Read Yamano Lúù 13 Bible Online

Lúù 13 - Yamano bible

Lúù 13

¹Lúó e kília káa, mia dò o kɛ yí. Míá o kília, o Gálàlíì‐mìà lɛ́ o kɛ sálà ɓopìà Wálà lɛ̀ɛ, o o wɔ̃̀ gèe Zízɛ̀ lɛ̀ɛ. Lɛ̀ o kɛ sálà ɓopìàa, Pálɛ̀ e o zɛ.

²Zízɛ̀ a gèe o lɛ̀ɛ, “Lɛ̀ lɛ́ Gálàlíì‐mìà o kília o zɛɛ̀ e kɛá zi sùu e kília káa, lɛ ka gé kélɛ̀ o kɛ‐wɔ̃̀ lɛ yɔɔ, é dieá Gálàlíì‐mìà yé o tóa séĩ́ là?

³Ye wá kíli. Ḿm̀ à gèe ka lɛ̀ɛ, yé kàá ka sɔ̃̀ɔ̃ yɔɔ mɛ́ vɔ̀ɔ, ka séĩ́ káà lo gaà zi nɔ́ doóa ká.

⁴Ɛ́ɛ̃́ zeĩ́, mia vũ̀ doó wɛ́lɛ́ sálàka, lɛ́ o ga lɛ̀ lɛ́ ká gbèkèni e wí o là Sàlóũ̀‐sɛ̀lɛ̀ yía, kó ma o bɛ̃̀ɛ̃ o píé? Káà gɛ̃̀ kélɛ̀ o zì kɛ‐wɔ̃̀ yɔɔ lɛ́ e kɛ o wĩĩ́a, à diè e kɛá mia séĩ́ lɛ́ o Zùlúsàlɛ̀ɛ o zì là?

⁵Ye wá kíli. Ḿm̀ à gèe ka lɛ̀ɛ, yé kàá ka sɔ̃̀ɔ̃ yɔɔ mɛ́ vɔ̀ɔ, ka séĩ́ káà lo gaà zi nɔ́ doóa ká.”

⁶Lɛ̀ e kɛ kília, Zízɛ̀ e pĩ̀ã̀ e kéa vɔ o lɛ̀ɛ. “Féè‐yìlì e kɛ gɔ̃ doó kɛ̀lɛ̀. À taà e kɛá ɓɛ̀lɛ̀‐wɛ́lɛ́ lɛ́ ò à ɓɛɛ yíí mia kɔ́ɛ́í. E ló, áà lò féè ɓɛɛ nàá sí à wĩĩ́. Kɛɛ lɛ̀ɛ́ gbaa à gbɛɛ gɛ̃̀.

⁷Lɛ̀ e kɛ kília, a gèe mi lɛ́ è e nyìɛ kɛ̀ pɔɔ̀ nyɛ́nɛ̀ĩ̀ e kília mɔ̀ɔ lɛ̀ɛ, ‘Lɛ̀ gɛ̃̀. Aà kɛ kɛ̀ɛ̀ yààka ká, máà nù nɔ̀ɔɔ̀, tó máà féè nàà féè‐yìlì e kéa wĩĩ́. Kɛɛ m̀ḿ à dò gɛ̃̀ do. Ì à kã́. Mɛ́ a mɔ́ɔ̀ dɔ ɓo nɔ̀ɔɔ̀, tó áà sɛ́lɛ́ɛ lɛ̀ yiè pìà ɓèlè ɓe?’

⁸Kɛɛ gɔ̃́ɛɛ a gèe kélɛ̀, ‘M dàa‐mì, ì gó à lɛ̀ɛ é kɛ̀ɛ̀ doóa ɓo. Ḿm̀ lo à píé fòoò, tó m yílí‐fàa‐nyìɛ̀ káá à píé.

⁹Yé aà kɛ kíli, lɛ́ yílí e kília aà ɓa féè ká kɛ̀ɛ̀ è nua yía, kɛɛ lɛ nɔ́ sɛ̀. Kɛɛ yé lɛ̀ɛ́ ɓaa, íì bɛ̀i gbaa à gèeè ó kã́.’ ”

¹⁰Fĩ́ĩ́‐dɔ‐lùò doó káa, Zízɛ̀ e kɛ pɛ zɔ̃̀ɔ̃̀pìà Zúù‐mìà zì Wálà‐kà doó‐mì wì.

¹¹Lee lɛ́ pɛ yɔɔ e kɛ à píéa e kɛ yí. Pɛ yɔɔ e kília aà lééa kɛ yáá ká kɛ̀ɛ̀ vũ̀ doó wɛ́lɛ́ sálàka píé. À kɔ̃̀nɔɔ̀ɔ e kɛá teele. Bɛ̀i lɛ̀ɛ́ gbaa kɛ à mɔ̀ kɛ é dɔ púlù‐púlù.

¹²Lɛ̀ Zízɛ̀ e à gɛ̃̀ɛ, a súo kɛ, áà gèè à lɛ̀ɛ, “Lee, i laà lɛ gbaa i mɔ̀‐yàà bà.”

¹³E e kɔ̀ kpɔ́ à là. Lɛ̀ e kɛ nɔ́ kília, lééa e dɔ gbaa e gã̀ mɔ̀ púlù‐púlù le, áà Wálà tɔ́ ɓɔ̀.

¹⁴Kɛɛ wɔ̃́ e Wálà‐kà e kília wũ‐là‐mì wàa, ɓii Zízɛ̀ aà mi la fĩ́ĩ́‐dɔ‐lùò káa mɔ́ɔ̀ wɔ̃̀ mɔ̀. Lɛ̀ e kɛ kília, gɔ̃́ɔ a gèe míáa lɛ̀ɛ, “Lúó sáláádo lɛ́ lɛ ko mɔ̀ kó yɛɓo kɛ à káa. À mɔ́ɔ̀ wɔ̃̀ mɔ̀ɔ, mí ɓà nàà í laa, ì nu lúó e kília ká, kɛɛ yékɛ̀ í nu fĩ́ĩ́‐dɔ‐lùò ká.”

¹⁵Lɛ̀ e kɛ kília, ko Dàa‐mì e à yí zṹ weeá kélɛ̀, “Mia lɛ́ kà ka dìè wɛlɛ li e ké ɓɛ. Ḿ gɔ̃̀, ka séĩ́ káà kà dìì wà kà sòo o ɓo ɓɛ̀lɛ̀ là, tó káà o ɓò o yììpìà, káà lò o ká, kɛ ó yíí mi fĩ́ĩ́‐dɔ‐lùò ká?

¹⁶Kà lɛ̀ gɛ̃̀. Léé e ké, lɛ́ lɛ Éɓɔ́lɔ́hã́ã̀ sùu‐là‐mì káa, Sétɔ̃̀ aà à yèlè ɓɛ̀lɛ̀ ká kɛ̀ɛ̀ vũ̀ doó wɛ́lɛ́ sálàka píé. Ye wá à mɔ̀ kɛ ó à yee ɓo ɓɛ̀lɛ̀ yí fĩ́ĩ́‐dɔ‐lùò ká?”

¹⁷Lɛ̀ e wɔ̃́ e kéa gèea, yɛ́lɛ̀ e kpɔ́ à dàa‐gbe vɔ̀ séĩ́ là. Kɛɛ mia séĩ́ o gé e li wɔ̃́ kpàlézɛ̀ séĩ́ lɛ́ e kɛ à kɛpìàa mɔ́ɔ̀ wɔ̃̀ mɔ̀.

¹⁸Zízɛ̀ e wɛ̃́ĩ́‐lɔ̀ɔ e kéa kɛ. A gèe, “Kéa, mɛ́ e Wálà zì tò‐mia‐là ɓɔ̀‐à‐bà ká? Mɛ́ m̀ bɛ̀i à gɔ̃́ɔ̃̀ à mɔ̀?

¹⁹Lɛ kélɛ̀ pɛ wɛ́lɛ́ lɛ́ è kɛ̀ lɛ̀ màà‐yè‐ŋèlè wɛ́lɛ́ɛ lɛ́ ɓe. Gɔ̃ doó e à sí, a taa e zì pɔɔ̀ taapìà. E fàa, e kɛ yílí ká. Mɔ̀ɔ̀ vɔ̀ bɛ̃̀ɛ̃ o o kéĩ́ dɔ à kɔ̀ yí.”

²⁰Zízɛ̀ e wɛ̃́ĩ́‐lɔ̀ɔ kɛ zeĩ́ weeá kélɛ̀, “Mɛ́ m̀ bɛ̀i à mɔ̀ ḿ Wálà zì tò‐mia‐là gɔ̃́ à mɔ̀?

²¹Lɛ kélɛ̀ belè‐fɔ̀ɔ‐pɛ̀ lɛ́ lee à si, tó áà kàà fáláɓà lɛ́ ò belè kɛ̀áa, bɔ́kì paàa yààka bà, é tóá kíli belè‐kpùlù e kília séĩ́ é fɔ̀ɔ lɛ́ ɓe.”

²²Zízɛ̀ e die pɛ́lɛ wà kpã̀ãã̀ kɔ́ɛ́í píé, áà lò pɛ zɔ̃̀ɔ̃̀á sí mia lɛ̀ɛ lɛ̀ e kɛ lópìà Zùlúsàlɛ̀ɛ ká.

²³Mi dò e à wɛ̃́ĩ́‐lɔ̀ɔ kɛ kélɛ̀, “M dàa‐mì, mia ɓéĩ́ ɓɔ̀ɔ lɛ́ nɔ́ ò lo la‐ɓo sɔ̀lɔ̀ ɓoòa?” Kɛɛ Zízɛ̀ a gèe o lɛ̀ɛ,

²⁴“Kà à kɛ‐zì kpó‐kpó naa ká kpɔ́ ká lé sɔ́ɔ́‐sɔ̀ɔ̀ zɛ̀ɛ ká, ká wàà kɛ́ì. Ƃii ḿm̀ gèe ka lɛ̀ɛ, mia búnùzɛ̀ óò lo à naà ó wàà kɛ́ì, kɛɛ bɛ̀i lɛ̀ɛ́ ló kɛɛ̀ o mɔ̀.

²⁵Ká e kília dàa‐mì lɛ́ɛ̀ lo wɛ̀lɛ̀, tó e ká e kília lé taa. Káà lo tóò dɔ̀á gbaa pɛ́lɛ̀ zèí, káà gbɛ̃̀ káa lé mɛ̀ɛɛ̀ mɔ̀, káà gèè, ‘Ko dàa‐mì, káa lé ɓo ko lɛ̀ɛ.’ Yé aà kɛ kília, lɛ́ɛ̀ lo à gèeè ka lɛ̀ɛ, ‘Lɛ̀ lɛ́ kà go yía, m̀ḿ à dɔ.’

²⁶Yé aà kɛ kília, káà lo à gèeè à lɛ̀ɛ, ‘Kɔ̀à ɓi nì kɔa pɛ ɓèlè, kɔ́áà pɛ mì e kíe bà. I pɛ zɔ̃̀ɔ̃̀ ko pà.’

²⁷Lɛ́ɛ̀ lo zeĩ́ à gèeè ka lɛ̀ɛ, ‘Lɛ̀ lɛ́ kà go yía, m̀ḿ à dɔ. Míá ka kɛ‐pɛ̀ yɔɔ kɛ‐mìà káa, kà gó dɔ̀á m là.’

²⁸Káà lo Éɓɔ́lɔ́hã́ã̀, Áázɛ̀ ɛ̃́ɛ̃́ Zékɔ̀, wà dɔ̀‐Wálà‐lé‐là‐mìà séĩ́ o gɛ̃̀ɛ̃̀ lɛ̀ lɛ́ Wálà tóò lɛ mia là yia mɔ̀. Yé kaà o gɛ̃̀, tó wáà ka yí lùòa, káà lo gbóó ɓoò, tó káà ka sɔ̃́ɔ̃́ là ɓèlè.

²⁹Mia óò lo góò nyɛ́nɛ́ wɛ̀lɛ̀pìà ɛ̃́ɛ̃́ nyɛ́nɛ́ dàpìà, tó o gó zeĩ́ kɔ̀ pɔ̃́ũ̀ pèèlɛ yé e tóa là, tó o yà gbaa téɓò mɔ̀ lɛ̀ lɛ́ Wálà tóò lɛ mia là yia mɔ̀.

³⁰Yé aà kɛ kília, míá o zízàá dɛɛ káa, óò lo kɛɛ̀ líé, tó mia yé o líé dɛɛ káa, tó o kɛ gbaa zízàá mìà ká.”

³¹Lúó e kília káa, Fálásíì‐mìà dò o nu Zízɛ̀ píé, wáà gèè à lɛ̀ɛ, “Ì gó lɛ̀ɛ mɔ̀, í ló lɛ̀ gbɛɛ mɔ̀, ɓii Hɛ́lɔ̀ láà nàà é i zɛ.”

³²Zízɛ̀ a gèe o lɛ̀ɛ, “Kà lo ká gèe kɛ̀nɛĩ̀ e yía lɛ̀ɛ, ḿm̀ gèe kéèe, ‘M pɛ yɔɔ ɓopìà mia píé, tó máà mia là o mɔ̀‐yàà bà pɛ́nɛɛ ɛ̃́ɛ̃́ tòò. À lɛ̀‐kpɛ̀iì yààka lùòa, lɛ́ m̀ lo nyɛɛ̀ m kɛ‐yɛ̀ɓo mɔ̀ɔ.’

³³É kɛ bɛ̃̀ɛ̃ kília, lɛ m mɔ̀ ḿ kɛ zi là pɛ́nɛɛ, ɛ̃́ɛ̃́ zeĩ́ tòò, e bɛ̀i, díì. Ye wá kpeĩ kɛ ó dɔ̀‐Wálà‐lé‐là‐mì zɛ lɛ̀ gbɛɛ dò fé mɔ̀, é kã́ Zùlúsàlɛ̀ mɔ̀ɔ ká.

³⁴“Zùlúsàlɛ̀, Zùlúsàlɛ̀, káà dɔ̀‐Wálà‐lé‐là‐mìà zɛ. Káà mia lɛ́ Wálà e o vɔ ka píéa, pa gɛ̀lɛ̀ ká. Lúó wɛ̀ɛɛ̀ píé lɛ́ ma naa ḿ m kɔ̀ sɔ̃́ kà mia nì bĩ̀ĩ̀, lɛ̀ zí tɔ̀ɔ̀ è là nɔ́ɔ̀ gbũ dɔá e gbã wìa ká ké. Kɛɛ kàá gbaa à tó kɛ ḿ kɛ kíli.

³⁵Lɛ̀ gɛ̃̀, ka píé kɛ́ì lɛ́ɛ̀ lo tóò ɓɔ̀ɔ. Ḿm̀ gèe ka lɛ̀ɛ, kàá ló m gɛ̃̀ɛ̃̀ é tóá kíli lúó lɛ́ kà lo wɔ̃́ e kéa gèeèa é ɓɔ. Ye lɛ́ e kélɛ̀, ‘Lúà é kpɔ́ mi lɛ́ è nu ko Dàa‐mì tɔ́ yía mɔ̀.’ ”