Read Yamano Zɔ̃̀ɔ̃́ 16 Bible Online

Zɔ̃̀ɔ̃́ 16 - Yamano bible

Zɔ̃̀ɔ̃́ 16

¹“Maà wɔ̃́ nì e kéa gèe ka lɛ̀ɛ yékɛ̀ ká dà ka mɛ̀ĩ́.

²Óò lo ka lúò o zì Wálà-kà wì. Lúó lɛ́ mí è ka zɛɛ, è lo à gɛ̃̀ɛ̃̀á kélɛ̀ ka zɛ́ à ɓoa, lɛ Wálà là yɛɓo ká áà kɛ̀ɛ, lɛ́ɛ̀ lo ɓɔɔ̀.

³Óò lo wɔ̃́ nì e kéa kɛɛ̀ ka ká, ɓii òó mia Dàa dɔ, ɛ̃́ɛ̃́ òó ma bɛ̃̀ɛ̃ m dɔ nɛ́ɛ mɔ́ɔ̀ wɔ̃̀ mɔ̀.

⁴Kɛɛ maà wɔ̃́ nì e kéa gèe ka lɛ̀ɛ, kɛ wɔ̃́ nì e kília kɛ-lùò é ɓɔáa, kɛɛ ka zò é vùò kélɛ̀ m à wɔ̃̀ gèe ka lɛ̀ɛ. “M̀ḿ gbaa wɔ̃́ nì e kéa gèe ka lɛ̀ɛ wɔ̃́ gã̀-gbɛ̃̀pìà, ɓii m kɛ ka píéa mɔ́ɔ̀ wɔ̃̀ mɔ̀.

⁵Kɛɛ dɛɛ káa, m lópìà gbaa mi lɛ́ e m vɔɔ píé. É kɛ bɛ̃̀ɛ̃ kília, ka dò nɔ́ɔ fé lɛ̀ɛ́ m wɛ̃́ĩ́-lɔ̀ɔ kɛ lɛ̀ m̀ lo yía mɔ́ɔ̀ wɔ̃̀ ká.

⁶Kɛɛ ka zò aà kɛ gbaa yéĩ̀zɛ̀ wɔ̃́ nì e kéa gèe ma ɓo ka lɛ̀ɛ ká.

⁷Kɛɛ lɛ wánà-wɔ̃̀ ká lɛ́ m̀ gèe ka lɛ̀ɛ. M zì gò ka píé lɛ sɛ̀ ka mɔ́ɔ̀ wɔ̃̀ mɔ̀. Ƃii yé m̀ḿ gó ka píéa, Gbũ̀-ka-mɔ̀-mìa lɛ̀ɛ́ ló nuù ka píé. Kɛɛ yé maà kɛ ló-mì káa, ḿm̀ lo à vɔɔ̀ ka píé.

⁸Yé aà nua, lɛ́ɛ̀ lo à zɔ̃̀ɔ̃̀ kpóṹ là zèe mìà lɛ̀ɛ kélɛ̀ o wɔ̃́ niì lɛ kɛ-wɔ̃̀ yɔɔ, e bɛ̀i, wɔ̃́ lɛ́ e kpeĩa, wà Wálà zì mɛ̀ĩ́-sà dɔ̀-mia-mɔ̀ mɔ́ɔ̀ wɔ̃̀ mɔ̀.

⁹O wɔ̃́ niì lɛ kɛ-wɔ̃̀ yɔɔ mɔ́ɔ̀ wɔ̃̀ mɔ̀, ɓii o zò dɔɔ̀ wá m mɔ.

¹⁰O wɔ̃́ niì lɛ zeĩ́ wɔ̃́ lɛ́ e kpeĩa mɔ́ɔ̀ wɔ̃̀ mɔ̀, ɓii m lópìà mia Dàa píé, ɛ̃́ɛ̃́ kàá ló gbaa m gɛ̃̀ɛ̃̀.

¹¹Zéniía, o wɔ̃́ niì lɛ Wálà zì mɛ̀ĩ́-sà dɔ̀-mia-mɔ̀ mɔ́ɔ̀ wɔ̃̀ mɔ̀. Ƃii mɛ̀ĩ́-sà káà lɛ kpóṹ là zèe wũ-là-mì wĩĩ́ gbaa.

¹²“Gèè-ka-lɛ̀ɛ-wɔ̃̀ lɛ m kɛ̀lɛ̀ gbùò, kɛɛ lɛ́ɛ̀ lo kɛɛ̀ ka là gbííni yé maà gèe ka lɛ̀ɛ dɛɛ káa ká.

¹³Kɛɛ yé Gɛ̀ɛ̀ Púlú wánà zɛ̀ɛ aà nua, lɛ́ɛ̀ ló líé síì ka ká wɔ̃́ wánà zɛ̀ séĩ́ yí. Lɛ̀ɛ́ ló mɛ́ĩ́ ɓoò e dìè zì yíkɛ̀ gáàa ká. Kɛɛ lɛ́ɛ̀ lo wɔ̃́ lɛ́ aà maa gèeè, ɛ̃́ɛ̃́ tó áà wɔ̃́ lɛ́ lɛ nupìà kɛɛ̀ɛ gèè ka lɛ̀ɛ.

¹⁴Lɛ́ɛ̀ lo m kɛɛ̀ kpànazɛ̀, ɓii lɛ́ɛ̀ lo wɔ̃́ lɛ́ e m géa síì, áà gèè ka lɛ̀ɛ.

¹⁵Pɛ séĩ́ lɛ́ e m Dàa kɛ̀lɛ̀ɛ, lɛ m̀ pɛ ká. Pɛ́ à kɛ̀ lɛ́ m̀ mɔ́ɔ̀ à gèe ɓo kélɛ̀ Gɛ̀ɛ̀ Púlúa lɛ́ɛ̀ lo m gé-wɔ̃̀ síì, áà gèè ka lɛ̀ɛ lɛ́ ɓɛ.

¹⁶“À lɛ̀ lɛ̀ɛ́ ló túò bɛ̃̀ɛ̃, káà kɔ̃̀ m ká gbaa. Ɛ́ɛ̃́ yé à lɛ̀ aà ɓo pèèlɛɛ, káà lo m gɛ̃̀ɛ̃̀ zeĩ́.”

¹⁷Là tòà-píé-mìàa gbṹũ̀ wa gèe o ɓɛ́ĩ̀ nì lɛ̀ɛ, “Wɔ̃́ sùua yí lɛ́ mɛɛ ká? Láà gèe ko lɛ̀ɛ, à lɛ̀ lɛ̀ɛ́ ló túò bɛ̃̀ɛ̃, kɔ́áà kɔ̃̀ à ká, ɛ̃́ɛ̃́ yé à lɛ̀ aà ɓo pèèlɛɛ, kɔ́áà lo à gɛ̃̀ɛ̃̀ zeĩ́. Ɛ́ɛ̃́ a gèe zeĩ́, lɛ kíli, ɓii lɛ́ɛ̀ lo mia Dàa píé.”

¹⁸Wa gèe kélɛ̀, “Kéa, à lɛ̀ lɛ̀ɛ́ ló túò à gèe e kéa, yí lɛ́ mɛɛ ká? Wɔ̃́ lɛ́ à gèea, kòó à yí ma.”

¹⁹Zízɛ̀ a yí dɔ kélɛ̀ o kɛ à naapìà ó à wɛ̃́ĩ́-lɔ̀ɔ kɛ. A mɔ́ɔ̀ à gèe ɓo o lɛ̀ɛ, “Ma gèe kélɛ̀, à lɛ̀ lɛ̀ɛ́ ló túò bɛ̃̀ɛ̃ káà kɔ̃̀ m ká, ɛ̃́ɛ̃́ yé à lɛ̀ aà ɓo pèèlɛɛ, káà lo m gɛ̃̀ɛ̃̀ zeĩ́. Wɔ̃́ lɛ́ kà ka kíe nì wɛ̃́ĩ́-lɔ̀ɔ kɛ̀áa lɛ́ ɓɛ?

²⁰Wánà-wɔ̃̀ kpó-kpó lɛ́ m̀ gèe ka lɛ̀ɛ ɓɛ. Káà lo gbóó ɓoò, ka nyìɛ yíí áà dìè, kɛɛ kpóṹ là gé lɛ́ɛ̀ lo kɛɛ̀ lipìà. Káà lo kɛɛ̀ yéĩ̀zɛ̀, kɛɛ ka zì kɛ̀ yéĩ̀zɛ̀ɛ, lɛ́ɛ̀ lo nìɛ̀ géli yí.

²¹Yé lee aà dɔ é laa, lɛ́ɛ̀ yà yéĩ̀zɛ̀, ɓii à zì wàa-ɓèlè lúó aà ɓɔ. Kɛɛ yé aà la nɛ́ e kília káa, à zò lɛ́ɛ̀ ni wàa lɛ́ a ɓèlèa mɔ́ɔ̀ wɔ̃̀ ká. À gé lɛ́ɛ̀ li, ɓii nɛ́fú dɛɛ aà nu kpóṹ là zèe.

²²Zí e kéa lɛ́ wɔ̃́ kɛɛ̀ lɛ à ká ka káa. Dɛɛ káa, ka yàà lɛ yéĩ̀zɛ̀. Kɛɛ ḿm̀ lo ka gɛ̃̀ɛ̃̀ zeĩ́. Yé aà kɛ kília, ka gé lɛ́ɛ̀ lo liì. Ɛ́ɛ̃́ mi gbɛɛ lɛ̀ɛ́ bɛ̀i géli e kília ɓoò ka là.

²³“Yé lúó e kília aà ɓɔɔ, kàá ló pɛ nɔ́ɔ fé dò pɛ̃́ɛ̃̀ m mɔ̀. Wánà-wɔ̃̀ kpó-kpó lɛ́ m̀ gèe ka lɛ̀ɛ ɓɛ. Mia Dàa lɛ́ɛ̀ lo pɛ nɔ́ɔ fé lɛ́ kà pɛ̃ à mɔ̀ m tɔ́ yía, nɔɔ̀ ka lɛ̀ɛ.

²⁴É kã́ lúó aà diea mɔ̀, é ɓɔá pɛ́nɛɛ mɔ̀ɔ, kàá pɛ gbɛɛ pɛ̃́ do m tɔ́ yí. Kà pɛ pɛ̃́. Ká kɛ̀á kília, káà lo à sɔ̀lɔ̀ ɓoò, kɛɛ ka zì géli lé é pa.

²⁵“Maà wɔ̃́ nì e kéa gèe ka lɛ̀ɛ pĩ̀ã̀ vɔɔ̀ ká. Kɛɛ lúó lɛ́ m̀ḿ ló gbaa wɔ̃́ gèeè ka lɛ̀ɛ pĩ̀ã̀ vɔɔ̀ káa, lɛ́ɛ̀ lo ɓɔɔ̀. Ḿm̀ lo wɔ̃́ lɛ́ à gbɛ̃̀ɛ̃̀ lɛ mia Dàa mɔ̀ɔ gèeè ka lɛ̀ɛ wéé fèle ká.

²⁶Lúó e kília káa, káà lo pɛ pɛ̃́ɛ̃̀ m tɔ́ yí. M̀ḿ gbaa gèe kélɛ̀ ḿm̀ lo pɛ pɛ̃́ɛ̃̀ mia Dàa mɔ̀ ka lɛ̀ɛ,

²⁷ɓii ka lɔ̀ kpɔ́ɔ̀ lɛ mia Dàa ɓɛ mɔ̀. Ka lɔ̀ kpɔ́ɔ̀ lɛ à mɔ̀, ɓii m lɔ̀ kpɔ́ɔ̀ lɛ ka mɔ̀, ɛ̃́ɛ̃́ kaà à gɛ̃̀ wánà ká kélɛ̀ m góò lɛ Wálà píé.

²⁸M gó mia Dàa píé, ɛ̃́ɛ̃́ m nu kpóṹ là zèe. Kɛɛ dɛɛ káa, m gópìà kpóṹ là zèe, máà lò mia Dàa ɓɛ píé.”

²⁹Lɛ̀ e kɛ kília, là tòà-píé-mìàa wa gèe à lɛ̀ɛ, “Yéa, i gbaa mɛ́ĩ́ ɓopìà ko lɛ̀ɛ i lé-wè fèle ká. Ƃi wá gbaa à gèepìà pĩ̀ã̀ vɔɔ̀ ká.

³⁰Kóò à yí dɔ gbaa kélɛ̀ íì wɔ̃́ séĩ́ yí dɔ. Ye wá gbaa mi nɔ́ɔ fé mɔ̀ kɛ é wɛ̃́ĩ̀-lɔ̀ɔ kɛ i kɛ̀lɛ̀. Wɔ̃́ e kéa, a kɛ kɔa gɛ̃̀ wánà ká kélɛ̀ íì go Wálà píé.”

³¹Zízɛ̀ e o wúú là nìɛ̀ kélɛ̀, “Káà wɔ̃́ gɛ̃̀ wánà ká gbaa?

³²Lúó lɛ́ ka séĩ́ ka kã́ã̀ è lo kɛɛ̀á e kíe mɔ̀ɔ, lɛ nupìà, ɛ̃́ɛ̃́ aà ɓɔ gbaa. Káà lo lóò ka pà doó doó, tó ka m tó m doó ká. Kɛɛ ma wá kpó-kpó ɓo m doó ká, ɓii mia Dàa lɛ m píé.

³³Maà wɔ̃́ e kéa gèe ka lɛ̀ɛ, kɛɛ ká zò-yà-gé sɔ̀lɔ̀ ɓo kɔ̀à ɓi nì kɔa kɛ̀ doó kolo là. Kpóṹ là lɛ́ɛ̀ lo ka yéĩ̀-kɛ̀ ɓoò. Kɛɛ kà kɛ zò-kũ̀-gé zɛ̀. M kɔ̀ aà die kpóṹ là zèe là.”