̀-Wálà-lé-là-mìà lɛ́ o mɔ́ zèea lɛ́ ɓe.”

¹⁶Kɛɛ yé Hɛ́lɔ̀ a maa, a gèe, “Zɔ̃̀ɔ̃́ lɛ́ ma wũ-kèlè kã́ à làa, ye lɛ. Aà wɛ̀lɛ̀ ga kɛ̀lɛ̀.”

¹⁷Hɛ́lɔ̀ nɔ́ doó e kília, kɛɛ aà mia vɔ ó Zɔ̃̀ɔ̃́ kṹ, ó à yèlè, ó dùò bĩ́-kɛ̀ì. E à kɛ kíli Hɛ̀lódìà wɛ̃́ĩ̀. Hɛ̀lódìà e kɛ Hɛ́lɔ̀ lèe-gé Félè na ká. Kɛɛ Hɛ́lɔ̀ aà à sí lee ká.

¹⁸Zɔ̃̀ɔ̃́ a gèe Hɛ́lɔ̀ lɛ̀ɛ, “Ye wá sɛ̀ kɛ í kɛ i lèe-gé na píé.”

¹⁹À mɔ́ɔ̀ wɔ̃̀ mɔ̀ɔ, Zɔ̃̀ɔ̃́ kpo e kɛ Hɛ̀lódìà yí, áà nàà á zɛ. Kɛɛ bɛ̀i lɛ̀ɛ́ gbaa kɛ à mɔ̀ á kɛ kíli.

²⁰Ƃii Hɛ́lɔ̀ e kɛ túópìà Zɔ̃̀ɔ̃́ lɛ̀ɛ. A yí dɔ kélɛ̀ Zɔ̃̀ɔ̃́ e kɛ mi kpeĩ ká, ɛ̃́ɛ̃́ e kɛ Wálà mi ká. À mɔ́ɔ̀ wɔ̃̀ mɔ̀ɔ, e kɛ e yɛ́lɛ́ yiè kɛpìà Zɔ̃̀ɔ̃́ mɔ̀. Lúó nɔ́ɔ fé lɛ́ è Zɔ̃̀ɔ̃́ wéè maáa, à lè lɛ́ɛ̀ dũ nyɔ́ɔ̀ɔ. É kɛ bɛ̃̀ɛ̃ kília, e kɛ à naapìà á wéè ma.

²¹Kɛɛ Hɛ̀lódìà e zi ɓéĩ́ gɛ̃̀ Hɛ́lɔ̀ ye-lùò mɔ́ɔ̀ kpílì-kɛ-lùò ká. Mia lɛ́ o ló kpílì e kília làa, o kɛ sɛ́lɛ́ wũ-là-mìà gbùò gbùò ká, ɛ̃́ɛ̃́ sóyà vɔ̀ líé-sí-mìà, wà mia kpànazɛ̀ yé o kɛ Gálàlíìa ká.

²²Hɛ̀lódìà lú e nu lɛ̀ lɛ́ míá o kília o kɛ yía mɔ̀, áà tã́ kɛ̀. Tã́ e kília kɛɛ̀ e Hɛ́lɔ̀ wà là lɔ̀ɔ̀-mìà vɔ̀ o nua, o zò kṹ. À mɔ́ɔ̀ wɔ̃̀ mɔ̀ɔ, Hɛ́lɔ̀ a gèe lee-nɛ̀fúa lɛ̀ɛ, “Pɛ nɔ́ɔ fé ɓà nàà à káa, à zɔ̃̀ɔ̃̀ m lɛ̀ɛ. Ḿm̀ lo à nɔɔ̀ i lɛ̀ɛ.”

²³E e náá kpɔ́ nɛ́fúa lɛ̀ɛ weeá kélɛ̀, “Pɛ nɔ́ɔ fé lɛ́ ì lo à pɛ̃́ɛ̃̀ m mɔ̀ɔ, ḿm̀ lo à nɔɔ̀ i lɛ̀ɛ. É kɛ bɛ̃̀ɛ̃ m pà lɛ́ m à làa, à pɛ̀ɛ̀ zèí zɛ̀ káa, ḿm̀ nɔ.”

²⁴Yé e kɛ kília, nɛ́fúa e ɓɔ pɛlɛí, áà e lòóò wɛ̃́ĩ́-lɔ̀ɔ kɛ̀ weeá kélɛ̀, “Mɛ́ m̀ bɛ̀i à mɔ̀ ḿ pɛ̃́?” À lòóò áà gèè, “Zɔ̃̀ɔ̃́ mia bàtáì-kɛ-mì wũ-kèlè pɛ̃́.”

²⁵Nɛ́fúa e táá dɔ táá là tíè-tíèe, áà lò Hɛ́lɔ̀ píé e mɛ̀ĩ́, áà gèè à lɛ̀ɛ, “Ḿm̀ nàà í Zɔ̃̀ɔ̃́ mia bàtáì-kɛ-mì wũ-kèlè nɔ m lɛ̀ɛ kpɔ̀á wélà yí nɔ́ dɛɛ ká.”

²⁶À yéĩ̀zɛ̀ e kɛ Hɛ́lɔ̀ mɔ̀ nyɔ́ɔ̀ɔ. Kɛɛ lɛ̀ɛ́ gbaa naa é e wúú mɛ́ vɔ̀ɔ, ɓii aà e náá kpɔ́ là lɔ̀ɔ̀-mìà vɔ̀ wɛlɛ mɔ̀.

²⁷Yé e kɛ nɔ́ kília, Hɛ́lɔ̀ e sóyà vɔ̀ lɛ́ o kɛ o nyìɛ kɛpìà à mɔ̀ɔ, doó-mì vɔ, áà gèè à lɛ̀ɛ, “Lo í nu Zɔ̃̀ɔ̃́ wũ-kèlè ká.” Sóyà e kília, e ló bĩ́-kɛ̀ì, e Zɔ̃̀ɔ̃́ wũ-kèlè kã́ à là,

²⁸áà nù à ká wélà yí, áà sì, áà dɔ̀ kɛ̀ lee-nɛ̀fúa kɛ̀lɛ̀. Nɛ́fúa a sí, a dɔ̀ kɛ e lòóò kɛ̀lɛ̀.

²⁹Lɛ̀ Zɔ̃̀ɔ̃́ là tòà-píé-mìà o wɔ̃́ sùua maa, o nu, wa bílí sí, o lóá, wa bĩ̀ĩ̀.

³⁰Àpɔ́sɔ̀lɔ̀ vɔ̀ o ló o mɛ̀ĩ́ Zízɛ̀ píé, wáà wɔ̃́ séĩ́ lɛ́ wa kɛɛ, ɛ̃́ɛ̃́ pɛ séĩ́ lɛ́ wa zɔ̃̀ɔ̃̀ mia lɛ̀ɛ, wáà à gã̀ pɛ̀ɛ̀ à lɛ̀ɛ.

³¹Zízɛ̀ a gèe o lɛ̀ɛ, “Kà nu kɔ́á ló kɔa dòló ká lɛ̀ lɛ́ à dɔɔ̀ lɛ dĩĩa mɔ̀, kɛ ká ka fĩ́ĩ́ dɔ e ɓéĩ́ ká.” A gèe kíli, ɓii mia búnùzɛ̀ o kɛ nupìà, wáà lò, wáà nù, wáà lò. Lúó lɛ̀ɛ́ gbaa bɛ̃̀ɛ̃ kɛ ɓe kɛ Zízɛ̀ nì ó pɛ ɓèlè.

³²O yà gɔɔ yí, o ló gbaa o dòló ká lɛ̀ lɛ́ à dɔɔ̀ lɛ dĩĩa mɔ̀.

³³Kɛɛ mia búnùzɛ̀ o o gɛ̃̀, wáà lò, ɛ̃́ɛ̃́ o o dɔ. Lɛ̀ lɛ́ e kɛ kília, o gó pɛlɛí píé píé, wáà gbùsù bàlà ká o gã̀ là, kɛ ó ɓɔ lɛ̀ lɛ́ Zízɛ̀ nì o ló yia mɔ̀, kɛ ó tĩã́ ɓɔɔ̀ yi.

³⁴Lɛ̀ Zízɛ̀ e gó gɔ́ɔ́ɔ yí, e gbɛ̃̀ tã́ã̀a, e mia gbààlà gbùò zɛ̀ gɛ̃̀. Yé e kɛ kília, o yéĩ́ e à kɛ nyɔ́ɔ̀ɔ. Ƃii o kɛ kélɛ̀ ɓáá vɔ̀ lɛ́ o líé-sí-mì wá ɓea, lɛ́ ɓe. Zízɛ̀ e gbɛ̃̀ gbaa, áà pɛ búnùzɛ̀ zɔ̃̀ɔ̃̀ o lɛ̀ɛ.

³⁵Lɛ̀ nyɛ́nɛ́ e kɛ lópìàa, là tòà-píé-mìà o nu à píé, wáà gèè, “Lɛ̀ e kéa, lɛ lɛ̀ púlú gbùò ɓɔ̀ɔ ká. Ɛ́ɛ̃́ nyɛ́ŋɛ̀ĩpíé lɛ kɛpìà gbaa.

³⁶Ì míáa vɔ, ó ló nyɛ́nɛ̀ĩ̀ kɔ́ɛ́í, ɛ̃́ɛ̃́ pɛ́lɛ kélé kélé yé e ko ká kɔ̀ɛ́ɛ, yí píé, ó ló pɛ lɔ́ɔ̀ ó ɓèlè.”

³⁷Zízɛ̀ a là nìɛ̀ weeá kélɛ̀, “Ka dìè-tĩ́ kà pɛ nɔ o lɛ̀ɛ ó ɓèlè.” O Zízɛ̀ wɛ̃́ĩ́-lɔ̀ɔ kɛ weeá kélɛ̀, “Ƃáà nàà kó lúó wũ pèèlɛ yɛ̀ɓo pɛ̀lèe sí, kó ló belè lɔ́ɔ̀ à ká, kó nɔ o lɛ̀ɛ ó ɓèlè?”

³⁸Zízɛ̀ e o wɛ̃́ĩ́-lɔ̀ɔ kɛ, áà gèè, “Belè-kpo wɛ̀ɛɛ̀ lɛ́ e ka kɛ̀lɛ̀? Kà lo ká gɛ̃̀.” Lɛ̀ wa gɛ̃̀ɛ, wa gèe, “Lɛ sɔ́ɔ́li. Ɛ́ɛ̃́ kpã̀ã́ pèèlɛ lɛ à píé.”

³⁹Zízɛ̀ a gèe o séĩ́-séĩ́ o lɛ̀ɛ ó yà o kù ká sùu lɛ́ e kɛ ɓɔpìàa là.

⁴⁰Yé e kɛ kília, o yà tã́ã̀ o kù ká o ɓɛ̀lɛ̀ yí. Mia wũ doó o kɛ kù dò yí, ɛ̃́ɛ̃́ à dò bɛ̃̀ɛ̃ mia o kɛ à yí vũ̀ sɔ́ɔ́li.

⁴¹Yé e kɛ kíli gbaa, Zízɛ̀ e belè-kpo sɔ́ɔ́li wà kpã̀ã́ pèèlɛɛ sí, e lɛ̀ gɛ̃̀ lɛ̀í, áà Wálà zúo ɓò. E belè-kpoa kpú yɛ́ kélé kélé, a sí, a nɔ là tòà-píé-mìàa lɛ̀ɛ ó à nɔ míáa lɛ̀ɛ. E kpã̀ã́ pèèlɛɛ yí gìnì o séĩ́ o mɔ̀ nɔ́ kíli.

⁴²Mia séĩ́-séĩ́ wa ɓèlè, o zò e dà.

⁴³Lɛ̀ e kɛ kília, o belè wà kpã̀ã́a yé o kɔ̃́ à mɔ̀ɔ, wɔ́ɔ́ e ɓɛ̀lɛ̀-kolo-kɔ̃̀ɛ̃̀ pa píé, à kɔ̃̀ɛ̃̀ e kília e kɛ vũ̀ doó wɛ́lɛ́ pèèlɛ.

⁴⁴Mia lɛ́ o belè e kília ɓèlèa, o yé lɛ́ o kɛ gɔ̃à káa, o wáá e kɛ sɔ́ɔ́li.

⁴⁵Yé e kɛ nɔ́ kília, Zízɛ̀ a kɛ là tòà-píé-mìà o yà gɔɔ yí, ó ló líé yíía mɛ̀ĩ́ pɛ́lɛ lɛ́ ò si Bɛ̀sádàa yí, lɛ̀ e kɛ à gèepìà mia gbààlà gbùò zɛ̀ɛ lɛ̀ɛ ó ló o pàa ká.

⁴⁶Lɛ̀ e e wè dà gbaa o lɛ̀ɛ, e ló tɔ̃̀ũ̀ dò wĩĩ́ sɛ̀nɛ ɓopìà.

⁴⁷Lɛ̀ nyɛ́ŋɛ̀ĩpíé e kɛɛ, gɔ́ɔ́ɔ e kɛ yíía zèí, lɛ̀ Zízɛ̀ e tó zízàá e doó káa ká.

⁴⁸E là tòà-píé-mìàa gɛ̃̀, wáà lúó gágà gɛ̃̀ lɛ̀ o kɛ gɔ́ɔ́ɔ táápìàa ká. Ƃii fã̀ã̀ wũ e kɛ o píé zàá. Lɛ̀ tɔ̀ɔ̀ bèĩzɛ̀ e dɔ é wééa, Zízɛ̀ e kɛ táápìà yíía là, áà lò o píé. E kɛ lópìà é die o là.

⁴⁹Kɛɛ lɛ̀ wa gɛ̃̀ áà tàà yíía làa, wa gɛ̃̀ kélɛ̀ mi gɛ̀ɛ̀ lɛ́ ɓe. Yé e kɛ kília, o gbɛ́ɛ́ gágà.

⁵⁰Ƃii o séĩ́-séĩ́ wa gɛ̃̀, wáà tùò yí gbùò zɛ̀. Zízɛ̀ e wɔ̃́ gèe o lɛ̀ɛ nɔ́ zá le weeá kélɛ̀, “Kà ka zò yà ka gé. Ma Zízɛ̀ lɛ. Yékɛ̀ ká túó.”

⁵¹Yé e kɛ kília, e yà gbaa gɔ́ɔ́ɔ yí o píé, ɛ̃́ɛ̃́ fã̀ã̀a e tèá gbaa diè ká. O lé e pa nɔ́ gã́ le.

⁵²Òó gbaa wɔ̃́ lɛ́ Zízɛ̀ a kɛɛ belè-kpo káa, yí ma. O wũ-kèlè yí e kɛ yɔɔ.

⁵³Lɛ̀ o yíía kã́a, o ɓɔ sɛ́lɛ́ lɛ́ ò si Gɛ̀nɛ́sɛ̀lɛ̀ɛ yí. O wà gɔ́ɔ́ɔ yèlè yi.

⁵⁴Lɛ̀ Zízɛ̀ nì o gó nɔ́ gɔ́ɔ́ɔ yí, o gbɛ̃̀ tã́ã̀a, míáa o Zízɛ̀ dɔ nɔ́ zá le.

⁵⁵Yé e kɛ kília, o ló bàlà ká sɛ́lɛ́ɛ kɔ̀ pɔ̃́ũ̀ píé, wáà nù yáá-mìà ká líí yí Zízɛ̀ píé, lɛ̀ nɔ́ɔ fé wa ma kélɛ̀ lɛ yía mɔ̀.

⁵⁶Lɛ̀ nɔ́ɔ fé lɛ́ Zízɛ̀ e ló yi, kélɛ̀ pɛ́lɛ píé, pɛ́lɛ kélé kélé ɛ̃́ɛ̃́ nyɛ̀nɛ̀ĩ̀ kɔ́ɛ́í píéa, míáa o kɛ lópìà yáá-mìà ká lɔ́ɔ́ gbéĩ́, wáà kpé kã̀ Zízɛ̀ lɛ̀ɛ é à tó yáá-mìàa ó pá yee ɓo à mɔ̀-sɔ̀ léĩ́ mɔ̀. Mia lɛ́ o pá à mɔ̀ɔ, o séĩ́ o la.