Read Yamano Lúù 22 Bible Online

Lúù 22 - Yamano bible

Lúù 22

¹Belè lɛ́ belè‐fɔ̀ɔ‐pɛ̀ wá à bàa, mɔ́ɔ̀ kpílì lúó e kɛ ɓɔpìà kɔ̀ɛ́. Kpílì e kília lɛ́ ò à si Dìè‐mia‐là Kpílìa.

²Sálà‐ɓò‐Wálà‐mɔ̀‐mìà kpànazɛ̀ ɛ̃́ɛ̃́ Wálà kii‐dɔ‐mìàa o kɛ zi naapìà ó Zízɛ̀ zɛ. Ƃii o kɛ túópìà míáa lɛ̀ɛ.

³Lɛ̀ e kɛ kília, Sétɔ̃̀ e wàà gbaa Zúdà, lɛ́ ò si Ɛ̀sɛ̀kélìàa yí. Gɔ̃́ e kília e kɛ Zízɛ̀ là tòà‐píé‐mìà vũ̀ doó wɛ́lɛ́ pèèlɛɛ doó‐mì ká.

⁴Lɛ̀ e kɛ kília, Zúdà e ló sálà‐ɓò‐Wálà‐mɔ̀‐mìà kpànazɛ̀ɛ píé. Zúdà wà míáa nì, ɛ̃́ɛ̃́ nyìɛ‐kɛ̀‐Wálà‐kà‐mɔ̀‐mìà wũ‐là‐mìà nì o ló wũ‐dũ yí, kɛɛ é zi lɛ́ è lo Zízɛ̀ nɔɔ̀ à ká o lɛ̀ɛ wɔ̃̀ gèe.

⁵O gé kpó‐kpó e kɛ lipìà. O o wè dɔ kɛ ó pɛlèe nɔ Zúdà lɛ̀ɛ.

⁶Zúdà e wéé à mɔ̀. E gbɛ̃̀ gbaa, áà zi lɛ́ è lo Zízɛ̀ lé góòá, tó mi gbɛɛ lɛ̀ɛ́ à yí dɔɔ nàà.

⁷Belè lɛ́ belè‐fɔ̀ɔ‐pɛ̀ wá à bàa mɔ́ɔ̀ kpílìa, lúó lɛ́ e kɛ o mɔ̀ ó ɓáá nyɔ̀nɔ́ nì zɛ à ká Dìè‐mia‐là Kpílìa wɛ̃́ĩ̀a, e ɓɔ.

⁸Lɛ̀ e kɛ kília, Zízɛ̀ e Pílɛ̀ wà Zɔ̃̀ɔ̃́ o vɔ, áà gèè, “Kà lo ká kɔa zì Dìè‐mia‐là Kpílìa mɔ́ɔ̀ léɓèlè pɛ̀ kɛ, kɛ kɔ́á ɓèlè.”

⁹Wa gèe à lɛ̀ɛ, “Mɛ́ɛ lɛ́ ɓà nàà kó à pɛ̀ kɛ yí?”

¹⁰Zízɛ̀ a gèe o lɛ̀ɛ, “Kà ka tóó kɛ m mɔ̀. Yé kaà kɛ ɓɔpìà pɛlɛía, gɔ̃ doó lɛ́ɛ̀ lo gbɛ̃̀ɛ̃̀ ka mɔ̀. Múnú pà yíí ká zɛ̀, lɛ́ɛ̀ lo kɛɛ̀ à kɛ̀lɛ̀, áà lò à ká. Kà tó à píé, ká ló ká lɛ́ è lo wàà à wìa wì,

¹¹ká à gèe káa dàa‐mì lɛ̀ɛ kélɛ̀, ‘Tísɛ̀ láà gèe i lɛ̀ɛ, À zì lɔ̀ɔ̀‐mi‐kà lɛ́ wà là tòà‐píé‐mìà ò lo Dìè‐mia‐là Kpílìa mɔ́ɔ̀ pɛ ɓèlè yia, lɛ mɛ́?’

¹²Lɛ́ɛ̀ lo lɛ̀ gbùò dò zɔ̃̀ɔ̃̀ ka lɛ̀ɛ lɛ̀í‐kàa yí. Kɛ́ì‐pɔ̀ɔ̀ lɛ à lɛ̀ mɔ̀. Kà pɛ séĩ́ pɛ̀ kɛ à lɛ̀ mɔ̀.”

¹³Lɛ̀ e kɛ kília, o ló. O pɛ séĩ́ gɛ̃̀ nɔ́ lɛ̀ zí Zízɛ̀ a gèe à ká o lɛ̀ɛ lɛ́ ɓe. Yé e kɛ kília, o Dìè‐mia‐là Kpílì mɔ́ɔ̀ léɓèlè ò lo à ɓèlèa, pɛ̀ kɛ à lɛ̀ mɔ̀.

¹⁴Lɛ̀ lúó e ɓɔɔ, Zízɛ̀ wà là àpɔ́sɔ̀lɔ̀ vɔ̀ o yà téɓò mɔ̀.

¹⁵Zízɛ̀ a gèe o lɛ̀ɛ, “Maà naa à ká nyɔ́ɔ̀ɔ kɛ kɔ̀à ɓi nì kɔ́á Dìè‐mia‐là Kpílì e kéa pɛ̀ ɓèlè e kíe là kɛ ḿ tĩã́ wɔ̃́ nyɔ́ɔ̀ɔ gɛ̃̀ɛ̃̀.

¹⁶Kɛɛ ḿm̀ gèe ka lɛ̀ɛ, m̀ḿ ló à ɓèlè, é tóá kíli à yí kpó‐kpó é kɛ à mɔ̀ lɛ̀ lɛ́ Wálà tóò lɛ mia là yia mɔ̀.”

¹⁷Lɛ̀ e kɛ kília, e kɔ̀ɛ̀ɛ sí, e Wálà zúo ɓo, áà gèè, “Kà pɛ́ e kéa sí, ká yí gìnì ka kíe mɔ̀.

¹⁸Ƃii ḿm̀ gèe ka lɛ̀ɛ, é kã́ pɛ́nɛɛ mɔ̀, é ló líéa, m̀ḿ ló ɓɛ̀lɛ̀‐wɛ́lɛ́ ɓɛɛ yíí e kéa miì gbaa é tóá kíli Wálà zì tò‐mia‐là lùò é ɓɔ.”

¹⁹Lɛ̀ e kɛ kília, e bɛ̀i, e belèa sí, e Wálà zúo ɓo, a kpuú yɛ́ kélé kélé, a nɔ o lɛ̀ɛ, áà gèè, “M gbĩ‐kpàla [lɛ́ à nɔɔ̀ lɛ ka mɔ́ɔ̀ wɔ̃̀ mɔ̀ɔ, gɛ̃̀ e ké. Kà wɔ̃́ e kéa kɛ, kɛɛ ka zò é vùò m mɔ́ɔ̀ wɔ̃̀ ká.”

²⁰Zi doó e kília káa, e kɔ́pòa nɔ o lɛ̀ɛ lɛ̀ lɛ́ o nyɛ o lé ɓèlèaà mɔ̀ɔ ká, áà gèè, “Kɔ́pò e kéa lɛ́ e Wálà zì wè‐dɔ‐wè dɛɛ lɛ́ m léà lɛ́ à káà lɛ tã́ã̀ ka wɛ̃́ĩ̀a, lɛ à wɛ́lɛ́ káa káa.]

²¹“Kà lɛ̀ gɛ̃̀. Mi lɛ́ è lo m lé góòa, kò ye nì ko téɓòa mɔ̀.

²²Ƃii Mi Gbe lɛ́ɛ̀ lo gaà lɛ̀ zí Wálà aà gèe é kɛáa lɛ́ ɓe. Kɛɛ gɔ̃ lɛ́ è lo à lé góòa, é ké nìé, gɔ̃́ e kília mɔ́ɔ̀ wɔ̃̀ lɛ́ɛ̀ lo kɛɛ̀ yéĩ̀zɛ̀ò.”

²³Lɛ̀ e kɛ kília, o gbɛ̃̀ gbaa, wáà wɛ̃́ĩ́‐lɔ̀ɔ kɛ̀ o dìè píé píé kélɛ̀ dé è bɛ̀i à mɔ̀ é kɛ wɔ̃́ sùua kɛ‐mì ká.

²⁴Tòà‐píé‐mìàa o gbɛ̃̀ wáà wéé dɔ̀ o kíe nì ká, wáà gèè, “Deĩ̀ kpó‐kpó lɛ́ ò lo à gɛ̃̀ɛ̃̀ mi kpànazɛ̀ ká ko bà?”

²⁵Zízɛ̀ a gèe o lɛ̀ɛ, “Sɛ́lɛ́ líé‐sí‐mìà wà yíkɛ̀ gáàa lɛ wà mia nì là gágà. Ɛ́ɛ̃́ mia lɛ́ o o làa, óò o si Gbũ̀‐sɛ́lɛ́‐mɔ̀‐mìà.

²⁶Kɛɛ zí e kéa ye wá à ká ka ká. Kɛɛ mi lɛ́ lɛ ka bà lɛ́ lɛ kpànazɛ̀ɛ, lɛ à mɔ̀ é kɛ lɛ̀ nɛ́ tèáà là lɛ́ ɓe. Ɛ́ɛ̃́ mi yé è líé si ka káa, è kɛ lɛ̀ yɛɓo‐kɛ̀‐mia‐mɔ̀‐mì lɛ́ ɓe.

²⁷Dé e kpànazɛ̀, mi yé è yà tã́ã̀, áà pɛ ɓèlèa lɛ, ɛ̃́ɛ̃́ kɛ̀ yɛɓo‐kɛ‐mì yé è nu là léɓèlè káa lɛ? Ḿ gɔ̃̀, à yé è yà tã́ã̀a lɛ? Kɛɛ ma ké m ka fĩ̀ã̀a lɛ́ m kélɛ̀ yɛɓo‐kɛ‐mìa.

²⁸“Ka lɛ́ ka mia lɛ́ kaà kɛ m píé m zì yí‐dã́‐wɔ̃̀ séĩ́ yía káa.

²⁹Zi lɛ́ m Dàa aà yíkɛ̀ gáàa nɔá m lɛ̀ɛ kɛ ḿ kɛá mia làa, zi nɔ́ doóa ḿm̀ lo à kɛɛ̀á ka ká.

³⁰Káà lo pɛ ɓèlè, káà pɛ mì m̀ téɓò mɔ̀ lɛ̀ lɛ́ m tóò lɛ mia là yia mɔ̀. Ɛ́ɛ̃́ káà lo yàà dɔ‐táŋáná là, káà mɛ̀ĩ́‐sà dɔ̀ mia sùu doò do vũ̀ doó wɛ́lɛ́ pèèlɛ lɛ́ o Éézɛ̀lɛ̀‐mìà káa mɔ̀.

³¹“Sáímɔ̀, Sáímɔ̀, ì i tóó dɔ. Sétɔ̃̀ aà yíkɛ̀ gáàa sɔ̀lɔ̀ ɓo, kɛ é ka séĩ́ ka pìè lɛ̀ zí mia ò ɓu pìèáa lɛ́ ɓe.

³²Kɛɛ maà sɛ̀nɛ ɓo i mɔ́ɔ̀ wɔ̃̀ mɔ̀, yékɛ̀ i zì zò‐dɔ̀à‐mɔ̀ é kɛ tɛ́ɛ́‐tɛ̀ɛ̀. Kɛɛ yé ɓaà nìɛ̀ zeĩ́, ɓaà nu m píéa, ì i lèe‐gé vɔ̀ wɛ́lɛ́ dà o yí.”

³³Pílɛ̀ a gèe kélɛ̀, “M Dàa‐mì, m pɛ̀ kɛɛ̀ lɛ, kɛɛ kò ɓi kó ló bĩ́‐kɛ̀ì, ɛ̃́ɛ̃́ kò ɓi ko gaà mɔ́ɔ̀ wɔ̃̀ mɔ̀.”

³⁴Zízɛ̀ a gèe kélɛ̀, “Pílɛ̀, ḿm̀ gèe i lɛ̀ɛ, íì lo à gèeè pɛ́nɛɛ e kíe yí yààka kélɛ̀ ìí m dɔ, kɛ tɔ̀ɔ̀ é tĩã́ wéè.”

³⁵Lɛ̀ e kɛ kília, Zízɛ̀ a gèe o lɛ̀ɛ, “Lɛ̀ lɛ́ m ka vɔ, lɛ́ pɛlèe kàà‐yí‐pɛ̀, ɛ̃́ɛ̃́ lɛ́ gbòṹ, e bɛ̀i sàkpà, òó gbaa kɛ ka kɛ̀lɛ̀ɛ, lɛ̀ e kɛɛ, pɛ dò sã̀ã̀ dàaà e kɛá ka mɔ̀ kàáà?” Wa gèe à lɛ̀ɛ, “Gbàaò. Pɛ sã̀ã̀ dàaà lɛ̀ɛ́ gbaa kɛá ko mɔ̀.”

³⁶Zízɛ̀ a gèe kélɛ̀, “Kɛɛ mi lɛ́ pɛlèe kàà‐yí‐pɛ̀, ɛ̃́ɛ̃́ gbòṹ lɛ à kɛ̀lɛ̀ɛ, è à sí gbaa. Ɛ́ɛ̃́ zeĩ́, mi lɛ́ gèlè‐gɔ̃‐làà wá à kɛ̀lɛ̀ɛ, lɛ à mɔ̀ é e mɔ̀‐sɔ̀ lɔ̀ɔ̀ dɔ, á doó lɔ́.

³⁷Ƃii ḿm̀ wɔ̃́ e kéa gèe ka lɛ̀ɛ. Ye lɛ́ e kélɛ̀, wɔ̃́ lɛ́ à bɛ̃̀ɛ̃ɛ̃̀ lɛ Wálà kii yí, lɛ́ e kélɛ̀, ‘Wa dà kɛ‐pɛ̀ yɔɔ kɛ‐mìà bàa,’ lɛ à mɔ̀ m mɔ́ɔ̀ wɔ̃̀ á kɛ, é kɛ wánà zɛ̀. Ƃii wɔ̃́ lɛ́ à bɛ̃̀ɛ̃ɛ̃̀ lɛ, lɛ́ à gbɛ̃̀ɛ̃̀ lɛ m mɔ̀ɔ, lɛ kɛpìà wánà ká.”

³⁸Là tòà‐píé‐mìàa wa gèe à lɛ̀ɛ, “Ko Dàa‐mì, lɛ̀ gɛ̃̀, gèlè‐gɔ̃‐làà pèèlɛ gɛ̃̀ e ké.” Zízɛ̀ a gèe, “Aà bɛ̀i gbaa.”

³⁹Zízɛ̀ e gó pɛ́lɛɛ yí, e ló Ɔ́lè‐tɔ̃̀ũ̀ wĩĩ́, lɛ̀ zí à kɛ̀á teelea lɛ́ ɓe. Wà là tòà‐píé‐mìàa nì o ló.

⁴⁰Lɛ̀ e ɓɔ lɛ̀ e kília mɔ̀ɔ, a gèe o lɛ̀ɛ, “Kà sɛ̀nɛ ɓo, yékɛ̀ yí‐dã́‐wɔ̃̀ é ɓɔ ka mɔ̀.”

⁴¹Lɛ̀ e kɛ kília, e gó gbaa o píé, e ló o ká gbèĩ, lɛ̀ zí mi ì bɛ̀i à mɔ̀ í gɛ̀lɛ̀ dùò à káa zì lò‐gbèĩ‐kɔ̀ lɛ́ ɓe. E káá gbaa e kpuò là, áà sɛ̀nɛ ɓò weeá kélɛ̀,

⁴²“M Dàa, é kɛ̀á i zì nàà‐ká‐wɔ̃̀ káa, ì wɔ̃́ nyɔ́ɔ̀ɔ kɔ̀ɛ̀ e kéa ɓo m là. É kɛ bɛ̃̀ɛ̃ kília, ì wɔ̃́ lɛ́ ɓà nàà à káa kɛ. Kɛɛ yékɛ̀ í m zì nàà‐ká‐wɔ̃̀ kɛ.” [

⁴³Lɛ̀ e kɛ kília, Wálà là vɔ‐mì doó e gó lɛ̀í, e ɓíé à là, e à mɛ́ kɛ gágà.

⁴⁴Zò‐dà‐zízàá e kɛ Zízɛ̀ mɔ̀ kpó‐kpó ɓo yɔɔ. À mɔ́ɔ̀ wɔ̃̀ mɔ̀ɔ, a mɔ́ɔ̀ sɛ̀nɛ ɓo zeĩ́ mɛ́ gágà zɛ̀. À mɔ̀‐zũ̀ e kɛ lɛ̀ léà‐kpùlù lɛ́ ɓe, áà bã̀ tã́ã̀.]

⁴⁵Lɛ̀ Zízɛ̀ e nyɛ sɛ̀nɛ ɓoò mɔ̀, lɛ́ e wɛ̀lɛ̀ɛ, e ló e mɛ̀ĩ́ là tòà‐píé‐mìàa píé, e o gɛ̃̀ yi bà. Zò kɛ̀ yéĩ̀zɛ̀ a kɛ o káá yi ká.

⁴⁶A gèe o lɛ̀ɛ kélɛ̀, “Mɛ́ e kɛ lɛ́ kà yi zɛ ké? Kà wɛ̀lɛ̀, ká sɛ̀nɛ ɓo, yékɛ̀ yí‐dã́‐wɔ̃̀ é ɓɔ ka mɔ̀.”

⁴⁷Zízɛ̀ e kɛ tĩã́ wéépìà lɛ̀ lɛ́ mia kù o nu yía ká. Zúdà lɛ́ e kɛ tòà‐píé‐mìà vũ̀ doó wɛ́lɛ́ pèèlɛɛ doó‐mì káa, e kɛ o líé sípìà. E ló Zízɛ̀ ká kɔ̀ɛ́, kɛ é e bè gbɛ̃̀ à kpéĩ́ mɔ̀.

⁴⁸Kɛɛ Zízɛ̀ a gèe à lɛ̀ɛ kélɛ̀, “Zúdà, íì Mi Gbe lé go i bè gbɛ̃̀ à kpéĩ́ mɔ̀ ká?”

⁴⁹Lɛ̀ lɛ́ tòà‐píé‐mìà yé o kɛ Zízɛ̀ sɔ́nɔ́ɔ, o wɔ̃́ lɛ́ e kɛ lópìà kɛɛ̀ɛ gɛ̃̀ɛ, wa gèe kélɛ̀, “Ko Dàa‐mì, kó yà‐ɓo kɛ kò gèlè‐gɔ̃‐lààa ká?”

⁵⁰Yé e kɛ kília, o doó‐mì e sálà‐ɓò‐Wálà‐mɔ̀‐mìà wũ‐là‐mì là lùò yà e tóó mɔ̀. E à kɔ̀ yiè tóó e kília kã́ pɛ̃ĩ le.

⁵¹Kɛɛ Zízɛ̀ a gèe kélɛ̀, “Gbɛɛ áá gbaa kɛ.” E pá gɔ̃́ɛɛ tóó mɔ̀, e kɛ e kɛ‐zì ká.

⁵²Lɛ̀ e kɛ kília, Zízɛ̀ a gèe sálà‐ɓò‐Wálà‐mɔ̀‐mìà kpànazɛ̀, ɛ̃́ɛ̃́ nyìɛ‐kɛ̀‐Wálà‐kà‐mɔ̀‐mìàa wũ‐là‐mìà, e bɛ̀i, mia dìè‐dìè vɔ̀, lɛ́ o nuù e kɛá yi kɛ ó à kṹa lɛ̀ɛ kélɛ̀, “Káà nu gèlè‐gɔ̃‐làà wà mia mɛ̀‐yìlì‐kpuú nì ká, lɛ̀ mi lɛ́ è nu mi dà‐luú‐là zɛ̀ kṹũ̀?

⁵³M kɛ ka píé lúó búnù‐búnùzɛ̀ ká sálà‐ɓò‐Wálà‐lɛ̀ɛ‐kà wì. Kɛɛ kàá gbaa m kṹ. Kɛɛ ka bɛ̃̀ɛ̃, ka zì lúó wà lúó lɛ́ yíkɛ̀ gáàa lɛ à ká bĩ́ tii kɛ̀lɛ̀ mia làa lɛ́ ɓɛ.”

⁵⁴O Zízɛ̀ kṹ, o ló à ká sálà‐ɓò‐Wálà‐mɔ̀‐mìàa wũ‐là‐mìa píé kɛ́ì. Pílɛ̀ e kɛ Zízɛ̀ ká gbèkèni, áà tò à píé.

⁵⁵O tíé dà gàlà lɛ́ e ká e kília mɔ̀ɔ yí. Pílɛ̀ e dà gbaa mia lɛ́ o kɛ yàá tíé e kília mɔ̀ɔ bà.

⁵⁶Lɛ̀ yɛɓo‐kɛ‐loàa doó‐mì e Pílɛ̀ gɛ̃̀ yàá tíé mɔ̀ɔ, e lɛ̀ gɛ̃̀ à wɛlɛ yí sĩ́ĩ́ le, áà gèè, “Gɔ̃́ e kéa e kɛ à píé nɔ́ kíli.”

⁵⁷Kɛɛ Pílɛ̀ a tèé ɓo, áà gèè, “Lee, m̀ḿ à dɔ fèle ɓo.”

⁵⁸Lɛ̀ à lɛ̀ e túó ɓéĩ́ ɓoa, gɔ̃ doó bɛ̃̀ɛ̃ e à gɛ̃̀, áà gèè, “I o dò ká nɔ́ kíli.” Kɛɛ Pílɛ̀ a là nìɛ̀ weeá kélɛ̀, “Gɔ̃, ye wá kíli.”

⁵⁹Lɛ̀ pɛ́ è kɛ̀ kélɛ̀ áwà doóa e diea, gɔ̃ dò e mɛ́ĩ́ ɓo zeĩ́ gágà kélɛ̀, “Gɔ̃́ e kéa e kɛ à píé wánà kpó‐kpó ká, ɓii lɛ́ɛ̀ go Gálàlíìa mɔ́ɔ̀ wɔ̃̀ mɔ̀.”

⁶⁰Kɛɛ Pílɛ̀ a gèe kélɛ̀, “Gɔ̃, wɔ̃́ ɓà gèea, m̀ḿ à yí dɔ.” Lɛ̀ e kɛ nɔ́ kíli, lɛ́ Pílɛ̀ e kɛ tĩã́ wéépìàa, tɔ̀ɔ̀ áà wèè gbaa.

⁶¹Ko Dàa‐mì e nìɛ̀, e Pílɛ̀ gɛ̃̀. Lɛ̀ e kɛ kília, Pílɛ̀ zò e vùò wɔ̃́ lɛ́ ko Dàa‐mì aà à gèe à lɛ̀ɛ ká gbaa. Wɔ̃́ɔ lɛ́ e kélɛ̀, “Kɛ tɔ̀ɔ̀ é tĩã́ wéè pɛ́nɛɛ̀ɛ, íì lo à gèeè e kíe yí yààka kélɛ̀ ìí m dɔ.”

⁶²Lɛ̀ e kɛ kília, Pílɛ̀ e gó gbaa yí, áà gbóó ɓò gbaa wɛlɛ yɔɔ zɛ̀.

⁶³Gɔ̃à lɛ́ o kɛ o nyìɛ kɛpìà Zízɛ̀ mɔ̀ɔ, o yéí sí à mɔ̀, wáà à mɛ̀.

⁶⁴O sɔ kùnù à nyìɛ là, wáà gèè à lɛ̀ɛ, “Dé e i mɛ̀ ɓɛ? Mí e i mɛ̀ɛ tɔ́ gèe.”

⁶⁵Ɛ́ɛ̃́ o o wè sí à mɔ̀ píé.

⁶⁶Lɛ̀ lɛ̀ e kpɛ̀ia, Zúù‐mìà dìè‐dìè vɔ̀, ɛ̃́ɛ̃́ sálà‐ɓò‐Wálà‐mɔ̀‐mìà kpànazɛ̀, e bɛ̀i, Wálà kii‐dɔ‐mìàa o pá o kíe mɔ̀. Lɛ̀ e kɛ kília, o ló Zízɛ̀ ká wà mɛ̀ĩ́‐sà ɓo‐mìà wɛlɛ mɔ̀.

⁶⁷Wa gèe à lɛ̀ɛ kélɛ̀, “É kɛ̀á ɓi lɛ́ i Kɛ́lɛ̀ì káa, ì à gèe ko lɛ̀ɛ.” Zízɛ̀ a gèe o lɛ̀ɛ kélɛ̀, “Ḿ gèeá ka lɛ̀ɛ, kàá ló m wúú gɛ̃̀ wánà ká.

⁶⁸Ɛ́ɛ̃́ ḿ wɛ̃́ĩ́‐lɔ̀ɔ kɛ̀á ka kɛ̀lɛ̀ɛ, kàá ló à yí ɓoò.

⁶⁹Kɛɛ é kã́ pɛ́nɛɛ mɔ̀ é ló líéa, Mi Gbe lɛ́ɛ̀ lo kɛɛ̀ yàá Wálà lɛ́ yíkɛ̀ gáàa lɛ à kɛ̀lɛ̀ɛ kɔ̀ yiè yí.”

⁷⁰O séĩ́ wa gèe kélɛ̀, “Ƃi lɛ́ i mɔṹ Wálà Gbe káa?” Zízɛ̀ a gèe o lɛ̀ɛ, “Káà à gèe m à ká.”

⁷¹Lɛ̀ e kɛ kília, wa gèe kélɛ̀, “Mɛ́ kò mɔ́ɔ̀ kélá naa ɓo ɓɛ? Ko séĩ́ kɔaà à dìè lé‐wè ma.”