Read Yamano Zɔ̃̀ɔ̃́ 19 Bible Online

Zɔ̃̀ɔ̃́ 19 - Yamano bible

Zɔ̃̀ɔ̃́ 19

¹Lɛ̀ e kɛ kília, Pálɛ̀ e Zízɛ̀ kṹ, áà mɛ̀ gbàtò ká.

²Sóyà vɔ̀ɔ o ɓɛ̀lɛ̀-kálá gɛ́nɛ́ zɛ̀ kpɛ́nɛ́ e kíe ká, wa wàà à wũ mɔ̀. O gbàà-wíì zóló sùu dò dà à mɔ̀.

³O nu à píé, wáà gèè kélɛ̀, “Zúù-mìà líé-sí-mì, i yìì píé é kɛ gbèĩ.” O gbɛ̃̀, wáà mɛ̀ o kɔ̀ ká.

⁴Pálɛ̀ e ló míáa píé zeĩ́, a gèe o lɛ̀ɛ, “Kà lɛ̀ gɛ̃̀. Ḿm̀ lo nuù à ká ka píé, kɛ ḿ zɔ̃̀ɔ̃̀ ka lɛ̀ɛ kélɛ̀ wɔ̃́ yɔɔ lɛ́ aà à kɛɛ, m̀ḿ à gɛ̃̀.”

⁵Lɛ̀ e kɛ kília, Zízɛ̀ e ɓɔ pɛlɛí. Gɛ́nɛ́ gbàláa yàaà e kɛá Zízɛ̀ wĩĩ́, ɛ̃́ɛ̃́ gbàà-wíì zóló e kɛ à mɔ̀ lɛ̀ e ɓɔ pɛ́lɛɛ ká. Pálɛ̀ a gèe o lɛ̀ɛ, “Gɔ̃́ɔ gɛ̃̀ e ké.”

⁶Lɛ̀ sálà-ɓò-Wálà-mɔ̀-mìà kpànazɛ̀ɛ wà sóyà vɔ̀ɔ o à gɛ̃̀ɛ, o gbɛ́ɛ́ weeá kélɛ̀, “Ì à pá nélè ká kɔ́lɔ́sì mɔ̀. Ì à pá nélè ká kɔ́lɔ́sì mɔ̀.” Pálɛ̀ a gèe o lɛ̀ɛ, “Ka yee kà à kṹ ká pá nélè ká kɔ́lɔ́sì mɔ̀. Kɛɛ m̀ḿ wɔ̃́ yɔɔ lɛ́ aà kɛɛ gɛ̃̀.”

⁷Zúù-mìà wa là nìɛ̀ kélɛ̀, “Lɔ́ɔ̀ dò lɛ ko kɛ̀lɛ̀ɛ, a gèe é ga, ɓii e e dìè kɛ Wálà Gbe ká.”

⁸Lɛ̀ Pálɛ̀ e wɔ̃́ lɛ́ wa gèe kília maa, túó kpó-kpó e kɛ à kɛpìà.

⁹E ló e mɛ̀ĩ́ e píé kɛ́ì, e Zízɛ̀ wɛ̃́ĩ́-lɔ̀ɔ kɛ kélɛ̀, “Íì go mɛ́ɛ̀ zàá?” Kɛɛ Zízɛ̀ lɛ̀ɛ́ gbaa à wéè yí zṹ.

¹⁰Pálɛ̀ a mɔ́ɔ̀ à gèe ɓo à lɛ̀ɛ kélɛ̀, “Ƃàá naa í m wéè dàa mɔ̀? Ìí à yí dɔ kélɛ̀ yíkɛ̀ gáàa lɛ m kɛ̀lɛ̀ kɛ ḿ i ɓo wɔ̃́ yí, ɛ̃́ɛ̃́ lɛ m kɛ̀lɛ̀ kɛ ḿ i pá nélè ká kɔ́lɔ́sì mɔ̀?”

¹¹Zízɛ̀ a là nìɛ̀ kélɛ̀, “Pɛ́ nɔ́ à kɛ̀ lɛ́ yíkɛ̀ gáàa lɛ i kɛ̀lɛ̀ m làa, lɛ́ e kélɛ̀, Wálà aà nɔ i lɛ̀ɛ. À mɔ́ɔ̀ wɔ̃̀ mɔ̀ɔ, mi lɛ́ e m nɔ i lɛ̀ɛ, à zì kɛ-wɔ̃̀ yɔɔ lɛ́ aà kɛɛ, lɛ gbùò é dieá i zì là.”

¹²Lɛ̀ Pálɛ̀ e wɔ̃́ e kéa maa, e zi naa kɛ é kã́ Zízɛ̀ mɔ̀. Kɛɛ Zúù-mìàa o gbɛ́ɛ́ weeá kélɛ̀, “Í kã̀ã́ à mɔ̀ɔ, kɛɛ ɓi wá Sízà ɓɛ́ɛ ká. Mi nɔ́ɔ fé lɛ́ è e dìè kɛ̀ mia líé-sí-mì káa, kɛɛ aà e dìè kɛ gèlè-gɔ̃̀-Sízà-ká-mì ká.”

¹³Lɛ̀ Pálɛ̀ e wɔ̃́ nì e kéa maa, e ɓɔ Zízɛ̀ ká pɛlɛí. E yà tã́ã̀ mɛ̀ĩ́-sà kã́ táŋáná là, lɛ̀ dò lɛ́ ò si Gɛ̀lɛ̀-kpɔ́ɔ́ Kṹã̀a Zɛ̀ɛ mɔ̀. Lɛ̀ e kília tɔ́ e Hííbúlù-wè yía lɛ́ Gàbátà.

¹⁴Lúó e kília e kɛ Dìè-mia-là Kpílìa pɛ̀-kɛ-lùò ká. E kɛ, kɛɛ nyɛ́nɛ́ aà dɔ lèĩ mia tùluù zèí. Pálɛ̀ a gèe Zúù-mìà lɛ̀ɛ, “Ka líé-sí-mìa gɛ̃̀ e ké.”

¹⁵O gbɛ́ɛ́ weeá kélɛ̀, “Ì à zɛ. Ì à zɛ. Ì à pá nélè ká kɔ́lɔ́sì mɔ̀.” Pálɛ̀ a gèe o lɛ̀ɛ, “Káà nàà ḿ ka líé-sí-mìa pá nélè ká kɔ́lɔ́sì mɔ̀?” Sálà-ɓò-Wálà-mɔ̀-mìà kpànazɛ̀ɛ wa gèe, “Ko líé-sí-mì nɔ́ kò dɔɔ lɛ́ e Sízà káa.”

¹⁶Lɛ̀ e kɛ kília, Pálɛ̀ e Zízɛ̀ nɔ o lɛ̀ɛ, kɛ ó à pá nélè ká kɔ́lɔ́sì mɔ̀.

¹⁷Lɛ̀ e kɛ kília, o ló Zízɛ̀ ká. E ɓɔ pɛlɛí, áà lò là kɔ́lɔ́sìa ká. E nu, e ɓɔ lɛ̀ lɛ́ ò si Kpò-kòlò-wɛ́lɛ́ pàa mɔ̀. Óò lɛ̀ e kília si Hííbúlù-wè yí kélɛ̀ Gɔ̀gɔ́tà.

¹⁸Wa pá nélè ká kɔ́lɔ́sì mɔ̀ lɛ̀ e kília mɔ̀. O bɛ̀i, o gɔ̃à pèèlɛ pá nélè ká kɔ́lɔ́sì mɔ̀. Mi doó-mì e kɛ zié, à doó-mì bɛ̃̀ɛ̃ e kɛ zié, Zízɛ̀ e kɛ o zèí.

¹⁹Pálɛ̀ e kii dò bɛ̃̀ɛ̃, a yà kɔ́lɔ́sìa mɔ̀ kélɛ̀, “Mí e kéa lɛ́ e Zízɛ̀, lɛ́ è go Názàlɛ̀, lɛ́ e Zúù-mìà Líé-sí-mì káa káa.”

²⁰Zúù-mìà búnùzɛ̀ o pɛ́ e kéa gèe, ɓii lɛ̀ lɛ́ o Zízɛ̀ pá kɔ́lɔ́sì mɔ̀ yia, lɛ̀ɛ́ gbaa kɛ pɛ́lɛɛ ká gbèĩ. O kíí e kília bɛ̃̀ɛ̃ Hííbúlù-wè, e bɛ̀i, Látĩ̀-wè ɛ̃́ɛ̃́ Gílíì-wè yí.

²¹Zúù-mìà zì sálà-ɓò-Wálà-mɔ̀-mìà kpànazɛ̀ɛ wa gèe Pálɛ̀ lɛ̀ɛ, “Yékɛ̀ ɓá bɛ̃̀ɛ̃ yí kélɛ̀, lɛ Zúù-mìà Líé-sí-mì ká. Kɛɛ ì à bɛ̃̀ɛ̃ yí kélɛ̀, Gɔ̃́ e kéa a gèe kélɛ̀ lɛ Zúù-mìà Líé-sí-mì ká.”

²²Pálɛ̀ a gèe kélɛ̀, “Pɛ́ maà à bɛ̃̀ɛ̃, à bɛ̃̀ɛ̃ɛ̃̀ lɛ.”

²³Lɛ̀ lɛ́ sóyà vɔ̀ɔ o Zízɛ̀ pá nélè ká kɔ́lɔ́sìa mɔ̀ɔ, o à mɔ̀-sɔ̀ sí, wa yí gìnì kpolà yììsɛ zɛ̀. À pɛ̃́ɛ̃́ doó e kɛ sóyà doó zì ká. O là gbàà-wíìa bɛ̃̀ɛ̃ sí. Gbàà-wíì e kília e kɛ sɔ vɔɔ̀ɔ zɛ̀ lɛ́ à gbɛ̃̀-kíe-mɔ̀ pìà wá à mɔ̀ɔ ká.

²⁴Sóyà vɔ̀ɔ wa gèe o kíe nì lɛ̀ɛ, “Yékɛ̀ kɔ́á à pɛ́ɛ́. Kɔ̀à gɔ̃-pɛ̀ gɔ̃, kɛɛ kó mi lɛ́ è lo tóò à kɛ̀lɛ̀ɛ dɔɔ̀ sí à mɔ̀.” À kɛɛ̀ e kɛá kíli, kɛɛ wɔ̃́ lɛ́ à bɛ̃̀ɛ̃ɛ̃̀ lɛ Wálà kii yía é kɛ wánà zɛ̀. Wɔ̃́ e kília lɛ́ e kélɛ̀, “O m mɔ̀-sɔ̀ yí gìnì o kíe nì mɔ̀. O gɔ̃-pɛ̀ gɔ̃ m mɔ̀ gbàà-wíì wɛ̃́ĩ̀.” À ḿɔ́ɔ̀ wɔ̃̀ mɔ̀ɔ, sóyà vɔ̀ɔ o wɔ̃́ e kéa kɛ.

²⁵Mia lɛ́ o kɛ dɔ̀á Zízɛ̀ là kɔ́lɔ́sìa ká kɔ̀ɛ́ɛ, lɛ́ o kélɛ̀, Zízɛ̀ lòóò, à lòóò ɓɛ́ɛ ye-mì lee zɛ̀, e bɛ̀i, Melé lɛ́ e kɛ Kólópà na káa, ɛ̃́ɛ̃́ Melé lɛ́ è go Mádɛ̀lɛ̀-pɛlɛía káa.

²⁶Zízɛ̀ e e lòóò wà là tòà-píé-mì yé à lɔ̀ kpɔ́ɔ̀ e kɛá à mɔ̀ɔ gɛ̃̀ dɔ̀á yi. Lɛ̀ e kɛ kília, a gèe e lòóò lɛ̀ɛ kélɛ̀, “Lee, i gbe gɛ̃̀ e ké.”

²⁷Lɛ̀ e kɛ kília, a gèe là tòà-píé-mìa lɛ̀ɛ, “I lòóò gɛ̃̀ e ké.” É kã́ lúó e kília mɔ̀ɔ, tòà-píé-mìa e à sí, e ló à ká kɛ é kɛ gbaa à píé kɛ́ì.

²⁸Zízɛ̀ a yí dɔ kèlɛ̀ wɔ̃́ séĩ́ kɛɛ̀ lɛ gbaa. Kɛɛ wɔ̃́ lɛ́ à bɛ̃̀ɛ̃ɛ̃̀ lɛ Wálà kiia yía é kɛ wánà zɛ̀ɛ, a mɔ́ɔ̀ à gèe ɓo kélɛ̀, “Yíí-mi-lɔ̀ lɛ́ɛ̀ m kɛ̀.”

²⁹Páni lɛ́ à paà e kɛá yɔ yíí kpɔ̀nɔɔ̀ɔ zɛ̀ káa, e kɛ yí. O pɛ vɔ́ɛ́-vɔ̀ɛ̀ dò wàà yɔ yíía bà, wa yà sùu lɛ́ ò si hísɔ̀ɔ gã̀ yílí lé, wa sí lɛ̀í, wáà wàà Zízɛ̀ lé.

³⁰Zízɛ̀ e yɔ́ɔ mi, áà gèè kélɛ̀, “Aà nyɛ.” Lɛ̀ e kɛ kília, e e wũ gbɛ̃̀, e ga.

³¹Lɛ̀ e kɛ kília, Zúù-mìa wa gèe Pálɛ̀ lɛ̀ɛ é à tó ó gɔ̃à lɛ́ waà o zɛɛ, gã̀ yɛ́ píé, ó o ɓo gbaa kɔ́lɔ́sìa mɔ̀. O wɔ̃́ e kéa kɛ kíli, ɓii lúó e kília e kɛ Kpílì pɛ̀-kɛ-lùò ká, ɛ̃́ɛ̃́ òó gbaa naa kɛ mia bílía é tó kɔ́lɔ́sìa mɔ̀ píé fĩ́ĩ́-dɔ-lùò ká. Ƃii fĩ́ĩ́-dɔ-lùò lɛ́ e kɛ nupìàa, e kɛ dóo kpó-kpó ɓo kpànazɛ̀.

³²Lɛ̀ e kɛ kília, sóyà vɔ̀ɔ o ló, o mi bèĩzɛ̀ɛ gã̀ pèèlɛ yɛ́. Ɛ́ɛ̃́ o mi yé lɛ́ o wà Zízɛ̀ o zɛ e kíe káa gã̀ pèèlɛ yɛ́ nɔ́ kíli.

³³Kɛɛ lɛ̀ o ɓɔ Zízɛ̀ mɔ̀ɔ, wa gɛ̃̀ kɛɛ aà ga. Òó gbaa mɔ́ɔ̀ à gã̀ yɛ́.

³⁴Yé bɛ̃̀ɛ̃ e kɛ kília, sóyà vɔ̀ɔ doó-mì e là dí sí, a dùò Zízɛ̀ sɛ̃́ĩ́. Lɛ̀ e kɛ nɔ́ kília, léà wà yíí o gbɛ̃̀ gbaa wáà dìè.

³⁵Mi lɛ́ e wɔ̃́ e kéa gɛ̃̀ áà kɛ̀ɛ, aà à mɛ̀ĩ̀ ɓo, kɛɛ ka bɛ̃̀ɛ̃ ká à gɛ̃̀ wánà ká nɔ́ kíli. Wɔ̃́ a gèea lɛ wánà ká. Ɛ́ɛ̃́ lɛ́ɛ̀ à yí dɔ kélɛ̀ lɛ́ɛ̀ wánà-wɔ̃̀ gèe.

³⁶À kɛɛ̀ e kɛá kíli, kɛɛ wɔ̃́ lɛ́ à bɛ̃̀ɛ̃ɛ̃̀ lɛ Wálà kiia yía é kɛ wánà zɛ̀. Ye lɛ́ e kélɛ̀, “À wɛ́lɛ́ doó yɛ́ɛ̀ lɛ̀ɛ́ ló kɛɛ̀ à ká.”

³⁷Ɛ́ɛ̃́ à bɛ̃̀ɛ̃ɛ̃̀ lɛ zeĩ́ Wálà kii yí kélɛ̀, “Óò lo mi lɛ́ wa pá dí káa gɛ̃̀ɛ̃̀.”

³⁸Lɛ̀ e kɛ kília, Zósɛ̀ lɛ́ è go Alèmàtíàa, e ló, e Zízɛ̀ bílí pɛ̃́ Pálɛ̀ mɔ̀, kɛɛ á sí. Zósɛ̀ e kɛ tò-Zízɛ̀-píé-mì ká, kɛɛ e kɛ e bĩ̀ĩ̀pìà, ɓii e kɛ túópìà Zúù-mìà lɛ̀ɛ. Pálɛ̀ e wéé à mɔ̀. Zósɛ̀ e ló, a mɔ́ɔ̀ Zízɛ̀ bílí sí ɓo, e ló à ká.

³⁹Nekòdímà, lɛ́ aà ló kpá bèĩzɛ̀ bĩ́míà Zízɛ̀ píéa, wà Zósɛ̀ o ló. Nekòdímà e ló nyɔ́nɔ́ gĩĩ yiè zɛ̀, lɛ́ à bòoò e kɛá yílí-ɓɛ̀ɛ lɛ́ ò si mɛ́ɛ̀, e bɛ̀i álò káa ká. À kɛ̀-gbííni-kɔ̀ e kɛ vɔ̀ pã́ũ̀ wũ doó ká.

⁴⁰Gɔ̃à pèèlɛɛ o Zízɛ̀ bílí sí, o nyɔ́nɔ́ gĩĩ yiè zɛ̀ɛ káá à là, o sɔ púlú kpɛ́nɛ́ à ká. Zía lɛ́ Zúù-mìà ò mi bílí pɛ̀ kɛ̀á kɛ ó tĩã́ bĩ̀ĩ̀a.

⁴¹Yílí nyɛ́nɛ̀ĩ̀ dò e kɛ lɛ̀ lɛ́ o Zízɛ̀ zɛ yía mɔ̀. Nyɛ́nɛ̀ e kília mɔ̀ɔ, bũ dɛɛ lɛ́ à fòoò e kɛá gɛ̀lɛ̀ yía dò, lɛ́ òó mi bĩ̀ĩ̀ do à yía, e kɛ yí.

⁴²E kɛ Zúù-mìà zì Kpílìa Pɛ̀-kɛ-lùò ká. Lɛ̀ lɛ́ wa gɛ̃̀ lɛ́ bṹa e kɛ lɛ̀ e kília ká kɔ̀ɛ́ɛ, o Zízɛ̀ kpɔ́ à yí.