Read Yamano Zɔ̃̀ɔ̃́ 21 Bible Online

Zɔ̃̀ɔ̃́ 21 - Yamano bible

Zɔ̃̀ɔ̃́ 21

¹Lɛ̀ e kɛ kília, Zízɛ̀ e e dìè zɔ̃̀ɔ̃̀ zeĩ́ là tòà-píé-mìà lɛ̀ɛ Tàbílèà Yíí-pṹã́ sɔ́nɔ́. Zí e e dìè zɔ̃̀ɔ̃̀áa gɛ̃̀ e ké.

²Sáímɔ̀ Pílɛ̀ wà Tɔ́mɔ̀, lɛ́ ò si Yòoa, e bɛ̀i Nàtánìà lɛ́ è go Kénà lɛ́ e Gálàlíìa, ɛ̃́ɛ̃́ Zɛ́bɛ́dìì gbe nì, e bɛ̀i tò-Zízɛ̀-píé-mìà pèèlɛ dò, o séĩ́ o kɛ lɛ̀ doó mɔ̀.

³Sáímɔ̀ Pílɛ̀ a gèe o lɛ̀ɛ, “M lópìà kpã̀ã́ naà yí píé.” Wa gèe à lɛ̀ɛ, “Kɔ̀à ɓi nì kɔ́áà lo.” O ló, o yà gɔɔ yí. Kɛɛ bĩ́ e kília míàa, òó gbaa kpã̀ã́ gbɛɛ kṹ.

⁴Lɛ̀ lɛ̀ e kɛ kpɛ̀ipìàa, Zízɛ̀ e dɔ yíí e kília kpóṹ là. Kɛɛ tòà-píé-mìàa òó gbaa à yí dɔ kélɛ̀ Zízɛ̀ lɛ.

⁵Lɛ̀ e kɛ kília, a gèe o lɛ̀ɛ, “Nɔ́ɔ̀ɓé, kàá pɛ gbɛɛ kṹ nɛ́?” Wa gèe kélɛ̀, “M̀m̀, kòó pɛ gbɛɛ kṹ nɛ́ɔ̀.”

⁶A gèe o lɛ̀ɛ, “Kà kà fɛ̃́ĩ̀a káá gɔ́ɔ́ɔ kɔ̀ yiè gbáàa mɔ̀ yíía bà. Káà lo à dò sɔ̀lɔ̀ ɓoò.” Lɛ̀ e kɛɛ, wa káá. Bɛ̀i lɛ̀ɛ́ gbaa kɛ o mɔ̀ kɛ ó à ɓo yíía bà, ɓii kpã̀ã́a e kɛ à yí gbùò.

⁷Tòà-píé-mì yé à lɔ̀ kpɔ́ɔ̀ e kɛá Zízɛ̀ mɔ̀ɔ, a gèe Pílɛ̀ lɛ̀ɛ, “Ko Dàa-mì lɛɔ̀.” Lɛ̀ lɛ́ Sáímɔ̀ Pílɛ̀ a ma kélɛ̀ ko Dàa-mì lɛɛ, e là sɔ-là-sɔ̀ɔ kpɛ́nɛ́ e ká, ɓii à mɔ̀-sɔ̀ ɓoò e kɛá à mɔ̀. E vɔ, e dùò yíía bà gbaa.

⁸Tòà-píé-mìà yé o tóa, o nu gbaa kpóṹ là gɔ́ɔ́ɔ yí, wáà fɛ̃́ĩ̀ pà kpã̀ã́ ká zɛ̀ ɓɛ gã̀ã̀ kpóṹ bíní. Òó gbaa kɛ kpóṹ mɔ̀ ká gbèĩ. Kpóṹ mɔ̀ e kɛ o ká gbèĩ vɔ̀ kélɛ̀ gã̀-fòlòà-yí wũ doó lɛ́ ɓe.

⁹Lɛ̀ o tɛ̀nɛ̀ kpóṹ bínía, o sɛ̃́ĩ̀ tíé gɛ̃̀ yàá yi, tó kpã̀ã́ lɛ kpɔ̀á à là. Belè dò e kɛ à lɛ̀ mɔ̀ nɔ́ kíli.

¹⁰Lɛ̀ e kɛ kília, Zízɛ̀ a gèe o lɛ̀ɛ, “Kà nu kpã̀ã́ lɛ́ ka zɛ dɛɛ káa dò ká.”

¹¹Sáímɔ̀ Pílɛ̀ e tɛ̀nɛ̀ gɔ́ɔ́ɔ yí, e fɛ̃́ĩ̀a gã́ã́ kpóṹ bíní. À paà e kɛá kpã̀ã́ gbùò gbùò ká. Kpã̀ã́a e kɛ wũ doó là vũ̀ sɔ́ɔ́li wɛ́lɛ́ yààka. Yé bɛ̃̀ɛ̃ e kɛ e kù gbùò zɛ̀ ká kília, fɛ̃́ĩ̀a lɛ̀ɛ́ gbaa kã́.

¹²Zízɛ̀ a gèe o lɛ̀ɛ, “Kà nu pɛ ɓèlè.” Tòà-píé-mìàa dò nɔ́ɔ fé lɛ̀ɛ́ gbaa kɛ bè zɛ̀ kɛ é Zízɛ̀ wɛ̃́ĩ́-lɔ̀ɔ kɛ kélɛ̀, “Dé e i ká?” Ƃii wa yí dɔ kélɛ̀ ko Dàa-mì lɛ.

¹³Lɛ̀ e kɛ kília, Zízɛ̀ e nu, e belèa sí, a nɔ o lɛ̀ɛ. E pɛ nɔ́ doóa kɛ kpã̀ã́a ká.

¹⁴Zízɛ̀ dìè zɔ̃̀ɔ̃̀ a ɓo là tòà-píé-mìàa lɛ̀ɛ wɛ̀lɛ̀ a ɓo ga kɛ̀lɛ̀ɛ káa, kpolà yààka zɛ̀ lɛ́ ɓɛ.

¹⁵Lɛ̀ lɛ́ o nyɛ pɛ ɓèleè mɔ̀ɔ, Zízɛ̀ a gèe Sáímɔ̀ Pílɛ̀ lɛ̀ɛ kélɛ̀, “Sáímɔ̀, lɛ́ i Zɔ̃̀ɔ̃́ gbe ká ɓɛ. M lɔ̀ kpɔ́ɔ̀ lɛ i mɔ̀, é dieá m lɔ̀ lɛ́ à kpɔ́ɔ̀ lɛ míá o kéa mɔ̀ɔ là?” A gèe à lɛ̀ɛ, “M̀m̀, m Dàa-mì. Íì i lɔ̀ kpɔ̀-m-mɔ̀ mɔ́ɔ̀ wɔ̃̀ yí dɔ.” Zízɛ̀ a gèe à lɛ̀ɛ, “Ì m̀ ɓáá nyɔ̀nɔ́ vɔ̀ɔ lé gba.”

¹⁶Zízɛ̀ a gèe zeĩ́ à lɛ̀ɛ, “Sáímɔ̀, lɛ́ i Zɔ̃̀ɔ̃́ gbe ká ɓɛ. M lɔ̀ kpɔ́ɔ̀ lɛ i mɔ̀?” A gèe à lɛ̀ɛ, “M̀m̀, m Dàa-mì. Íì i lɔ̀ kpɔ̀-m-mɔ̀ mɔ́ɔ̀ wɔ̃̀ yí dɔ.” Zízɛ̀ a gèe à lɛ̀ɛ, “Ì i nyìɛ kɛ m̀ ɓáá vɔ̀ɔ mɔ̀.”

¹⁷Zízɛ̀ a gèe kpolà yààka zɛ̀ ɓo zeĩ́ à lɛ̀ɛ kélɛ̀, “Sáímɔ̀, lɛ́ i Zɔ̃̀ɔ̃́ gbe ká ɓɛ. M lɔ̀ kpɔ́ɔ̀ lɛ i mɔ̀?” Pílɛ̀ e yà gbaa yɔ̀ũ̀ le, ɓii Zízɛ̀ a wɛ̃́ĩ́-lɔ̀ɔ kɛ e kíe yí yààka kélɛ̀, “M lɔ̀ kpɔ́ɔ̀ lɛ i mɔ̀?” A gèe Zízɛ̀ lɛ̀ɛ, “M Dàa-mì, íì wɔ̃́ séĩ́ yí dɔ. Íì i lɔ̀ kpɔ̀-m-mɔ̀ mɔ́ɔ̀ wɔ̃̀ yí dɔ.” Zízɛ̀ a gèe à lɛ̀ɛ, “Ì m̀ ɓáá vɔ̀ɔ lé gba.

¹⁸Wánà-wɔ̃̀ kpó-kpó lɛ́ m̀ gèe i lɛ̀ɛ ɓɛ. Lɛ̀ lɛ́ i kɛ dɛɛ, i kɛ ɓà sɔ-là-ɓɛ̀lɛ̀ dɔpìà i gbĩĩ́, tó ɓáà lò lɛ̀ nɔ́ɔ fé lɛ́ ɓà nàà í ló yia mɔ̀. Kɛɛ yé ɓaà kɛ kòlòa, íì lo i kɔ̀ fólóò, tó mi gbɛɛ áà o yèlè, tó wáà lò i ká lɛ̀ lɛ́ ɓàá naa í ló yia mɔ̀.”

¹⁹Wɔ̃́ e kéa gèeè yía, Zízɛ̀ e ga lɛ́ Pílɛ̀ è kɛ lópìà ɓoò, kɛ é à kɛ kɛɛ Wálà é tɔ́-ɓɔ sɔ̀lɔ̀ ɓoa zɔ̃̀ɔ̃̀. Lɛ̀ e kɛ kília, Zízɛ̀ a gèe à lɛ̀ɛ, “Ì tó m píé.”

²⁰Pílɛ̀ e nìɛ̀, e tòà-píé-mì yé à lɔ̀ kpɔ́ɔ̀ e kɛá Zízɛ̀ mɔ̀ɔ gɛ̃̀ e mɛ̀ĩ́. Tòà-píé-mì yé e kília lɛ́ e tɛ̃́ Zízɛ̀ mɔ̀ lɛ̀ lɛ́ o kɛ pɛ ɓèlèpìà téɓò mɔ̀, lɛ́ a wɛ̃́ĩ́-lɔ̀ɔ kɛ kélɛ̀, “Ko Dàa-mì, dé è lo i lé góòa káa.”

²¹Lɛ̀ Pílɛ̀ a gɛ̃̀ɛ, a gèe Zízɛ̀ lɛ̀ɛ, “M Dàa-mì, kó ma gɔ̃́ e kéa píé?”

²²Zízɛ̀ a gèe à lɛ̀ɛ, “Yé maà à naa é kɛ ɓe é tóá kíli ḿ nua, ɓà mɛɛ wɔ̃̀ lɛ́ laa yí? Ì tó m píé.”

²³Lɛ̀ e kɛ kília, Zízɛ̀ là mia nì o kɛ lópìà à gèeá sí kélɛ̀ tòà-píé-mì yé e kília lɛ̀ɛ́ ló gaà. Kɛɛ Zízɛ̀ lɛ̀ɛ́ gbaa gèe kélɛ̀ lɛ̀ɛ́ ló gaà. Kɛɛ a gèe kélɛ̀, “Yé maà à naa é kɛ ɓe é tóá kíli ḿ nua, ɓà mɛɛ wɔ̃̀ lɛ́ laa yí?”

²⁴Mí e kília lɛ́ e tòà-píé-mì lɛ́ e wɔ̃́ nì e kéa wɔ̃̀ gèe, ɛ̃́ɛ̃́ lɛ́ e à wɔ̃̀ bɛ̃̀ɛ̃ káa. Ɛ́ɛ̃́ kóò à yí dɔ kélɛ̀ wɔ̃́ a gèea lɛ wánà zɛ̀.

²⁵Kɛɛ wɔ̃́ búnùzɛ̀ gbɛɛ̀ gbɛɛ lɛ́ Zízɛ̀ a kɛɛ lɛ ɓe. È kɛ̀á wa séĩ́ bɛ̃̀ɛ̃ doó doóa, ḿm̀ à gɛ̃̀ wánà ká kélɛ̀ áá kɛɛ̀ gbùò tó lɛ̀ɛ́ gɔ̃̀ bɛ̀iì kpóṹ là zèe.