Read Yamano Máà 7 Bible Online

Máà 7 - Yamano bible

Máà 7

¹Fálásíì-mìà wà Wálà kii-dɔ-mìà dò, lɛ́ o gó Zùlúsàlɛ̀ɛ, o pá o kíe mɔ̀ Zízɛ̀ sɔ́nɔ́.

²O Zízɛ̀ là tòà-píé-mìà dò gɛ̃̀, wáà pɛ ɓèlè o kɔ̀ mɛ́ lilì kṹã̀a zɛ̀ ká. À yí lɛ́ e tɔ́, òó gbaa o kɔ̀ pɛ́lɛ́ e pɛ́lɛ́-zì ká.

³Ƃii Fálásíì-mìà wà Zúù-mìà yé o tóa, óò wɔ̃́ kɛ̀ o mìà nì zì wɔ̃́ kɛ-kɔ̀ lɛ́ wa zɔ̃̀ɔ̃̀ mɔ́ o lɛ̀ɛ ká. Òó pɛ ɓèlè yé òó o kɔ̀ pɛ́lɛ́ nɛ́ e pɛ́lɛ́-zì káa ká.

⁴E bɛ̀i, yé waà gó lɔ́ɔ́ yía, òó pɛ́ o gó à ká yia, gbɛɛ ɓèlè nɛ́, yé òó mɛ́ pɛ́lɛ́ nɛ́ e mɛ́-pɛ́lɛ́-zì káa ká. Ɛ́ɛ̃́ zeĩ́, óò wɔ̃́ kɛ̀ o mìà nì zì wɔ̃́ kɛ-kɔ̀ búnùzɛ̀ gbɛɛ̀ gbɛɛ lɛ́ waà zɔ̃̀ɔ̃̀ do o lɛ̀ɛ ká. À dò gɛ̃̀ e ké. Óò yíí-mi-kɔ̀ɛ̀, ɛ̃́ɛ̃́ beì-gbɔɔ, wà pɛ-kúlú-kɔ̀ɛ̀ mɛ́ pɛ̀lɛ̀.

⁵À mɔ́ɔ̀ wɔ̃̀ mɔ̀ɔ, Fálásíì-mìà wà Wálà kii-dɔ-mìàa, o Zízɛ̀ wɛ̃́ĩ́-lɔ̀ɔ kɛ weeá kélɛ̀, “Mɛ́ e kɛ lɛ́ ɓà tòà-píé-mìàa òó wɔ̃́ kɛ kɔa mìà nì zì wɔ̃́ kɛ-kɔ̀, lɛ́ wa zɔ̃̀ɔ̃̀ mɔ́ kɔa lɛ̀ɛ ká, lɛ́ ò pɛ ɓèlè o kɔ̀ mɛ́ lilì kṹã̀a zɛ̀ ká ɓɛ?”

⁶Zízɛ̀ a gèe o lɛ̀ɛ, “Lɛ̀ Ààzáyà e kɛ dɔpìà Wálà lé làa, e wɔ̃́ gèe ɓɛ̀lɛɛ zɛ̀ e gbɛ̃̀ mia lɛ́ kà ka dìè wɛlɛ lia mɔ̀. Wɔ̃́ a bɛ̃̀ɛ̃, gɛ̃̀ e ké. ‘Míá o kéa, óò ma Wálà m tɔ́ ɓɔ o wéè ká. Kɛɛ o zò lɛ m ká gbèkèni kpó-kpó ɓo.

⁷Óò gbìnì m lɛ̀ɛ ɓɔ̀ɔ. Ƃii óò o dìè zì wɔ̃́-gèe-kɔ̀ si é kɛ Wálà zì pɛ-zɔ̃̀ɔ̃̀-kɔ̀ ká, wáà zɔ̃̀ɔ̃̀ mia lɛ̀ɛ.’

⁸“Káà go lɔ́ɔ̀ lɛ́ Wálà a kpɔ́ɔ lɛ̀ɛ, tó káà mia zì wɔ̃́ kɛ-kɔ̀ sì gbùò.”

⁹Zízɛ̀ a gèe zeĩ́ o lɛ̀ɛ, “Ɛ̀ɛ̀, zi lɛ́ kà Wálà là lɔ́ɔ̀ dà à ká ka kɔ̀ mɛ̀ĩ́, kɛɛ ká tó mia kɛ-kɔ̀ píéa, lɛ sɛ̀ nyɔ́ɔ̀ɔ.

¹⁰Ƃii Móózè a gèe, ‘Ì ɓɛ̀lɛyà nɔ i dàa wà i lèe o lɛ̀ɛ,’ ɛ̃́ɛ̃́ zeĩ́, ‘Mi lɛ́ è wɔ̃́ yɔɔ gèe e dàa wà e lèe o gbĩ mɔ̀ɔ, lɛ à mɔ̀ ó zɛ.’

¹¹Kɛɛ káà gèe mi lɛ́ɛ̀ bɛ̀i à mɔ̀ á gèe e dàa wà e lèe o lɛ̀ɛ weeá kélɛ̀, ‘Pɛ́ máá gbũũ̀á ka mɔ̀ɔ, lɛ kɔ́bã̀ ká.’ (Kɔ́bã̀ yí lɛ́ e kélɛ̀, à nɔɔ̀ lɛ Wálà lɛ̀ɛ.)

¹²Yé aà gèe kília, kàá tó gbaa é wɔ̃́ nɔ́ɔ fé kɛ e dàa wà e lèe o lɛ̀ɛ gbaa.

¹³Zí e kéa káa, káà wɔ̃́ lɛ́ Wálà a gèea, kɛ̀ à ká fɛ́í-fɛ̀ì mia kɛ-kɔ̀ lɛ́ kà zɔ̃̀ɔ̃̀ mia lɛ̀ɛ ká. Kɛɛ káà wɔ̃́ búnùzɛ̀ sùu e kéa kɛ̀.”

¹⁴Zízɛ̀ e mia kùa súo kɛ ó nu à píé zeĩ́, áà gèè o lɛ̀ɛ, “Ka séĩ́ kà ka tóó dɔ m mɔ̀, ká wɔ̃́ yí ma.

¹⁵Pɛ gbɛɛ wá ɓe, kɛ mi á ɓèlè, kɛ é bɛ̀i à mɔ̀ á mɛ́ lilì kṹ. Kɛɛ pɛ lɛ́ è go mi yía, lɛ́ è mi mɛ́ lilì kũa. [

¹⁶Mi nɔ́ɔ fé lɛ́ à tóó è wɔ̃́ maa, è e tóó dɔ.]”

¹⁷Lɛ̀ lɛ́ e gó mia kùa yí, lɛ́ e ló kɛ́ìa, là tòà-píé-mìà wa wɛ̃́ĩ́-lɔ̀ɔ kɛ pĩ̀ã̀ a vɔɔ wɛ̃́ĩ̀.

¹⁸Zízɛ̀ a gèe o lɛ̀ɛ, “Ɛ́ɛ̃́, ka bɛ̃̀ɛ̃, kàá wɔ̃́ yí ma nɛ́? Kàá yí dɔ kélɛ̀ pɛ nɔ́ɔ fé lɛ́ mi ɓà ɓèlèa, lɛ̀ɛ́ bɛ̀i à mɔ̀ é mi mɛ́ lilì kṹ?

¹⁹Ƃii pɛ lɛ́ è à ɓèlèa, lɛ̀ɛ́ ló à zò píé. Kɛɛ lɛ́ɛ̀ lo à gé, tó áà gò à mɔ̀, yé aà gó zi píéa ká.” (Wɔ̃́ e kília gèeà yía, Zízɛ̀ a gèe ɓèlè-pɛ̀ nɔ́ɔ fé lɛ sɛ̀ ó ɓèlè.)

²⁰A gèe zeĩ́, “Pɛ́ è go mi yía, lɛ́ è mi mɛ́ lilì kũa.

²¹Ƃii pɛ́ è go mi yía, lɛ́ɛ̀ go mi zò píé. Ƃii à zò láà kɛ̀, tó áà e yɛ́lɛ́ tàà yɔɔ. Ɛ́ɛ̃́ áà sɔ̃̀ɔ̃ yɔɔ kɛ̀, áà kã̀ã ɓò. E bɛ̀i, áà mi zɛ̀, áà wàà e ɓɛ́ĩ̀ gbɛɛ na ɛ̃́ɛ̃́ dɛ̃ píé kɛ́ì.

²²Tó pɛ séĩ́ zì lɔ̀-kɛ̀à-mɔ̀ áà kɛ̀ à yí. Ɛ́ɛ̃́ áà sɔ̃̀ɔ̃ yɔɔ doò do kɛ̀. E bɛ̀i, áà kpàlà-kpálá kɛ̀, áà nɛ́ĩ̀ wà mànaà zɛ̀, áà e zò tàà yɔɔ mi ká. Tó áà wàà-kílí kɛ̀. Ɛ́ɛ̃́ áà e dìè sì gbùò, áà yí-gíni-wɔ̃̀ kɛ̀.

²³Wɔ̃́ yɔɔ̀ yɔɔ̀ e kília, lɛ́ɛ̀ go mi zò píé, tó áà mi mɛ́ lilì kũ̀.”

²⁴Zízɛ̀ e wɛ̀lɛ̀ yi, e ló pɛ́lɛ lɛ́ ò si Táyàa gbààlà. E ló ká doó wìa, lɛ̀ɛ́ gbaa à naa kɛ mia ó yí dɔ kélɛ̀ lɛ yí. Kɛɛ à wɔ̃̀ lɛ̀ɛ́ gbaa kɛ bĩ̀ĩ̀-wɔ̃̀ ká.

²⁵Lee doó lɛ́ pɛ yɔɔ e kɛ à lú nyɔ̀nɔ́ píéa, yé e Zízɛ̀ nu làṹ maa, e nu à píé zá le, e gbini à gã̀ dṹɔ̃̀.

²⁶Léé e kília, e Gílíì-wè gèe. Lɛ̀ lɛ́ wa ye yía, óò si Fìnísìà Sílìà-sɛ̀lɛ̀ yí. E kpé kã́ Zízɛ̀ lɛ̀ɛ kɛ é pɛ yɔɔ ɓo à lú píé.

²⁷Kɛɛ Zízɛ̀ e à là nìɛ̀ weeá kélɛ̀, “Dɔ nɛ́, kó léɓèlè nɔ nɔ́ɔ̀ɓéa lɛ̀ɛ nɛ́. Ƃii ye wá sɛ̀ kɛ ó nɔ́ɔ̀ɓé wà léɓèlè sí, kɛ ó yà gbã́ lɛ̀ɛ.”

²⁸Kɛɛ lééa bɛ̃̀ɛ̃ a yí zṹ weeá, “Lɛ kíli, m dàa-mì. Kɛɛ é kɛ bɛ̃̀ɛ̃ gbã́ lɛ́ e téɓò wìa káa, lɛ́ɛ̀ nɔ́ɔ̀ɓé wà ɓu yé è kàà tã́ã̀ à ɓèlèpìàa ɓèlè.”

²⁹Yé e kɛ kília, Zízɛ̀ a gèe à lɛ̀ɛ, “À kɛ̀ í wɔ̃́ sùua yí ɓo kília, ɓà ló ɓo. Kɛɛ pɛ yɔɔ lɛ́ e kɛ i lú píéa, aà gó à píé.”

³⁰Lééa e ló gbaa e píé kɛ́ì. E e lú gɛ̃̀ wɔ̀ɔ̀á kpĩ̀ĩ̀ là. Kɛɛ pɛ yɔɔ e kɛ à píéa, aà ɓo à píé.

³¹Zízɛ̀ e gó gbaa Táyà gbààlà, áà dìè Sádã̀-pɛ́lɛ zèí, áà lò Gálàlíì Yíí-pṹã́ sɔ́nɔ́. Lɛ̀ e kɛ lópìàa, e die sɛ́lɛ́ lɛ́ o kɛ à sípìà Pɛ́lɛ Vũ̀ Doóa zèí.

³²Mia o nu gɔ̃ doó lɛ́ à tóó taà e kɛ à ká, ɛ̃́ɛ̃́ e kɛ ɓoó ɓoó káa, ká Zízɛ̀ píé. O kpé kã́ à lɛ̀ɛ é e kɔ̀ kpɔ́ gɔ̃́ɛɛ là.

³³Zízɛ̀ e gɔ̃́ e kília kṹ, e lóá kɔ̀ pɔ̃́ũ̀ doó mɔ̀ é gó mia kù yí. E e kɔ̀-wɛ́nɛ́ wàà gɔ̃́ɛɛ tóó yí. E bɛ̀i, e e leí suo, ɛ̃́ɛ̃́ e pá gɔ̃̀ɛɛ nanà mɔ̀.

³⁴Zízɛ̀ e lɛ̀ gɛ̃̀ gbaa lɛ̀í. E e wúú káá, áà gèè gɔ̃́ɛɛ lɛ̀ɛ, “Ɛ̀fátà.” Ɛ̀fátà yí lɛ́ e kélɛ̀, “I tóó lé è ɓo.”

³⁵Gɔ̃́ɛɛ tóó lé e ɓo gbaa, ɛ̃́ɛ̃́ ɓɛ̀lɛ̀ e kã́ gbaa à nanà mɔ̀, áà wèè gbaa kpeĩ le.

³⁶Zízɛ̀ a gèe o lɛ̀ɛ kpànazɛ̀ yékɛ̀ ó gèe mi dò fé lɛ̀ɛ. Kɛɛ á gèe bɛ̃̀ɛ̃ o lɛ̀ɛ kília, ye lɛ́ yee o kɛ à gèepìàa.

³⁷Mia lɛ́ o wɔ̃́ e kília maa, o lé e pa kpó-kpó ɓo nyɔ́ɔ̀ɔ, wáà gèè, “Lɛ́ɛ̀ wɔ̃́ séĩ́ kɛ̀ ɓɛ̀lɛɛ zɛ̀. Ƃii láà kɛ̀ mia lɛ́ o tóó taà lɛɛ, wáà wɔ̃́ mà, ɛ̃́ɛ̃́ mia lɛ́ òó wééa, o kɛ̀ wáà wèè.”