Read Yamano Lúù 20 Bible Online

Lúù 20 - Yamano bible

Lúù 20

¹Lɛ̀ lɛ́ Zízɛ̀ e kɛ sálà‐ɓò‐Wálà‐lɛ̀ɛ‐kà wì, áà pɛ zɔ̃̀ɔ̃̀ mia lɛ̀ɛ, ɛ̃́ɛ̃́ áà wɔ̃́ làṹ yièa gèè lúó doó káa, sálà‐ɓò‐Wálà‐mɔ̀‐mìà kpànazɛ̀, ɛ̃́ɛ̃́ Wálà kii‐dɔ‐mìà wà mia dìè‐dìè vɔ̀ o nu,

²wáà gèè à lɛ̀ɛ, “Ì wɔ̃́ e kéa yí ɓo ko lɛ̀ɛ. Yíkɛ̀ gáàa kpɛɛ̀ zɛ̀ lɛ́ e i kɛ̀lɛ̀, lɛ́ ì wɔ̃́ sùu e kéa kɛ̀á ɓɛ? Deĩ̀ lɛ́ e yíkɛ̀ gáàa sùua nɔ i lɛ̀ɛ?”

³Zízɛ̀ e à yí ɓo o lɛ̀ɛ kélɛ̀, “Kà tó ḿ wɛ̃́ĩ́‐lɔ̀ɔ kɛ ka yee ka kɛ̀lɛ̀. Kà wɔ̃́ e kéa yí ɓo m lɛ̀ɛ.

⁴Dé a gèe Zɔ̃̀ɔ̃́ lɛ̀ɛ é mia bàtáì kɛ? Wálà lɛ, ɛ̃́ɛ̃́ mia lɛ?”

⁵O gbɛ̃̀, wáà mɛ́ĩ́ ɓò o kíe nì lɛ̀ɛ kélɛ̀, “Yé kɔaà gèe Wálà lɛɛ, lɛ́ɛ̀ lo à gèeè, ‘Mɛ́ mɔṹ e kɛ lɛ́ kàá wɔ̃́ lɛ́ Zɔ̃̀ɔ̃́ a gèea gɛ̃̀ wánà ká?’

⁶Kɛɛ yé kɔaà à gèe mia lɛɛ, míáa séĩ́‐séĩ́ óò lo ko páà gɛ̀lɛ̀ ká. Ƃii o wéè lɛ Zɔ̃̀ɔ̃́ kɛ̀ dɔ̀‐Wálà‐lé‐là‐mì ká wɔ̃̀ mɔ̀.”

⁷Yé e kɛ kília, wa gèe kélɛ̀, “Kòó mi lɛ́ e à gèea dɔ.”

⁸Zízɛ̀ a gèe o lɛ̀ɛ, “M̀ḿ ló mɔṹ yíkɛ̀ gáàa lɛ́ m̀ wɔ̃́ sùu e kéa kɛ̀áa, zɔ̃̀ɔ̃̀ ka lɛ̀ɛ.”

⁹Lɛ̀ e kɛ kília, Zízɛ̀ e pĩ̀ã̀ e kéa vɔ míáa lɛ̀ɛ. A gèe kélɛ̀, “Gɔ̃ doó e ɓɛ̀lɛ̀‐wɛ́lɛ́ lɛ́ ò à ɓɛɛ yíí mia, nyɛ́nɛ̀ĩ̀ kpɔ́. E nyɛ́nɛ̀ɛ kpɔ́ mia dò kɔ̀ là, kɛ ó o nyìɛ kɛ à mɔ̀. Yé e kɛ kília, e ló gbaa táá mɔ̀ lɛ̀ gbèkèni mɔ̀. E kɛ yí lúó gbèkèni píé.

¹⁰Lɛ̀ lɛ́ taa‐pɛ̀ e kília tãã‐lùò e ɓɔɔ, gɔ̃́ɛɛ e là lùò doó vɔ mia lɛ́ o kɛ o nyìɛ kɛpìà nyɛ́nɛ̀ɛ mɔ̀ɔ píé, kɛɛ ó taa‐pɛ̀ e kília ɓɛɛ dò vɔ à lɛ̀ɛ. Kɛɛ o lùò e kília mɛ̀, wa vɔ e mɛ̀ĩ́ e kɔ̀ fèle ká.

¹¹E bɛ̀i, e lùò doó‐mì vɔ zeĩ́. Kɛɛ nyìɛ‐kɛ̀‐nyɛ́nɛ̀ɛ‐mɔ̀‐mìàa, o bɛ̀i, o à mɛ̀ nɔ́ kíli, wáà à kɛ̀ e líà‐ɓo‐zì píé. Lɛ̀ e kɛ kília, wa vɔ e mɛ̀ĩ́ e kɔ̀ fèle ká.

¹²Lɛ̀ gɔ̃́ɛɛ e mia pèèlɛ vɔ yía, e lùò doó‐mì vɔ zeĩ́. Mi yé e kéa, o à gĩ̀ĩ, ɛ̃́ɛ̃́ o à dùò luú.

¹³Lɛ̀ e kɛ kília, nyɛ́nɛ̀ĩ̀ e kília dàa‐mì a gèe, ‘Mɛ́ m̀ bɛ̀i à mɔ̀ ḿ à kɛ? Ḿm̀ lo m̀ lɔ̀‐kɛ̀á‐nɛ̀ɛ vɔɔ̀. Ḿm̀ yí dɔ óò lo lèĩ à ɓɛ̀lɛ yàà.’

¹⁴Kɛɛ yé nyìɛ‐kɛ̀‐nyɛ́nɛ̀ɛ‐mɔ̀‐mìàa wa gɛ̃̀ɛ, wa gèe o kíe nì lɛ̀ɛ, ‘Mí à dàa là pɔɔ̀ è lo tóò à kɛ̀lɛ̀ɛ, lɛ́ e kéa. Kɔ̀à à zɛ. Yé aà kɛ kília, pɛ́ è lo tóò à kɛ̀lɛ̀ɛ, lɛ́ɛ̀ lo kɛɛ̀ kɔ̀à pɛ ká gbaa.’

¹⁵Lɛ̀ e kɛ kília, o gó à ká nyɛ́nɛ̀ĩ̀a mɔ̀, o à zɛ. “Yé aà kɛ kília, nyɛ́nɛ̀ɛ dàa‐mì lɛ́ɛ̀ lo à kɛɛ̀ kpɛ nyìɛ‐kɛ̀‐nyɛ́nɛ̀ɛ‐mɔ̀‐mìàa ká?

¹⁶Lɛ́ɛ̀ lo nuù, tó e mia lɛ́ o kília o zɛ, tó e nyɛ́nɛ̀ĩ̀a sí, a dɔ̀ kɛ mia gbɛɛ kɛ̀lɛ̀ ó o nyìɛ kɛ à mɔ̀.” Lɛ̀ míáa o wɔ̃́ e kília maa, wa gèe kélɛ̀, “Lɛ̀ɛ́ bɛ̀i kɛɛ̀ kíli.”

¹⁷Zízɛ̀ e lɛ̀ gɛ̃̀ o píé, áà gèè o lɛ̀ɛ, “Yé ye wá mɔṹ kília, wɔ̃́ lɛ́ à bɛ̃̀ɛ̃ɛ̃̀ lɛ Wálà kii yí lɛ́ e kéa, yí lɛ́ mɛɛ ká? Ye lɛ́ e kélɛ̀, ‘Gɛ̀lɛ̀ lɛ́ ká dɔ‐mìà wa dà o kɔ̀ mɛ̀ĩ́a, aà kɛ gbaa gɛ̀lɛ̀ kpànazɛ̀ ká, é dieá gɛ̀lɛ̀ séĩ́ là.’

¹⁸Mia séĩ́ lɛ́ ò lo pèlè gɛ̀lɛ̀ e kília làa, óò lo wɛ̃̀ĩ‐wɛ̃́ĩ̀, o gó o kíe lé. Ɛ́ɛ̃́ yé gɛ̀lɛ̀ e kília aà dà mi dò làa, lɛ́ɛ̀ lo à tɛ̀lɛ‐tɛ́lɛ̀, tó e mùnú kã́.”

¹⁹Wálà kii‐dɔ‐mìà ɛ̃́ɛ̃́ sálà‐ɓò‐Wálà‐mɔ̀‐mìà kpànazɛ̀ɛ, o kɛ à kɛ‐zì naapìà kɛ ó Zízɛ̀ kṹ yé e kɛ nɔ́ kília ká. Ƃii wa yí dɔ kélɛ̀ pĩ̀ã̀ a vɔɔ, à vɔɔ̀ lɛ o gbĩ mɔ̀. Kɛɛ o kɛ túópìà míá o kɛ yía lɛ̀ɛ.

²⁰Lɛ̀ e kɛ kília, o kɛ lúó yiè naapìà ó à kṹ. O ló, o pɛlèe nɔ gɔ̃à dò lɛ̀ɛ, kɛ ó à kɛ kélɛ̀ pɛ lɛ́ o wánà zɛ̀. O o vɔ kɛ ó Zízɛ̀ kṹ e wúú mɔ̀, kɛ ó à nɔ mia wũ‐là‐mì lɛ̀ɛ, é kɛ là yíkɛ̀ gáàa wì.

²¹Dà‐mia‐wì‐mìà o kéa, wa gèe Zízɛ̀ lɛ̀ɛ kélɛ̀, “Tísɛ̀, kóò à yí dɔ kélɛ̀ wɔ̃́ lɛ́ ɓà gèe, ɛ̃́ɛ̃́ lɛ́ ɓà zɔ̃̀ɔ̃̀ɔ lɛ wánà zɛ̀. Ìí túó mi nɔ́ɔ fé wɛlɛ lɛ̀ɛ. Kɛɛ íì pɛ zɔ̃̀ɔ̃̀ wánà ká, é gbɛ̃̀á zi lɛ́ Wálà à nàà mia ó tó à píéa mɔ̀.

²²Ƃáà yí dɔ lɛ sɛ̀ kɛ kó ɓo‐pɛ̀ ɓo mia wũ‐là‐mì Sízà lɛ̀ɛ, ɛ̃́ɛ̃́ ye wá sɛ̀?”

²³Kɛɛ Zízɛ̀ e yɛ̀ì‐yɛ́í lɛ́ o kɛ à kɛpìàa dɔ. A gèe o lɛ̀ɛ,

²⁴“Kà pɛlèe gbá doó zɔ̃̀ɔ̃̀ ḿ gɛ̃̀. Deĩ̀ wũ‐kèlè bĩ́ lɛ́ e pɛlèea là ɓɛ? Pɛ́ à bɛ̃̀ɛ̃ɛ̃̀ lɛ à làa, gbɛ̃̀ɛ̃̀ lɛ deĩ̀ mɔ̀?” Wa gèe kélɛ̀, “Sízà lɛ́ là pɛ lɛɛ.”

²⁵Lɛ̀ e kɛ kília, Zízɛ̀ a gèe o lɛ̀ɛ kélɛ̀, “Yé lɛ kília, kà pɛ lɛ́ e Sízà là pɛ káa, nɔ à lɛ̀ɛ, ɛ̃́ɛ̃́ pɛ́ yé lɛ Wálà zì pɛ káa, kà nɔ Wálà lɛ̀ɛ.”

²⁶Bɛ̀i lɛ̀ɛ́ gbaa kɛ o mɔ̀ kɛ ó Zízɛ̀ kṹ e wúú mɔ̀ zi nɔ́ɔ fé dò ká mia nyìɛ mɔ̀ yi. À mɔ́ɔ̀ wɔ̃̀ mɔ̀ɔ, o o lɛ̀à ga, ɛ̃́ɛ̃́ o lé paà e kɛá wɔ̃́ yí‐ɓo‐kɔ̀ e kília mɔ́ɔ̀ wɔ̃̀ mɔ̀.

²⁷Sáyúsíì vɔ̀ dò o nu Zízɛ̀ píé. O lɛ́ o mia lɛ́ ò gèe mia òó ló wɛ̀lɛ̀ ga kɛ̀lɛ̀ɛ káa.

²⁸O wɛ̃́ĩ́‐lɔ̀ɔ doó kɛ Zízɛ̀ kɛ̀lɛ̀ weeá kélɛ̀, “Tísɛ̀, Móózè e wɔ̃́ e kéa bɛ̃̀ɛ̃ ko lɛ̀ɛ. Wɔ̃́ e kília lɛ́ e kélɛ̀, ‘Yé gɔ̃ aà ga, aà e na tó, lɛ́ nɛ́ wá à kɛ̀lɛ̀ɛ, lɛ gɔ̃́ e kília lèe‐gé mɔ̀ é à ná e kília sí, kɛ wà ye ó nɛ́ ye à lìi dìè e ga kília lɛ̀ɛ.’

²⁹E kɛ ye‐mìà gɔ̃à zɛ̀ sálápèèlɛ ká. O dɔ̀‐líéa e lee sí. E ga, kɛɛ lɛ̀ɛ́ nɛ́ gbɛɛ ye nɛ́.

³⁰Lɛ̀ e kɛ kília, mi tò‐ko‐mɔ̀ zɛ̀ɛ e lééa sí e na ká.

³¹Yé e kɛ zeĩ́ kília, o yààka‐mìa e lééa sí e na ká nɔ́ kíli. Wɔ̃́ nɔ́ doóa e kɛ ye‐mìà sálápèèlɛɛ ká. O ga, ɛ̃́ɛ̃́ òó gbaa nɛ́ gbɛɛ ye.

³²Lɛ̀ gɔ̃àa o ga e nyɛɛ, lééa bɛ̃̀ɛ̃ e ga nɔ́ kíli.

³³Yé aà kɛ kília, yé mia wɛ̀lɛ̀‐ga‐kɛ̀lɛ̀ lùò aà ɓɔɔ, dé lééa è lo kɛɛ̀ à na ká, lɛ́ gɔ̃à sálápèèlɛɛ waà à sí lee ká ɓɛ?”

³⁴Zízɛ̀ a gèe o lɛ̀ɛ, “Gɔ̃à wà loà nì lɛ́ o ɓe lúó e kéa káa, óò o kíe nì si.

³⁵Kɛɛ gɔ̃à wà loà nì lɛ́ o kpeĩ kɛ ó wɛ̀lɛ̀ ga kɛ̀lɛ̀, kɛ ó kɛ ɓe lúó lɛ́ è lo nuùa káa, òó ló o kíe nì síì.

³⁶O kélɛ̀ Wálà là vɔ‐mìà lɛ́ ɓe. Òó bɛ̀i gaà. O Wálà gbe nì ká, ɓii waà wɛ̀lɛ̀ ga kɛ̀lɛ̀ɛ mɔ́ɔ̀ wɔ̃̀ mɔ̀.

³⁷Ɛ́ɛ̃́ Móózè a zɔ̃̀ɔ̃̀ e yí púlú zɛ̀ ká kélɛ̀ mia lɛ́ waà gaa, óò wɛ̀lɛ̀ ga kɛ̀lɛ̀. Wɔ̃́ lɛ́ à bɛ̃̀ɛ̃ɛ̃̀ lɛ Wálà kii yí, lɛ́ à gbɛ̃̀ɛ̃̀ lɛ yílí lɛ́ tíé e kɛ à wĩĩ́ gélépìàa mɔ̀ɔ, Móózè e ko Dàa‐mì sí Éɓɔ́lɔ́hã́ã̀ là Wálà, ɛ̃́ɛ̃́ Áázè là Wálà, e bɛ̀i, Zékɔ̀ là Wálà à lɛ̀ mɔ̀.

³⁸À yí lɛ́ e kélɛ̀, ye wá mia yé o gaà lɛɛ, wà Wálà ká. Mia yé o ɓéèea lɛ́ wà Wálà lɛɛ. Ƃii mia séĩ́ o ɓe à píé.”

³⁹Lɛ̀ e kɛ kília, Wálà kii‐dɔ‐mìàa dò wa gèe kélɛ̀, “Tísɛ̀, ɓà wɔ̃́ yí‐ɓo‐kɔ̀ɔ lɛ sɛ̀.”

⁴⁰Ƃii míáa o kɛ túópìà kɛ ó wɛ̃́ĩ́‐lɔ̀ɔ nɔ́ɔ fé dò kɛ zeĩ́ Zízɛ̀ kɛ̀lɛ̀.

⁴¹Zízɛ̀ a gèe o lɛ̀ɛ, “E dɔ kpɛɛ̀ lɛ́ ò gèe Kɛ́lɛ̀ì lɛ Dèɓé gbe ká?

⁴²Ƃii Dèɓé dìè e à gèe Tã́‐kiia yí kélɛ̀, ‘Kɔa Dàa‐mì a gèe m Dàa‐mì lɛ̀ɛ weeá kélɛ̀, Ì yà m kɔ̀ yiè yí,

⁴³é tóá kíli ḿ mia lɛ́ ò gèlè gɔ̃ i káa, kɛ i gã̀‐gbɛ̃̀à‐là pɛ̀ ká.’

⁴⁴Lɛ̀ gɛ̃̀, Dèɓé e à sí e Dàa‐mì. Lɛ́ɛ̀ dɔ kpɛɛ̀ lɛ́ à Dàa‐mì è kɛ̀ à gbe ká?”

⁴⁵Lɛ̀ míáa séĩ́ tóó dɔɔ̀ e kɛá Zízɛ̀ mɔ̀ɔ, a gèe là tòà‐píé‐mìàa lɛ̀ɛ kélɛ̀,

⁴⁶“Kà ka zò kɛ ka dìè píé Wálà kii‐dɔ‐mìàa wɛ̃́ĩ̀. O dò óò nàà ó wà gbàà‐wíì dà, wáà lò tàá sí, ɛ̃́ɛ̃́ óò nàà mia ó wéé o píé ɓɛ̀lɛyà ká lɔ́ɔ́ kpánà píé. Ɛ́ɛ̃́ wáà nàà yà‐pìè kpànazɛ̀ ká o zì Wálà‐kàa wì, tó wáà nàà lɛ̀ kpànazɛ̀ ká ó yà yi yé waà ló kpílì làa ká.

⁴⁷E bɛ̀i, óò lee lɛ́ lɛ gã̀ã káa, là pɛ ɓèlè à kɛ̀lɛ̀ gbã́ã̀ ká. Yé waà à kɛ kília, óò o dìè wɛlɛ li sɛ̀nɛ‐ɓò gbèĩ ká. À mɔ́ɔ̀ wɔ̃̀ mɔ̀ɔ, mɛ̀ĩ́‐sà lɛ́ è lo káà o wĩĩ́a, lɛ́ɛ̀ lo kɛɛ̀ yɔɔ kpó‐kpó ɓo.”