Read Yamano Zɔ̃̀ɔ̃́ 7 Bible Online

Zɔ̃̀ɔ̃́ 7 - Yamano bible

Zɔ̃̀ɔ̃́ 7

¹Lɛ̀ e kɛ kília, Zízɛ̀ e ló tàá sí Gálàlíì. Lɛ̀ɛ́ gbaa naa é ló tàá sí Zùdíà, ɓii Zúù-mìà lɛ́ o kɛ yía, o kɛ à naapìà ó à zɛ.

²Zúù-mìà zì kpílì lɛ́ ò si Gbàa Kpílìa lúó e kɛ ɓɔpìà kɔ̀ɛ́.

³Lɛ̀ e kɛ kília, Zízɛ̀ lèe-gé gɔ̃à zɛ̀ wa gèe à lɛ̀ɛ, “Gó lɛ̀ɛ mɔ̀, í ló Zùdíà, kɛɛ ɓà tòà-píé-mìà ó wɔ̃́ nì lɛ́ ɓà kɛ̀ɛ gɛ̃̀.

⁴Mi gbɛɛ lɛ̀ɛ́ pɛ́ à kɛ̀ɛ bĩ̀ĩ̀, yé à nàà mia ó à dɔɔ ká. Yé mɔṹ i wɔ̃́ nì e kéa kɛpìàa, ì à kɛ kpóṹ-là-mìà séĩ́ ó i dɔ.”

⁵É kɛ bɛ̃̀ɛ̃ à lèe-gé vɔ̀ káa, òó gbaa o zò dɔ à mɔ̀.

⁶Zízɛ̀ a gèe o lɛ̀ɛ, “M zì lúó lɛ̀ɛ́ ɓɔ nɛ́. Kɛɛ ka zì lúó lɛ ɓe teele.

⁷Ka lɔ̀ lɛ̀ɛ́ bɛ̀i nyɛɛ̀ kpóṹ-là-mìà mɔ̀. Kɛɛ m lɔ̀ nyɛɛ̀ lɛ kpóṹ-là-mìà mɔ̀, ɓii ḿm̀ à gèe teele kélɛ̀ o kɛ-pɛ̀ lɛ yɔɔ.

⁸Ka dìè kà lo kpílìa là. Ma wá lópìà kpílì e kéa là, ɓii m zì lúó lɛ̀ɛ́ ɓɔ nɛ́ sɛ̀.”

⁹E wɔ̃́ e kéa gèe kíli, e là tó ɓo Gálàlíì.

¹⁰Lɛ̀ lɛ́ à lèe-gé nì o ló kpílìa làa, Zízɛ̀ bɛ̃̀ɛ̃ e ló nɔ́ kíli. Kɛɛ e ló yi bĩ̀ĩ̀ ká. Lɛ̀ɛ́ gbaa ló yi zi lɛ́ mia ò bɛ̀i à mɔ̀ ó gɛ̃̀áa ká.

¹¹Zúù-mìà o kɛ à naapìà kpílìa là, wáà gèè kélɛ̀, “Lɛ mɛ́ɛ̀ zàá?”

¹²O kɛ Zízɛ̀ lùe ɓopìà píé gbṹa yí. Mia dò o kɛ à gèepìà kélɛ̀, “Gɔ̃́ɔ sɔ̃̀ɔ̃ lɛ sɛ̀.” O dò bɛ̃̀ɛ̃ wáà gèè, “Gbàaò. Lɛ míáa bèkɛ̀ ɓopìà.”

¹³Kɛɛ mi gbɛɛ lɛ̀ɛ́ gbaa à wɔ̃̀ gèe wáà-là, ɓii o kɛ túópìà Zúù-mìàa lɛ̀ɛ.

¹⁴Yé o dɔ gbaa kpílìa kɛɛ̀ zèía, Zízɛ̀ e ló sálà-ɓò-Wálà-lɛ̀ɛ-kà wì, e gbɛ̃̀, áà pɛ zɔ̃̀ɔ̃̀ à lɛ̀ mɔ̀.

¹⁵Lɛ̀ e kɛ kília, Zúù-mìàa lé kpó-kpó paà e kɛá, wáà gèè, “E dɔ kpɛɛ̀ lɛ́ gɔ̃́ e kéa è pɛ dɔ e nyɔ́ɔ̀ɔ ká, lɛ́ lɛ̀ɛ́ kii dã́ do mɔṹ ɓɛ?”

¹⁶Zízɛ̀ a là nìɛ̀ kélɛ̀, “Pɛ lɛ́ m̀ zɔ̃̀ɔ̃̀ ka lɛ̀ɛ, ye wá m dìè m̀ pɛ-zɔ̃̀ɔ̃̀-kɔ̀ ká. Kɛɛ lɛ́ɛ̀ go Wálà lɛ́ e m vɔɔ kɛ̀lɛ̀.

¹⁷Mi nɔ́ɔ fé lɛ́ à nàà é wɔ̃́ lɛ́ Wálà à nàà á kɛɛ kɛ̀ɛ, lɛ́ɛ̀ lo wɔ̃́ e kéa yí dɔɔ̀. Ye lɛ́ e kélɛ̀, é kɛ̀á pɛ́ m̀ zɔ̃̀ɔ̃̀ɔ lɛ́ɛ̀ go Wálà kɛ̀lɛ̀, ɛ̃́ɛ̃́ é kɛ̀á wɔ̃́ m̀ gèea ḿm̀ gèe m dìè zì yíkɛ̀ gáàa káa, lɛ́ɛ̀ lo à yí dɔɔ̀.

¹⁸Mi lɛ́ è wɔ̃́ gèe e dìè zì yíkɛ̀ gáàa káa, kɛɛ lɛ e dìè tɔ́-ɓɔ wàà ɓèlèpìà. Kɛɛ mi lɛ́ è tɔ́-ɓɔ nàà mi lɛ́ e à vɔɔ lɛ̀ɛ, kɛɛ lɛ mi kpeĩ ká. Gbã́ã̀ gbɛɛ wá à yí.

¹⁹Ḿ gɔ̃̀, Móózè e Lɔ́ɔ̀ɔ nɔ ka lɛ̀ɛ? Kɛɛ ka dò nɔ́ɔ fé lɛ̀ɛ́ lɔ́ɔ̀ɔ kɛ. Mɛ́ e kɛ lɛ́ kà m zɛ-zì nàà ɓɛ?”

²⁰Mia kùa wa là nìɛ̀ weeá kélɛ̀, “Pɛ yɔɔ lɛ i píé. Dé lɛ i zɛ-zì naapìà?”

²¹Zízɛ̀ a là nìɛ̀ kélɛ̀, “M wɔ̃́ doó kɛ. E à kɛ ka séĩ́ ka lé e pa.

²²Móózè a gèe ka gbe nì ó bɔ̃́ɔ̃́ sí. Wánà kpó-kpó káa, Móózè wá kɛ á zi gbɛ̃̀. Ka dàa ye dàà nì lɛ́ wa zi gbɛ̃̀ɛ. À gèe Móózè a ɓo ka lɛ̀ɛ kília, káà mɔ́ɔ̀ à kɛ ɓo mia wáà bɔ̃́ɔ̃́ sì fĩ́ĩ́-dɔ-lùò ká.

²³Yé mi è bɔ̃́ɔ̃́ si fĩ́ĩ́-dɔ-lùò ká, yékɛ̀ ó Móózè là Lɔ́ɔ̀ɔ sìèa, mɛ́ e kɛ lɛ́ wɔ̃́ è ka wàa m píé, ɓii m gɔ̃ dò la fɛ́fɛ́ le fĩ́ĩ́-dɔ-lùò ká ɓɛ?

²⁴Yékɛ̀ ká mɛ̀ĩ́-sà dɔ pɛ mɔ̀ zí kà gɛ̃̀á e gbĩ mɔ̀ɔ ká. Kɛɛ kà mɛ̀ĩ́-sà dɔ pɛ mɔ̀ mɛ̀ĩ́-sà dɔ̀-pɛ-mɔ̀ zì kpeĩ ká.”

²⁵Zùlúsàlɛ̀-mìà gbṹũ̀ wa gèe kélɛ̀, “Ḿ gɔ̃̀, gɔ̃ lɛ́ ò à zɛ-zì nààa lɛ́ e kéa?

²⁶Lɛ̀ gɛ̃̀, lɛ dɔ̀á áà mɛ́ĩ́ ɓò mia wɛlɛ mɔ̀, tó mi gbɛɛ lɛ̀ɛ́ wɔ̃́ gbɛɛ gèe à lɛ̀ɛ. Ɛ́ɛ̃́ ko wũ-là-mìàa óò à yí kpó-kpó dɔ kélɛ̀ à ye lɛ́ lɛ Kɛ́lɛ̀ì ká mɔṹa?

²⁷Kɛɛ yé Kɛ́lɛ̀ìa aà nua, mi gbɛɛ lɛ̀ɛ́ ló à gópìà dɔɔ̀. Kɛɛ kóò gɔ̃́ e kéa gópìà dɔ.”

²⁸Lɛ̀ Zízɛ̀ e kɛ pɛ zɔ̃̀ɔ̃̀pìà sálà-ɓò-Wálà-lɛ̀ɛ-kàa wìa, e e wúú wɛ̀lɛ̀ lɛ̀í, áà gèè kélɛ̀, “Káà m dɔ, ɛ̃́ɛ̃́ káà lɛ̀ m̀ go yía dɔ kàáà? Kɛɛ m̀ḿ gbaa nu m dìè zì yíkɛ̀ gáàa ká. Mí e m vɔɔ lɛ wánà zɛ̀. Kàá à dɔ.

²⁹Kɛɛ ma lɛ́ m̀ à dɔ, ɓii m gó à píé, ɛ̃́ɛ̃́ à ye lɛ́ e m vɔɔ.”

³⁰Lɛ̀ e kɛ kília, o gbɛ̃̀ wáà kɛ-zì nàà ó kṹ. Kɛɛ mi gbɛɛ lɛ̀ɛ́ gbaa e kɔ̀ bĩ́ à mɔ̀, ɓii à zì lúó ɓɔɔ̀ lɛ̀ɛ́ gbaa kɛá.

³¹Kɛɛ míá o kɛ yía, o búnùzɛ̀ o o zò dɔ à mɔ̀, wáà gèè, “Yé Kɛ́lɛ̀ì aà nua, lɛ́ɛ̀ lo lé-pa-wɔ̃̀ búnùzɛ̀ kɛɛ̀, é dieá à yé gɔ̃́ e kéa aà kɛɛ là?”

³²Fálásíì-mìà o wɔ̃́ sùu lɛ́ mia kùa o kɛ à gèepìà lùe káa ma. Lɛ̀ e kɛ kília, Fálásíì-mìàa wà sálà-ɓò-Wálà-mɔ̀-mìà kpànazɛ̀ɛ o sóyà vɔ̀ vɔ Zízɛ̀ kṹpìà.

³³Zízɛ̀ a gèe kélɛ̀, “Ḿm̀ lo kɛɛ̀ ka píé ɓéĩ́ ɓo gbèĩ. Yé aà kɛ kília, ḿm̀ lo lóò mi lɛ́ e m vɔɔ píé.

³⁴Káà lo m naà, kɛɛ kàá ló m gɛ̃̀ɛ̃̀. Ƃii lɛ̀ m̀ lo kɛɛ̀ yia, kàá bɛ̀i ɓɔɔ̀ yi.”

³⁵Zúù-mìàa wa gèe o kíe nì lɛ̀ɛ kélɛ̀, “Mɛ́ɛ lɛ́ è lo lóò yi e ké, lɛ́ kòó ló à gɛ̃̀ɛ̃̀ ɓɛ? Ɛ́ɛ̃́ lɛ́ɛ̀ lo lóò Gílíì-mìà pà lɛ̀ yé lɛ́ Zúù-mìà o yía mɔ̀, áà pɛ zɔ̃̀ɔ̃̀ Gílíì-mìà lɛ̀ɛ?

³⁶A gèe kélɛ̀, ‘Káà lo m naà, kɛɛ kàá ló m gɛ̃̀ɛ̃̀.’ Ɛ́ɛ̃́ zeĩ́, ‘Kàá bɛ̀i ɓɔɔ̀ lɛ̀ lɛ́ m̀ lo kɛɛ̀ yia mɔ̀.’ Wɔ̃́ à gèea yí lɛ́ mɛɛ ká?”

³⁷Kpílìa lúó tèá-là zɛ̀ɛ lɛ́ e kɛ à lúó kpànazɛ̀ kpó-kpó káa. Lúó e kília káa, Zízɛ̀ e dɔ e gã̀ mɔ̀, e e wúú wɛ̀lɛ̀ lɛ̀í, áà gèè kélɛ̀, “Mi nɔ́ɔ fé lɛ́ yíí-mi-lɔ̀ à kɛ̀ɛ, è nu m píé é yíí mi.

³⁸Zi lɛ́ à bɛ̃̀ɛ̃ɛ̃̀ lɛ à ká Wálà kiia yía, gɛ̃̀ e ké. ‘Mi lɛ́ è e zò dɔ m mɔ̀ɔ, yíí ɓéèe lɛ́ɛ̀ lo góò à zò píé, tó à tɔ̀lɔ áà dìè lɛ̀ yíí dièa lɛ́ ɓe.’ ”

³⁹Wɔ̃́ Zízɛ̀ a gèe kília gbɛ̃̀ɛ̃ɛ̃̀ e kɛá Gɛ̀ɛ̀ Púlú lɛ́ mia lɛ́ ò o zò dɔ à mɔ̀ɔ, ò lo à sɔ̀lɔ̀ ɓoòa mɔ̀. Lúó e kília káa, Gɛ̀ɛ̀ Púlú nɔɔ̀ lɛ̀ɛ́ gbaa kɛá mia lɛ̀ɛ, ɓii Zízɛ̀ lóò lɛ̀ɛ́ gbaa kɛá nɛ́ lɛ̀ fɔ̀nɔɔ̀ɔ lɛ́ e lɛ̀ía yí.

⁴⁰Mia búnùzɛ̀ lɛ́ o kɛ yía, o wɔ̃́ lɛ́ a gèe kília ma, wáà gèè, “Gɔ̃́ e kéa lɛ Dɔ̀-Wálà-lé-là-mìa kpó-kpó ká.”

⁴¹Mia dò bɛ̃̀ɛ̃ wa gèe kélɛ̀, “Kɛ́lɛ̀ìa lɛ́ ɓɛ.” Kɛɛ mia dò bɛ̃̀ɛ̃ o kɛ à gèepìà kélɛ̀, “Kéa, Kɛ́lɛ̀ìa lɛ́ɛ̀ lo góò Gálàlíì?

⁴²Wálà kiia láà gèe kélɛ̀ Kɛ́lɛ̀ìa lɛ́ɛ̀ lo góò Dèɓé sùu là. Ɛ́ɛ̃́ óò lo à yeè Bɛ́féléhɛ̃́ɛ̃̀, lɛ̀ à yé e kɛ Dèɓé pà káa mɔ̀.”

⁴³Lɛ̀ e kɛ kília, mia kã́ã̀ e kɛá e kíe mɔ̀ gbṹa yí Zízɛ̀ mɔ́ɔ̀ wɔ̃̀ mɔ̀.

⁴⁴Mia gbṹũ̀ wa naa ó à kṹ, kɛɛ mi gbɛɛ lɛ̀ɛ́ gbaa e kɔ̀ yà à mɔ̀.

⁴⁵Sóyà vɔ̀ɔ o yɛ́ o zí, o ló sálà-ɓò-Wálà-mɔ̀-mìà kpànazɛ̀ wà Fálásíì-mìàa o píé. O sóyà vɔ̀ɔ wɛ̃́ĩ́-lɔ̀ɔ kɛ kélɛ̀, “Mɛ́ e kɛ lɛ́ kàá gbaa nu à ká?”

⁴⁶Sóyà vɔ̀ɔ wa gèe kélɛ̀, “Mi gbɛɛ lɛ̀ɛ́ mɛ́ĩ́ ɓo do zí gɔ̃́ e kéa è mɛ́ĩ́ ɓoáa ká.”

⁴⁷Fálásíì-mìàa o o wɛ̃́ĩ́-lɔ̀ɔ kɛ kélɛ̀, “E ka bɛ̃̀ɛ̃ ka bèkɛ̀ ɓo kɛ̀è?

⁴⁸Kaà ko wũ-là-mìàa doó-mì, ɛ̃́ɛ̃́ Fálásíì-mìàa dò gɛ̃̀, waà o zò dɔ à mɔ̀?

⁴⁹Mia kù e kéa, òó Móózè là Lɔ́ɔ̀ɔ dɔ. Wálà zì náá lɛ o mɔ̀ à mɔ́ɔ̀ wɔ̃̀ mɔ̀.”

⁵⁰Nekòdímà, ye lɛ́ aà ló do Zízɛ̀ píéa, e kɛ míá o kília doó-mì ká. A gèe o lɛ̀ɛ,

⁵¹“Kéa, kɔ̀à Lɔ́ɔ̀ɔ lɛ́ɛ̀ mɛ̀ĩ́-sà kàà mi wĩĩ́, yé òó mí e kília wéè ma nɛ́, ɛ̃́ɛ̃́ lɛ́ òó wɔ̃́ a kɛɛ yí naa nɛ́ɛ ká?”

⁵²Wa gèe à lɛ̀ɛ kélɛ̀, “Ƃi bɛ̃̀ɛ̃, íì go Gálàlíì kɛ̀è? Ì Wálà kiia dã́. É kɛ̀á dɔ̀-Wálà-lé-là-mì lɛ́ɛ̀ go Gálàlíìa, íì lo à yí dɔɔ̀.” [

⁵³Lɛ̀ e kɛ kília, mia séĩ́ o ló o píé kɛ́ì píé.