Read Yamano Máà 9 Bible Online

Máà 9 - Yamano bible

Máà 9

¹Zízɛ̀ a gèe o lɛ̀ɛ, “Wánà-wɔ̃̀ lɛ́ m̀ gèe ka lɛ̀ɛ ɓɛ. Mia gbú o dɔ̀á lɛ̀ɛ mɔ̀ɔ, òó ló gaà é tóá kíli ó Wálà gɛ̃̀, áà nù kɛ é tó mia là e zì yíkɛ̀ gáàa ká.”

²Yé lúó sáláádo e diea, Zízɛ̀ e Pílɛ̀ ɛ̃́ɛ̃́ Zĩ́ĩ̀ wà Zɔ̃̀ɔ̃́ o líé sí, e ló o ká tɔ̃̀ũ̀ gbèkèni dò wĩĩ́ o dòló ká. Lɛ̀ wa gɛ̃̀ɛ, kɛɛ Zízɛ̀ mɛ́ aà vɔ̀ɔ.

³À mɔ̀-sɔ̀ e kɛ ɓípìà kpó-kpó ɓo zãã le, ɛ̃́ɛ̃́ e kɛ félépìà pɛ́kú-pɛ́kú le. Sɔ-pɛ́lɛ́-mì gbɛɛ wá kpóṹ là zèe, kɛɛ é à pɛ́lɛ́ é ɓɔ kíli.

⁴O Ìláyà wà Móózè o gɛ̃̀, wà Zízɛ̀ nì wáà wèè.

⁵Pílɛ̀ a gèe Zízɛ̀ lɛ̀ɛ, “Tísɛ̀, e kɛ sɛ̀ lɛ́ ko lɛ̀ɛ mɔ̀ɔ. Tó kó gbàa yààka dɔ, kɛɛ i zì é kɛ ɓe, ɛ̃́ɛ̃́ Móózè zì é kɛ ɓe, e bɛ̀i, Ìláyà zì é kɛ ɓe.”

⁶Pílɛ̀ a gèe kíli, ɓii wɔ̃́ e kɛ à mɔ̀ á gèea, lɛ̀ɛ́ gbaa dɔ. Ƃii túó e kɛ o kɛpìà yɔɔ.

⁷Lúé-lúé e yà yi. À gbùlù e dɔ gbaa o là. O wéé dò ma, áà gò lúé-lúéa yí weeá kélɛ̀, “M zì lɔ̀-kɛ̀á-nɛ̀ lɛ́ e yía. Kà ka tóó dɔ à mɔ̀.”

⁸Lɛ̀ o lɛ̀ gɛ̃̀ gbaa o sɔ́nɔ́ píé zá lea, òó gbaa mi dò fé gɛ̃̀ yi gbaa, é kã́ Zízɛ̀ mɔ̀ɔ ká. Zízɛ̀ lɛ́ nɔ́ e kɛ gbaa o píé yia.

⁹Lɛ̀ o kɛ gópìà tɔ̃̀ũ̀a wĩĩ́a, Zízɛ̀ a gèe o lɛ̀ɛ kpànazɛ̀ yékɛ̀ ó wɔ̃́ lɛ́ wa gɛ̃̀ɛ, gèe mi gbɛɛ lɛ̀ɛ, é tó à ká kíli Mi Gbe é wɛ̀lɛ̀ ga kɛ̀lɛ̀.

¹⁰O wɔ̃́ e kília kpɔ́ o gé. Tó wáà wɔ̃́ gèè o kíe nì lɛ̀ɛ kélɛ̀ mi wɛ̀lɛ̀-ga-kɛ̀lɛ̀ wɔ̃̀ yí lɛ́ mɛɛ ká?

¹¹O Zízɛ̀ wɛ̃́ĩ́-lɔ̀ɔ kɛ, wáà gèè, “Mɛ́ e kɛ lɛ́ Wálà kii-dɔ-mìàa ò gèe lɛ Ìláyà mɔ̀ é nu líé ɓɛ?”

¹²Zízɛ̀ a gèe o lɛ̀ɛ, “Ìláyà lɛ́ɛ̀ nu líé kɛ é pɛ séĩ́ pɛ̀ kɛ wánà ká. Kɛɛ à kɛɛ̀ lɛ kpɛ lɛ́ à bɛ̃̀ɛ̃ɛ̃̀ lɛ à ká Wálà-kii yí kélɛ̀ Mi Gbe lɛ́ɛ̀ lo wɔ̃́ nyɔ́ɔ̀ɔ búnùzɛ̀ gɛ̃̀ɛ̃̀, ɛ̃́ɛ̃́ óò lo à síì fĩ́ĩ́-nyɛ zɛ̀ ɓɛ?

¹³Kɛɛ ḿm̀ gèe ka lɛ̀ɛ kélɛ̀ Ìláyà nuù lɛ. Ɛ́ɛ̃́ wɔ̃́ lɛ́ wa naa ó kɛ à káa, wa kɛ à ká, zí nɔ́ à bɛ̃̀ɛ̃ɛ̃̀ laa ká Wálà-kii yía ká.”

¹⁴Lɛ̀ o ɓɔ Zízɛ̀ là tòà-píé-mìà yé o gó tóòa mɔ̀ɔ, o mia kù gbùò zɛ̀ gɛ̃̀ o mɛ̀ĩ́ píé. Wálà kii-dɔ-mìà dò o kɛ yí, wáà tèé dà Zízɛ̀ là tòà-píé-mìàa ká.

¹⁵Lɛ̀ míáa séĩ́ o Zízɛ̀ gɛ̃̀ nɔ́ɔ, o lé kpó-kpó e pa, wáà lò gbaa à píé bàlà ká, wáà wèè à bà.

¹⁶Zízɛ̀ a gèe là tòà-píé-mìàa lɛ̀ɛ, “Mɛ́ kà míáa kà mɔ́ɔ̀ tèé dà ɓɛ?”

¹⁷Mi doó lɛ́ e kɛ míáa bàa, e à là nìɛ̀ weeá kélɛ̀, “Tísɛ̀, m nu m gbe ká i píé. Pɛ yɔɔ lɛ à píé, láà kɛ̀ tó lɛ̀ɛ́ wéé.

¹⁸Lɛ̀ nɔ́ɔ fé lɛ́ pɛ́ e kília è nu à là yia, lɛ́ɛ̀ à mɛ̀ tã́ã̀. Tó à lélií fílí áà dɔ̀. Ɛ́ɛ̃́ áà e nɔ̃́ɔ̃́ là ɓèlè. Tó à dɔ-pɛ séĩ́ áà dɔ̀ à mɔ̀ kpã-kpã le. M à gèe ɓà tòà-píé-mìàa lɛ̀ɛ ó à ɓo à píé m lɛ̀ɛ. Kɛɛ òó bɛ̀i à mɔ̀ kɛ ó kɛ kíli.”

¹⁹Zízɛ̀ a gèe o lɛ̀ɛ, “Míá ka ɓe yà kɔa ɓoa yí e ké ɓɛ, zò-dɔ̀à-mɔ̀ gbɛɛ wá ka yí. Káà nàà ḿ kɛ ka píé lúó wɛ̀ɛɛ̀ píé? Lúó wɛ̀ɛɛ̀ píé lɛ́ kà nàà ḿ ka kɛ-wɔ̃̀ káá ká m píé? Nu nɛ́fúa ká m píé.”

²⁰O nu gbaa nɛ́fúa ká à píé. Yé pɛ yɔɔ e kɛ nɛ́fúa píéa e Zízɛ̀ gɛ̃̀ nɔ́ɔ, e nɛ́fúa ɓo. Nɛ́fúa e pèlè tã́ã̀, áà lò e fɛ̃̀ɛ̃-fɛ̃̀ɛ̃á sí, tó à lélií fílí áà dɔ̀.

²¹Zízɛ̀ e wɛ̃́ĩ́-lɔ̀ɔ kɛ nɛ́fúa dàa kɛ̀lɛ̀ weeá kélɛ̀, “Pɛ́ɛ e gbini nɛ́fúa mɔ̀ lúó kpɛɛ̀ ká?” Gɔ̃́ɛɛ áà gèè, “E gbini à mɔ̀ à nyɔ̀nɔ́-lɛ̀ zɛ̀ ká.

²²Pɛ́ɛ lɛ́ɛ̀ à dà tíé yí, ɛ̃́ɛ̃́ áà dùò yíí bà teele à zɛ-zì píé. É kɛ̀á íì bɛ̀i wɔ̃́ nɔ́ɔ fé dò kɛɛ̀ɛ, ko yéĩ́ è i kɛ í gbũ ko mɔ̀.”

²³Zízɛ̀ a gèe à lɛ̀ɛ, “É kɛ̀á íì bɛ̀i à mɔ̀ɔèè! Yé zò-dɔ̀à-mɔ̀ aà kɛ mi yía, bɛ̀i laa mɔ̀ wɔ̃́ nɔ́ɔ fé é kɛ à lɛ̀ɛ.”

²⁴Yé e kɛ nɔ́ kília, nɛ́fúa dàa e gbɛ́ɛ́ gbóó-ɓo-wè yí, áà gèè, “Zò-dɔ̀à-mɔ̀ lɛ m yí. Lɛ̀ lɛ́ zò-dɔ̀à-mɔ̀ wá m yí yia, ì gbũ m mɔ̀ à lɛ̀ mɔ̀.”

²⁵Zízɛ̀ e mia gbààlà gbùò zɛ̀ gɛ̃̀ gbaa, wáà nù à mɔ̀. Yé e kɛ kília, e mɛ́ĩ́ ɓo pɛ yɔɔ lɛ̀ɛ weeá kélɛ̀, “Pɛ yɔɔ lɛ́ i tóó taà lɛ, ɛ̃́ɛ̃́ i lé lɛ̀ɛ́ wééa, ḿm̀ gèe i lɛ̀ɛ, gó nɛ́fúa píé, ɛ̃́ɛ̃́ yékɛ̀ í kɛ à píé gbaa.”

²⁶Pɛ yɔɔ e kília, e gbɛ́ɛ́, ɛ̃́ɛ̃́ e nɛ́fúa ɓo yɔɔ, áà gò à píé. Nɛ́fúa e kɛ lɛ̀ pɛ lɛ́ à gaà lɛ. À mɔ́ɔ̀ wɔ̃̀ mɔ̀ɔ, mia búnùzɛ̀ o kɛ à gèepìà kélɛ̀ nɛ́fúa gaà lɛ.

²⁷Kɛɛ Zízɛ̀ e e kɔ̀ dà nɛ́fúa zì, a sí lɛ̀í. Ɛ́ɛ̃́ nɛ́fúa e wɛ̀lɛ̀ gbaa.

²⁸Lɛ̀ Zízɛ̀ e ló gbaa kɛ́ìa, là tòà-píé-mìàa wa wɛ̃́ĩ́-lɔ̀ɔ kɛ o doó lɛ̀ píà weeá kélɛ̀, “Mɛ́ e kɛ lɛ́ bɛ̀i lɛ̀ɛ́ gbaa kɛ ko mɔ̀ kɛ kó pɛ yɔɔ ɓo nɛ́fúa píé?”

²⁹Zízɛ̀ a gèe o lɛ̀ɛ, “Pɛ yɔɔ sùu e kéa, pɛ gbɛɛ lɛ̀ɛ́ bɛ̀i à ɓoò mi píé. Kɛɛ sɛ̀nɛ ɓoò lɛ́ nɔ́ à ɓo mi píéa.”

³⁰O gó gbaa lɛ̀ e kília mɔ̀, wáà dìè Gálàlíì. Zízɛ̀ a naa yékɛ̀ mi gbɛɛ á yí dɔ.

³¹Ƃii e kɛ pɛ zɔ̃̀ɔ̃̀pìà là tòà-píé-mìàa lɛ̀ɛ, áà gèè, “Óò lo Mi Gbe nɔɔ̀ gɔ̃à lɛ́ ò lo à zɛɛ̀ɛ lɛ̀ɛ. Yé waà à zɛ, lɛ́ lúó yààka aà diea, lɛ́ɛ̀ lo wɛ̀lɛ̀ ga kɛ̀lɛ̀.”

³²Kɛɛ wɔ̃́ lɛ́ Zízɛ̀ a gèe kília, òó gbaa à yí ma. Ɛ́ɛ̃́ o kɛ túópìà ó à wɛ̃́ĩ́-lɔ̀ɔ kɛ é wɔ̃́ lɛ́ a gèea yí ɓo.

³³O ɓɔ gbaa Kàpɛ́nìɛ̀-pɛlɛí. Lɛ̀ Zízɛ̀ e kɛ kɛ́ìa, e là tòà-píé-mìàa wɛ̃́ĩ́-lɔ̀ɔ kɛ, áà gèè, “Lɛ̀ ko kɛ nupìàa, mɛɛ wɔ̃̀ lɛ́ ka kɛ à gèepìà ɓɛ?”

³⁴Kɛɛ o dò lɛ̀ɛ́ gbaa wéé. Ƃii wɔ̃́ o kɛ à gèepìà o kíe nì lɛ̀ɛ lɛ̀ o kɛ nupìàa káa, à gbɛ̃̀ɛ̃̀ e kɛá mi lɛ́ lɛ kpànazɛ̀, ɛ̃́ɛ̃́ à diè lɛ o séĩ́ o làa mɔ̀.

³⁵Zízɛ̀ e yà tã́ã̀, e là tòà-píé-mìà vũ̀ doó wɛ́lɛ́ pèèlɛɛ o súo kɛ, áà gèè o lɛ̀ɛ, “Mi lɛ́ à nàà é e ɓɛ́ĩ̀ líé sía, lɛ à mɔ̀ é e dìè gbɛ̃̀ e ɓɛ́ĩ̀ mɛ̀ĩ́, ɛ̃́ɛ̃́ é kɛ mia séĩ́-séĩ́ wà yɛɓo-kɛ-mì ká.”

³⁶Zízɛ̀ e nɛ́fú dò kṹ, a gbɛ̃̀ o wɛlɛ mɔ̀. Ɛ́ɛ̃́ Zízɛ̀ e e kɔ̀ sɔ̃́ à mɔ̀, áà gèè o lɛ̀ɛ,

³⁷“Mi lɛ́ è lo e kɔ̀ yàà nɛ́fú nyɔ̀nɔ́ sùu e kéa dò wì m tɔ́ yía, kɛɛ aà e kɔ̀ yà m wì. Ɛ́ɛ̃́ mí è lo e kɔ̀ yàà m wìa, kɛɛ ye wá m doó m ká kɛ é e kɔ̀ yà m wì. Mí e m vɔɔ lɛ́ è e kɔ̀ yà à wìa.”

³⁸Zɔ̃̀ɔ̃́ a gèe à lɛ̀ɛ, “Tísɛ̀, ko gɔ̃ doó gɛ̃̀, áà pɛ yɔɔ ɓò mia píé i tɔ́ yí. Kɔa gèe à lɛ̀ɛ é tèá à kɛɛ̀ ká, ɓii ye wá ko dò káa mɔ́ɔ̀ wɔ̃̀ mɔ̀.”

³⁹Kɛɛ Zízɛ̀ a gèe, “Yékɛ̀ ká tèá. Ƃii mí è wɔ̃́ kpàlézɛ̀ kɛ̀ m tɔ́ yí nɔ́ kéa, lɛ̀ɛ́ ló bɛ̀iì wɔ̃́ yɔɔ gbɛɛ gèeè m gbĩ mɔ̀ zá le.

⁴⁰Ƃii mí lɛ̀ɛ́ gèlè gɔ̃ ko káa, lɛ ko doó-mì ká.

⁴¹Wánà-wɔ̃̀ lɛ́ m̀ gèe ka lɛ̀ɛ ɓɛ. Mi lɛ́ è lo yíí nɔɔ̀ ka lɛ̀ɛ ká mi, ɓii ka Kɛ́lɛ̀ì là mia káa wɛ̃́ĩ̀a, lɛ́ɛ̀ lo e fɔ́nɔ́ gɛ̃̀ɛ̃̀ tékélé-tèkèlè.

⁴²“Mí è lo à kɛɛ̀ nɔ́ɔ̀ɓé o ké lɛ́ o zò dɔɔ̀ lɛ m mɔ̀ɔ, o dò é gó m píéa, áá kɛɛ̀ sɛ̀ à mɔ̀ kɛɛ ó gɛ̀lɛ̀-wéĩ́ gbùò yèlè à kpɛɛ mɔ̀, ó à dùò à ká mɛ̀ĩ́ bà.

⁴³I kɔ̀ é kɛ̀á kɛpìà í gó Wálà píéa, i kɔ̀ e kília à kã́ é gó yi. Ƃii lɛ sɛ̀ i kɔ̀ é kɛ doó, í ló lɛ̀ lɛ́ kɛ̀ɓe lɛ yía mɔ̀, é dieá i kɔ̀ pèèlɛ kɛ̀ yi là, tó ɓáà lò à ká lɛ̀ lɛ́ tíé lɛ yí, lɛ́ lɛ̀ɛ́ bɛ̀i númíàa mɔ̀. [

⁴⁴Lɛ̀ e kília mɔ̀ɔ, wɛ́nɛ́ lɛ́ e o ɓèlèpìàa, ga-pɛ̀ wáá ká. Ɛ́ɛ̃́ tíéa lɛ̀ɛ́ ló númíì tòá kíli ká.]

⁴⁵I gã̀ é kɛ̀á kɛpìà í gó Wálà píéa, i gã̀ e kília, à kã́ é gó yi. Ƃii lɛ sɛ̀ i gã̀ é kɛ doó, í ló lɛ̀ lɛ́ kɛ̀ɓe lɛ yía mɔ̀, é dieá i gã̀ pèèlɛ kɛ̀ yi, tó wáà i dùòá tíé-pàa là. [

⁴⁶Lɛ̀ e kília mɔ̀ɔ, wɛ́nɛ́ lɛ́ e o ɓèlèpìàa, ga-pɛ̀ wáá ká. Ɛ́ɛ̃́ tíéa lɛ̀ɛ́ ló númíì tòá kíli ká.]

⁴⁷I nyìɛ é kɛ̀á kɛpìà í gó Wálà píéa, i nyìɛ e kília, à ɓo e kèlè yí. Ƃii lɛ sɛ̀ i nyìɛ é kɛ doó, í ló lɛ̀ lɛ́ Wálà tóò lɛ mia là yia mɔ̀, é dieá i nyìɛ pèèlɛ kɛ̀ yi, tó wáà i dùòá tíé-pàa là.

⁴⁸Lɛ̀ e kília mɔ̀ɔ, wɛ́nɛ́ lɛ́ e o ɓèlèpìàa, ga-pɛ̀ wáá ká. Ɛ́ɛ̃́ tíéa lɛ̀ɛ́ ló númíì tòá kíli ká.

⁴⁹“Tíéa lɛ́ɛ̀ lo káà mia séĩ́ là, lɛ̀ zí ò wèĩ kàá léɓèlè bàa, lɛ́ ɓe.

⁵⁰Wèĩ lɛ sɛ̀. Kɛɛ yé wèĩ aà là kɛ̀-nɛ́ĩ́-nɛ̀ĩ̀ kɔ̀ gínia, zi sùu kpɛɛ̀ lɛ́ ì lo à kɛɛ̀á nɛ́ĩ́-nɛ̀ĩ̀ zeĩ́? Wèĩ è kɛ ka dìè ka yí. Ɛ́ɛ̃́ zò-yà-gé è kɛ ka fĩ̀ã̀.”