Read Yamano Zɔ̃̀ɔ̃́ 4 Bible Online

Zɔ̃̀ɔ̃́ 4 - Yamano bible

Zɔ̃̀ɔ̃́ 4

¹Fálásíì-mìà wa ma kélɛ̀ mia lɛ́ Zízɛ̀ e kɛ o kɛpìà là tòà-píé-mìà ká, tó áà o bàtáì kɛ̀ɛ, o kɛ gbùò, ó dieá Zɔ̃̀ɔ̃́ zìa là.

²Kɛɛ Zízɛ̀ dìè lɛ̀ɛ́ gbaa mi dò bàtáì kɛ. Kɛɛ là tòà-píé-mìà lɛ́ nɔ́ o kɛ mia bàtáì kɛpìàa.

³Lɛ̀ Zízɛ̀ e wɔ̃́ lɛ́ mia o kɛ à gèepìà kília maa, e gó Zùdíà, e ló e mɛ̀ĩ́ Gálàlíì.

⁴Lɛ̀ e kɛ lópìà yia, e kɛ à mɔ̀ é die Sɛ̀mɛ́lìà.

⁵E ɓɔ gbaa Sɛ̀mɛ́lìà-pɛ̀lɛ̀ lɛ́ ò si Sákàa yí. Lɛ̀ e kília lɛ̀ɛ́ gbaa kɛ tã́ã̀ lɛ́ Zékɔ̀ a nɔ mɔ́ e gbe Zósɛ̀ lɛ̀ɛ ká gbèĩ.

⁶Zékɔ̀ là yíí-gùlù e kɛ yí. À kɛ̀ Zízɛ̀ fĩ́ĩ́ é kɛ nyɛpìà táá a ɓoa káa, e yà gbaa yíí-gùlùa sɔ́nɔ́. E kɛ lèĩ nyɛ́nɛ́-dɔ̀-mia-tùluù-zèí lùò ká.

⁷Sɛ̀mɛ́lìà lee doó e nu yíía dò síì. Zízɛ̀ a gèe à lɛ̀ɛ, “Ƃà yíí dè dò nɔ ḿ mi.”

⁸Là tòà-píé-mìà nì lóò e kɛá pɛlɛí léɓèlè lɔ́pìà.

⁹Lééa a gèe à lɛ̀ɛ, “I Zúù mi ká, ma bɛ̃̀ɛ̃ m Sɛ̀mɛ́lìà lee ká. Lɛ́ɛ̀ dɔ kpɛɛ̀ lɛ́ ì yíí pɛ̃ m mɔ̀?” A gèe kíli, ɓii Zúù-mìà wà Sɛ̀mɛ́lìà-mìà òó kɛ wéépìà o kíe píé.

¹⁰Zízɛ̀ a là nìɛ̀ weeá kélɛ̀, “È kɛ̀á íì pɛ lɛ́ Wálà à nɔ mia lɛ̀ɛ dɔ, ɛ̃́ɛ̃́ è kɛ̀á íì mí è yíí pɛ̃ i mɔ̀ɔ dɔɔ, ɓáá pɛ pɛ̃́ɛ̃̀ à mɔ̀, tó à yee e yíí ɓéèe nɔ i lɛ̀ɛ.”

¹¹Lééa a gèe kélɛ̀, “M dàa-mì, yíía sí-pɛ̀ gbɛɛ wá i kɛ̀lɛ̀, ɛ̃́ɛ̃́ yíí-gùlùa bɛ̃̀ɛ̃ lɛ gbèĩ. Íì lo góò kɛ̀ɓe-yììa ká mɛ́?

¹²Ko dàa Zékɔ̀ lɛ́ e yíí-gùlùa nɔ mɔ́ ko lɛ̀ɛ. Wà e gbe nì, e bɛ̀i, là tòlò-pɛ̀ séĩ́ o kɛ yíí e kéa mipìà. Kéa, i kpànazɛ̀, í dieá Zékɔ̀ là?”

¹³Zízɛ̀ a gèe à lɛ̀ɛ, “Mi nɔ́ɔ fé lɛ́ è yíí e kéa mia, yíí-mi-lɔ̀ lɛ́ɛ̀ lo à kɛɛ̀ zeĩ́.

¹⁴Kɛɛ mi nɔ́ɔ fé lɛ́ è lo yíí lɛ́ m̀ lo à nɔɔ̀ à lɛ̀ɛ miìa, yíí-mi-lɔ̀ lɛ̀ɛ́ ló à kɛɛ̀ gbaa. Yíí lɛ́ m̀ lo à nɔɔ̀ à lɛ̀ɛ, lɛ́ɛ̀ lo kɛɛ̀ lɛ̀ yíí lɛ́ è ɓɔ gìèa lɛ́ ɓe. Lɛ́ɛ̀ lo kɛɛ̀ à yí, ɛ̃́ɛ̃́ lɛ́ɛ̀ lo kɛɛ̀ yíí nɔpìà à lɛ̀ɛ, tó zeĩ́ áà kɛ̀ɓe wɔ́lɔ́-wɔ́lɔ́ sɔ̀lɔ̀ ɓò.”

¹⁵Lééa a gèe à lɛ̀ɛ, “M dàa-mì, ì yíí ɓéĩ́ lɛ́ ì wèè à káa, nɔ m lɛ̀ɛ. Ƃá kɛ̀á kília, yíí-mi-lɔ̀ lɛ̀ɛ́ ló m kɛɛ̀ gbaa. Ɛ́ɛ̃́ m̀ḿ ló bɛ̃̀ɛ̃ nuù gbaa lɛ̀ e kéa mɔ̀ yíí sípìà.”

¹⁶Zízɛ̀ a gèe à lɛ̀ɛ, “Lo í i dɛ̃ súo kɛ, kà ye ká nu.”

¹⁷Lééa a gèe kélɛ̀, “Gɔ̃ wá m píé.” Zízɛ̀ a gèe à lɛ̀ɛ kélɛ̀, “Yé ɓaà gèe kélɛ̀ gɔ̃ wá i píéa, à liì lɛ i mɔ̀.

¹⁸Gɔ̃à lɛ́ waà i sí le káa, o sɔ́ɔ́li. Ɛ́ɛ̃́ à yé i à píé dɛɛ káa, wá i dɛ̃ kpó-kpó ká. Ƃaà wánà-wɔ̃̀ gèe.”

¹⁹Lééa a gèe à lɛ̀ɛ, “M dàa-mì, maà i kɛ̀ dɔ̀-Wálà-lé-là-mì ká míní sí gbaa.

²⁰Ko dàa ye dàà nì o kɛ gbinipìà Wálà lɛ̀ɛ tɔ̃̀ũ̀ e kéa mɔ̀, kɛɛ ka bɛ̃̀ɛ̃ káà gèe kélɛ̀ Zùlúsàlɛ̀ lɛ́ lɛ à mɔ̀ ó gbini Wálà lɛ̀ɛ yía.”

²¹Zízɛ̀ a gèe à lɛ̀ɛ, “Lee, ì wɔ̃́ m̀ gèea gɛ̃̀ wánà ká. Ye lɛ́ e kélɛ̀, lúó lɛ́ mia òó ló gbiniì à ká mia Dàa lɛ̀ɛ tɔ̃̀ũ̀ e kéa mɔ̀, ɛ̃́ɛ̃́ Zùlúsàlɛ̀ɛ lɛ́ɛ̀ lo ɓɔɔ̀.

²²Mi lɛ́ kà gbìnì à lɛ̀ɛ, kàá à dɔ. Míá ko Zúù-mìà káa, kóò mi lɛ́ kò gbìnì à lɛ̀ɛ dɔ, ɓii la-ɓo lɛ́ɛ̀ go Zúù-mìà kɛ̀lɛ̀ɛ mɔ́ɔ̀ wɔ̃̀ mɔ̀.

²³Kɛɛ lúó lɛ́ gbìnì-Wálà-lɛ̀ɛ-mìà wánà zɛ̀ ò lo gbiniìá mia Dàa lɛ̀ɛ gɛ̀ɛ̀ yí ɛ̃́ɛ̃́ wánà-wɔ̃̀ yía, lɛ nupìà. Ɛ́ɛ̃́ lɛ bɛ̃̀ɛ̃ zèe dɛɛ káa mɔ̀. Gbìnì-Wálà-lɛ̀ɛ-mìà lɛ́ mia Dàa è o nàà ó gbini à lɛ̀ɛ, o lɛ́ ɓɛ.

²⁴Wálà lɛ Gɛ̀ɛ̀ ká. Mia lɛ́ ò gbìnì à lɛ̀ɛ, lɛ o mɔ̀ ó gbini à lɛ̀ɛ gɛ̀ɛ̀ yí ɛ̃́ɛ̃́ wánà-wɔ̃̀ yí.”

²⁵Lééa a gèe à lɛ̀ɛ, “Ḿm̀ yí dɔ kélɛ̀ Mɛ̀sáyà lɛ́ ò si Kɛ́lɛ̀ìa, lɛ́ɛ̀ lo nuù. Yé aà nua, lɛ́ɛ̀ lo wɔ̃́ séĩ́ gèeè ko lɛ̀ɛ.”

²⁶Zízɛ̀ a gèe à lɛ̀ɛ, “Má m̀ wèè i lɛ̀ɛ e kéa, m à ká.”

²⁷Lɛ̀ e kɛ nɔ́ kília, Zízɛ̀ là tòà-píé-mìàa wáà nù. O lé paà e kɛá kpó-kpó ɓo kɛ ó wà lee o gɛ̃̀ wáà wèè. Kɛɛ o dò nɔ́ɔ fé lɛ̀ɛ́ gbaa gèe lééa lɛ̀ɛ, “Mɛ́ ɓà nàà lɛ̀ɛ mɔ̀?” Ɛ́ɛ̃́ òó gbaa gèe à lɛ̀ɛ, “Mɛ́ e kɛ lɛ́ kà lééa kà wèè?”

²⁸Lɛ̀ e kɛ kília, lééa e là yíí-sí-gbɔɔ tó yàá yi, e ló pɛlɛí, áà gèè míáa lɛ̀ɛ kélɛ̀,

²⁹“Kà nu ká ló gɔ̃ lɛ́ e wɔ̃́ séĩ́ lɛ́ maà kɛ m zì kɛ̀ɓe làa a gèe m lɛ̀ɛ gɛ̃̀ɛ̃̀. Lɛ́ɛ̀ bɛ̀i à mɔ̀ é kɛ Kɛ́lɛ̀ìa ká?”

³⁰Lɛ̀ e kɛ kília, o gó gbaa pɛ́lɛɛ yí, wáà lò Zízɛ̀ píé.

³¹Lɛ̀ wɔ̃́ sùua e kɛ lópìà líéa, Zízɛ̀ là tòà-píé-mìàa o kɛ kpé kã́pìà à lɛ̀ɛ, wáà gèè, “Tísɛ̀, ì ɓèlè-pɛ̀ dò kṹ ɓá ɓèlè.”

³²Kɛɛ a gèe o lɛ̀ɛ, “Léɓèlè lɛ́ kàá wɔ̃́ gbɛɛ yí dɔ à mɔ̀ɔ, lɛ m kɛ̀lɛ̀ ḿ ɓèlè.”

³³Lɛ̀ e kɛ kília, là tòà-píé-mìàa o gbɛ̃̀ wáà gèè o kíe nì lɛ̀ɛ kélɛ̀, “Mi dò aà nu léɓèlè ká à lɛ̀ɛ kɛ̀è?”

³⁴Zízɛ̀ a gèe o lɛ̀ɛ, “M̀ léɓèlè lɛ́ e mí e m vɔɔ nàà-ká-wɔ̃̀ kɛɛ̀ ká, ɛ̃́ɛ̃́ yɛɓo lɛ́ a nɔ m lɛ̀ɛ ḿ kɛɛ, kɛɛ̀ ḿ nyɛ à mɔ̀ɔ káa.

³⁵Káà à gèe kélɛ̀, ‘Mɛnɛ aà tó yììsɛ, kɛ kó ɓu kã́.’ Ḿm̀ gèe ka lɛ̀ɛ, kà ka nyìɛ táá píé nyɛ́nɛ̀ɛ là. Ƃúa aà ga, ɛ̃́ɛ̃́ à kã́-lùò aà ɓɔ gbaa.

³⁶Mi lɛ́ è ɓúa kãa, lɛ e fɔ́nɔ́ sípìà, tó áà ɓúa pà e kíe mɔ̀ kɛ̀ɓe wɔ́lɔ́-wɔ́lɔ́ wɛ̃́ĩ̀. À kɛɛ̀ lɛ kíli kɛɛ mí è à tààa, wà mí è à kãa, kɛɛ ó géli kɛ e kíe là.

³⁷Wɔ̃́ ò gèea lɛ wánà zɛ̀. Ye lɛ́ e kélɛ̀, ‘Mi dò láà tàà, tó mi dò bɛ̃̀ɛ̃ áà kã̀.’

³⁸Maà ka vɔ, kɛ ká ɓu kã́ nyɛ́nɛ̀ lɛ́ kàá gbaa yɛɓo kɛ yía mɔ̀. Mia gbɛɛ o yɛɓo kɛ yí, ɛ̃́ɛ̃́ ka yɛɓo lɛ́ wa kɛɛ pɔ̀pɔ̀ ɓèlèpìà.”

³⁹Sɛ̀mɛ́lìà-mìà lɛ́ o kɛ pɛ́lɛ e kília yía, o búnùzɛ̀ o o zò dɔ Zízɛ̀ mɔ̀, ɓii lééa a gèe o lɛ̀ɛ kélɛ̀, “E wɔ̃́ séĩ́ lɛ́ maà kɛ m zì kɛ̀ɓe làa gèe m lɛ̀ɛ.”

⁴⁰À mɔ́ɔ̀ wɔ̃̀ mɔ̀ɔ, yé Sɛ̀mɛ́lìà-mìà o nu à píéa, o kpé kã́ à lɛ̀ɛ kɛ wà ye nì ó yìì yi. Zízɛ̀ e ɓo o píé yi pèèlɛ.

⁴¹Mia búnùzɛ̀ bɛ̃̀ɛ̃ o o zò dɔ à mɔ̀ wɔ̃́ lɛ́ e kɛ à gèepìàa kolo là.

⁴²Wa gèe lééa lɛ̀ɛ kélɛ̀, “Kòó ko zò dɔ à mɔ̀ gbaa, wɔ̃́ lɛ́ ɓa gèea mɔ́ɔ̀ wɔ̃̀ mɔ̀. Kɛɛ ko zò dɔɔ̀ lɛ à mɔ̀, ɓii ko dìè kɔaà à wéè maa mɔ́ɔ̀ wɔ̃̀ mɔ̀. Ɛ́ɛ̃́ kóò à yí dɔ lɛ kpó-kpó ɓo kpóṹ là zèe La-mì ká gbaa.”

⁴³Yé lúó pèèlɛ e kília e diea, Zízɛ̀ e gó gbaa yí, e ló Gálàlíì.

⁴⁴Ƃii Zízɛ̀ dìè aà gèe kélɛ̀ òó ɓɛ̀lɛyà nɔ dɔ̀-Wálà-lé-là-mì lɛ̀ɛ e dìè pà.

⁴⁵Lɛ̀ e ɓɔ Gálàlíìa, míá o kɛ yía, o o kɔ̀ yà à wì, ɓii o góò e kɛá Dìè-mia-là Kpílì lɛ́ e kɛ Zùlúsàlɛ̀ɛ là, ɛ̃́ɛ̃́ o wɔ̃́ séĩ́ lɛ́ e à kɛ Kpílì e kília làa gɛ̃̀.

⁴⁶Lɛ̀ e kɛ kília, Zízɛ̀ e ló e mɛ̀ĩ́ Kénà lɛ́ e Gálàlíì, lɛ́ e yíí lùá wã́ã́ĩ̀ yí yia lɛ̀ mɔ̀. Sɛ́lɛ́ líé-sí-mì kɔ̀-píé-mì dò e kɛ yí. Mí e kília gbe lɛ́ e kɛ Kàpɛ́nìɛ̀ɛ, e kɛ kɔ̃́ṹ-kɔ̃̀ũ̀.

⁴⁷Lɛ̀ lɛ́ gɔ̃́ɔ a ma kélɛ̀ Zízɛ̀ aà gó Zùdíà, aà nu gbaa Gálàlíìa, e ló à píé, e kpé kã́ Zízɛ̀ lɛ̀ɛ kɛ é ló Kàpɛ́nìɛ̀, kɛ é à gbe lɛ́ e kɛ à kɛpìà é gaa la.

⁴⁸Zízɛ̀ a gèe à lɛ̀ɛ, “Yé kàá lé-pa-wɔ̃̀ wà wɔ̃́ kpàlézɛ̀ gɛ̃̀ɛ, kàá ló wɔ̃́ gɛ̃̀ɛ̃̀ wánà ká.”

⁴⁹Gɔ̃́ɔ a gèe kélɛ̀, “M dàa-mì, nu kó ló, kó ɓɔ yí kɛ m̀ nɛ́ɛ é tiã́ gaà.”

⁵⁰Zízɛ̀ a gèe à lɛ̀ɛ, “Ƃà ló ɓo. I gbe lɛ́ɛ̀ lo laà.” Gɔ̃́ɔ e Zízɛ̀ wéè gɛ̃̀ wánà ká, e ló.

⁵¹Lɛ̀ e kɛ lópìàa, gɔ̃́ɔ wà là yɛɓo-kɛ-mìà o o kíe gɛ̃̀ zuú. Wa gèe à lɛ̀ɛ, “I gbe lɛ ɓéèe.”

⁵²A gèe o lɛ̀ɛ ó lúó lɛ́ à gbe e kɛá kéléŋ-kèlèŋa gèe à lɛ̀ɛ. Wa gèe, “Yááa e kã́ à là yalá, kɛɛ nyɛ́nɛ́ aà dɔ mia tóó gbáà.”

⁵³Nɛ́ɛ dàa e à míní sí gbaa kélɛ̀ lúó nɔ́ doóa lɛ́ Zízɛ̀ a gèeá à lɛ̀ɛ, “I gbe lɛ́ɛ̀ lo laàa.” Lɛ̀ e kɛ kília, gɔ̃́ɔ wà e píé-kɛ́ì-mìà séĩ́ o o zò dɔ Zízɛ̀ mɔ̀.

⁵⁴Lé-pa-wɔ̃̀ lɛ́ Zízɛ̀ a kɛ, lɛ̀ e gó Zùdíà áà lò Gálàlíìa káa, pèèlɛ zɛ̀ lɛ́ ɓɛ.