Read Yamano Zɔ̃̀ɔ̃́ 2 Bible Online

Zɔ̃̀ɔ̃́ 2 - Yamano bible

Zɔ̃̀ɔ̃́ 2

¹Lɛ̀ lúó pèèlɛ e diea, lee-sí-kpìlì dò e kɛ pɛ́lɛ lɛ́ ò si Kénà, lɛ́ e kɛ Gálàlíìa yí. Zízɛ̀ lòóò e kɛ à lɛ̀ mɔ̀.

²Zízɛ̀ wà là tòà-píé-mìà o súo kɛɛ̀ e kɛá kpílì e kília là.

³Lɛ̀ lɛ́ míáa o wã́ã́ĩ̀a séĩ́ mia, Zízɛ̀ lòóò a gèe à lɛ̀ɛ, “Wã́ã́ĩ̀ aà nyɛ o kɛ̀lɛ̀.”

⁴Zízɛ̀ a gèe à lɛ̀ɛ, “Lee, yékɛ̀ í m kpɔ́ m kɛ-yɛ̀lɛ̀ mɔ̀. M zì lúó lɛ̀ɛ́ ɓɔ nɛ́.”

⁵Zízɛ̀ lòóò e à gèe gbaa yɛɓo-kɛ-mìà lɛ̀ɛ, “Kà wɔ̃́ nɔ́ɔ fé lɛ́ à gèe ká kɛɛ kɛ.”

⁶Lɔ́ɔ̀ doò do e kɛ Zúù-mìà kɛ̀lɛ̀ é gbɛ̃̀á pɛ mɛ́ pɛ́lɛ̀ mɔ̀. Wɔ̃́ e kéa mɔ́ɔ̀ wɔ̃̀ mɔ̀ɔ, yíí-yàà-yí gbɔɔ, lɛ́ à kɛɛ̀ e kɛá gɛ̀lɛ̀ káa, sáláádo e kɛ yàá yi. Yíí tíà sáláádo ɛ̃́ɛ̃́ sálápèèlɛ lɛ́ɛ̀ bɛ̀i lóò à doó yí.

⁷Zízɛ̀ a gèe yɛɓo-kɛ-mìà lɛ̀ɛ, “Kà gbɔɔ nì e kéa pa yíí ká.” O à pa à lé ká nyɛ̀nɛ̀ɛ̀ le.

⁸Lɛ̀ e kɛ kília, Zízɛ̀ a gèe o lɛ̀ɛ, “Kà yíía dò sí gbaa, ká ló à ká kpílìa wũ-là-mìa píé.” O ló à dò ká à píé.

⁹E yíí lɛ́ aà lùá gbaa wã́ã́ĩ̀ yía dã́. Lɛ̀ɛ́ gbaa lɛ̀ lɛ́ wã́ã́ĩ̀a e gó yia dɔ. Kɛɛ yɛɓo-kɛ-mìà lɛ́ o yíía sía wa dɔ. Lɛ̀ e kɛ kília, e lee-sí-gɔ̃̀ɔ súo kɛ,

¹⁰áà gèè à lɛ̀ɛ, “Mia séĩ́ óò wã́ã́ĩ̀ yiè-mì yí gìnì nɛ́ mia mɔ̀. Yé lɔ̀ɔ̀-mìà waà mi, lɛ́ aà bɛ̀i o mɔ̀ɔ, kɛ ó tĩã́ à kpɔ̀nɔɔ̀ɔ zɛ̀ɛ yí gìnì. Kɛɛ ɓi yee, ɓaà wã́ã́ĩ̀ yièa tó zízàá.”

¹¹Zízɛ̀ e là lé-pa-wɔ̃̀ bèĩzɛ̀ e kéa kɛ Kénà lɛ́ e Gálàlíìa mɔ̀. À lɛ̀ mɔ̀ lɛ́ e lɛ́ɛ́ ɓo e zì kɛ̀ kpànazɛ̀ là yia. Ɛ́ɛ̃́ là tòà-píé-mìà o o zò dɔ à mɔ̀.

¹²Lɛ̀ e kɛ kília, Zízɛ̀ wà e lòóò, e bɛ̀i à lèe-gé gɔ̃à zɛ̀, é dàá là tòà-píé-mìà bàa o ló Kàpɛ́nìɛ̀. O kɛ yí lúó zààle píé.

¹³Zúù-mìà zì Dìè-mia-là Kpílìa lúó e kɛ nupìà kɔ̀ɛ́ gbaa. Zízɛ̀ a mɔ́ɔ̀ ló ɓo Zùlúsàlɛ̀.

¹⁴Lɛ̀ Zízɛ̀ e ló sálà-ɓò-Wálà-lɛ̀ɛ-kà wìa, e mia gɛ̃̀ yi, wáà dìì ɛ̃́ɛ̃́ ɓáá, e bɛ̀i tèŋè nì lɔ̀ɔ̀ dɔ̀ yi. Pɛlèe mɛ́-vɔ̀ɔ-mìà bɛ̃̀ɛ̃ o kɛ yàá o zì téɓò mɔ̀.

¹⁵Zízɛ̀ e ɓɛ̀lɛ̀-gbàtò dò kɛ, áà míáa, e bɛ̀i ɓáá wà dìì nìa yí lùò à ká, wáà gò Wálà-kàa wì. E pɛlèe mɛ́-vɔ̀ɔ-mìàa wà téɓòa nìɛ̀, à gã̀ e dɔ lɛ̀í. Ɛ́ɛ̃́ e pɛlèea wɛ̃̀ĩ píé.

¹⁶A gèe gɔ̃à lɛ́ o kɛ tèŋèa lɔ̀ɔ̀ dɔpìàa lɛ̀ɛ, “Kà pɔɔ̀ɔ sí é gó lɛ̀ɛ mɔ̀. Yékɛ̀ ká m Dàa là káa kɛ lɔ́ɔ́ dɔpìà ká.”

¹⁷Là tòà-píé-mìàa o zò e vùò wɔ̃́ lɛ́ à bɛ̃̀ɛ̃ɛ̃̀ e kɛá Wálà kiia yía ká. Ye lɛ́ e kélɛ̀, “Ƃà káa mɔ́ɔ̀ wɔ̃̀ diè lɛ m zò ká, tó áà kɛ̀ m zò áà gèlè m gé.”

¹⁸Zúù-mìà wa gèe gbaa à lɛ̀ɛ, “Lé-pa-wɔ̃̀ sùu kpɛɛ̀ lɛ́ ì bɛ̀i à mɔ̀ ɓá kɛ, kɛ á zɔ̃̀ɔ̃̀ ko lɛ̀ɛ kélɛ̀ yíkɛ̀ gáàa lɛ i kɛ̀lɛ̀ kɛ í wɔ̃́ sùua kɛ?”

¹⁹Zízɛ̀ a là nìɛ̀ weeá kélɛ̀, “Kà sálà-ɓò-Wálà-lɛ̀ɛ-kà e kéa wí tã́ã̀. Lɛ̀-kpɛ̀iì yààka gílìa, ḿm̀ lo à dɔɔ̀.”

²⁰Lɛ̀ e kɛ kília, Zúù-mìà wa gèe kélɛ̀, “E mia sí kɛ̀ɛ̀ vũ̀ yììsɛ wɛ́lɛ́ sáláádo ká kɛ ó káa dɔ. Ye lɛ́ ɓà gèe kélɛ̀ íì lo à dɔɔ̀ lɛ̀-kpɛ̀iì yààka gílìa?”

²¹Kɛɛ Wálà-kà lɛ́ Zízɛ̀ a mɔ́ɔ̀ wɔ̃̀ gèea, lɛ́ e kɛ à gbĩ-kpàla káa.

²²À mɔ́ɔ̀ wɔ̃̀ mɔ̀ɔ, lɛ̀ à wɛ̀lɛɛ̀ e kɛá ga kɛ̀lɛ̀ɛ, là tòà-píé-mìà zò e vùò wɔ̃́ lɛ́ a gèe kília mɔ́ɔ̀ wɔ̃̀ ká. Ɛ́ɛ̃́ o Wálà kiia wà wɔ̃́ lɛ́ Zízɛ̀ aà gèea gɛ̃̀ wánà ká.

²³Lɛ̀ Zízɛ̀ e kɛ Zùlúsàlɛ̀ Dìè-mia-là Kpílìa làa, mia búnùzɛ̀ o o zò dɔ à mɔ̀ lɛ̀ lɛ́ o lé-pa-wɔ̃̀ lɛ́ e kɛ à kɛpìàa gɛ̃̀ɛ ká.

²⁴Kɛɛ Zízɛ̀ lɛ̀ɛ́ gbaa e dìè nɔ o lɛ̀ɛ, ɓii lɛ́ɛ̀ mia séĩ́ dɔ sɛ̀ɛ mɔ́ɔ̀ wɔ̃̀ mɔ̀.

²⁵Lɛ̀ɛ́ gbaa kɛ mi nɔ́ɔ fé dò mɔ̀ kɛ é mia kɛ-kɔ̀ zɔ̃̀ɔ̃̀ à lɛ̀ɛ, ɓii e kɛ pɛ lɛ́ e kɛ o géa dɔpìà.