Read Yamano Zɔ̃̀ɔ̃́ 17 Bible Online

Zɔ̃̀ɔ̃́ 17 - Yamano bible

Zɔ̃̀ɔ̃́ 17

¹Lɛ̀ Zízɛ̀ e nyɛ wɔ̃́ nì e kéa gèeè mɔ̀ɔ, e lɛ̀ gɛ̃̀ lɛ̀í áà gèè, “M Dàa, lúóa aà ɓɔ. Ì i Gbe kɛ kpànazɛ̀, kɛ à bɛ̃̀ɛ̃ é i kɛ kpànazɛ̀.

²Ƃii i yíkɛ̀ gáàa nɔ à lɛ̀ɛ mia séĩ́ là, kɛ é kɛ̀ɓe wɔ́lɔ́-wɔ́lɔ́ nɔ mia séĩ́ lɛ́ ɓaà o nɔ à lɛ̀ɛ lɛ̀ɛ.

³Ɛ́ɛ̃́ kɛ̀ɓe wɔ́lɔ́-wɔ́lɔ́ gɛ̃̀ e ké. Ye lɛ́ e kélɛ̀, kɛɛ mia ó ɓí i Wálà wánà zɛ̀ doó ɓɛ káa dɔ, ɛ̃́ɛ̃́ kɛ zeĩ́ mia ó Zízɛ̀ Kɛ́lɛ̀ì lɛ́ ɓa vɔɔ dɔ.

⁴M i zì kɛ̀-kpànazɛ̀ zɔ̃̀ɔ̃̀ kpóṹ là. M nyɛ yɛɓo lɛ́ ɓa nɔ m lɛ̀ɛ ḿ kɛɛ, kɛɛ̀ mɔ̀.

⁵M Dàa, ì m kɛ kpànazɛ̀ i wɛlɛ mɔ̀ gbaa kɛ̀-kpànazɛ̀-kɔ̀ nɔ́ doó lɛ́ e kɛ m kɛ̀lɛ̀ i píé yi, kɛ kpóṹ là kɛɛ̀ é tĩã́ kɛɛ̀ à káa ká.

⁶“Maà à kɛ mia lɛ́ i o nɔ m lɛ̀ɛ, lɛ́ o góò e kɛá kpóṹ là yía, waà i dɔ. O kɛ ɓà mia nì ká, lɛ́ i o nɔ m lɛ̀ɛ. Waà i wéè kɛ.

⁷Ɛ́ɛ̃́ óò à yí dɔ gbaa kélɛ̀ pɛ séĩ́ lɛ́ ɓa nɔ m lɛ̀ɛ, lɛ́ɛ̀ go i kɛ̀lɛ̀.

⁸Wéé lɛ́ ɓa nɔ m lɛ̀ɛ, ma nɔ o bɛ̃̀ɛ̃ o lɛ̀ɛ nɔ́ kíli. Ɛ́ɛ̃́ o o kɔ̀ yà o wì. Óò à yí dɔ kélɛ̀ m gó i píé wánà ká. Óò à gɛ̃̀ wánà ká kélɛ̀ ɓi lɛ́ i m vɔɔ.

⁹“Ḿm̀ sɛ̀nɛ e kéa ɓo o wɛ̃́ĩ̀. Ma wá sɛ̀nɛ ɓopìà kpóṹ là wɛ̃́ĩ̀. Kɛɛ ḿm̀ ɓo mia lɛ́ i o nɔ m lɛ̀ɛ wɛ̃́ĩ̀, ɓii o ɓà mia nì káa mɔ́ɔ̀ wɔ̃̀ mɔ̀.

¹⁰Pɛ séĩ́ lɛ́ e m kɛ̀lɛ̀ɛ lɛ ɓà pɛ ká. Ɛ́ɛ̃́ pɛ séĩ́ lɛ́ e ɓi bɛ̃̀ɛ̃ i kɛ̀lɛ̀ɛ, lɛ m̀ pɛ ká. Ɛ́ɛ̃́ m zì kɛ̀-kpànazɛ̀-kɔ̀ zɔ̃̀ɔ̃ɔ̃̀ lɛ o kolo là.

¹¹M nupìà gbaa i píé dɛɛ ká. Ma wá kpóṹ là zèe gbaa. Kɛɛ o yee, o tĩã́ kpóṹ là zèe. M Dàa lɛ́ i púlú ɓɛ. Ì o mɛ́ lúó i zì tɔ́ lɛ́ ɓa kpɔ́ m mɔ̀ɔ mɔ́ɔ̀ yíkɛ̀ gáàa ɓɛ ká, kɛɛ ó kɛ doó lɛ̀ zí kò ɓi ko à ká doóa lɛ́ ɓe.

¹²Lɛ̀ lɛ́ m kɛ o píéa, m o mɛ́ lúó i zì tɔ́ lɛ́ ɓa kpɔ́ m mɔ̀ɔ, mɔ́ɔ̀ yíkɛ̀ gáàa ɓɛ ká. M m nyìɛ kɛ o mɔ̀. O dò nɔ́ɔ fé lɛ̀ɛ́ gbaa gíni, é kã́ à yé e kɛ à mɔ̀ é gínia mɔ̀ɔ ká. E kɛ kíli kɛɛ wɔ̃́ lɛ́ à bɛ̃̀ɛ̃ɛ̃̀ lɛ Wálà kiia yía, é kɛ wánà zɛ̀.

¹³Kɛɛ dɛɛ káa, m nupìà gbaa i píé. Ḿm̀ wɔ̃́ nì e kéa gèe kpóṹ là zèe, kɛɛ m mɔ́ɔ̀ géli é kɛ o yí, ɛ̃́ɛ̃́ kɛ à lé paà é kɛá.

¹⁴M ɓà wééa nɔ o lɛ̀ɛ. Ɛ́ɛ̃́ o lɔ̀ e nyɛ kpóṹ là mɔ̀, ɓii o wá kpóṹ là là mia nì ká, lɛ̀ zí ma wá kpóṹ là là mi káa lɛ́ ɓea, mɔ́ɔ̀ wɔ̃̀ mɔ̀.

¹⁵Ma wá sɛ̀nɛ ɓopìà i lɛ̀ɛ kɛ í o sí kpóṹ là, kɛɛ ḿm̀ ɓo kɛ í i yɛ́lɛ́ kɛ o mɔ̀ Kɛ-pɛ̀ Yɔɔ Kɛ-mì ɓɛ mɔ́ɔ̀ wɔ̃̀ mɔ̀.

¹⁶Zi lɛ́ ma wá à ká kpóṹ là là mi káa, o bɛ̃̀ɛ̃ o wá à ká nɔ́ kíli.

¹⁷Ì o kɛ i doó ɓà mia nì ká wɔ̃́ wánà zɛ̀ɛ kolo là. I lé-wè lɛ́ e wɔ̃́ wánà zɛ̀ e kília káa.

¹⁸Maà o vɔ kpóṹ là píé, lɛ̀ zí i m vɔá yia lɛ́ ɓe.

¹⁹Maà m dìè kɛ i doó ɓà mi ká o mɔ́ɔ̀ wɔ̃̀ mɔ̀, kɛ o bɛ̃̀ɛ̃ o kɛɛ̀ é kɛá i doó ɓà mia nì ká wánà ká.

²⁰“M̀ḿ sɛ̀nɛ ɓo o doó o wɛ̃́ĩ̀, kɛɛ ḿm̀ ɓo mia lɛ́ ò o zò dɔ m mɔ̀ wɔ̃́ lɛ́ wa gèea kolo làa wɛ̃́ĩ̀ nɔ́ kíli.

²¹Ḿm̀ sɛ̀nɛ ɓo kɛɛ o séĩ́ ó kɛ doó. M Dàa, ò kɛ ko yí, lɛ̀ zí i à ká m yí, lɛ́ ma bɛ̃̀ɛ̃ m à ká i yía lɛ́ ɓe. Ò kɛ doó, kɛɛ kpóṹ là á gɛ̃̀ wánà ká kélɛ̀ i m vɔ.

²²Kɛ̀-kpànazɛ̀-kɔ̀ nɔ́ doó i à nɔ m lɛ̀ɛ, ma nɔ o bɛ̃̀ɛ̃ o lɛ̀ɛ, kɛ ó kɛ doó, lɛ̀ zí kò ɓi ko à ká doóa ká.

²³M o yí, ɛ̃́ɛ̃́ ɓi bɛ̃̀ɛ̃ i m yí, kɛɛ ó kɛ doó kpó-kpó ɓo, kɛ kpóṹ là á yí dɔ kélɛ̀ ɓi lɛ́ i m vɔ, ɛ̃́ɛ̃́ o lɔ̀ kpɔ́ɔ̀ lɛ i mɔ̀, lɛ̀ zí m lɔ̀ kpɔ́ɔ̀ lɛ à ká i mɔ̀ɔ lɛ́ ɓe.

²⁴“M Dàa, ɓaà o nɔ m lɛ̀ɛ. Ḿm̀ nàà ó kɛ m píé lɛ̀ lɛ́ m yía mɔ̀, kɛɛ ó m zì kɛ̀-kpànazɛ̀-kɔ̀ lɛ́ ɓa nɔ m lɛ̀ɛ gɛ̃̀. Ƃii m lɔ̀ kpɔ́ɔ̀ e kɛá i mɔ̀ kɛɛ kpóṹ là kɛɛ̀ é tĩã́ kɛɛ̀ à ká.

²⁵M Dàa lɛ́ i kpeĩ ɓɛ. Kpóṹ là lɛ̀ɛ́ i dɔ. Kɛɛ ḿm̀ i dɔ. Ɛ́ɛ̃́ míá o kéa óò à yí dɔ kélɛ̀ ɓi lɛ́ i m vɔɔ.

²⁶Maà o kɛ, waà i dɔ. Ɛ́ɛ̃́ ḿm̀ lo lóò m líé à kɛ̀ kíli ká, kɛɛ m lɔ̀ lɛ́ à kpɔ́ɔ̀ lɛ i mɔ̀ɔ é kɛ o yí, ɛ̃́ɛ̃́ kɛ ma bɛ̃̀ɛ̃ ḿ kɛ o yí nɔ́ kíli.”