Read Yamano Lúù 21 Bible Online

Lúù 21 - Yamano bible

Lúù 21

¹Zízɛ̀ e lɛ̀ gɛ̃̀ píé, áà mia kpànazɛ̀ gɛ̃̀, wáà o zì nɔ̀‐lɛ̀ɛ‐pɛ̀ dà pɛlèe dàà‐yí‐pɛ̀ yí píé.

²Zízɛ̀ e bɛ̀i, e gã̀ã lee lɛ́ pɛ wá à kɛ̀lɛ̀ɛ gɛ̃̀, áà káɓà pèèlɛ lɛ́ è bɛ̀i kɛɛ̀ wã́ã́ sɛ̃́ĩ̀ káa, dà pɛlèe dàà‐yí‐pɛ̀ɛ yí.

³Lɛ̀ e kɛ kília, Zízɛ̀ a gèe kélɛ̀, “Wánà‐wɔ̃̀ lɛ́ m̀ gèe ka lɛ̀ɛ ɓɛ. Gã̀ã lee lɛ́ pɛ wá à kɛ̀lɛ̀ e kéa, pɛ lɛ́ aà dàa lɛ gbùò, é dieá pɛ lɛ́ mia yé o tóa o séĩ́ wa dàa là.

⁴Ƃii míá o tóa, pɛlèe lɛ́ wa dàa, lɛ pɛlèe lɛ́ o kɔ̃́ɔ̃̀ lɛ à mɔ̀ɔ ká. Kɛɛ léé e ké, lɛ́ pɛ kpã́‐kpã̀ lɛ̀ɛ́ gbaa kɛ à kɛ̀lɛ̀ɛ, aà pɛ lɛ́ e kɛ à tùò‐à‐là wà à yìì‐à‐là káa séĩ́ nɔ.”

⁵Mia dò o kɛ zi lɛ́ sálà‐ɓò‐Wálà‐lɛ̀ɛ‐kà mɛ́ síì e kɛá gɛ̀lɛ̀ yiè yiè, ɛ̃́ɛ̃́ pɛ lɛ́ ò nɔ Wálà lɛ̀ɛ káa, à wɔ̃̀ gèepìà. Zízɛ̀ a gèe kélɛ̀,

⁶“Pɛ séĩ́ lɛ́ kà gɛ̃̀ e kéa, lúó lɛ́ɛ̀ lo ɓɔɔ̀, tó gɛ̀lɛ̀‐kpùlù doó fèle lɛ̀ɛ́ ló tóò wɔ̀ɔ̀á e wɔ̀lɔ̀ mɔ̀. Óò lo o séĩ́‐séĩ́ o wíì tã́ã̀.”

⁷Lɛ̀ e kɛ kília, o à wɛ̃́ĩ́‐lɔ̀ɔ kɛ kélɛ̀, “Tísɛ̀, lúó lɛ́ wɔ̃́ e kéa è lo kɛɛ̀ à káa, gèe ko lɛ̀ɛ. Mɛ́ è lo à zɔ̃̀ɔ̃̀ ko lɛ̀ɛ kélɛ̀ lɛ nupìà kɛɛ̀?”

⁸Zízɛ̀ a gèe kélɛ̀, “Kà ka yɛ́lɛ́ kɛ ka dìè píé, yékɛ̀ mia ó ka bèkɛ̀ ɓo. Ƃii mia búnùzɛ̀ óò lo nuù m tɔ́ yí, wáà gèè kélɛ̀ o lɛ́ o m káa. Ɛ́ɛ̃́ zeĩ́, óò lo à gèeè, lúóa aà ɓɔ. Kɛɛ yékɛ̀ ká ka zɛ o wéè lɛ̀ɛ.

⁹Yékɛ̀ ká túó yé kaà gèlè‐gɔ̃‐wɔ̃̀ ɛ̃́ɛ̃́ gèlè gɔ̃̀ gòmɛ́nɛ̀ ká wɔ̃̀ maa ká. Ƃii lɛ à mɔ̀ wɔ̃́ e kéa é kɛ nɛ́ bèĩzɛ̀. Kɛɛ ye wá kélɛ̀ wɔ̃́ séĩ́ léĩ́‐tó‐lùò aà ɓɔ kɔ̀ɛ́.”

¹⁰Lɛ̀ e kɛ kília, a gèe zeĩ́ o lɛ̀ɛ kélɛ̀, “Wè gbɛɛ̀ gbɛɛ gèe‐mìà óò lo gèlè gɔ̃ɔ̀ o kíe ká. Ɛ́ɛ̃́ sɛ́lɛ́ gbɛɛ̀ gbɛɛ lɛ́ɛ̀ lo gèlè dàà e kíe là.

¹¹Kpóṹ là lɛ́ɛ̀ lo kɛɛ̀ kã́pìà áà lò gìè wɛlɛ yɔɔ zɛ̀. Lɔ̀ɔ wà yáá yɔɔ̀ yɔɔ̀ óò lo kɛɛ̀ lɛ̀ búnùzɛ̀ mɔ̀. Wɔ̃́ yɔɔ̀ yɔɔ̀ wà wɔ̃́ gɔ̃̀á kpànazɛ̀ lɛ́ è go lɛ̀ía, lɛ́ɛ̀ lo kɛɛ̀ ɓe.

¹²Kɛɛ wɔ̃́ nì e kéa séĩ́ é tĩã́ kɛɛ̀ɛ, óò lo ka kṹũ̀, tó wáà ka sã̀ dɔ̀. Óò lo ka kṹũ̀, tó o ló ka ká Zúù‐mìà zì Wálà‐kà wì kɛ ó mɛ̀ĩ́‐sà dɔ ka mɔ̀. Óò lo ka dùò bĩ́‐kɛ̀ì. Óò lo nuù ka ká sɛ́lɛ́ líé‐sí‐mìà wà gòmɛ́nɛ̀‐mìà wɛlɛ mɔ̀ m mɔ́ɔ̀ wɔ̃̀ mɔ̀.

¹³Lúó e kília káa, lɛ́ è lo kɛɛ̀ kɛ ká m̀ kélá‐wè ɓo yía.

¹⁴Kà à yà ka gé líé yékɛ̀ ka lè é dũ zi lɛ́ kà lo wɔ̃́ ɓoò à ká ka dìè wũ mɔ̀ɔ mɔ́ɔ̀ wɔ̃̀ ká.

¹⁵Ƃii ḿm̀ lo wéé wà gíkã́ lɛ́ è lo à kɛɛ̀, tó gèlè‐gɔ̃̀‐ka‐ká mìà dò nɔ́ɔ fé òó bɛ̀i ka lé yɛ́ɛ̀, ɛ̃́ɛ̃́ lɛ́ òó bɛ̀i tèé dàà ka káa, nɔɔ̀ ka lɛ̀ɛ.

¹⁶Ka ye‐mìà, e bɛ̀i, ka lèe‐gé vɔ̀, ɛ̃́ɛ̃́ ka kɔ̀‐píé‐mìà, zéniía, ka ɓɛ́ĩ̀ nì, óò lo ka nɔɔ̀ mia lɛ̀ɛ. Óò lo ka dò zɛɛ̀.

¹⁷Ka lɔ̀ lɛ́ɛ̀ lo nyɛɛ̀ mia séĩ́ mɔ̀ m mɔ́ɔ̀ wɔ̃̀ mɔ̀.

¹⁸Kɛɛ ka wĩĩ́‐wũ̀à‐kɛ̀ì doó fèle lɛ̀ɛ́ ló gíniì.

¹⁹Kɛɛ kà ka zò dɔ gágà, ɓii káà lo ka dìè laà zí e kéa ká.

²⁰“Yé kaà gèlè‐gɔ̃‐mìà gɛ̃̀, tó o nìɛɛ̀ lɛ Zùlúsàlɛ̀ mɔ̀ɔ, kɛɛ kaà à yí dɔ gbaa kélɛ̀ à yí lɛ nupìà sìè.

²¹Yé aà kɛ kília, mia lɛ́ o Zùdíàa ò wɛ̀lɛ̀ ó ló tɔ̃̀ũ̀ wĩĩ́ píé. Mia lɛ́ ò lo kɛɛ̀ pɛ́lɛɛ yía, ò gó yi. Ɛ́ɛ̃́ mia lɛ́ ò lo kɛɛ̀ pɛ́lɛɛ kɔ̀ pɔ̃́ũ̀ mɔ̀ píéa, yékɛ̀ ó ɓɔ pɛ́lɛ gbùò e kília yí.

²²Ƃii lúó e kéa lɛ́ wɔ̃́ nyɔ́ɔ̀ɔ è lo ɓɔɔ̀ à ká mia làa. Lɛ́ɛ̀ lo kɛɛ̀ kíli, kɛɛ wɔ̃́ séĩ́ lɛ́ à bɛ̃̀ɛ̃ɛ̃̀ lɛ Wálà kiia yía, kɛ é kɛ wánà ká.

²³É ké nìé. Loà lɛ́ o gí lɛ o mɔ̀ɔò, e bɛ̀i, o yé lɛ́ o nyɔ́ dɔpìà nɛ́ léaò, lɛ́ɛ̀ lo kɛɛ̀ dóo yéĩ̀zɛ̀ o mɔ̀ lúó e kília ká. Lúó gáàa kṹũ̀ lɛ́ɛ̀ lo ɓɔɔ̀ sɛ́lɛ́ e kília yí. Ɛ́ɛ̃́ Wálà zì wɔ̃́à‐wàa‐kɔ̀ lɛ́ɛ̀ lo kɛɛ̀ míá o kéa là.

²⁴Óò lo o dò zɛɛ̀ gèlè‐gɔ̃‐làà ká. Ɛ́ɛ̃́ óò lo o dò kṹũ̀, o ló o ká sɛ́lɛ́ séĩ́ yí. Ɛ́ɛ̃́ zeĩ́, sɛ́lɛ́ gbɛɛ yí‐mìà óò lo táà Zùlúsàlɛ̀ là, é tóá kíli o zì lúó e nyɛ.

²⁵“Lé‐pa‐wɔ̃̀ lɛ́ɛ̀ lo kɛɛ̀ nyɛ́nɛ́, e bɛ̀i mɛnɛ, ɛ̃́ɛ̃́ sĩ̀ã́ã̀ŋèlè yí píé. Ɛ́ɛ̃́ kpóṹ là zèea, sɛ́lɛ́ gbɛɛ̀ gbɛɛ òó ló wɔ̃́ lɛ́ lɛ o mɔ̀ ó kɛɛ dɔɔ̀. Óò lo túò mɛ̀ĩ́ tɛ́lɛ́‐vĩ̀ gbùò, ɛ̃́ɛ̃́ à zì súlúú dɔ‐vĩ̀ lɛ̀ɛ.

²⁶Túó lɛ́ɛ̀ lo à kɛɛ̀, tó mia ɓéèe vũ̀nɛ̀ĩ̀ áà ɓò o yí yé waà kɛ yàá wɔ̃́ lɛ́ è lo nuù kpóṹ là zèe lɛ̀ séĩ́ mɔ̀ɔ gɛ̀nɛ̀ɛ ká. Ƃii yíkɛ̀ gáàa nì yé o lɛ̀í kii yí píéa, o wɛ̀lɛɛ̀ lɛ́ɛ̀ lo kɛɛ̀á o wɔ̀lɔ̀ mɔ̀ píé.

²⁷Yé aà kɛ kília, mia óò lo Mi Gbe gɛ̃̀ɛ̃̀, áà nù lɛ̀í‐kii yí yíkɛ̀ gáàa ká, ɛ̃́ɛ̃́ Wálà zì lɛ̀ fɔ̀nɔɔ̀ɔ kpó‐kpó yí.

²⁸Yé wɔ̃́ nì e kéa aà gbɛ̃̀, áà kɛ̀ɛ, kà dɔ ka gã̀ mɔ̀ ká ka wũ sí lɛ̀í, ɓii ka zì la‐ɓo lɛ gbaa kɔ̀ɛ́ɛ mɔ́ɔ̀ wɔ̃̀ mɔ̀.”

²⁹Lɛ̀ e kɛ kília, Zízɛ̀ e pĩ̀ã̀ e kéa vɔ o lɛ̀ɛ kélɛ̀, “Ka zò è vùò féè‐yìlì wà yílí yé e tóa séĩ́ ká.

³⁰Yé kaà yílí gɛ̃̀, áà e dèĩ̀a, káà à yí dɔ kélɛ̀ lɛ̀ɛ‐yíí‐pɛ̃́ lɛ nupìà kɔ̀ɛ́.

³¹Zí nɔ́ doóa káa, yé kaà wɔ̃́ ni e kéa gɛ̃̀ kɛpìàa, káà lo à yí dɔɔ̀ kélɛ̀ Wálà zì tò‐mia‐là lɛ ɓɔpìà kɔ̀ɛ́.

³²“Wánà‐wɔ̃̀ lɛ́ m̀ gèe ka lɛ̀ɛ ɓɛ. Míá o ɓe yà kɔa ɓoa yía, o séĩ́ o gaà lɛ̀ɛ́ ló kɛɛ̀ à ká, kɛɛ wɔ̃́ nì e kéa séĩ́ é tĩã́ kɛɛ̀.

³³Lɛ̀í wà tã́ã̀ zèe o nyɛ‐pɛ̀ ká. Kɛɛ m lé‐wè lɛ̀ɛ́ ló nyɛɛ̀.

³⁴“Kà ka yɛ́lɛ́ kɛ ka dìè píé. Yékɛ̀ ká tó ka zò píé é pa kpílì kɛɛ̀, e bɛ̀i yɔ miì, ɛ̃́ɛ̃́ kpóṹ là zèe zì yɛ́lɛ́‐tàà‐yí‐wɔ̃̀ ká. Ká kɛ̀á kília, Lúó e kília lɛ́ɛ̀ lo ɓɔɔ̀ ka púgã̀ ká.

³⁵Ƃii Lúó e kília lɛ́ɛ̀ lo mia séĩ́ lɛ́ o kpóṹ là zèe lɛ̀ séĩ́ mɔ̀ɔ kṹũ̀ lɛ̀ zí pɛ́lɛ́ è pɛ kũáa lɛ́ ɓe.

³⁶Kà yà ka nyìɛ́ lúó séĩ́ ká, ká sɛ̀nɛ ɓo, kɛ yíkɛ̀ gáàa é kɛ ka kɛ̀lɛ̀, kɛ ká die wɔ̃́ nì è lo kɛɛ̀ɛ séĩ́ yí, kɛ ká dɔ Mi Gbe wɛlɛ mɔ̀.”

³⁷Zízɛ̀ e pɛ zɔ̃̀ɔ̃̀ mia lɛ̀ɛ sálà‐ɓò‐Wálà‐lɛ̀ɛ‐kà wì lúó nì o kília píé. Tó yé nyɛ́ŋɛ̀ĩpíé aà kɛɛ, áà lò Ɔ́lè‐tɔ̃̀ũ̀ wĩĩ́, kɛ é kɛ yí bĩ́míàa píé.

³⁸Mia séĩ́ o kɛ lópìà làapíé tùlù pɛ̃‐pɛ̃ yí, kɛ ó o tóó dɔ à mɔ̀ Wálà‐kà e kília wì.