Read Yamano Lúù 3 Bible Online

Lúù 3 - Yamano bible

Lúù 3

¹E kɛ Tàbílìà Sízà zì kɛ̀‐mia‐là kɛ̀ɛ̀ vũ̀ doó wɛ́lɛ́ sɔ́ɔ́li kɛ̀ɛ̀ ká. Pɔ̃́sɔ̀ Pálɛ̀ e kɛ Zùdíà‐sɛ̀lɛ̀ yí‐mìà wũ‐là‐mì ká. Hɛ́lɔ̀ e kɛ Gálàlíì‐sɛ̀lɛ̀ líé‐sí‐mì ká. Hɛ́lɔ̀ lèe‐gé Félè bɛ̃̀ɛ̃, e kɛ sɛ́lɛ́ lɛ́ ò si Itùlíà wà Takònátàa líé‐sí‐mì ká. Làsánìà bɛ̃̀ɛ̃ e kɛ sɛ́lɛ́ lɛ́ ò si Abìlínìa líé‐sí‐mì ká.

²Aná wà Káyáfà o kɛ sálà‐ɓò‐Wálà‐mɔ̀‐mìà wũ‐là‐mìà ká. Lúó e kéa káa, ye lɛ́ Wálà lé‐wè nɔɔ̀ e kɛá Zɔ̃̀ɔ̃́ lɛ́ e kɛ Zɛkèláyà gbe káa lɛ̀ɛ yɛ̀í làa.

³Zɔ̃̀ɔ̃́ e ló sɛ́lɛ́ séĩ́ lɛ́ e kɛ Zɔ́dã̀‐yìì sɔ́nɔ́ɔ yí píé, áà lò lòũ̀ ɓòá sí weeá kélɛ̀, lɛ sɛ̀ mia ó o sɔ̃̀ɔ̃ yɔɔ mɛ́ vɔ̀ɔ, ó o bàtáì kɛ, kɛɛ Wálà é o kɛ‐wɔ̃̀ yɔɔ ɓo o wũ mɔ̀.

⁴Zi lɛ́ à bɛ̃̀ɛ̃ɛ̃̀ lɛ à ká Ààzáyà lɛ́ e kɛ dɔ̀‐Wálà‐lé‐là‐mì káa, là kíía yía, gɛ̃̀ e ké. “Mi dò gbɛ́ɛ́‐wè lɛ́ɛ̀ dɔ yɛ̀í là, áà gbɛ̀ɛ̀ weeá kélɛ̀, ‘Kà zía pɛ̀ kɛ kɔa Dàa‐mì lɛ̀ɛ, kà à kɛ zía é dɔ kpeĩ.

⁵Lɛ à mɔ̀ ó goo séĩ́ yí pa. Lɛ à mɔ̀ ó tɔ̃̀ũ̀ nyɔ̀nɔ́, e bɛ̀i, à gbùò nì séĩ́ kɛ é kɛ tɛ́nɛ́‐tɛ̀nɛ̀. Lɛ à mɔ̀ ó zi kpɛ́nɛ̀ɛ kɛ é dɔ kpeĩ. Ɛ́ɛ̃́ lɛ à mɔ̀ ó zi yɔ́sɔ́‐yɔ̀sɔ̀ zɛ̀ kɛ é kɛ sɛ̀.

⁶Mia séĩ́ óò lo Wálà là mia lapìà gɛ̃̀ɛ̃̀.’ ”

⁷Mia kù gbùò zɛ̀ o nu Zɔ̃̀ɔ̃́ píé kɛ é o bàtáì kɛ. A gèe o lɛ̀ɛ, “Mɛ̀nɛ là nɔ́ɔ̀ ka ké ɓɛ. Dé a gèe ka lɛ̀ɛ kélɛ̀ káà lo wàà Wálà là wɔ̃́à‐wàa‐kɔ̀ lɛ́ è lo nuùa mɔ̀?

⁸Kà wɔ̃́ lɛ́ è lo à zɔ̃̀ɔ̃̀ kélɛ̀ kaà ka sɔ̃̀ɔ̃ yɔɔ mɛ́ vɔ̀ɔ kɛ. Yékɛ̀ ká gbɛ̃̀, káà gèè ka kíe nì lɛ̀ɛ, ‘Éɓɔ́lɔ́hã́ã̀ lɛ ko dàa ye dàà ká.’ Ḿm̀ bɛ̀i à mɔ̀ ḿ gèe ka lɛ̀ɛ kélɛ̀, Wálà lɛ́ɛ̀ bɛ̀i à mɔ̀ é gɛ̀lɛ̀ nì e kéa sí, é o kɛ Éɓɔ́lɔ́hã́ã̀ sùu‐là‐mìà ká.

⁹Gbɔ̀ɔ lɛ́ è lo yílí kã́ã̀ e gáná yí kpó‐kpó mɔ̀ɔ, à pɛ̀ kɛɛ̀ lɛ. Yílí séĩ́ lɛ́ lɛ̀ɛ́ ló ɓaà e ɓɛɛ yiè káa, óò lo à kã́ã̀, tó wa dùò tíé yí.”

¹⁰Míáa wa wɛ̃́ĩ́‐lɔ̀ɔ kɛ kélɛ̀, “Mɛ́ mɔṹ e ko mɔ̀ kó kɛ?”

¹¹A yí zṹ o lɛ̀ɛ kélɛ̀, “Mi lɛ́ sɔ pèèlɛ lɛ à kɛ̀lɛ̀, lɛ́ à gbɛɛ wá à ɓɛ́ɛ‐mì kɛ̀lɛ̀ɛ, è à doó nɔ à lɛ̀ɛ. Ɛ́ɛ̃́ mi lɛ́ léɓèlè lɛ à kɛ̀lɛ̀ɛ, è e ɓɛ́ĩ̀ gba à dò ká.”

¹²Ƃo‐pɛ̀ ɓo‐mìà dò o nu Zɔ̃̀ɔ̃́ píé kɛ é o bàtáì kɛ. O à wɛ̃́ĩ́‐lɔ̀ɔ kɛ weeá kélɛ̀, “Tísɛ̀, mɛ́ lɛ ko mɔ̀ kó kɛ?”

¹³A gèe o lɛ̀ɛ, “Yékɛ̀ ká pɛ́ ò gèe ó ɓoa là kpɔ́ ka dìè lɛ̀ɛ.”

¹⁴Sóyà vɔ̀ dò bɛ̃̀ɛ̃ o à wɛ̃́ĩ́‐lɔ̀ɔ kɛ, wáà gèè, “Ko bɛ̃̀ɛ̃? Mɛ́ e ko mɔ̀ kó kɛ?” A gèe o lɛ̀ɛ, “Yékɛ̀ ká pɛlèe kṹ mi nɔ́ɔ fé dò kɛ̀lɛ̀ gana ká. Ɛ́ɛ̃́ yékɛ̀ ká wɔ̃́ lɛ́ mi lɛ̀ɛ́ gbaa à kɛɛ, kpɔ́ à wĩĩ́. Ka zò è dà ka fɔ́nɔ́ píé.”

¹⁵Mia ɓéèe zò e vùò wɔ̃́ lɛ́ e kɛ à mɔ̀ é kɛɛ mɔ́ɔ̀ wɔ̃̀ ká. O gbɛ̃̀ gbaa, wáà o yɛ́lɛ́ tàà Zɔ̃̀ɔ̃́ gbĩ mɔ̀, wáà gɛ̃̀ ɓɔ̀ɔ kélɛ̀ à ye lɛ́ e Kɛ́lɛ̀ì káa.

¹⁶Lɛ̀ e kɛ kília, Zɔ̃̀ɔ̃́ a gèe o séĩ́ o lɛ̀ɛ, “Ḿm̀ ka bàtáì kɛ̀ yíí ká. Kɛɛ mi yé à zì yíkɛ̀‐gágà‐kɔ̀ diè lɛ m zìa làa, lɛ nupìà. Ma wá bɛ̃̀ɛ̃ kpeĩ kɛ ḿ là bàá‐ɓɛ̀lɛ̀ fóló bɛ̃̀ɛ̃. Lɛ́ɛ̀ lo ka bàtáì kɛɛ̀ Gɛ̀ɛ̀ Púlú wà tíé o ká.

¹⁷Là ɓu‐pìè‐pɛ̀ lɛ à kɛ̀lɛ̀, kɛ é ɓu séĩ́ pìè à ká. Yé aà kɛ kília, tó à lɛ̀ yé e ɓu káa, a pá e kíe mɔ̀, tó a yà à yàlà bɛ̀ipìà. Kɛɛ lɛ́ɛ̀ lo ɓu tòlòa síì, a gélé tíé lɛ́ lɛ̀ɛ́ bɛ̀i númíàa ká.”

¹⁸Zɔ̃̀ɔ̃́ e lìè‐wè dɔ zi búnù‐búnùzɛ̀ ká mia lɛ̀ɛ, lɛ̀ lɛ́ e kɛ wɔ̃́ làṹ yièa gèepìà o lɛ̀ɛ ká.

¹⁹Kɛɛ Zɔ̃̀ɔ̃́ e wɔ̃́ gèe sɛ́lɛ́ líé‐sí‐mì Hɛ́lɔ̀ lɛ̀ɛ, ɓii Hɛ́lɔ̀ e e lèe‐gé na, lɛ́ ò si Hɛ̀lódìàa a sí é kɛ à na ká, ɛ̃́ɛ̃́ áà wɔ̃́ yɔɔ doò do bɛ̃̀ɛ̃ kɛ̀ nɔ́ kíli.

²⁰É kã́ wɔ̃́ nì e kéa mɔ̀ɔ, Hɛ́lɔ̀ a yɔɔ doó kɛ zeĩ́. Ye lɛ́ e kélɛ̀, Zɔ̃̀ɔ̃́ dùò a ɓo bĩ́‐kɛ̀ìa.

²¹Lɛ̀ lɛ́ o nyɛ míáa séĩ́ bàtáì kɛɛ̀ mɔ̀ɔ, o Zízɛ̀ bɛ̃̀ɛ̃ bàtáì kɛ nɔ́ kíli. Lɛ̀ e kɛ sɛ̀nɛ ɓopìàa, lɛ̀í lé e ɓo.

²²Ɛ́ɛ̃́ Gɛ̀ɛ̀ Púlú e nu à là pɛ dò kpàáà yí lɛ̀ tèŋè lɛ́ ɓe. Lɛ̀ e kɛ kília, wéé dò e gó Wálà‐pà weeá kélɛ̀, “Ƃi lɛ́ i m̀ lɔ̀‐kɛ̀á‐nɛ̀ káa. M zò dàà lɛ i píé.”

²³Lɛ̀ Zízɛ̀ e gbɛ̃̀ e kɛ‐yɛ̀ɓo kɛɛ̀ mɔ̀ɔ, kɛɛ à kɛ̀ɛ̀ aà kɛ vũ̀ yààka lèĩ. Mia óò o yɛ́lɛ́ tàà kélɛ̀ Zízɛ̀ lɛ Zósɛ̀ gbe ká. Zósɛ̀ bɛ̃̀ɛ̃ e kɛ Hílì gbe ká.

²⁴Hílì bɛ̃̀ɛ̃ e kɛ Mátà gbe ká. Mátà bɛ̃̀ɛ̃ e kɛ Lííváì gbe ká. Lííváì bɛ̃̀ɛ̃ e kɛ Mɛ́kì gbe ká. Tó Mɛ́kì bɛ̃̀ɛ̃, e kɛ Zánà gbe ká. Zánà bɛ̃̀ɛ̃ e kɛ Zósɛ̀ gbe ká.

²⁵Zósɛ̀ bɛ̃̀ɛ̃ e kɛ Matàtáyà gbe ká. Matàtáyà e kília bɛ̃̀ɛ̃ e kɛ Émɔ̀ gbe ká. Émɔ̀ bɛ̃̀ɛ̃ e kɛ Néɔ̀ gbe ká. Néɔ̀ bɛ̃̀ɛ̃ e kɛ Ɛ́sè gbe ká. Ɛ́sè bɛ̃̀ɛ̃ e kɛ Nágà gbe ká.

²⁶Nágà bɛ̃̀ɛ̃ e kɛ Méà gbe ká. Méà bɛ̃̀ɛ̃ e kɛ Matàtáyà gbe ká. Matàtáyà bɛ̃̀ɛ̃ e kɛ Sɛ́míà gbe ká. Sɛ́míà bɛ̃̀ɛ̃ e kɛ Zósɛ̀ gbe ká. Zósɛ̀ bɛ̃̀ɛ̃ e kɛ Zódà gbe ká.

²⁷Zódà bɛ̃̀ɛ̃ e kɛ Zòánà gbe ká. Zòánà e kília e kɛ Lísà gbe ká. Lísà bɛ̃̀ɛ̃ e kɛ Zàlábábò gbe ká. Zàlábábò bɛ̃̀ɛ̃ e kɛ Sìátíà gbe ká. Sìátíà bɛ̃̀ɛ̃ e kɛ Nílè gbe ká.

²⁸Nílè e kília, e kɛ Mɛ́kì gbe ká. Mɛ́kì bɛ̃̀ɛ̃ e kɛ Ádì gbe ká. Ádì bɛ̃̀ɛ̃ e kɛ Kósɔ̃̀ gbe ká. Kósɔ̃̀ bɛ̃̀ɛ̃ e kɛ Ɛmádà gbe ká. Ɛmádà bɛ̃̀ɛ̃ e kɛ Ɛ́ɛ̀ gbe ká.

²⁹Ɛ́ɛ̀ bɛ̃̀ɛ̃ e kɛ Zásùà gbe ká. Zásùà bɛ̃̀ɛ̃ e kɛ Ɛ̀lézà gbe ká. Ɛ̀lézà bɛ̃̀ɛ̃ e kɛ Zɔ́lì gbe ká. Zɔ́lì bɛ̃̀ɛ̃ e kɛ Mátà gbe ká. Mátà bɛ̃̀ɛ̃ e kɛ Lííváì gbe ká.

³⁰Lííváì bɛ̃̀ɛ̃ e kɛ Símìà gbe ká. Símìà bɛ̃̀ɛ̃ e kɛ Zúdà gbe ká. Zúdà bɛ̃̀ɛ̃ e kɛ Zósɛ̀ gbe ká. Zósɛ̀ bɛ̃̀ɛ̃ e kɛ Zónìà gbe ká. Zónìà bɛ̃̀ɛ̃ e kɛ Ìláyákɛ̀ gbe ká.

³¹Ìláyákɛ̀ bɛ̃̀ɛ̃ e kɛ Mélìà gbe ká. Mélìà bɛ̃̀ɛ̃ e kɛ Mɛ́nà gbe ká. Mɛ́nà bɛ̃̀ɛ̃ e kɛ Màtátà gbe ká. Màtátà bɛ̃̀ɛ̃ e kɛ Nétɔ̃̀ gbe ká. Nétɔ̃̀ bɛ̃̀ɛ̃ e kɛ Dèɓé gbe ká.

³²Dèɓé bɛ̃̀ɛ̃ e kɛ Zɛ́sè gbe ká. Zɛ́sè bɛ̃̀ɛ̃ e kɛ Óbɛ̀ gbe ká. Óbɛ̀ bɛ̃̀ɛ̃ e kɛ Bóà gbe ká. Bóà bɛ̃̀ɛ̃ e kɛ Sámà gbe ká. Sámà bɛ̃̀ɛ̃ e kɛ Násɔ̃̀ gbe ká.

³³Násɔ̃̀ bɛ̃̀ɛ̃ e kɛ Àmínádà gbe ká. Àmínádà bɛ̃̀ɛ̃ e kɛ Ádɛ̃̀ gbe ká. Ádɛ̃̀ bɛ̃̀ɛ̃ e kɛ Ánì gbe ká. Ánì bɛ̃̀ɛ̃ e kɛ Hɛ́zɔ̃̀ gbe ká. Hɛ́zɔ̃̀ bɛ̃̀ɛ̃ e kɛ Pílì gbe ká. Pílì bɛ̃̀ɛ̃ e kɛ Zúdà gbe ká.

³⁴Zúdà bɛ̃̀ɛ̃ e kɛ Zékɔ̀ gbe ká. Zékɔ̀ bɛ̃̀ɛ̃ e kɛ Áázè gbe ká. Áázè bɛ̃̀ɛ̃ e kɛ Éɓɔ́lɔ́hã́ã̀ gbe ká. Éɓɔ́lɔ́hã́ã̀ bɛ̃̀ɛ̃ e kɛ Tílà gbe ká. Tílà bɛ̃̀ɛ̃ e kɛ Néhɔ̀ gbe ká.

³⁵Néhɔ̀ bɛ̃̀ɛ̃ e kɛ Sígà gbe ká. Sígà bɛ̃̀ɛ̃ e kɛ Líù gbe ká. Líù bɛ̃̀ɛ̃ e kɛ Pɛ́lè gbe ká. Pɛ́lè bɛ̃̀ɛ̃ e kɛ Ébà gbe ká. Ébà bɛ̃̀ɛ̃ e kɛ Sílà gbe ká.

³⁶Sílà bɛ̃̀ɛ̃ e kɛ Kánà gbe ká. Kánà bɛ̃̀ɛ̃ e kɛ Àfásà gbe ká. Àfásà bɛ̃̀ɛ̃ e kɛ Sĩ́ã̀ gbe ká. Sĩ́ã̀ bɛ̃̀ɛ̃ e kɛ Nóà gbe ká. Nóà bɛ̃̀ɛ̃ e kɛ Lámɛ̀ gbe ká.

³⁷Lámɛ̀ bɛ̃̀ɛ̃ e kɛ Màtúsúlà gbe ká. Màtúsúlà bɛ̃̀ɛ̃ e kɛ Ínɔ̀ gbe ká. Ínɔ̀ bɛ̃̀ɛ̃ e kɛ Zɛ́lè gbe ká. Zɛ́lè bɛ̃̀ɛ̃ e kɛ Màhálálìò gbe ká. Màhálálìò bɛ̃̀ɛ̃ e kɛ Kánà gbe ká.

³⁸Kánà bɛ̃̀ɛ̃ e kɛ Énɔ̀ gbe ká. Énɔ̀ bɛ̃̀ɛ̃ e kɛ Sɛ́ɛ̀ gbe ká. Sɛ́ɛ̀ bɛ̃̀ɛ̃ e kɛ Ádã̀ gbe ká. Lɛ́ Ádã̀ bɛ̃̀ɛ̃ e kɛ gbaa Wálà gbe káa.