Read Yamano Lúù 19 Bible Online

Lúù 19 - Yamano bible

Lúù 19

²Gɔ̃ doó e kɛ yía, o kɛ à sípìà Zakíyà. E kɛ ɓo‐pɛ̀ ɓo‐mì kpànazɛ̀ ká. Pɛ e kɛ à kɛ̀lɛ̀.

³E kɛ mi lɛ́ Zízɛ̀ e kɛ à káa, naapìà á dɔ. Kɛɛ e kɛ gɔ̃ ɓúlu ká. Bɛ̀i lɛ̀ɛ́ gbaa kɛ à mɔ̀ é Zízɛ̀ gɛ̃̀, ɓii mia gbũa e kɛ gbùò.

⁴Lɛ̀ e kɛ kília, e bàlà sí míáa wɛlɛ mɔ̀. E ló, e tɛ̀nɛ̀ síkámɔ̀‐yìlì wĩĩ́, kɛ é Zízɛ̀ gɛ̃̀, ɓii Zízɛ̀ e kɛ tópìà zí e kília píé.

⁵Lɛ̀ Zízɛ̀ e ɓɔ lɛ̀ e kília mɔ̀ɔ, e lɛ̀ gɛ̃̀ lɛ̀í, áà gèè Zakíyà lɛ̀ɛ, “Zakíyà, ì gbɛ̃̀ tã́ã̀ tíè‐tíèe, ɓii lɛ m mɔ̀ ḿ kɛ i píé kɛ́ì pɛ́nɛɛ.”

⁶Zakíyà e gbɛ̃̀ tã́ã̀ tíè‐tíèe, e Zízɛ̀ kpɛ̀ɛ̀ kɛ géli ká.

⁷Mia séĩ́ lɛ́ o wɔ̃́ nì e kília gɛ̃̀ɛ, o gbɛ̃̀, wáà mɛ́ĩ́ ɓò Zízɛ̀ gbĩ mɔ̀ kélɛ̀, “Gɔ̃́ e kéa aà ló kɛ‐wɔ̃̀ yɔɔ kɛ‐mì píé kɛ́ì, kɛ é kɛ lɔ̀ɔ̀‐mi ká yi.”

⁸Zakíyà e dɔ e gã̀ mɔ̀, áà gèè ko Dàa‐mì lɛ̀ɛ, “M dàa‐mì, ḿm̀ gèe i lɛ̀ɛ, ḿm̀ lo pɔɔ̀ lɛ́ e m kɛ̀lɛ̀ɛ pɛ́ɛ̀ e yí, tó ma lé‐gbú doó‐mì nɔ mia lɛ́ pɛ wá o kɛ̀lɛ̀ɛ lɛ̀ɛ. Ɛ́ɛ̃́ é kɛ̀á maà mi dò fùlua, ḿm̀ lo pɛ lɛ́ m à fùlu à yía, nɔɔ̀ à lɛ̀ɛ kpolà yììsɛ.”

⁹Zízɛ̀ a gèe à lɛ̀ɛ, “La‐ɓo aà nu ká e kéa wì pɛ́nɛɛ. Gɔ̃́ e kéa lɛ Éɓɔ́lɔ́hã́ã̀ sùu‐là‐mì ká nɔ́ kíli.

¹⁰Ƃii Mi Gbe e nu kɛ é mia lɛ́ o gíniìa lɛɛ naa, é o la.”

¹¹Lɛ̀ míáa o kɛ o tóó dɔpìà wɔ̃́ e kéa mɔ̀ɔ, Zízɛ̀ e ló e líé wɔ̃́ gèeè ká. E pĩ̀ã̀ dò vɔ o lɛ̀ɛ, ɓii e kɛ Zùlúsàlɛ̀ ká gbaa kɔ̀ɛ́. Míáa wa gɛ̃̀ ɓɔ̀ɔ kélɛ̀ Wálà zì tò‐mia‐là lɛ nupìà nuù.

¹²À mɔ́ɔ̀ wɔ̃̀ mɔ̀ɔ, Zízɛ̀ a gèe kélɛ̀, “E kɛ gɔ̃ kpànazɛ̀ dò lɛ́ e wɛ̀lɛ̀ áà lò sɛ́lɛ́ gbɛɛ yí gbèkènia ká. E ló yi, kɛ ó yíkɛ̀ gáàa nɔ à lɛ̀ɛ, kɛ é kɛ sɛ́lɛ́ líé‐sí‐mì ká, kɛ é nuá e pà zeĩ́.

¹³Kɛ é tĩã́ lóò táá e kília mɔ̀ɔ, e là yɛɓo‐kɛ‐mìà vũ̀ doóa súo kɛ. E pɛlèe lɛ́ à kɛɛ̀ lɛ góò káa, gbá doó doó nɔ o lɛ̀ɛ déĩ́ le. A gèe o lɛ̀ɛ, ‘Kà lɔ́ɔ́ dɔ pɛlèea ká, é tóá kíli ḿ nu.’

¹⁴Kɛɛ gɔ̃ kpànazɛ̀ɛ lɔ̀ nyɛɛ̀ e kɛá e pà‐mìà mɔ̀. Lɛ̀ e kɛ kília, o vɔ‐mìà vɔ, kɛ ó tó à píé, ó gèe míáa lɛ̀ɛ, ‘Kòó naa gɔ̃́ e kéa é kɛ ko líé‐sí‐mì ká.’

¹⁵“Gɔ̃ kpànazɛ̀ɛ e kɛ̀ mia líé‐sí‐mì ká mɔ́ɔ̀ yíkɛ̀ gáàa sɔ̀lɔ̀ ɓo. Yé e nuá e mɛ̀ĩ́a, a gèe ó là yɛɓo‐kɛ‐mìà lɛ́ aà pɛlèe nɔ o lɛ̀ɛ súo kɛ, kɛ ó nu à wɛlɛ mɔ̀, kɛ é pɛ lɛ́ waà à gɛ̃̀ pɛlèe e kília mɔ̀ɔ, á dɔ.

¹⁶Mi bèĩzɛ̀ɛ e nu, a gèe à lɛ̀ɛ, ‘M dàa‐mì, maà pɛlèe vũ̀ doó gɛ̃̀ góò pɛlèe gbá doó lɛ́ ɓa nɔ m lɛ̀ɛ mɔ̀.’

¹⁷A gèe à lɛ̀ɛ, ‘Ƃaà wɔ̃́ kɛ sɛ̀. I yɛɓo‐kɛ‐mì yiè ká. Yé mi è e zò dɔ i mɔ̀ wɔ̃́ nyɔ̀nɔ́ káa, ḿm̀ lo sɛ́lɛ́ vũ̀ doó kɛɛ̀ é kɛ ɓà yíkɛ̀ gáàa wì.’

¹⁸Mi tò‐ko‐mɔ̀ zɛ̀ɛ e nu. A gèe à lɛ̀ɛ, ‘M dàa‐mì, maà pɛlèe sɔ́ɔ́li gɛ̃̀ góò pɛlèe gbá doó lɛ́ ɓa nɔ m lɛ̀ɛ mɔ̀.’

¹⁹A gèe mi yé e kéa lɛ̀ɛ, ‘Ƃi bɛ̃̀ɛ̃, sɛ́lɛ́ sɔ́ɔ́li lɛ́ è lo kɛɛ̀ ɓà yíkɛ̀ gáàa wìa.’

²⁰Yɛɓo‐kɛ‐mìàa doó‐mì e nu zeĩ́, áà gèè, ‘M dàa‐mì, ɓà góò pɛlèe gbáa gɛ̃̀ e ké. Ma kpo dɔ kɛ́lɛ́ yí, ma bĩ̀ĩ̀ lɛ̀ dò mɔ̀.

²¹M kɛ túópìà i lɛ̀ɛ, ɓii i dóo gɔ̃ gágà dò káa mɔ́ɔ̀ wɔ̃̀ mɔ̀. Íì pɛ lɛ́ ye wá ɓà pɛ káa si. Ɛ́ɛ̃́ íì pɛ lɛ́ ìí gbaa taa ɓɛɛ ɓo.’

²²À dàa‐mì a gèe à lɛ̀ɛ, ‘I yɛɓo‐kɛ‐mì yɔɔ ká. Ḿm̀ lo i lé‐wè síì, tó m wɔ̃́ káá à ká i wĩĩ́. Ƃáà yí dɔ kélɛ̀ m gɔ̃ gágà dò ká, tó máà pɛ lɛ́ ye wá m̀ pɛ káa sì, ɛ̃́ɛ̃́ zeĩ́, máà pɛ lɛ́ m̀ḿ taa, ɓɛɛ ɓò.

²³Mɛ́ e kɛ mɔṹ lɛ́ ìí gbaa m̀ pɛlèea kpɔ́lɔ̀ bɛ̀i pɛlèe kpɔ̀‐tã́ã̀‐kà wì? Ƃà kɛ̀á kília, máá nuù à gɛ̃̀ɛ̃̀, tó máà à kpɔ̀à‐mɔ̀ nì gɛ̃̀ lɛ̀ m nua ká.’

²⁴Lɛ̀ e kɛ kília, a gèe mia lɛ́ o kɛ dɔ̀á yia lɛ̀ɛ, ‘Kà góò pɛlèe gbá lɛ́ e à kɛ̀lɛ̀ɛ kṹ à kɛ̀lɛ̀, ká nɔ mi yé pɛlèe gbá vũ̀ doó lɛ à kɛ̀lɛ̀ɛ lɛɛ.’

²⁵Wa gèe à lɛ̀ɛ, ‘Ko dàa‐mì, pɛlèe vũ̀ doó lɛ à kɛ̀lɛ̀ɔ̀.’

²⁶Lɛ̀ e kɛ kília, gɔ̃́ɛɛ a gèe kélɛ̀, ‘Ḿm̀ gèe ka lɛ̀ɛ kélɛ̀, mia séĩ́ lɛ́ pɛ lɛ o kɛ̀lɛ̀ɛ, óò lo nɔ́ à dò nɔɔ̀ o lɛ̀ɛ tĩã́. Kɛɛ mi lɛ́ pɛ wá à kɛ̀lɛ̀ɛ, é kɛ bɛ̃̀ɛ̃ à nyɔ̀nɔ́ lɛ́ e à kɛ̀lɛ̀ɛ káa, óò lo à kṹũ̀ à kɛ̀lɛ̀.

²⁷Kɛɛ m dàa‐gbe vɔ̀ ké o yí, lɛ́ òó gbaa naa ḿ kɛ o líé‐sí‐mì káa, kà nu o ká lɛ̀ e kéa mɔ̀, ká o zɛ m wɛlɛ mɔ̀.’ ”

²⁸Zízɛ̀ e wɔ̃́ e kéa gèe, áà lò míáa líé Zùlúsàlɛ̀.

²⁹Lɛ̀ Zízɛ̀ e ɓɔ Bɛ́fézì wà Bɛ́fénì ká kɔ̀ɛ́, ɛ̃́ɛ̃́ lɛ́ e kɛ gbaa Ɔ́lè‐tɔ̃̀ũ̀ sɔ́nɔ́ɔ, e là tòà‐píé‐mìàa o pèèlɛ vɔ,

³⁰áà gèè o lɛ̀ɛ, “Kà lo pɛ́lɛ lɛ́ e ka líé yia yí. Yé kaà kɛ ɓɔpìà à yía, káà lo sòofàné nyɔ̀nɔ́ gɛ̃̀ɛ̃̀ dɔ̀á e yèleèe zɛ̀ ká. Mi gbɛɛ lɛ̀ɛ́ yà do à là. Kà à fóló, ká nu à ká.

³¹Yé mi dò aà ka wɛ̃́ĩ́‐lɔ̀ɔ kɛ kélɛ̀, ‘Mɛ́ e kɛ lɛ́ kà fòlòa,’ kà gèe à lɛ̀ɛ kélɛ̀, ‘Ko Dàa‐mì láà nàà à ká.’ ”

³²Míá e o vɔɔ, o ló, o pɛ séĩ́ gɛ̃̀ nɔ́ lɛ̀ zí Zízɛ̀ a gèe à káa lɛ́ ɓe.

³³Lɛ̀ o kɛ sòo e kília fólópìàa, mia lɛ́ wà pɛ lɛɛ, wa gèe o lɛ̀ɛ kélɛ̀, “Mɛ́ e kɛ lɛ́ kà pɛ́ɛ fòlò?”

³⁴Wa gèe kélɛ̀, “Ko Dàa‐mì láà nàà à ká.”

³⁵O ló à ká Zízɛ̀ píé. Lɛ̀ e kɛ kília, o wà sɔ káá sòoa là, ɛ̃́ɛ̃́ o gbũ Zízɛ̀ mɔ̀ yà à là pìè.

³⁶Lɛ̀ e kɛ sòoa là, áà lòa, o wà sɔ káá zi gbùò mɔ̀ píé.

³⁷Lɛ̀ e ɓɔ Zùlúsàlɛ̀ ká kɔ̀ɛ́, lɛ́ e ɓɔ zi lɛ̀ lɛ́ è kpɔ Ɔ́lè‐tɔ̃̀ũ̀ wĩĩ́ áà yɔ̀ɔ̀ bèía mɔ̀ɔ, là tòà‐píé‐mìà kù gbùò zɛ̀ɛ, o gbɛ̃̀, wáà o wúú wɛ̀lɛ̀ lɛ̀í Wálà zúo gèeè ká, wáà à tɔ́ ɓɔ̀ wɔ̃́ kpàna‐kpànazɛ̀ séĩ́ lɛ́ waà à gɛ̃̀ɛ mɔ́ɔ̀ wɔ̃̀ mɔ̀.

³⁸Wa gèe kélɛ̀, “Lúà é kpɔ́ mia Líé‐sí‐mì lɛ́ è nu ko Dàa‐mì tɔ́ yía mɔ̀. Zò‐yà‐gé è kɛ Wálà‐pà, ɛ̃́ɛ̃́ Wálà tɔ́ è ɓɔ.”

³⁹Lɛ̀ e kɛ kília, Fálásíì‐mìà yé o kɛ mia gbũa fĩ̀ã̀a, o dò wa gèe Zízɛ̀ lɛ̀ɛ, “Tísɛ̀, à gèe ɓà tòà‐píé‐mìàa lɛ̀ɛ ó o lɛ̀à ga.”

⁴⁰Zízɛ̀ a gèe o lɛ̀ɛ, “Ḿm̀ gèe ka lɛ̀ɛ, míá o kéa, o lɛ̀à gaà è kɛ̀á káa, é kɛ bɛ̃̀ɛ̃ gɛ̀lɛ̀ vɔ̀ o kéa káa, wáá gbɛ́ɛ̀ gágà.”

⁴¹Zízɛ̀ e nu pɛ́lɛɛ ká kɔ̀ɛ́. Lɛ̀ a gɛ̃̀ à làa, e gbɛ̃̀ áà gbóó ɓò

⁴²weeá kélɛ̀, “È kɛ̀á vɔ̀ íì pɛ́ è lo zò‐yà‐gé nɔɔ̀ i lɛ̀ɛ, ɓáà dɔ lúó e kéa káaò. Kɛɛ ìí bɛ̀i pɛ nì o kília gɛ̃̀ɛ̃̀ dɛɛ ká.

⁴³Lúó lɛ́ i dàa‐gbe vɔ̀ ò lo gbã́ã́ ɓoò à ká ɓà gàlà mɛ̀ĩ́ píé déĩ́ le, ɛ̃́ɛ̃́ lɛ́ o nìɛɛ̀ è lo kɛɛ̀á i mɔ̀ lɛ̀ séĩ́ mɔ̀, tó wáà i kɛ̀, tó mi lɛ̀ɛ́ bɛ̀i góò i yía, à lúó lɛ́ɛ̀ lo ɓɔɔ̀ i là.

⁴⁴Óò lo mia lɛ́ o i yía kpɔ́ɔ̀ i mɔ̀, o ka yí sìè féfé le. Òó ló gɛ̀lɛ̀ kpùlù doó fèle tóò wɔ̀ɔ̀á e wɔ̀lɔ̀ mɔ̀. Ƃii ìí gbaa lúó lɛ́ Wálà e nuá i píéa dɔ.”

⁴⁵Zízɛ̀ e wàà sálà‐ɓò‐Wálà‐lɛ̀ɛ‐kà wì. E gbɛ̃̀ gbaa, áà mia lɛ́ o kɛ pɛ lɔ̀ɔ̀ dɔpìà yia, áà o yí lùò,

⁴⁶áà gèè o lɛ̀ɛ, “À bɛ̃̀ɛ̃ɛ̃̀ lɛ Wálà là kíía yí kélɛ̀, ‘M̀ ká lɛ́ɛ̀ lo kɛɛ̀ sɛ̀nɛ‐ɓòà‐wì‐kà ká. Kɛɛ kaà à kɛ gbaa bĩ̀ĩ̀pìà ká kã̀ã‐mìà lɛ̀ɛ.”

⁴⁷Zízɛ̀ e pɛ zɔ̃̀ɔ̃̀ sálà‐ɓò‐Wálà‐lɛ̀ɛ‐kà wì lúó séĩ́ ká. Sálà‐ɓò‐Wálà‐mɔ̀‐mìà kpànazɛ̀, ɛ̃́ɛ̃́ Wálà kii‐dɔ‐mìà, e bɛ̀i, mia líé‐sí‐mìàa, wa naa ó à zɛ.

⁴⁸Kɛɛ òó gbaa zi lɛ́ ò lo à zɛɛ̀ à káa gɛ̃̀. Ƃii mia séĩ́ o kɛ o tóó dɔpìà Zízɛ̀ mɔ̀. Míáa òó gbaa naa wɔ̃́ lɛ́ e kɛ à gèepìàa dò é die o là.