Read Yamano Zɔ̃̀ɔ̃́ 13 Bible Online

Zɔ̃̀ɔ̃́ 13 - Yamano bible

Zɔ̃̀ɔ̃́ 13

¹E kɛ Dìè-mia-là Kpílì lúó mɛ́ĩ́ yìì ká gbaa. Zízɛ̀ e à yí dɔ kélɛ̀ lúó lɛ́ è lo góòá kpóṹ là zèe, kɛ é ló mia Dàa píéa aà ɓɔ. Mia lɛ́ o kɛ à dìè là mia nì ká kpóṹ là zèea o lɔ̀ e kpɔ́ à mɔ̀, ɛ̃́ɛ̃́ o lɔ̀ e tó kpɔ́pìà à mɔ̀ é ɓɔá wɔ̃́ líé nyɛpìà.

²Zízɛ̀ wà là tòà-píé-mìà o kɛ wà nyɛ́ŋɛ̀ĩpíé léɓèlè ɓèlèpìà. Lɛ̀ e kɛ kília, kɛɛ Dɛ́ɓò aà à dà Zúdà lɛ́ e kɛ Sáímɔ̀ Ɛ̀sɛ̀kélìà gbe káa zò píé, kélɛ̀ é Zízɛ̀ lé gó.

³Zízɛ̀ e à yí dɔ kélɛ̀ mia Dàa aà pɛ séĩ́ kpɔ́ gbaa à kɔ̀ là. A yí dɔ kélɛ̀ e gó Wálà píé, ɛ̃́ɛ̃́ lɛ lópìà Wálà píé.

⁴À mɔ́ɔ̀ wɔ̃̀ mɔ̀ɔ, Zízɛ̀ e gó téɓòa mɔ̀, e là sɔ-là-sɔ̀ ɓo e mɔ̀, e táɓà dò yèlè e dĩ́.

⁵Lɛ̀ e kɛ kília, e yíí gbɛ̃̀ páni dò yí, e gbɛ̃̀ áà là tòà-píé-mìà gã̀ mɛ́ pɛ̀lɛ̀, áà o mɛ́ sòlò táɓà lɛ́ e kɛ à dĩ́a ká.

⁶E ɓɔ Sáímɔ̀ Pílɛ̀ mɔ̀. Pílɛ̀ a gèe à lɛ̀ɛ, “M Dàa-mì, ɓáà nàà í m gã̀ mɛ́ pɛ́lɛ́?”

⁷Zízɛ̀ a là nìɛ̀ kélɛ̀, “Wɔ̃́ lɛ́ m̀ kɛ̀ɛ, ìí à yí ma nɛ́ dɛɛ ká. Kɛɛ íì lo à yí maà líé zàá.”

⁸Pílɛ̀ a gèe Zízɛ̀ lɛ̀ɛ kélɛ̀, “Ìí ló m gã̀ mɛ́ pɛ́lɛ̀ gbɛɛ ɓo.” Zízɛ̀ a gèe, “Ḿ gɔ̃̀á i gã̀ mɛ́ pɛ́lɛ́ɛ̀ɛ, kɛɛ kò ɓi kòó ló tàà-kíe-píé kɛɛ̀ gbaa.”

⁹Sáímɔ̀ Pílɛ̀ a gèe kélɛ̀, “M Dàa-mì, yékɛ̀ é kɛ m gã̀ doó ká mɔṹ. È kɛ m kɔ̀ wà m wĩĩ́ nì ká nɔ́ kíli.”

¹⁰Zízɛ̀ a gèe à lɛ̀ɛ, “Mi lɛ́ aà e zúlúa, à mɛ́ ɓɔɔ̀ lɛ pã́pã́ le. Ye wá à mɔ̀ kɛ é e zúlú zeĩ́. À gã̀ lɛ́ nɔ́ lɛ à mɔ̀ á pɛ́lɛ́ɛ. Ka mɛ́ ɓɔɔ̀ lɛ. Kɛɛ ka séĩ́ ka mɛ́ ɓɔɔ̀ wá.”

¹¹Zízɛ̀ e mi lɛ́ e kɛ lópìà à lé góòa dɔ. Pɛ́ e kɛ lɛ́ a gèe kélɛ̀, ka séĩ́ ka mɛ́ ɓɔɔ̀ wáa, lɛ́ ɓɛ.

¹²Lɛ̀ lɛ́ Zízɛ̀ e nyɛ o gã̀ mɛ́ pɛ́lɛ̀ mɔ̀ɔ, e là sɔ-là-sɔ̀ɔ dà zeĩ́, e ló e yà e yàlà mɔ̀. E o wɛ̃́ĩ́-lɔ̀ɔ kɛ kélɛ̀, “Káà wɔ̃́ lɛ́ ma kɛ ka káa yí dɔ?

¹³Káà m si Tísɛ̀, ɛ̃́ɛ̃́ mia Dàa-mì. Lɛ wánà zɛ̀ lɛ́ kà kɛ̀ kília, ɓii m à ká.

¹⁴Yé má m ka Dàa-mì wà kà pɛ-zɔ̃̀ɔ̃̀-mì káa, maà ka gã̀ mɛ́ pɛ́lɛ́ɛ, lɛ ka bɛ̃̀ɛ̃ ka mɔ̀ kɛ ká ka kíe nì gã̀ mɛ́ pɛ́lɛ́.

¹⁵Maà wɔ̃́ gɔ̃̀á zɔ̃̀ɔ̃̀ ka lɛ̀ɛ, kɛɛ ká wɔ̃́ lɛ́ nɔ́ ma kɛ ka lɛ̀ɛ kɛ.

¹⁶Wánà-wɔ̃̀ kpó-kpó lɛ́ m̀ gèe ka lɛ̀ɛ ɓɛ. Lùò nɔ́ɔ fé wá kpànazɛ̀, é dieá e dàa-mì là. Vɔ-mì nɔ́ɔ fé wá kpànazɛ̀, é dieá mí a vɔɔ là.

¹⁷É kɛ̀á káà wɔ̃́ nì e kília yí maa, kɛɛ lúà kpɔ́ɔ̀ lɛ ka mɔ̀ yé kaà o kɛɛ ká.

¹⁸“Ma wá mɛ́ĩ́ e kéa ɓopìà ka séĩ́ ka gbĩ mɔ̀. Mia lɛ́ maà o sía, ḿm̀ o dɔ. Kɛɛ wɔ̃́ yé e ké lɛ́ è go Wálà là kíía yía, laa mɔ̀ é kɛ wánà zɛ̀. Ye lɛ́ e kélɛ̀, ‘Mi lɛ́ e m̀ léɓèlè ɓèlèa, e e gã̀-kɛlɛ̀ zóló zɔ̃̀ɔ̃̀ m lɛ̀ɛ.’

¹⁹Ḿm̀ wɔ̃́ e kéa gèe ka lɛ̀ɛ kɛ bɛ̃̀ɛ̃ é tĩã́ kɛɛ̀. À kɛɛ̀ lɛ kíli, kɛɛ é kɛ̀áa, kɛ ká gɛ̃̀ wánà ká kélɛ̀ m mí e m káa ká.

²⁰Wánà-wɔ̃̀ kpó-kpó lɛ́ m̀ gèe ka lɛ̀ɛ ɓɛ. Mi lɛ́ è e kɔ̀ yà mi nɔ́ɔ fé lɛ́ m̀ vɔɔ wìa, kɛɛ aà e kɔ̀ yà ma bɛ̃̀ɛ̃ m wì nɔ́ kíli. Ɛ́ɛ̃́ mí è e kɔ̀ yà m wìa, kɛɛ aà e kɔ̀ yà mí e m vɔɔ wì.”

²¹Lɛ̀ Zízɛ̀ e wɔ̃́ e kéa gèea, à zò e mɛ̀ à mɔ̀ yɔɔ, áà gèè kélɛ̀, “Wánà-wɔ̃̀ kpó-kpó lɛ́ m̀ gèe ka lɛ̀ɛ ɓɛ. Ka doó-mì lɛ́ɛ̀ lo m lé góò.”

²²Là tòà-píé-mìàa o o kíe nì bà gɛ̃̀. Òó gbaa mi lɛ́ Zízɛ̀ e kɛ là wéé ɓopìàa dɔ.

²³Tòà-píé-mìàa doó-mì yé à lɔ̀ kpɔ́ɔ̀ e kɛá Zízɛ̀ mɔ̀ɔ, e kɛ yàá Zízɛ̀ sɔ́nɔ́ kɔ̀ɛ́.

²⁴Sáímɔ̀ Pílɛ̀ e mɛ́ĩ́ ɓo e kɔ̀ ká à lɛ̀ɛ, áà gèè, “Zízɛ̀ wɛ̃́ĩ́-lɔ̀ɔ kɛ kélɛ̀, dé è là mɛ́ĩ́ ɓo ɓɛ.”

²⁵Lɛ̀ e kɛ kília, tòà-píé-mì e kília e tɛ̃́ Zízɛ̀ mɔ̀, áà gèè, “M dàa-mì, deĩ̀ lɛ?”

²⁶Zízɛ̀ a là nìɛ̀ kélɛ̀, “Mi lɛ́ m̀ lo belè wàà ɓòo bà, tó ma nɔ à lɛ̀ɛ lɛ́ e à káa.” Lɛ̀ e kɛ kília, e belè kpuú sí, a wàà ɓòo bà, a nɔ Zúdà lɛ́ e kɛ Sáímɔ̀ Ɛ̀sɛ̀kélìà gbe káa lɛ̀ɛ.

²⁷Yé Zúdà e belèa kṹ nɔ́ɔ, Sétɔ̃̀ e wàà à yí gbaa. Zízɛ̀ a gèe à lɛ̀ɛ, “Wɔ̃́ lɛ́ lɛ i mɔ̀ ɓá kɛɛ, ì i yɛ́lɛ́ kɛ i líé ɓá kɛ.”

²⁸Mia lɛ́ o kɛ yàá téɓòa mɔ̀ɔ, o dò nɔ́ɔ fé òó gbaa wɔ̃́ lɛ́ Zízɛ̀ a mɔ́ɔ̀ wɔ̃́ e kéa gèe ɓo à lɛ̀ɛ yí ma.

²⁹Lɛ̀ lɛ́ Zúdà e kɛ pɛlèea vũ-mì káa, tòà-píé-mìàa dò wa gɛ̃̀ ɓɔ̀ɔ kélɛ̀ Zízɛ̀ a gèe à lɛ̀ɛ é ló kpílìa kɛ-pɔ̀ɔ̀ lɔ́ɔ̀, ɛ̃́ɛ̃́ zeĩ́, Zízɛ̀ a gèe lèĩ à lɛ̀ɛ é pɛlèea dò nɔ mia lɛ́ pɛ wá o kɛ̀lɛ̀ɛ lɛ̀ɛ.

³⁰Yé nɔ́ e kɛ kília, Zúdà e ɓɔ pɛlɛí lɛ̀ lɛ́ e belèa kṹa ká. E kɛ bĩ́míà ká.

³¹Lɛ̀ lɛ́ Zúdà e gó yia, Zízɛ̀ a gèe kélɛ̀, “Dɛɛ káa, lɛ́ɛ́ aà ɓo gbaa Mi Gbe là kɛ̀-kpànazɛ̀-kɔ̀ là. Ɛ́ɛ̃́ lɛ́ɛ́ ɓoò lɛ Wálà zì kɛ̀-kpànazɛ̀-kɔ̀ là à kolo là.

³²Ɛ́ɛ̃́ yé lɛ́ɛ́ ɓoò lɛ Wálà zì kɛ̀-kpànazɛ̀-kɔ̀ là à kolo làa, kɛɛ Wálà lɛ́ɛ̀ lo à kɛɛ̀ kpànazɛ̀ e dìè yí zàá, ɛ̃́ɛ̃́ lɛ́ɛ̀ lo à kɛɛ̀ nɔ́ zá le.

³³M̀ nɔ́ɔ̀ɓé, ma wá gbaa ka píé zèe gbèĩ. Káà lo m naà. Kɛɛ wɔ̃́ lɛ́ ma gèe Zúù-mìà lɛ̀ɛ, ḿm̀ lo à gèeè ka bɛ̃̀ɛ̃ ka lɛ̀ɛ dɛɛ ká. Ye lɛ́ e kélɛ̀, kàá bɛ̀i lóò lɛ̀ lɛ́ m̀ lo yía mɔ̀.

³⁴M nupìà lɔ́ɔ̀ dɛɛ nɔɔ̀ ka lɛ̀ɛ. Ye lɛ́ e kélɛ̀, kà lɔ̀ kɛ ka kíe nì ká. Lɛ̀ zí maà à lɔ̀ kɛá ka káa, kà lɔ̀ kɛ ka kíe nì ká zi nɔ́ doóa ká.

³⁵É kɛ̀á ka kíe nì lɔ̀ kpɔ́ɔ̀ lɛ ka mɔ̀ɔ, kɛɛ mia séĩ́ óò lo à yí dɔɔ̀ kélɛ̀ ka tò-m-píé-mìà ká.”

³⁶Sáímɔ̀ Pílɛ̀ a gèe à lɛ̀ɛ, “M Dàa-mì, mɛ́ɛ lɛ́ ì lo yí ɓɛ?” Zízɛ̀ a là nìɛ̀ kélɛ̀, “Ìí bɛ̀i tóò m píé, kɛɛ kò ɓi kó ló lɛ̀ m̀ lo yía mɔ̀ dɛɛ ká. Kɛɛ íì lo tóò m píé, tó i ɓɔ yí líé zàá.”

³⁷Pílɛ̀ a gèe à lɛ̀ɛ, “M Dàa-mì, mɛ́ e kɛ lɛ́ m̀ḿ tó yee ɓo i píé dɛɛ ká? Ḿm̀ lo m̀ kɛ̀ɓe nɔɔ̀ i mɔ́ɔ̀ wɔ̃̀ mɔ̀.”

³⁸Zízɛ̀ a gèe à lɛ̀ɛ, “Íì lo ɓà kɛ̀ɓe nɔɔ̀ m mɔ́ɔ̀ wɔ̃̀ mɔ̀ kàáà? Wánà-wɔ̃̀ kpó-kpó lɛ́ m̀ gèe i lɛ̀ɛ ɓɛ. Kɛ tɔ̀ɔ̀ é tĩã́ wéèa, íì lo à gèeè kpolà yààka zɛ̀ kélɛ̀ ìí m dɔ.