Read Yamano Lúù 4 Bible Online

Lúù 4 - Yamano bible

Lúù 4

¹Zízɛ̀ paà e kɛá Gɛ̀ɛ̀ Púlú ká lɛ̀ e gó Zɔ́dã̀‐yìì bàa ká. Gɛ̀ɛ̀ Púlú e Zízɛ̀ líé sí, áà lò à ká yɛ̀í là.

²E kɛ lɛ̀ e kília mɔ̀ lúó vũ̀ yììsɛ píé. Dɛ́ɓò e kɛ à yí dã́pìà. Lúó e kília píéa, lɛ̀ɛ́ gbaa pɛ gbɛɛ ɓèlè. Lɛ̀ à kɛ̀‐yi‐lùò e nyɛɛ, lɔ̀ɔ e kɛ à kɛpìà.

³Dɛ́ɓò a gèe à lɛ̀ɛ kélɛ̀, “É kɛ̀á i Wálà Gbe káa, ì à gèe gɛ̀lɛ̀ e kéa lɛ̀ɛ é kɛ belè ká.”

⁴Zízɛ̀ a là nìɛ̀ weeá kélɛ̀, “À bɛ̃̀ɛ̃ɛ̃̀ lɛ Wálà là kíía yí kélɛ̀, ‘Mi ìí bɛ̀i kɛɛ̀ ɓe belè dòló là.’ ”

⁵Lɛ̀ e kɛ kília, Dɛ́ɓò e à sí, e ló à ká lɛ̀í, e kpóṹ là zèe lɛ̀ séĩ́ lɛ́ sɛ́lɛ́ líé‐sí‐mìà o kɛ o líé sípìàa, zɔ̃̀ɔ̃̀ à lɛ̀ɛ nɔ́ zá le.

⁶Dɛ́ɓò a gèe à lɛ̀ɛ, “Ḿm̀ lo yíkɛ̀ gáàa wà dɔ‐pɔ̀ɔ̀ séĩ́ e kéa nɔɔ̀ i lɛ̀ɛ. À séĩ́‐séĩ́ nɔɔ̀ e kɛá m lɛ̀ɛ. Ḿm̀ bɛ̀i à mɔ̀ ma nɔ mi nɔ́ɔ fé lɛ́ m̀ nàà ḿ sía lɛ̀ɛ.

⁷À mɔ́ɔ̀ wɔ̃̀ mɔ̀ɔ, yé ɓaà gbini m lɛ̀ɛ, pɔɔ̀ nì o kília séĩ́ lɛ́ɛ̀ lo kɛɛ̀ ɓà pɛ ká.”

⁸Zízɛ̀ a là nìɛ̀ weeá kélɛ̀, “À bɛ̃̀ɛ̃ɛ̃̀ lɛ Wálà là kíía yí kélɛ̀, ‘Ì gbini i Dàa‐mì lɛ́ e ɓà Wálà káa lɛ̀ɛ. Ì kɛ à doó là yɛɓo‐kɛ‐mì ká.’ ”

⁹Lɛ̀ e kɛ kília, Dɛ́ɓò e à sí, e ló à ká Zùlúsàlɛ̀. E ló a yà sálà‐ɓò‐Wálà‐lɛ̀ɛ‐kà gbãã̀ lɛ̀í gbèkèni, áà gèè à lɛ̀ɛ, “É kɛ̀á i Wálà Gbe káa, ì gó lɛ̀ e kéa mɔ̀, í dà tã́ã̀.

¹⁰Ƃii à bɛ̃̀ɛ̃ɛ̃̀ lɛ Wálà là kíía yí kélɛ̀, ‘Wálà lɛ́ɛ̀ lo à gèeè là vɔ‐mìà lɛ̀ɛ ó o nyìɛ kɛ i mɔ̀.’

¹¹Ɛ́ɛ̃́ à bɛ̃̀ɛ̃ɛ̃̀ lɛ zeĩ́ kélɛ̀, ‘Óò lo o kɔ̀ yàà i wì, yékɛ̀ gɛ̀lɛ̀ é i gã̀ gĩ̀ĩ.’ ”

¹²Zízɛ̀ e à là nìɛ̀ weeá kélɛ̀, “À bɛ̃̀ɛ̃ɛ̃̀ lɛ Wálà là kíía yí kélɛ̀, ‘Yékɛ̀ í i Dàa‐mì lɛ́ e ɓà Wálà káa yí dã́.’ ”

¹³Lɛ̀ Dɛ́ɓò e nyɛ Zízɛ̀ yí dã́ã̀ mɔ̀ zi séĩ́ káa, e gó nɛ́ à mɔ̀.

¹⁴Lɛ̀ e kɛ kília, Zízɛ̀ e ló e mɛ̀ĩ́ Gálàlíì. Gɛ̀ɛ̀ Púlú zì yíkɛ̀ gáàa e kɛ à píé. Wɔ̃́ lɛ́ à gbɛ̃̀ɛ̃̀ e kɛá à mɔ̀ɔ, làṹ e wɛ̃̀ĩ sɛ́lɛ́ e kília yí lɛ̀ séĩ́ mɔ̀.

¹⁵E pɛ zɔ̃̀ɔ̃̀ mia lɛ̀ɛ Zúù‐mìà zì Wálà‐kàa wì píé, mia séĩ́‐séĩ́ wáà à tɔ́ lì.

¹⁶Lɛ̀ e kɛ kília, Zízɛ̀ e ló Názàlɛ̀, lɛ́ wa tòlò yia mɔ̀. Lɛ̀ fĩ́ĩ́‐dɔ‐lùò e ɓɔɔ, e ló Zúù‐mìà zì Wálà‐kàa wì. Zía lɛ́ e kɛ à kɛpìà à ká teelea. E dɔ e gã̀ mɔ̀, kɛ é Wálà kiia gèe.

¹⁷O dɔ̀‐Wálà‐lé‐là‐mì Ààzáyà là kíía dɔ̀ kɛ à kɛ̀lɛ̀. E à fóló, e lɛ̀ lɛ́ wɔ̃́ e kéa bɛ̃̀ɛ̃ɛ̃̀ e kɛá yia gɛ̃̀. Ye lɛ́ e kélɛ̀,

¹⁸“Ko Dàa‐mì là Gɛ̀ɛ̀ lɛ m là. Ƃii aà m sí, kɛ ḿ wɔ̃́ làṹ yièa gèe mia lɛ́ pɛ wá o kɛ̀lɛ̀ɛ lɛ̀ɛ. Aà m vɔ kɛ ḿ mi‐la‐wɔ̃̀ gèe bĩ́‐kɛ̀ì‐mìà lɛ̀ɛ lòũ̀ ká, ɛ̃́ɛ̃́ kɛ ḿ gèe mia lɛ́ o nyìɛ káà lɛɛ lɛ̀ɛ kélɛ̀ óò lo lɛ̀ gɛ̃̀ɛ̃̀ zeĩ́. Ɛ́ɛ̃́ zeĩ́, e m vɔ kɛ ḿ mia lɛ́ ò o lùò‐là kɛ̀ ɓoa, ɓo wɔ̃́ yí,

¹⁹ɛ̃́ɛ̃́ kɛ ḿ kɛ̀ɛ̀ lɛ́ ko Dàa‐mì è lo là mia nì laà à káa wɔ̃̀ gèe lòũ̀ ká.”

²⁰Zízɛ̀ e kíí e kília kpɛ́nɛ́ zeĩ́, e à dɔ̀ kɛ lò‐à‐ká‐mì kɛ̀lɛ̀. Lɛ̀ e kɛ kília, e yà tã́ã̀. Mia séĩ́ lɛ́ o kɛ Wálà‐kà e kília wìa, o kɛ nɔ́ à gɛ̃̀pìà sĩ́ĩ́ le.

²¹E gbɛ̃̀ gbaa, áà mɛ́ĩ́ ɓò o lɛ̀ɛ weeá kélɛ̀, “Wálà kii lɛ̀ à yé e kéa aà kɛ gbaa wánà zɛ̀ pɛ́nɛɛ lɛ̀ zí nɔ́ ka gèe‐wè ma à káa lɛ́ ɓe.”

²²Míá o kɛ yía séĩ́ o zò e dà à píé, ɛ̃́ɛ̃́ à zì wɔ̃́‐gèe‐kɔ̀ ɓɛ̀lɛ̀ɛ zɛ̀ nì ɓɛ, a kɛ o lé e pa. O à gèe kélɛ̀, “Ḿ gɔ̃̀, Zósɛ̀ gbe lɛ́ɛ?”

²³A gèe o lɛ̀ɛ, “Ḿm̀ à yí dɔ kélɛ̀ káà lo pĩ̀ã̀ e kéa vɔɔ̀ m lɛ̀ɛ. Ye lɛ́ e kélɛ̀, ‘Nyìɛ̀‐kɛ‐mì, ì i dìè nyìɛ̀ kɛ.’ Ɛ́ɛ̃́ zeĩ́, ‘Wɔ̃́ lɛ́ kɔa ma kélɛ̀ ɓa kɛ Kàpɛ́nìɛ̀ɛ, ì wɔ̃́ nɔ́ doóa kɛ i dìè pà zèe.’ ”

²⁴Zízɛ̀ a gèe zeĩ́, “Òó o kɔ̀ yà dɔ̀‐Wálà‐lé‐là‐mì wì e dìè pà. Ɛ́ɛ̃́ lɛ wánà ká lɛ́ m̀ gèea.

²⁵Ḿm̀ gèe ka lɛ̀ɛ, gã̀ã loà búnùzɛ̀ o kɛ Éézɛ̀lɛ̀ lɛ̀ lɛ́ Ìláyà e kɛ à yía ká wánà ká. Lúó e kília káa, lɛ̀ɛ lɛ̀ɛ́ gbaa kɛ ɓe kɛ̀ɛ̀ yààka wà à lé‐gbú píé. Nyu‐kèlè‐ɓo‐lɔ̀ɔ̀ dàaà e kɛá sɛ́lɛ́ɛ yí lɛ̀ séĩ́ mɔ̀.

²⁶É kɛ bɛ̃̀ɛ̃ kília, Ìláyà vɔɔ̀ lɛ̀ɛ́ gbaa kɛá o dò nɔ́ɔ fé píé, é kã́ gã̀ã lee yé e kɛ pɛ́lɛ lɛ́ ò si Záláfà, lɛ́ e kɛ Sádã̀‐sɛ̀lɛ̀ yía mɔ̀ɔ ká.

²⁷Ɛ́ɛ̃́ zeĩ́, gbéè‐mìà búnùzɛ̀ o kɛ Éézɛ̀lɛ̀ dɔ̀‐Wálà‐lé‐là‐mì Ìlásà kɛ̀‐à‐yí lùò ká. É kɛ bɛ̃̀ɛ̃ kília, o dò nɔ́ɔ fé lɛ̀ɛ́ gbaa la, é kã́ Néémà lɛ́ e kɛ Sílìà‐mì káa mɔ̀ɔ ká.”

²⁸Lɛ̀ mia séĩ́ lɛ́ o kɛ Zúù‐mìà zì Wálà‐kà e kília wìa, o wɔ̃́ɔ maa, wɔ̃́ e o wàa kpó‐kpó ɓo.

²⁹O wɛ̀lɛ̀, o dɔ o gã̀ mɔ̀. O Zízɛ̀ gã́ã́ tã́ã̀, wáà ɓɔ̀á pɛlɛí. O à kṹ, o ló à ká tɔ̃̀ũ̀ lɛ́ o pà dɔɔ̀ e kɛá à wìa wĩĩ́, kɛ ó à dùò à goo yí.

³⁰Kɛɛ e là fɔ̃́ ɓo mia fĩ̀ã̀, e là ló ɓo.

³¹Lɛ̀ e kɛ kília, Zízɛ̀ e ló pɛ́lɛ lɛ́ ò si Kàpɛ́nìɛ̀, lɛ́ e Gálàlíìa yí. E pɛ zɔ̃̀ɔ̃̀ míá o kɛ yía lɛ̀ɛ fĩ́ĩ́‐dɔ‐lùò ká.

³²Míá o kília, o lé e pa pɛ‐zɔ̃̀ɔ̃̀‐kɔ̀ lɛ́ Zízɛ̀ e kɛ à zɔ̃̀ɔ̃̀pìàa mɔ́ɔ̀ wɔ̃̀ ká, ɓii yíkɛ̀ gáàa e kɛ à lé‐wè kɛ̀lɛ̀.

³³Gɔ̃ doó e kɛ Zúù‐mìà zì Wálà‐kà e kília wìa, pɛ yɔɔ e kɛ à píé. E e wúú wɛ̀lɛ̀ lɛ̀í, áà gbɛ̀ɛ̀ kélɛ̀,

³⁴“Yée, Zízɛ̀ lɛ́ ì go Názàlɛ̀ ɓɛ, mɛ́ ɓà nàà ko píé? I nuù lɛ zèe kɛ í ko yí sìè? Ƃí i dɔ ɓɛ, ḿm̀ i dɔ. I Wálà zì mi púlú ká.”

³⁵Lɛ́ Zízɛ̀ e mɛ́ĩ́ ɓo pɛ́ɛ lɛ̀ɛ weeá kélɛ̀, “I lɛ̀à ga, í gó gɔ̃́ɔ píé.” Lɛ̀ e kɛ kília, pɛ yɔɔ e gɔ̃́ɛɛ mɛ̀ tã́ã̀ míáa nyìɛ mɔ̀, áà gò à píé. Ɛ́ɛ̃́ lɛ̀ɛ́ gbaa gɔ̃́ɛɛ mɛ́ gĩ̀ĩ.

³⁶Míá o kɛ yía, o séĩ́ o lé e pa kpó‐kpó ɓo. Wa gèe o kíe nì lɛ̀ɛ, “Mɛ́ e gɔ̃́ e kéa lé‐wè píé, lɛ́ è mɛ́ĩ́ ɓo pɛ yɔɔ vɔ̀ lɛ̀ɛ yíkɛ̀ gáàa wà pɛ yɔɔ ɓò mia píé wè ká, wáà gò mia píé ɓɛ?”

³⁷Zízɛ̀ làṹ e wɛ̃̀ĩ sɛ́lɛ́ e kília yí lɛ̀ séĩ́ mɔ̀.

³⁸Zízɛ̀ e wɛ̀lɛ̀, e gó gbaa Wálà‐kà e kília wì, e ló Sáímɔ̀ píé kɛ́ì. E ɓɔ yí, Sáímɔ̀ na lòóò kɛ̀ kɔ̃́ṹ‐kɔ̃̀ũ̀ lùò ká. À kpóló kṹũ̀ e kɛá à mɔ̀ nyɔ́ɔ̀ɔ. O kpé kã́ Zízɛ̀ lɛ̀ɛ à mɔ́ɔ̀ wɔ̃̀ mɔ̀.

³⁹Zízɛ̀ e ló, e dɔ à là, áà mɛ́ĩ́ ɓò kii kṹa lɛ̀ɛ. Lɛ̀ e kɛ kília, lééa e kɛ kéléŋ‐kèlèŋ. Nɔ́ zá lea, e wɛ̀lɛ̀ gbaa, áà Zízɛ̀ nì wà léɓèlè‐wɔ̃̀ wũ kɛ̀ à mɔ̀.

⁴⁰Lɛ̀ lɛ́ nyɛ́nɛ́ e dàa, mia séĩ́ lɛ́ yáá doò do e kɛ wà mia nì kɛpìàa, o nu o ká Zízɛ̀ píé. Zízɛ̀ e e kɔ̀ kpɔ́ o séĩ́ o là, e o la o tɔ̀ là doó doó.

⁴¹Ɛ́ɛ̃́ zeĩ́, pɛ yɔɔ e gó mia búnùzɛ̀ píé, wáà gbɛ̀ɛ̀ weeá kélɛ̀, “Ƃi lɛ́ i Wálà Gbe káa.” Kɛɛ Zízɛ̀ e mɛ́ĩ́ ɓo pɛ yɔɔ vɔ̀ɔ lɛ̀ɛ, ɛ̃́ɛ̃́ lɛ̀ɛ́ gbaa à tó kɛ pɛ yɔɔ vɔ̀ɔ ó wéé. Ƃii o à yí dɔ kélɛ̀ lɛ Kɛ́lɛ̀ì ká.

⁴²Lɛ̀ lɛ̀ e kpɛ̀ia, Zízɛ̀ e gó pɛ́lɛɛ yí, e ló lɛ̀ lɛ́ à dɔɔ̀ lɛ dĩĩa mɔ̀. Mia o gbɛ̃̀ gbaa, wáà à nàà. Lɛ̀ o ɓɔ à làa, o gbɛ̃̀ gbaa, wáà à kɛ‐zì nàà ó à tèá lóò mɔ̀.

⁴³Kɛɛ a gèe o lɛ̀ɛ, “Lɛ m mɔ̀ ḿ wɔ̃́ làṹ yiè lɛ́ à gbɛ̃̀ɛ̃̀ lɛ Wálà zì tò‐mia‐là mɔ̀ɔ gèe sɛ́lɛ́ gbɛɛ yí bɛ̃̀ɛ̃ mɔ̀ nɔ́ kíli. Ƃii Wálà aà m vɔ, kɛ ḿ kɛ kíli.”

⁴⁴Lɛ̀ e kɛ kília, e ló wɔ̃́ làṹ yièa gèeá sí Zúù‐mìà zì Wálà‐kà lɛ́ e Zùdíàa wì píé.