Read Yamano Lúù 7 Bible Online

Lúù 7 - Yamano bible

Lúù 7

¹Lɛ̀ Zízɛ̀ e nyɛ wɔ̃́ nì e kéa séĩ́ gèeè mɔ̀ míáa lɛ̀ɛ, e ló Kàpɛ́nìɛ̀.

²Wólómà sóyà vɔ̀ líé‐sí‐mìà doó‐mì e kɛ yí. Là yɛɓo‐kɛ‐mì doó e kɛ à kɛ̀lɛ̀ɛ, a naa à ká nyɔ́ɔ̀ɔ. Yɛɓo‐kɛ‐mì e kília e kɛ kɔ̃́ṹ‐kɔ̃̀ũ̀, áà ɓùò gaà.

³Lɛ̀ sóyà vɔ̀ líé‐sí‐mì e kília e Zízɛ̀ wɔ̃̀ maa, e Zúù‐mìà dìè‐dìè vɔ̀ dò vɔ Zízɛ̀ píé, kɛ é nu é là mía la.

⁴O nu Zízɛ̀ píé, o kpé kã́ à lɛ̀ɛ kpó‐kpó ɓo, wáà gèè, “Gɔ̃́ e kéa à i zì gbũ̀‐mɔ̀ sɔ̀lɔ̀ ɓoò lɛ́ɛ̀ à mɛ́ kũ.

⁵Ko mìà nì lɔ̀ kpɔ́ɔ̀ lɛ à mɔ̀. Ɛ́ɛ̃́ zeĩ́a, e Wálà‐kà dò dɔ ko lɛ̀ɛ.”

⁶Lɛ̀ e kɛ kília, wà Zízɛ̀ nì o ló. Lɛ̀ɛ́ gbaa kɛ káa ká gbèĩ lɛ̀ lɛ́ sóyà vɔ̀ líé‐sí‐mìa e e ɓɛ́ĩ̀ vɔ, wáà gèè, “Ko dàa‐mì, yékɛ̀ í i dìè yí gíni. Ma wá bɛ̃̀ɛ̃ kpeĩ kɛ í nu m píé kɛ́ì.

⁷Ɛ́ɛ̃́ kɛ bɛ̃̀ɛ̃, ḿ m dìè sí kpànazɛ̀, kɛ ḿ nu i píé m gbĩ‐kpàlaa yí. Ì wéé ɓɔ̀ɔ yee ɓo. Ƃá kɛ̀á kília, m̀ yɛɓo‐kɛ‐mìa lɛ́ɛ̀ lo laà.

⁸Má m kéa, m gɔ̃ lɛ́ lɛ mia gbɛɛ zì yíkɛ̀ gáàa wìa ká. Ɛ́ɛ̃́ sóyà vɔ̀ o ma bɛ̃̀ɛ̃ m wì nɔ́ kíli. Maà gèe mí e kéa lɛ̀ɛ, loa, lɛ́ɛ̀ lo. Ḿ gèèá mi doó‐mì lɛ̀ɛ, nua, tó e nu. Ɛ́ɛ̃́ ḿm̀ gèe m̀ lùò lɛ̀ɛ, à kɛ ké, tó áà kɛ̀.”

⁹Zízɛ̀ lé paà e kɛá lɛ̀ e wɔ̃ sùua maa ká. E nìɛ̀ gbaa mia kù lɛ́ o kɛ tópìà à píéa o píé, áà gèè o lɛ̀ɛ, “Tó ḿ gèe ka lɛ̀ɛ, m̀ḿ zò‐dɔ̀à‐mɔ̀ sùua gɛ̃̀ do. É kɛ bɛ̃̀ɛ̃ Éézɛ̀lɛ̀‐mìà fĩ̀ã̀ káa, m̀ḿ à gɛ̃̀ do yí.”

¹⁰Mia lɛ́ o o vɔɔ, o ló o mɛ̀ĩ́ ká là. O ló gɔ̃́ɛɛ là yɛɓo‐kɛ‐mìa gɛ̃̀ɛ̃̀ gbaa e kéléŋ‐kèlèŋ ká.

¹¹Lɛ̀ e kɛ nɔ́ kília, Zízɛ̀ e ló pɛ́lɛ lɛ́ ò si Néĩ̀a yí. Wà là tòà‐píé‐mìà, ɛ̃́ɛ̃́ mia kù gbùò zɛ̀ o ló yi.

¹²Lɛ̀ e ɓɔ nɔ́ sɛ́lɛ́ e kília mɔ́ɔ̀ gàlà‐lé mɔ̀ɔ, e mia lɛ́ o kɛ lópìà mi bĩ̀ĩ̀a gɛ̃̀. Gɔ̃ lɛ́ e gaa, e kɛ gã̀ã lee doó là nɛ́ gɔ̃ zɛ̀ doó e kɛ à kɛ̀lɛ̀ɛ ká. Mia kù gbùò zɛ̀ lɛ́ o góò e kɛá pɛ́lɛ e kília yía, o kɛ lééa píé.

¹³Lɛ̀ ko Dàa‐mì e à gɛ̃̀ɛ, à yéĩ́ e kɛ à kɛpìà nyɔ́ɔ̀ɔ. A gèe à lɛ̀ɛ, “Yékɛ̀ í gbóó ɓo.”

¹⁴Lɛ̀ e kɛ kília, Zízɛ̀ e ló, e pá pɛ lɛ́ mi bílía e kɛ wɔ̀ɔ̀á làa mɔ̀. Gɔ̃à lɛ́ o kɛ lópìà à káa, o tèá, o dɔ. Zízɛ̀ a gèe, “Gɔ̃, ḿm̀ gèe i lɛ̀ɛ, wɛ̀lɛ̀.”

¹⁵Mi bílí e kília e wɛ̀lɛ̀ e yà, e gbɛ̃̀ gbaa, áà wèè. Lɛ̀ e kɛ kília, Zízɛ̀ e à nɔ e mɛ̀ĩ́ e lèe lɛ̀ɛ.

¹⁶Mia séĩ́ paà e kɛá túó ká, wáà Wálà tɔ́ ɓɔ̀, wáà gèè, “Dɔ̀‐Wálà‐lé‐là‐mì kpànazɛ̀ dò aà dà ko bà.” Ɛ́ɛ̃́ zeĩ́, “Wálà aà nu, kɛ é là mia nì la.”

¹⁷Wɔ̃́ làṹ e ké lɛ́ à gbɛ̃̀ɛ̃̀ e kɛá Zízɛ̀ mɔ̀ɔ, e wɛ̃̀ĩ Zùdíà wà sɛ́lɛ́ kélé kélé lɛ́ e kɛ à sɔ́nɔ́ píéa yí lɛ̀ séĩ́ mɔ̀.

¹⁸Zɔ̃̀ɔ̃́ zì tòà‐píé‐mìà o wɔ̃́ nì e kéa séĩ́ wɔ̃̀ gèe Zɔ̃̀ɔ̃́ lɛ̀ɛ.

¹⁹E o pèèlɛɛ o súo kɛ, e o vɔ ko Dàa‐mì píé, ó à wɛ̃́ĩ́‐lɔ̀ɔ kɛ weeá kélɛ̀, “Ƃi lɛ́ i mi lɛ́ è lo nuùa káa, ɛ̃́ɛ̃́ kɛ̀ lɛ ko mɔ̀ ko nyìɛ é kɛ zuú mi gbɛɛ nuù wɛ̃́ĩ̀?”

²⁰Lɛ̀ o ɓɔ Zízɛ̀ mɔ̀ɔ, wa gèe kélɛ̀, “Zɔ̃̀ɔ̃́ mia bàtáì‐kɛ‐mì e ko vɔ i píé, kó i wɛ̃́ĩ́‐lɔ̀ɔ kɛ. Ƃi lɛ́ i mi lɛ́ è lo nuùa káa, ɛ̃́ɛ̃́ kɛ̀ lɛ ko mɔ̀ ko nyìɛ é kɛ zuú mi gbɛɛ nuù wɛ̃́ĩ̀ mɔṹ?”

²¹Lúó e kília káa, Zízɛ̀ e mia búnùzɛ̀ la yáá doò do, wà mia gbĩ‐kpàla fɔ̃̀ã̀‐fɔ̃́ã́ kɛ‐pɛ̀ gbɛɛ̀ gbɛɛ kɛ̀lɛ̀, tó áà pɛ yɔɔ ɓò mia píé, ɛ̃́ɛ̃́ áà mia búnùzɛ̀ lɛ́ o nyìɛ káà e kɛáa, áà o nyìɛ fòlò.

²²E Zɔ̃̀ɔ̃́ là vɔ‐mìàa wéè yí zṹ kélɛ̀, “Kà lo ká wɔ̃́ lɛ́ kaà à gɛ̃̀, ɛ̃́ɛ̃́ lɛ́ kaà à maa gèe Zɔ̃̀ɔ̃́ lɛ̀ɛ. O lɛ́ o kélɛ̀, nyìɛ‐káá‐mìà óò lɛ̀ gɛ̃̀. Mia kpɔ́lɔ̀ɔ zɛ̀ óò tàà, tó mia lɛ́ gbéè lɛ o mɔ̀ɔ, wáà là, tó wáà kɛ̀ dà‐o‐ɓɛ́ĩ̀‐bà mìà ká. Mia lɛ́ o tóó taà lɛɛ, óò wɔ̃́ ma. Mia yé o gaà lɛɛ, o wɛ̀lɛɛ̀ lɛ ga kɛ̀lɛ̀. Ɛ́ɛ̃́ zeĩ́, wɔ̃́ làṹ yièa gèeè lɛ mia lɛ́ pɛ wá o kɛ̀lɛ̀ɛ lɛ̀ɛ.

²³Mi lɛ́ lɛ̀ɛ́ ló tèáà lò líé m mɔ́ɔ̀ wɔ̃̀ yí mɔ̀ɔ, zò géli lɛ à kɛ̀lɛ̀.”

²⁴Lɛ̀ Zɔ̃̀ɔ̃́ là vɔ‐mìàa o yɛ́ o zía, Zízɛ̀ e gbɛ̃̀ gbaa, áà Zɔ̃̀ɔ̃́ mɔ́ɔ̀ wɔ̃̀ gèè mia gbũa lɛ̀ɛ. Áà gèè kélɛ̀, “Lɛ̀ lɛ́ ka ló Zɔ̃̀ɔ̃́ píé yɛ̀í làa, mɛ́ ka naa ká gɛ̃̀? Ka naa ká sùu lɛ́ fã̀ã̀ aà lááa gɛ̃̀?

²⁵Mɛ́ ka ló yi ká gɛ̃̀? Ka ló yi kɛ ká gɔ̃ lɛ́ à mɛ́ síì lɛ sɔ yiè káa gɛ̃̀? Wánà kpó‐kpó káa, mia lɛ́ ò o mɛ́ si kíli, lɛ́ o yàà lɛ wà dɔ‐pɔ̀ɔ̀ làa, o kɛ‐pìà lɛ́ nɔ́ e mia kpànazɛ̀ kɛ‐pìà káa.

²⁶Pɛ lɛ́ ka ló à gɛ̃̀ wɛ̃́ĩ̀a, kà tɔ́ gèe m lɛ̀ɛ. Ka ló dɔ̀‐Wálà‐lé‐là‐mì gɛ̃̀ wɛ̃́ĩ̀? Kà tó ḿ gèe ka lɛ̀ɛ, lɛ kíli, ɛ̃́ɛ̃́ pɛ lɛ́ ka gɛ̃̀ɛ, à diè lɛ bɛ̃̀ɛ̃ dɔ̀‐Wálà‐lé‐là‐mì là.

²⁷Ƃii Zɔ̃̀ɔ̃́ lɛ́ à wɔ̃̀ bɛ̃̀ɛ̃ɛ̃̀ lɛ Wálà kiia yía. A gèe kélɛ̀, ‘Lɛ̀ gɛ̃̀, ma Wálà, ḿm̀ lo m̀ vɔ‐mì vɔɔ̀ i wɛlɛ mɔ̀, à ye lɛ́ è lo lóò i líé, kɛ é i gɛ̀nɛ̀ bɛ̀ia.’

²⁸Ḿm̀ gèe ka lɛ̀ɛ kélɛ̀, lee là nɛ́ lɛ́ waà yea, à dò nɔ́ɔ fé wá kpànazɛ̀ kɛ é dieá Zɔ̃̀ɔ̃́ là. Kɛɛ mi lɛ́ lɛ fĩ́ĩ́‐nyɛ zɛ̀ mia lɛ́ Wálà tóò lɛ o làa fĩ̀ã̀a, lɛ kpànazɛ̀, é dieá Zɔ̃̀ɔ̃́ bɛ̃̀ɛ̃ là.”

²⁹Mia séĩ́, é dàá ɓo‐pɛ̀ ɓo‐mìà bàa, o à wéè ma. O lɛ́ o kɛ mia lɛ́ o wéé Wálà kɛ̀‐kpeĩ‐wɔ̃̀ mɔ̀, ɛ̃́ɛ̃́ lɛ́ Zɔ̃̀ɔ̃́ aà o bàtáì kɛɛ káa.

³⁰Kɛɛ Fálásíì‐mìà wà Wálà là lɔ́ɔ̀ɔ dɔ‐mìàa o wɔ̃́ lɛ́ lɛ Wálà gé o gbĩ mɔ̀ɔ, o o wũ ɓo à wì, ɛ̃́ɛ̃́ òó gbaa wéé à mɔ̀ kɛɛ Zɔ̃̀ɔ̃́ é o bàtáì kɛ.

³¹“Kɛɛ mɛ́ m̀ bɛ̀i à mɔ̀ ḿ míá o ɓe yà kɔa ɓoa yía, gɔ̃́ à mɔ̀? O kélɛ̀ mɛ́ɛ́?

³²O kélɛ̀ nɔ́ɔ̀ɓé lɛ́ ɓe yàá lɔ́ɔ́ kpánà. O kù doó‐mì lɛ́ɛ̀ gbɛ̀ɛ̀ mia yé o tóa o là, áà gèè, ‘Ko ɓɔ̀ɔ̀ pìè ka lɛ̀ɛ. Kɛɛ kàá gbaa naa ká tã́ kɛ. Ko ga‐là‐gbòò ɓo. Kɛɛ kàá gbaa naa ká gbóó ɓo.’

³³Lɛ̀ Zɔ̃̀ɔ̃́ mia bàtáì‐kɛ‐mì e nu, lɛ́ lɛ̀ɛ́ gbaa kɛ belè ɓèlèpìà, tó lɛ̀ɛ́ wã́ã́ĩ̀ gbɛɛ mia, ka à gèe kélɛ̀, ‘Pɛ yɔɔ lɛ à píé.’

³⁴Lɛ̀ Mi Gbe e nu, áà pɛ ɓèlè, ɛ̃́ɛ̃́ áà pɛ mìa, ka à gèe, ‘Kà gɔ̃́ɔ gɛ̃̀. À gé‐zì‐wɔ̃̀ lɛ à mɔ̀, ɛ̃́ɛ̃́ lɛ zeĩ́ wã́ã́ĩ̀ mi‐mì ɓɔ̀ɔ ká. Ɛ́ɛ̃́ lɛ ɓo‐pɛ̀ ɓo‐mìà wà kɛ‐wɔ̃̀ yɔɔ kɛ‐mìà ɓɛ́ɛ ká.’

³⁵Kɛɛ mia séĩ́ lɛ́ ò wèè Wálà zì gíkã́a wɔ̃̀ mɔ̀ɔ, waà à zɔ̃̀ɔ̃̀ kélɛ̀ lɛ wánà zɛ̀.”

³⁶Fálásíì mi doó a gèe Zízɛ̀ lɛ̀ɛ é nu wà ye ó pɛ ɓèlè. Zízɛ̀ e ló à píé kɛ́ì, e yà kɛ ó pɛ ɓèlè.

³⁷Lee doó e kɛ sɛ́lɛ́ e kília yía, e kɛ kɛ‐wɔ̃̀ yɔɔ kɛ‐mì ká. E à ma kélɛ̀ Zízɛ̀ e kɛ pɛ ɓèlèpìà Fálásíì mi e kília píé kɛ́ì. E nu kpòóò lɛ́ à kɛɛ̀ e kɛá álàbásà‐gɛ̀lɛ̀ káa ká. À paà e kɛá tààlà nyɔ́nɔ́ ká.

³⁸E dɔ Zízɛ̀ mɛ̀ĩ́ à gã̀ sɔ́nɔ́. Léé e kília e kɛ gbóó ɓopìà, tó áà Zízɛ̀ gã̀ yɔ̀ɔ̀ e nyìɛ‐yíí ká. Lɛ̀ e kɛ kília, e à gã̀ mɛ́ sòló e wĩĩ́‐wũ̀ ká, e e bè gbɛ̃̀ à gã̀ mɔ̀, e nyɔ́nɔ́ɔ káá gbaa à gã̀ mɔ̀.

³⁹Lɛ̀ Fálásíì mi lɛ́ e Zízɛ̀ súo kɛ kɛ ó pɛ ɓèlè à píé kɛ́ìa, e wɔ̃́ e kéa gɛ̃̀ áà kɛ̀ɛ, a gèe e zò píé kélɛ̀, “È kɛ̀á gɔ̃́ e kéa lɛ dɔ̀‐Wálà‐lé‐là‐mì káa, áá léé e ké, lɛ́ è pa à mɔ̀ɔ dɔɔ̀, ɛ̃́ɛ̃́ zeĩ́, áá zi lɛ́ à kɛ‐pɛ̀ lɛ à ká yɔɔ dɔɔ̀ nɔ́ kíli.”

⁴⁰Zízɛ̀ a gèe à lɛ̀ɛ, “Sáímɔ̀, wɔ̃́ dò lɛ m gé ḿ gèe i lɛ̀ɛ.” A gèe, “Èè, Tísɛ̀, à gèe ḿ ma.”

⁴¹Zízɛ̀ a gèe kélɛ̀, “E kɛ gɔ̃à pèèlɛ ká. O pɛlèe‐kèlè kṹ pɛlèe‐kèlè dɔ‐mì mɔ̀. Mi doó‐mì e dálà wũ sɔ́ɔ́li kèlè kṹ à mɔ̀. Mi doó‐mì bɛ̃̀ɛ̃ e dálà vũ̀ sɔ́ɔ́li kèlè kṹ nɔ́ kíli.

⁴²Bɛ̀i lɛ̀ɛ́ gbaa kɛ o dò nɔ́ɔ fé mɔ̀ kɛ ó gɔ̃́ɛɛ là kèlea ɓo. Lɛ̀ e kɛ kília, kèle‐dɔ‐mìa e pɛlèea tó o mɔ̀. Aà kɛ kília, míáa ye kpɛɛ̀ zɛ̀ lɛ́ pɛlèe‐kèlè dɔ‐mìa lɔ̀ è lo kpɔ́ɔ̀ à mɔ̀ kpó‐kpó ɓo?”

⁴³Sáímɔ̀ a gèe kélɛ̀, “Ḿm̀ à yí dɔ kélɛ̀ mi yé o pɛlèe gbùò tó à mɔ̀ɔ lɛ.” Zízɛ̀ a gèe à lɛ̀ɛ, “Ƃà wɔ̃́ yí‐ɓo‐kɔ̀ɔ lɛ kpeĩ.”

⁴⁴Lɛ̀ e kɛ kília, e nìɛ̀ lééa píé, áà gèè Sáímɔ̀ lɛ̀ɛ, “Íì léé e kéa gɛ̃̀? M nu i píé kɛ́ì, ìí gbaa yíí nɔ́ɔ fé dò nɔ kɛ ḿ m gã̀ pɛ́lɛ́ à ká. Kɛɛ à yee, aà m gã̀ pɛ́lɛ́ e nyìɛ‐yíí ká. Ɛ́ɛ̃́ aà m gã̀ mɛ́ sòló e wĩĩ́‐wũ̀ ká.

⁴⁵Ƃi yee, ìí gbaa bɛ̃̀ɛ̃ m sɛ́nɛ́ ɓo i bè gbɛ̃̀ m kpéĩ́ mɔ̀ ká. Kɛɛ lééa yee, lɛ̀ɛ́ tèá do e bè gbɛ̃̀ m gã̀ mɔ̀ ká nú ma ɓo kɛ̀ɛ ká.

⁴⁶Ìí gbaa nyɔ́nɔ́ gbɛɛ nɔ m lɛ̀ɛ m wĩĩ́ mɔ́ɔ̀ wɔ̃̀ mɔ̀. Kɛɛ lééa yee, aà tààlà nyɔ́nɔ́ táá m gã̀ mɔ̀.

⁴⁷Ḿm̀ gèe i lɛ̀ɛ, lɔ̀‐kɛ̀à‐mɔ̀ yí fɔ̀nɔɔ̀ɔ zɛ̀ lɛ́ aà zɔ̃̀ɔ̃̀ m lɛ̀ɛ, lɛ́ɛ̀ à zɔ̃̀ɔ̃̀ kélɛ̀ à zì kɛ‐wɔ̃̀ yɔɔ búnùzɛ̀ɛ aà ɓo à wũ mɔ̀. Kɛɛ ɓá gɛ̃̀á lɛ́ mi zì kɛ‐wɔ̃̀ yɔɔ lɛ́ à ɓoò lɛ à wũ mɔ̀ɔ lɛ péĩ́a, kɛɛ à zì mia lɔ̀‐kpɔ̀à‐mɔ̀ lɛ péĩ́.”

⁴⁸Lɛ̀ e kɛ kília, Zízɛ̀ a gèe lééa lɛ̀ɛ, “I zì kɛ‐wɔ̃̀ yɔɔ aà ɓo i wũ mɔ̀.”

⁴⁹Mia yé o kɛ yàá téɓòa mɔ̀ɔ, o gbɛ̃̀, wáà gèè o dìè píé kélɛ̀, “Dé e ké, lɛ́ è mia kɛ‐wɔ̃̀ yɔɔ ɓo o wũ mɔ̀ ɓɛ?”

⁵⁰Kɛɛ Zízɛ̀ a gèe lééa lɛ̀ɛ, “I zì zò‐dɔ̀à‐mɔ̀ aà i la. Ì ɓà ló ɓo í yi yiè zɛèé.”