Read Yamano Lúù 6 Bible Online

Lúù 6 - Yamano bible

Lúù 6

¹E kɛ fĩ́ĩ́‐dɔ‐lùò doó káa, Zízɛ̀ e kɛ diepìà nyɛ́nɛ̀ĩ̀ kɔ́ɛ́í lɛ́ ɓu sùu dò taà e kɛá yia mɔ̀. Là tòà‐píé‐mìàa o gbɛ̃̀ gbaa, wáà ɓú e kília dò kã̀, wáà gìli‐gìlì o kɛ̀lɛ̀, wáà ɓèlè.

²Fálásíì‐mìà dò wa gèe kélɛ̀, “Mɛ́ e kɛ lɛ́ kà wɔ̃́ lɛ́ ye wá mia mɔ̀ ó kɛ fĩ́ĩ́‐dɔ‐lùò káa kɛ̀ ɓe?”

³Zízɛ̀ a là nìɛ̀ weeá kélɛ̀, “Kàá wɔ̃́ lɛ́ Dèɓé a kɛ, lɛ̀ lɛ́ lɔ̀ɔ e kɛ wà là mia nì o kɛpìàa wɔ̃̀ gèe do Wálà kiia yí?

⁴E wɛ̀lɛ̀, e ló Wálà‐kɛ̀ì, e belè lɛ́ à nɔɔ̀ e kɛá Wálà lɛ̀ɛ sí, e à ɓèlè, ɛ̃́ɛ̃́ a dò nɔ là mia nì bɛ̃̀ɛ̃ lɛ̀ɛ. Kɛɛ ye wá mi nɔ́ɔ fé dò mɔ̀ á ɓèlè, é kã́ sálà‐ɓò‐Wálà‐mɔ̀‐mìàa mɔ̀ɔ ká.”

⁵Lɛ́ Zízɛ̀ a gèe o lɛ̀ɛ, “Mi Gbe là yíkɛ̀ gáàa lɛ fĩ́ĩ́‐dɔ‐lùòa là.”

⁶Fĩ́ĩ́‐dɔ‐lùò gbɛɛ káa, Zízɛ̀ e ló Zúù‐mìà zì Wálà‐kà wì, áà pɛ zɔ̃̀ɔ̃̀. Gɔ̃ doó e kɛ yía, à kɔ̀ yiè zùaà e kɛ à ká.

⁷Wálà kii‐dɔ‐mìà wà Fálásíì‐mìàa o nyìɛ kɛɛ̀ e kɛá Zízɛ̀ mɔ̀, kɛ é kɛ̀á lɛ́ɛ̀ lo mi laà fĩ́ĩ́‐dɔ‐lùòa káa, kɛ wɔ̃́ dò é kɛ o kɛ̀lɛ̀ kɛ ó gèe aà wɔ̃́ yɔɔ kɛ.

⁸Kɛɛ Zízɛ̀ e o zì yɛ́lɛ́‐tàà‐yí‐wɔ̃̀ dɔ. A gèe gɔ̃ lɛ́ à kɔ̀ zùaà e kɛáa lɛ̀ɛ, “Wɛ̀lɛ̀ í nu líé zèe.” Gɔ̃́ɛɛ e wɛ̀lɛ̀, e dɔ e gã̀ mɔ̀ à lɛ̀ mɔ̀.

⁹Lɛ́ Zízɛ̀ a gèe o lɛ̀ɛ, “Wɔ̃́ yiè kɛ̀ fĩ́ĩ́‐dɔ‐lùò káò, wà à yɔɔ kɛ̀ à káò, ɛ̃́ɛ̃́ mi là fĩ́ĩ́‐dɔ‐lùò ká, wà mi zɛ̀ à káò, à ye kpɛɛ̀ zɛ̀ lɛ́ e sɛ̀?”

¹⁰E lɛ̀ gɛ̃̀ o séĩ́ o là déĩ́ le, áà gèè gɔ̃́ɛɛ lɛ̀ɛ, “Ì i kɔ̀ɔ fóló.” E à kɛ kíli. Lɛ́ à kɔ̀ɔ e kɛ e yiè ká gbaa.

¹¹Kɛɛ míáa wɔ̃́ kpó‐kpó e o wàa, wáà o kíe gɛ̃̀ wɔ̃́ ò lo à kɛɛ̀ Zízɛ̀ káa mɔ́ɔ̀ wɔ̃̀ mɔ̀.

¹²À lúó e kília káa, Zízɛ̀ e ló tɔ̃̀ũ̀ dò wĩĩ́ kɛ é sɛ̀nɛ ɓo. E kɛ yí bĩ́míà doó píé, áà sɛ̀nɛ ɓò Wálà lɛ̀ɛ.

¹³Lɛ̀ lɛ̀ e kpɛ̀ia, e là tòà‐píé‐mìà súo kɛ. E o vũ̀ doó wɛ́lɛ́ pèèlɛ sí, e o tɔ́ kpɔ́ àpɔ́sɔ̀lɔ̀ vɔ̀.

¹⁴O lɛ́ o kélɛ̀, Sáímɔ̀, lɛ́ e à tɔ́ kpɔ́ zeĩ́ Pílɛ̀ɛ, e bɛ̀i, à lèe‐gé Áã́dùlù, ɛ̃́ɛ̃́ Zĩ́ĩ̀ wà Zɔ̃̀ɔ̃́, wà Félè ɛ̃́ɛ̃́ Bàtólómì.

¹⁵Ɛ́ɛ̃́ zeĩ́, Máfìù wà Tɔ́mɔ̀, ɛ̃́ɛ̃́ Zĩ́ĩ̀ lɛ́ e kɛ Áfìà gbe káaò, ɛ̃́ɛ̃́ Sáímɔ̀, lɛ́ ò si mia lɛ́ o tò‐o‐dìè‐là wɔ̃̀ e kɛ o zò píéa, o doó‐mì káaò,

¹⁶ɛ̃́ɛ̃́ Zúdà lɛ́ e kɛ Zĩ́ĩ̀ gbe káa, ɛ̃́ɛ̃́ Zúdà Ɛ̀sɛ̀kélìà, lɛ́ e kɛ mi lɛ́ è lo Zízɛ̀ lé góòa káa.

¹⁷Wà Zízɛ̀ nì o tɔ̃̀ũ̀ yɔ̀ɔ́ e kíe ká. Lɛ̀ e kɛ kília, Zízɛ̀ wà là tòà‐píé‐mìà kù gbùò zɛ̀ o dɔ tã́ã̀ tɛ́nɛ́‐tɛ̀nɛ̀ dò mɔ̀. Mia kù gbùò zɛ̀ o kɛ yí. Míá o kília o góò e kɛá Zùdíà lɛ̀ séĩ́ mɔ̀, ɛ̃́ɛ̃́ Zùlúsàlɛ̀, ɛ̃́ɛ̃́ o dò góò e kɛá sɛ́lɛ́ lɛ́ ò si Táyà wà Sádã̀, lɛ́ o kɛ mɛ̀ĩ́ kpóṹ làa yí píé. O nu kɛ ó à wéè ma, ɛ̃́ɛ̃́ kɛ ó la o mɔ̀ yáá bà.

¹⁸Mia lɛ́ pɛ yɔɔ e kɛ o píé, áà o yí gínìa, o nu yí nɔ́ kíli, wáà la‐ɓo sɔ̀lɔ̀ ɓò.

¹⁹Mia séĩ́ wa kɛ‐zì naa kɛ ó pá à ká, ɓii yíkɛ̀ gáàa e kɛ gópìà à yí, tó áà mia séĩ́ làa mɔ́ɔ̀ wɔ̃̀ mɔ̀.

²⁰Zízɛ̀ e lɛ̀ gɛ̃̀ là tòà‐píé‐mìàa là, áà gèè, “Mia lɛ́ pɛ wá ka kɛ̀lɛ̀ɛ, zò géli lɛ ka kɛ̀lɛ̀. Ƃii ka lɛ́ ka mia lɛ́ Wálà tóò lɛ o làa káa.

²¹“Mia lɛ́ lɔ̀ɔ è ka kɛ̀ dɛɛ káa, zò géli lɛ ka kɛ̀lɛ̀. Ƃii ka gí lɛ́ɛ̀ lo dɔɔ̀. “Mia lɛ́ gbóó lɛ ka lé dɛɛ káa, zò géli lɛ ka kɛ̀lɛ̀, Ƃii káà lo yéí síì.

²²“Yé ka lɔ̀ aà nyɛ mia mɔ̀, tó òó o kɔ̀ yà ka wì, tó wáà lé‐kã́ kɛ̀ ka mɔ̀, tó wáà gèè ka kɛ‐pɛ̀ yɔɔ kɛ‐mìà ká Mi Gbe mɔ́ɔ̀ wɔ̃̀ mɔ̀ɔ, zò géli lɛ ka kɛ̀lɛ̀.

²³Wɔ̃́ sùua é kɛ̀áa, ka gé è li, káà tã́ kɛ̀ géli wɛ̃́ĩ̀, ɓii ka fɔ́nɔ́ lɛ́ lɛ Wálà‐pàa lɛ kpànazɛ̀. Ƃii o dàa ye dàà nì o wɔ̃́ nɔ́ doóa kɛ dɔ̀‐Wálà‐lé‐là‐mìà ká.

²⁴“Kɛɛ mia yé ka pɛ‐mìà káa, zi sùu kpɛɛ̀ lɛ́ ka mɔ́ɔ̀ wɔ̃̀ lɛ à ká yéĩ̀zɛ̀ ké. Kaà ka zì géli kɛ.

²⁵“Mia yé ka gí dɔɔ̀ lɛ dɛɛ káa, zi sùu kpɛɛ̀ lɛ́ ka mɔ́ɔ̀ wɔ̃̀ lɛ à ká yéĩ̀zɛ̀ ké. Lɔ̀ɔ lɛ́ɛ̀ lo ka kɛɛ̀. “Mia yé kà yéí si dɛɛ káa, zi sùu kpɛɛ̀ lɛ́ ka mɔ́ɔ̀ wɔ̃̀ lɛ à ká yéĩ̀zɛ̀ ké. Káà lo dàà yéĩ̀ yí, káà gbóó ɓò.

²⁶“Yé mia séĩ́ waà ka tɔ́ lia, lɛ ka mɔ̀ wɔ̃́ yéĩ̀zɛ̀ ká. Ƃii o dàa ye dàà nì o wɔ̃́ nɔ́ doóa kɛ mia lɛ́ ò o dìè si dɔ̀‐Wálà‐lé‐là‐mìà, lɛ́ o wá mɔṹ à káa o lɛ̀ɛ.

²⁷“Kɛɛ ḿm̀ gèe mia lɛ́ ka tóó dɔɔ̀ lɛ m mɔ̀ɔ lɛ̀ɛ, ka dàa‐gbe lɔ̀ è kpɔ́ ka mɔ̀. Kà wɔ̃́ yiè kɛ mia lɛ́ òó o nyìɛ dɔ ka mɔ̀ɔ lɛ̀ɛ.

²⁸Kà lúà kpɔ́ mia lɛ́ ò ka náá kpɔɔ mɔ̀. Kà sɛ̀nɛ ɓo mia lɛ́ ò ka lùò‐lɛ̀ kɛ̀ ɓoa mɔ́ɔ̀ wɔ̃̀ mɔ̀.

²⁹Yé mi aà i mɛ̀ i kpéĩ́ doó‐mì mɔ̀ɔ, ì à tó é i mɛ̀ à yé e tóa mɔ̀. Yé mi dò aà ɓà sɔ‐là‐sɔ̀ sía, ì à tó é ɓà dà‐sɔ̀ bɛ̃̀ɛ̃ sí nɔ́ kíli.

³⁰Ì pɛ nɔ mi nɔ́ɔ fé lɛ́ è pɛ pɛ̃ i mɔ̀ɔ lɛ̀ɛ. Yé mi dò aà ɓà pɛ sía, yékɛ̀ í à wɛ̃́ĩ́‐lɔ̀ɔ kɛ à mɔ́ɔ̀ wɔ̃̀ mɔ̀.

³¹Kà wɔ̃́ kɛ mia ká lɛ̀ zí nɔ́ kà nàà ó wɔ̃́ kɛá ka káa lɛ́ ɓe.

³²“Yé kaà lɔ̀ kɛ míá nɔ́ ka lɔ̀ kpɔ́ɔ̀ lɛ o mɔ̀ɔ káa, mɛ́ mɔṹ kà lo à mɔ́ɔ̀ lúà sɔ̀lɔ̀ ɓoò? É kɛ bɛ̃̀ɛ̃ kɛ‐wɔ̃̀ yɔɔ kɛ‐mìà káa, óò lɔ̀ kɛ̀ míá o lɔ̀ kpɔ́ɔ̀ lɛ o mɔ̀ɔ ká.

³³Ɛ́ɛ̃́ yé kaà wɔ̃́ yiè kɛ míá nɔ́ ò wɔ̃́ yiè kɛ̀ ka lɛ̀ɛ lɛ̀ɛ, mɛ́ mɔṹ kà lo à mɔ́ɔ̀ lúà sɔ̀lɔ̀ ɓoò? É kɛ bɛ̃̀ɛ̃ kɛ‐wɔ̃̀ yɔɔ kɛ‐mìà káa, óò à kɛ̀ kíli.

³⁴Ɛ́ɛ̃́ zeĩ́, yé kaà pɛ kèlè dɔ mia lɛ́ ka zò lɛ o mɔ̀ ó à nɔ ka lɛ̀ɛ e mɛ̀ĩ́a mɔ̀ɔ, mɛ́ mɔṹ kà lo à mɔ́ɔ̀ lúà sɔ̀lɔ̀ ɓoò? É kɛ bɛ̃̀ɛ̃ kɛ‐wɔ̃̀ yɔɔ kɛ‐mìà káa, óò pɛ kèlè dɔ kɛ‐wɔ̃̀ yɔɔ kɛ‐mìà mɔ̀, kɛ ó pɛ nɔ́ doóa sɔ̀lɔ̀ ɓo zeĩ́.

³⁵Kɛɛ ka dàa‐gbe lɔ̀ è kpɔ́ ka mɔ̀, káà wɔ̃́ yiè kɛ̀ o ká. Kà pɛ kèlè dɔ, yékɛ̀ ka zò é kɛ à sɔ̀lɔ̀ ɓoò mɔ̀ zeĩ́. Káà lo ka fɔ́nɔ́ kpànazɛ̀ síì à mɔ́ɔ̀ wɔ̃̀ mɔ̀. Ɛ́ɛ̃́ káà lo kɛɛ̀ Wálà lɛ́ lɛ pɛ séĩ́ làa, gbe nì ká. Ƃii lɛ́ɛ̀ zò yiè là kɛ̀ mia lɛ́ òó à zúo ɓoaò, e bɛ̀i, o yé o kɛ‐pɛ̀ wá sɛ̀ɛ o ká.

³⁶Kà mia yéĩ̀ kṹ, lɛ̀ zí ka Dàa è mia yéĩ̀ kũáa lɛ́ ɓe.

³⁷“Yékɛ̀ ká mɛ́ĩ́ yɔɔ ɓo mia gbĩ mɔ̀. Yé aà kɛ kília, Wálà lɛ̀ɛ́ ló mɛ́ĩ́ yɔɔ ɓoò ka gbĩ mɔ̀. Yékɛ̀ ká mɛ̀ĩ́‐sà káá mia wĩĩ́. Yé aà kɛ kília, Wálà lɛ̀ɛ́ ló mɛ̀ĩ́‐sà káà ka wĩĩ́. Kà die mia kɛ‐wɔ̃̀ yɔɔ là. Yé aà kɛ kília, Wálà lɛ́ɛ̀ lo diè ka bɛ̃̀ɛ̃ ka zì là.

³⁸Kà pɛ nɔ mia lɛ̀ɛ. Ká kɛ̀á kília, Wálà lɛ́ɛ̀ lo pɛ nɔɔ̀ ka bɛ̃̀ɛ̃ ka lɛ̀ɛ. Ka zì pɛ gɔ̃́‐pɛ̀ lɛ́ Wálà è lo pɛ gɔ̃́ɔ̃̀ à yí á nɔ ka lɛ̀ɛ, à lé lɛ́ɛ̀ lo paà súlú tútú le. Ƃii waà à zùku‐zúkú, wáà o kɔ̀ nɛ̀ɛ̀ à là. Ɛ́ɛ̃́ à bùlù‐bùlù lɛ́ɛ̀ lo kɛɛ̀ káápìà. À nɔɔ̀ lɛ́ɛ̀ lo kɛɛ̀á ka lɛ̀ɛ. Pɛ gɔ̃́‐pɛ̀ lɛ́ kà pɛ gɔ̃ à yí, káà nɔ̀ mia lɛ̀ɛ, lɛ́ Wálà è lo à síì, áà ka zì gɔ̃̀ à yía.”

³⁹Zízɛ̀ e pĩ̀ã̀ e kéa vɔ o lɛ̀ɛ. Áà gèè, “Kéa, nyìɛ‐káá‐mì lɛ́ɛ̀ bɛ̀i líé síì e ɓɛ́ɛ nyìɛ‐káá‐mì ká? Yé aà kɛ kília, ḿ gɔ̃̀, o pèèlɛɛ, óò lo dùò gùlù yí?

⁴⁰Pɛ‐dã́‐mì wá kpànazɛ̀ é dieá mí è pɛ zɔ̃̀ɔ̃̀ à lɛ̀ɛ là. Kɛɛ yé pɛ‐dã́‐mìà séĩ́ waà nyɛ pɛ́ ò dãa dã́ã̀ mɔ̀ɔ, lɛ́ɛ̀ lo kɛɛ̀ nɔ́ lɛ̀ pɛ‐zɔ̃̀ɔ̃̀‐o‐lɛ̀ɛ mì lɛ́ ɓe.

⁴¹“Mɛ́ e kɛ lɛ́ i yɛ́lɛ́ lɛ yílí‐séé lɛ́ e i lèe‐gé nyìɛɛ píé, lɛ́ i yɛ́lɛ́ nyɛɛ̀ lɛ yílí‐kpàla ké e i nyìɛɛ píé ɓɛ?

⁴²Zi sùu kpɛɛ̀ lɛ́ ì bɛ̀i à mɔ̀ ɓá gèeá i lèe‐gé lɛ̀ɛ, ‘M ɓɛ́ɛ ye‐mì, tó ḿ yílí‐séé e i nyìɛɛ ɓeí,’ yé ɓi yee, ìí yílí‐kpàla e i nyìɛɛ gɛ̃̀ɛ ká ɓe? Ƃí ì i dìè wɛlɛ li e ké ɓɛ. Ì yílí‐kpàla lɛ́ lɛ i nyìɛɛ ɓeí nɛ́. Yé aà kɛ kília, bɛ̀i lɛ́ɛ̀ lo kɛɛ̀ i mɔ̀ kɛ í lɛ̀ gɛ̃̀, kɛ í tĩã́ yílí‐séé lɛ́ e i lèe‐gé nyìɛɛ ɓeíì.

⁴³“Yílí yiè lɛ̀ɛ́ ɓa e ɓɛɛ yɔɔ ká. Ɛ́ɛ̃́ é kɛ bɛ̃̀ɛ̃ yílí yɔɔ káa, lɛ̀ɛ́ ɓa e ɓɛɛ yiè ká.

⁴⁴Óò yílí séĩ́ dɔ e ɓɛɛ mɔ̀. Ìí bɛ̀i à mɔ̀ í féè ɓɛɛ ɓo gɛ́nɛ́‐yìlì wĩĩ́. Ɛ́ɛ̃́ ìí bɛ̀i à mɔ̀ í pɛ ɓɛɛ lɛ́ ò kɛ̀ wã́ã́ĩ̀ káa ɓo gɛ́nɛ́‐kɔ́ɔ́ mɔ̀.

⁴⁵Mi sɔ̃̀ɔ̃ yiè zɛ̀ lɛ́ɛ̀ nu pɛ yiè lɛ́ aà o kpɔ́lɔ̀ bɛ̀i e zò píéa ká wáà‐là. Kɛɛ mi sɔ̃̀ɔ̃ yɔɔ zɛ̀ lɛ́ɛ̀ nu pɛ yɔɔ lɛ́ aà o kpɔ́lɔ̀ bɛ̀ia ká wáà‐là. Ƃii pɛ lɛ́ à mi zò píé paà lɛɛ, lɛ́ mi ɓà wè ɓoa.

⁴⁶“Mɛ́ e kɛ lɛ́ kà m si ‘M Dàa‐mì, m Dàa‐mì,’ tó kàá wɔ̃́ lɛ́ m̀ gèe ká kɛɛ kɛ mɔṹ ɓɛ?

⁴⁷Mia séĩ́ lɛ́ ò nu m píé, lɛ́ ò o tóó dɔ m wéè mɔ̀, lɛ́ ò à kɛ̀ɛ, ḿm̀ lo zi lɛ́ mí e kília lɛ à káa zɔ̃̀ɔ̃̀ ka lɛ̀ɛ.

⁴⁸Lɛ kélɛ̀ gɔ̃ lɛ́ e ká dɔɔ lɛ́ ɓe. Gɔ̃́ e kília e gìè fòo gbèkèni, e là ká‐gã̀ gbɛ̃̀ à yí gɛ̀lɛ̀ là. Yíí paàa e zɔ̃ ká e kília mɔ̀. Kɛɛ lɛ̀ɛ́ gbaa vĩ́ fèle ɓo, ɓii à dɔ kpó‐kpó ɓoò e kɛá.

⁴⁹Kɛɛ mí yé è m wéè ma, tó làá kɛɛ, lɛ kélɛ̀ gɔ̃ lɛ́ e ká dɔ tã́ã̀ ɓɔ̀ɔ mɔ̀, lɛ́ lɛ̀ɛ́ gbaa à gã̀‐gbɛ̃̀ gìèa lɛ́ ɓe. Lɛ̀ yíí paàa e zɔ̃ ká e kília mɔ̀ɔ, e káá tã́ã̀ nɔ́ zá le. Ɛ́ɛ̃́ ká e kília wíì e kɛá kpĩ́ĩ̀‐kpĩ́ĩ̀ le.”