Read Yamano Zɔ̃̀ɔ̃́ 20 Bible Online

Zɔ̃̀ɔ̃́ 20 - Yamano bible

Zɔ̃̀ɔ̃́ 20

¹Lúó bèĩzɛ̀ lɛ́ e lɔ́ɔ́ yía káa, Melé lɛ́ è go Mádɛ̀lɛ̀-pɛlɛía, e sòló làapíé, kɛɛ lɛ̀ lɛ̀ɛ́ fɔ̀nɔ nɛ́, e ló ɓɔ́àa mɔ̀. E bṹa lékèlè lɛ́ e kɛ gɛ̀lɛ̀ káa, gɛ̃̀ e ɓoòo zɛ̀ ká bṹa lé.

²Lɛ̀ e kɛ kília, e ló bàlà ká Sáímɔ̀ Pílɛ̀ wà Zízɛ̀ là tòà-píé-mì yé à lɔ̀ kpɔ́ɔ̀ e kɛá Zízɛ̀ mɔ̀ɔ píé, áà gèè o lɛ̀ɛ, “Waà ko Dàa-mì sí ɓɔ́àa mɔ̀, ɛ̃́ɛ̃́ kòó lɛ̀ lɛ́ o à kpɔ́ yia dɔ.”

³Lɛ̀ e kɛ kília, Pílɛ̀ wà tòà-píé-mì yéa, o wɛ̀lɛ̀ o ló ɓɔ́àa mɔ̀.

⁴O pèèlɛɛ o kɛ bàlà sípìà, kɛɛ tòà-píé-mì yéa e bàlà sí, e die Pílɛ̀ là. E ɓɔ ɓɔ́àa mɔ̀ bèĩzɛ̀.

⁵E yɔ̀ɔ́ tã́ã̀, e sɔ púlúa gɛ̃̀ kàá yi. Kɛɛ lɛ̀ɛ́ gbaa wàà bṹa yí.

⁶Sáímɔ̀ Pílɛ̀ e tó gbaa à ko mɔ̀, e ló gùlùa yí kpeĩ kpeĩ. E sɔ púlúa gɛ̃̀ kàá yi.

⁷Ɛ́ɛ̃́ e sɔ lɛ́ à kpɛ́nɛ̀ e kɛá Zízɛ̀ wũ káa gɛ̃̀. Lɛ̀ɛ́ gbaa kɛ kàá sɔ púlúa bà. Kɛɛ à kpɛ́nɛ̀ e kɛá, à káà lɛ zi gbɛɛ ká.

⁸Lɛ̀ e kɛ kília, tòà-píé-mìa yé lɛ́ e ɓɔ kɛ̀ɛ̀ gùlùa là bèĩzɛ̀ɛ, e wàà bṹa yí nɔ́ kíli. E lɛ̀ gɛ̃̀, ɛ̃́ɛ̃́ e wɔ̃́ gɛ̃̀ wánà ká.

⁹Òó gbaa wɔ̃́ lɛ́ à bɛ̃̀ɛ̃ɛ̃̀ lɛ Wálà kiia yí kélɛ̀ lɛ à mɔ̀ é wɛ̀lɛ̀ ga kɛ̀lɛ̀ɛ yí ma nɛ́.

¹⁰Lɛ̀ e kɛ kília, tòà-píé-mìàa o ló o mɛ̀ĩ́ o píé kɛ́ì.

¹¹Melé e dɔ gùlùa sɔ́nɔ́, áà gbóó ɓò. Lɛ̀ e kɛ tĩã́ gbóó ɓopìàa, e yɔ̀ɔ́ tã́ã̀, e lɛ̀ gɛ̃̀ bṹa yí.

¹²E Wálà là vɔ-mìà pèèlɛ, lɛ́ sɔ púlú e kɛ o mɔ̀ɔ gɛ̃̀ yàá yi. O kɛ yàá lɛ̀ lɛ́ Zízɛ̀ bílí e kɛ yía mɔ̀. Mi doó-mì e kɛ yàá lɛ̀ lɛ́ à gã̀ vɔɔ̀ e kɛá yia mɔ̀, tó mi doó-mì bɛ̃̀ɛ̃ yàà lɛ à wũ vɔpìà.

¹³Míáa wa gèe à lɛ̀ɛ, “Lee, mɛ́ e kɛ lɛ́ ì gbóó ɓo?” A gèe o lɛ̀ɛ, “Waà ló m Dàa-mì ká, ɛ̃́ɛ̃́ lɛ̀ lɛ́ wa wɔɔ yía m̀ḿ à dɔ.”

¹⁴Lɛ̀ e nyɛ wɔ̃́ e kéa gèeè mɔ̀ɔ, e nìɛ̀, e Zízɛ̀ gɛ̃̀ dɔ̀á yi. Kɛɛ lɛ̀ɛ́ gbaa yí dɔ kélɛ̀ Zízɛ̀ lɛ.

¹⁵Zízɛ̀ a gèe à lɛ̀ɛ, “Lee, mɛ́ e kɛ lɛ́ ì gbóó ɓo? Dé ɓà nàà ɓɛ?” Lééa a gɛ̃̀ ɓɔ̀ɔ kélɛ̀ nyìɛ-kɛ̀-nyɛ́nɛ̀ɛ-mɔ̀-mì lɛ. A mɔ́ɔ̀ à gèe ɓo à lɛ̀ɛ kélɛ̀, “M dàa-mì, é kɛ̀á ɓa sía, ì lɛ̀ lɛ́ ɓa kpɔ́ yia zɔ̃̀ɔ̃̀ m lɛ̀ɛ. Yé ɓaà zɔ̃̀ɔ̃̀ɔ, ḿm̀ lo lóò, ma sí yi.”

¹⁶Zízɛ̀ a gèe à lɛ̀ɛ, “Melé.” Melé e nìɛ̀, a gèe à lɛ̀ɛ Hííbúlù-wè yí kélɛ̀, “Làbónì.” (Làbónì yí lɛ́ e kélɛ̀, pɛ-zɔ̃̀ɔ̃̀-mì.)

¹⁷Zízɛ̀ a gèe à lɛ̀ɛ, “Yékɛ̀ í wí m mɔ̀, ɓii m̀ḿ ló nɛ́ mia Dàa ɓɛ píé lɛ̀í. Kɛɛ ì lo m lèe-gé vɔ̀ píé, ɓá gèe o lɛ̀ɛ kélɛ̀, ‘Ḿm̀ lo mi lɛ́ e m Dàa ɛ̃́ɛ̃́ ka bɛ̃̀ɛ̃ ka Dàa ká, ɛ̃́ɛ̃́ lɛ́ e m̀ Wálà ɛ̃́ɛ̃́ ka bɛ̃̀ɛ̃ kà Wálà káa, píé lɛ̀í.’ ”

¹⁸Lɛ̀ e kɛ kília, Melé lɛ́ è go Mádɛ̀lɛ̀-pɛlɛía, e ló, a gèe tòà-píé-mìàa lɛ̀ɛ kélɛ̀ aà mia Dàa-mì ɓɛ gɛ̃̀, ɛ̃́ɛ̃́ kélɛ̀ aà wɔ̃́ e kília gèe à lɛ̀ɛ.

¹⁹Lúó bèĩzɛ̀ lɛ́ e lɔ́ɔ́ yí e kília káa, tòà-píé-mìàa o pá o kíe mɔ̀. E kɛ nyɛ́ŋɛ̀ĩpíé ká. Lɛ̀ lɛ́ o kɛ yía mɔ́ɔ̀ ká lé dùoò e kɛá, ɓii o kɛ túópìà Zúù-mìàa lɛ̀ɛ. Lɛ̀ e kɛ kília, Zízɛ̀ e nu e dɔ o bà, áà gèè o lɛ̀ɛ, “Zò-yà-gé è kɛ ka kɛ̀lɛ̀.”

²⁰Lɛ̀ e nyɛ wɔ̃́ e kéa gèeè mɔ̀ɔ, e e kɛ̀lɛɛ̀ wà e sɛ̃́ĩ́ zɔ̃̀ɔ̃̀ o lɛ̀ɛ. Tòà-píé-mìàa o gé kpó-kpó liì e kɛá ko Dàa-mì gɛ̃̀ wa ɓoa wɛ̃́ĩ̀.

²¹Lɛ̀ e kɛ kília, Zízɛ̀ a gèe zeĩ́ o lɛ̀ɛ kélɛ̀, “Zò-yà-gé è kɛ ka kɛ̀lɛ̀. Lɛ̀ zí lɛ́ mia Dàa e m vɔáa, lɛ́ ma bɛ̃̀ɛ̃ m ka vɔáa.”

²²A gèe kíli, e e wúú káá o mɔ̀, áà gèè, “Kà Gɛ̀ɛ̀ Púlúa sɔ̀lɔ̀ ɓo.

²³Yé kaà die mia kɛ-wɔ̃̀ yɔɔ làa, kɛɛ aà ɓo o mɔ̀. Kɛɛ yé kàá die à làa, kɛɛ à ɓoò wá o mɔ̀.”

²⁴Tòà-píé-mìà vũ̀ doó wɛ́lɛ́ pèèlɛɛ, o doó-mì lɛ́ ò si Tɔ́mɔ̀, lɛ́ ò si zeĩ́ Yòoa, lɛ̀ɛ́ gbaa kɛ o bà lɛ̀ Zízɛ̀ e nua ká.

²⁵À mɔ́ɔ̀ wɔ̃̀ mɔ̀ɔ, tòà-píé-mìà yé o tóa, wa gèe à lɛ̀ɛ kélɛ̀, “Ko ko Dàa-mì gɛ̃̀.” Tɔ́mɔ̀ a gèe o lɛ̀ɛ, “Yé m̀ḿ nélè kpɔnɔ lɛ́ a kɛ̀lɛ̀ɛ gɛ̃̀, ɛ̃́ɛ̃́ lɛ́ m̀ḿ m kɔ̀-wɛ́nɛ́ wàà nɛ́ kpɔnɔ e kília yí, ɛ̃́ɛ̃́ lɛ́ m̀ḿ m kɔ̀ wàà nɛ́ à sɛ̃́ĩ́a, m̀ḿ ló à gɛ̃̀ɛ̃̀ wánà ká.”

²⁶Yé lɔ́ɔ́ doó e diea, tòà-píé-mìàa páà e kɛá o kíe mɔ̀ káa wì zeĩ́. Tɔ́mɔ̀ e kɛ o bà. Káa lé dùoò e kɛá. Kɛɛ Zízɛ̀ e ɓɔ, e dɔ o bà yi, áà gèè, “Zò-yà-gé è kɛ ka kɛ̀lɛ̀.”

²⁷Lɛ̀ e kɛ kília, a gèe Tɔ́mɔ̀ lɛ̀ɛ, “Ì i kɔ̀-wɛ́nɛ́ gbɛ̃̀ nɔ̀ɔɔ̀ ké, í m kɔ̀ gɛ̃̀. Ì i kɔ̀ fóló ɓá wàà m sɛ̃́ĩ́ dè mɔ̀. Zò pèèlɛ è gó i gé, í wɔ̃́ gɛ̃̀ wánà ká.”

²⁸Tɔ́mɔ̀ a là nìɛ̀ weeá kélɛ̀, “M Dàa-mì, wà m̀ Wálà.”

²⁹Zízɛ̀ a gèe à lɛ̀ɛ, “I wɔ̃́ gɛ̃̀ɛ̃̀ lɛ wánà ká m gɛ̃̀ ɓa ɓoa wɛ̃́ĩ̀? Mia lɛ́ òó m gɛ̃̀, tó wáà wɔ̃́ gɛ̃̀ wánà káa, zò géli lɛ o kɛ̀lɛ̀.”

³⁰Zízɛ̀ e lé-pa-wɔ̃̀ búnùzɛ̀ lɛ́ à wɔ̃̀ bɛ̃̀ɛ̃ɛ̃̀ wá kíí e kéa yía kɛ là tòà-píé-mìà nyìɛ mɔ̀.

³¹Wɔ̃́ nì e kéa bɛ̃̀ɛ̃ɛ̃̀ lɛ, kɛɛ ká gɛ̃̀ wánà ká kélɛ̀ Zízɛ̀ lɛ Kɛ́lɛ̀ì lɛ́ e Wálà Gbe káa ká, ɛ̃́ɛ̃́ kɛ zò-dɔ̀à-mɔ̀ sùua kolo làa, ká kɛ̀ɓe sɔ̀lɔ̀ ɓo à tɔ́ yí.