Read Yamano Àpɔ́sɔ̀lɔ̀ 10 Bible Online

Àpɔ́sɔ̀lɔ̀ 10 - Yamano bible

Àpɔ́sɔ̀lɔ̀ 10

¹Gɔ̃ doó e kɛ Sízàlíà, wáà sì Kɔ̀nélìà. E kɛ Wólómà sóyà vɔ̀ kù lɛ́ ò si Ìtálìà-kùa, wũ-là-mìà doó-mì ká.

²Gɔ̃́ e kília e kɛ túópìà Wálà lɛ̀ɛ. Wà e píé-kɛ́ì-mìà séĩ́ o kɛ gbinipìà Wálà lɛ̀ɛ. E gbũ Zúù-mìà yé pɛ wá o kɛ̀lɛ̀ɛ mɔ̀ kpànazɛ̀. À zì sɛ̀nɛ ɓò Wálà lɛ̀ɛ fĩ̀ã̀ lɛ̀ɛ́ kɛ kã́pìà.

³Lúó doó káa, lɛ̀ e kɛ nyɛ́nɛ́-dɔ̀-mia-tóó-gbáà-lùò káa, e pɛ lɛ́ e kɛ kélɛ̀ mɛ̀ĩ̀ lɛ́ ɓea zɛ. À zɛɛ̀ yía, e Wálà là vɔ-mì gɛ̃̀ séĩ́-sèĩ̀, e nu à píé, áà gèè à lɛ̀ɛ, “Kɔ̀nélìà.”

⁴E lɛ̀ gɛ̃̀ à píé túó ká, áà gèè, “M dàa-mì, mɛ́ e kɛ?” Vɔ-mìà a là nìɛ̀ weeá kélɛ̀, “Wálà aà e kɔ̀ yà i zì sɛ̀nɛ, ɛ̃́ɛ̃́ i zì gbũ̀-mia-mɔ̀ɔ wì, ɛ̃́ɛ̃́ à zò vùoò lɛ i mɔ́ɔ̀ wɔ̃̀ ká.

⁵Lɛ̀ lɛ kília, ì gɔ̃à vɔ Zɔ́pà, ó ló gɔ̃ lɛ́ e yí lɛ́ ò si Sáímɔ̀ Pílɛ̀ɛ, súo kɛɛ̀.

⁶Lɛ lɔ̀ɔ̀-mi ká gɔ̃ lɛ́ lɛ wìì kii sɔ́lɔ́-mì ká, lɛ́ là ká dɔɔ̀ lɛ mɛ̀ĩ́ sɔ́nɔ́, lɛ́ ò si Sáímɔ̀ɔ píé kɛ́ì.”

⁷Lɛ̀ e kɛ kília, vɔ-mì lɛ́ e kɛ mɛ́ĩ́ ɓopìà à lɛ̀ɛ, e là ló ɓo. Kɔ̀nélìà e mia lɛ́ o kɛ à kɔ̀-lé káa, e o yààka súo kɛ. O pèèlɛ-mì e kɛ là yɛɓo-kɛ-mìà ká. O doó-mì bɛ̃̀ɛ̃ e kɛ sóyà lɛ́ è gbìnì Wálà lɛ̀ɛ ká.

⁸E wɔ̃́ lɛ́ à kɛɛ̀ e kɛáa gèe o lɛ̀ɛ. E o vɔ Zɔ́pà.

⁹Lɛ̀ lɛ̀ e kpɛ̀i, ɛ̃́ɛ̃́ lɛ́ o kɛ zi là, wáà nù Zɔ́pà ká kɔ̀ɛ́ɛ, Pílɛ̀ e tɛ̀nɛ̀ ká lɛ́ e kɛ à wìa là lɛ̀í, kɛ é sɛ̀nɛ ɓo. Lɛ̀ a kɛ kília, kɛɛ aà kɛ vɔ̀ nyɛ́nɛ́-dɔ̀-mia-tùluù-lùò ká.

¹⁰Lɔ̀ɔ e gbɛ̃̀ gbaa áà kɛ̀. A naa é pɛ ɓèlè. Lɛ̀ lɛ́ o kɛ léɓèlè pɛ̀ kɛpìàa, e pɛ lɛ́ e kélɛ̀ mɛ̀ĩ̀ lɛ́ ɓea zɛ.

¹¹E lɛ̀í lé ɓoòa zɛ̀ gɛ̃̀. Ɛ́ɛ̃́ e pɛ dò gɛ̃̀, áà nù tã́ã̀. Pɛ́ e kília ɓɔɔ̀ e kɛá sɔ pɛ̃́ɛ̃́ gbùò dò bà. E kɛ lɛ̀ pɛ lɛ́ mia kɔ̀ e kɛ à tóó yììsɛɛ mɔ̀, wáà nùá tã́ã̀.

¹²Wìì doò do, ɛ̃́ɛ̃́ wìì vɔ̀ yé ò tàà o gí làa, wà mɔ̀ɔ̀ nì o kɛ sɔ́ e kília yí.

¹³Wéé dò e mɛ́ĩ́ ɓo Pílɛ̀ lɛ̀ɛ weeá kélɛ̀, “Pílɛ̀, wɛ̀lɛ̀ í pɛ zɛ, ɓá ɓèlè.”

¹⁴Kɛɛ Pílɛ̀ a gèe kélɛ̀, “É, gbàaò, m Dàa-mì. M̀ḿ pɛ lɛ́ è mia mɛ́ lilì kũ, ɛ̃́ɛ̃́ pɛ lɛ́ lɛ yɔɔ ɓèlè wɛ̃́ĩ̀a, ɓèlè do.”

¹⁵Wéé nɔ́ doóa, e bɛ̀i e mɛ́ĩ́ ɓo zeĩ́ Pílɛ̀ lɛ̀ɛ weeá kélɛ̀, “Pɛ lɛ́ Wálà aà à kɛ ɓèlè-pɛ̀ yiè káa, yékɛ̀ ɓá sí pɛ yɔɔ.”

¹⁶Pɛ nɔ́ doóa, e kɛ e kíe yí kpolà yààka zɛ̀. Yé e kɛ gbaa kília, o kɛ pɛ́ɛ gã́ã́pìà, áà lò lɛ̀í.

¹⁷Zò-gɔ̃́ kpó-kpó e kɛ Pílɛ̀ mɔ̀ pɛ́ a zɛ lɛ́ e kɛ kélɛ̀ mɛ̀ĩ̀ lɛ́ ɓea mɔ́ɔ̀ wɔ̃̀ mɔ̀. Lɛ̀ Pílɛ̀ e kɛ zò-gɔ̃́ yía, kɛɛ mia lɛ́ Kɔ̀nélìà e o vɔɔ, waà lɛ̀ lɛ́ Sáímɔ̀ là ká e kɛ yía dɔ. O kɛ gbaa dɔ̀á mia wàà-kpáá lɛ́ è lo káa wìa mɔ̀.

¹⁸O súo kɛ weeá kélɛ̀, “Lɔ̀ɔ̀-mi dò lɛ lɛ̀ɛ mɔ̀, wáà sì Sáímɔ̀ Pílɛ̀?”

¹⁹Pílɛ̀ e kɛ tĩã́ naapìà é pɛ lɛ́ a zɛ, lɛ́ e kɛ kélɛ̀ mɛ̀ĩ̀ lɛ́ ɓea yí ma lɛ̀ lɛ́ Gɛ̀ɛ̀ Púlú e wɔ̃́ e kéa gèea ká. A gèe kélɛ̀, “Lɛ̀ gɛ̃̀, gɔ̃à yààka o i naapìà.

²⁰Wɛ̀lɛ̀ í yɔ̀ɔ́. Yékɛ̀ í dɔ̀-dɔ̀ ɓèlè kà ye nì ka lóò mɔ́ɔ̀ wɔ̃̀ yí. Ƃii ma lɛ́ m o vɔɔ.”

²¹Yé e kɛ kília, Pílɛ̀ e yɔ̀ɔ́ gbaa, e ló gɔ̃àa píé, áà gèè o lɛ̀ɛ, “Ma lɛ́ m mi lɛ́ kà nààa káa. Mɛ́ ka mɔ́ɔ̀ nu ɓo?”

²²Wa gèe gbaa à lɛ̀ɛ, “Sóyà vɔ̀ wũ-là-mì lɛ́ ò si Kɔ̀nélìàa, lɛ́ e ko vɔ i píéa. Lɛ dóo gɔ̃ kpeĩ lɛ́ è gbìnì Wálà lɛ̀ɛ ká. Zúù-mìà séĩ́ óò à tɔ́ yiè gèe. Wálà là vɔ-mìà doó-mì a gèe à lɛ̀ɛ é i súo kɛ e píé kɛ́ì, kɛɛ é wɔ̃́ lɛ́ lɛ i kɛ̀lɛ̀ ɓá gèea ma.”

²³Pílɛ̀ e e kɔ̀ yà gɔ̃à yààkaa wì, wà ye nì o kɛ yí bĩ́míà doóa píé. À zì lɛ̀-kpɛ̀iì káa, wà gɔ̃àa nì o wɛ̀lɛ̀, wáà lò. Wà e lèe-gé vɔ̀ nì lɛ́ wà ye nì o kɛ Zɔ́pàa, dò o ló nɔ́ kíli.

²⁴À zì lɛ̀-kpɛ̀iì káa, Pílɛ̀ nì o dà gbaa Sízàlíà. Lɛ̀ e kɛ kília, kɛɛ Kɔ̀nélìà aà e mìà nì, ɛ̃́ɛ̃́ e ɓɛ́ĩ̀ yiè yiè vɔ̀ súo kɛ o kíe là. O dɔɔ̀ e kɛá Pílɛ̀ gɛ̀nɛ̀.

²⁵Lɛ̀ Pílɛ̀ e dɔ gbaa é wàà kɛ́ìa, Kɔ̀nélìà e ɓɔ gbaa à là. E pèlè gbaa Pílɛ̀ gã̀ dṹɔ̃̀, áà gbìnì à wɛlɛ mɔ̀.

²⁶Kɛɛ Pílɛ̀ a kɛ e wɛ̀lɛ̀ e dɔ. A gèe à lɛ̀ɛ, “Wɛ̀lɛ̀ í dɔ. Ma vɔ̀ɔ, m nɔ́ gɔ̃́ i à káa dò ká nɔ́ kíli.”

²⁷Pílɛ̀ e kɛ nɔ́ tĩã́ mɛ́ĩ́ ɓopìà Kɔ̀nélìà lɛ̀ɛ lɛ̀ lɛ́ o kɛ lópìà kɛ́ìa ká. E mia búnùzɛ̀ gɛ̃̀, o páà e kɛá e kíe mɔ̀ à lɛ̀ mɔ̀.

²⁸A gèe o lɛ̀ɛ, “Ka dìè káà yí dɔ kélɛ̀ ye wá Zúù mi nɔ́ɔ fé mɔ̀ kɛɛ é ɓɔ, ɛ̃́ɛ̃́ kɛ é dà sɛ́lɛ́ gbɛɛ yí-mì nɔ́ɔ fé píé. Kɛɛ Wálà aà zɔ̃̀ɔ̃̀ m lɛ̀ɛ kélɛ̀ yékɛ̀ ḿ mi nɔ́ɔ fé sí mi mɛ́ lilì kṹ-mì, ɛ̃́ɛ̃́ yékɛ̀ ḿ à dò sí mi yɔɔ.

²⁹À mɔ́ɔ̀ wɔ̃̀ mɔ̀ɔ, lɛ̀ lɛ́ i nɛ́ vɔ m lɛ̀ɛ, ma mɔ́ɔ̀ nu ɓo. M̀ḿ gbaa ka wéè tèé ɓo. Yé lɛ kília, ḿm̀ ka wɛ̃́ĩ́-lɔ̀ɔ kɛ̀ kélɛ̀, mɛ́ ka mɔ́ɔ̀ m súo kɛ?”

³⁰Kɔ̀nélìà a gèe kélɛ̀, “Lúó yààka lɛ́ aà die, lɛ́ à yììsɛ lùò lɛ pɛ́nɛɛ káa, zì lɛ̀-kpɛ̀iì doó ká kɛɛ nyɛ́nɛ́ aà dɔ-mia-tóó-gbáàa, m kɛ sɛ̀nɛ ɓopìà m píé kɛ́ì. Nɔ́ zá lea, gɔ̃ dò dɔɔ̀ e kɛá m wɛlɛ mɔ̀. À mɔ̀-sɔ̀ e kɛ ɓípìà,

³¹áà gèè m lɛ̀ɛ, ‘Kɔ̀nélìà. Wálà aà ɓà sɛ̀nɛ-ɓo-wè ma, ɛ̃́ɛ̃́ à zò vùoò lɛ i zì gbũ̀-mia-mɔ̀ɔ ká.

³²Ì mi dò vɔ Zɔ́pà, é ló gɔ̃ lɛ́ e yí lɛ́ ò si Sáímɔ̀ Pílɛ̀ɛ súo kɛɛ̀. Lɛ lɔ̀ɔ̀-mi ká Sáímɔ̀ lɛ́ e wìì kii sɔ́lɔ́-mì ká, lɛ́ là ká dɔɔ̀ lɛ mɛ̀ĩ́ sɔ́nɔ́ɔ, píé kɛ́ì.’

³³Yé e kɛ nɔ́ kília, máà nɛ́ vɔ̀ i píé. Ɛ́ɛ̃́ ɓi bɛ̃̀ɛ̃, ɓa kɛ dóo sɛ̀ lɛ́ i nua. Ko séĩ́ ko gbaa zèe dɛɛ ká Wálà wɛlɛ mɔ̀, kɛ kó wɔ̃́ nɔ́ɔ fé lɛ́ ko Dàa-mì aà gèe i lɛ̀ɛ ɓá gèea, kɛ kó ma.”

³⁴Pílɛ̀ e gbɛ̃̀ gbaa, áà gèè, “Ḿm̀ à yí kpó-kpó dɔ gbaa wánà ká kélɛ̀ Wálà lɛ̀ɛ́ mia bà ɓo.

³⁵Mi nɔ́ɔ fé lɛ́ è tùò à lɛ̀ɛ, lɛ́ è wɔ̃́ lɛ́ lɛ kpeĩa kɛ̀ɛ, à ye lɛ́ Wálà è bɛ̀i à mɔ̀ é e kɔ̀ yà à wì, é kɛ bɛ̃̀ɛ̃ sɛ́lɛ́ nɔ́ɔ fé yí-mì káa káa.

³⁶Wè-vɔ-wè lɛ́ e à vɔ Éézɛ̀lɛ̀-mìà píéa, káà dɔ. E kɛ wɔ̃́ làṹ yiè, lɛ́ à gbɛ̃̀ɛ̃̀ lɛ zò-yà-gé lɛ́ mia ò sɔ̀lɔ̀ ɓo Zízɛ̀ Kɛ́lɛ̀ì tɔ́ yí zàáa, mɔ̀ɔ gèepìà lòũ̀ ká. (Zízɛ̀ e kília lɛ́ lɛ mia séĩ́ Dàa-mì káa.)

³⁷Wɔ̃́ lɛ́ à kɛɛ̀ e kɛá Zúù-mìà pà lɛ̀ séĩ́ mɔ̀, lɛ́ à zi gbɛ̃̀ɛ̃ɛ̃̀ e kɛá Gálàlíìa, káà dɔ. À kɛɛ̀ e kɛá, kɛɛ mia bàtáì-kɛ-wɔ̃̀ lɛ́ Zɔ̃̀ɔ̃́ a wɔ̃̀ gèe lòũ̀ káa, kɛ aà kɛ.

³⁸Káà wɔ̃́ lɛ́ à gbɛ̃̀ɛ̃̀ lɛ Zízɛ̀ lɛ́ è go Názàlɛ̀ɛ mɔ̀ɔ dɔ. Zi lɛ́ Wálà e Gɛ̀ɛ̀ Púlú wà yíkɛ̀ gáàa káá à ká à làa, káà dɔ. E ló lɛ̀ séĩ́ mɔ̀ wɔ̃́ yiè kɛɛ̀ ká. E kɛ mia séĩ́ lɛ́ o kɛ Dɛ́ɓò là yíkɛ̀ gáàa wìa lapìà, ɓii Wálà e kɛ à píéa mɔ́ɔ̀ wɔ̃̀ mɔ̀.

³⁹Ko wɔ̃́ séĩ́ lɛ́ a kɛ Zúù-mìà pà, ɛ̃́ɛ̃́ lɛ́ a kɛ Zùlúsàlɛ̀ɛ, kélá ká. O à zɛ à pà kɔ́lɔ́sì mɔ̀ ká.

⁴⁰Kɛɛ Wálà e à wɛ̀lɛ̀ ga kɛ̀lɛ̀ à lɛ̀-kpɛ̀iì yààka lùò ká. Ɛ́ɛ̃́ e à kɛ e ɓíé ko là.

⁴¹Lɛ̀ɛ́ gbaa ɓíé mia séĩ́ là. Mia nɔ́ lɛ́ ko kélá vɔ̀ ká, lɛ́ Wálà aà ko sía, lɛ́ nɔ́ e ɓíé ko làa. Kò ye nì ko pɛ ɓèlè, ɛ̃́ɛ̃́ ko pɛ mi e kíe là, lɛ̀ lɛ́ e wɛ̀lɛ̀ ga kɛ̀lɛ̀ɛ ká.

⁴²Ɛ́ɛ̃́ a gèe ko lɛ̀ɛ kó wɔ̃́ làṹ yièa gèe mia lɛ̀ɛ lòũ̀ ká, ɛ̃́ɛ̃́ zeĩ́ kó kélá-wè ɓo kélɛ̀ à ye lɛ́ Wálà aà à sí, kɛ é kɛ mɛ̀ĩ́-sà ɓo-mì ká mia lɛ́ waà gaa, wà o yé o ɓea o lɛ̀ɛ.

⁴³Dɔ̀-Wálà-lé-là-mìà séĩ́ o kélá-wè ɓo áà gbɛ̃̀á à mɔ̀, wáà gèè kélɛ̀ mia séĩ́ lɛ́ ò lo o zò dɔɔ̀ à mɔ̀ɔ, o kɛ-wɔ̃̀ yɔɔ lɛ́ɛ̀ lo ɓoò o wũ mɔ̀ à tɔ́ yí zàá.”

⁴⁴Lɛ̀ Pílɛ̀ e kɛ tĩã́ mɛ́ĩ́ ɓopìàa, Gɛ̀ɛ̀ Púlú e nu mia séĩ́ lɛ́ o kɛ o tóó dɔpìà wɔ̃́ lɛ́ e kɛ à gèepìàa mɔ̀ɔ là.

⁴⁵Zúù-mìà lɛ́ o zò dɔɔ̀ e kɛá Zízɛ̀ mɔ̀, lɛ́ wà Pílɛ̀ nì o gó Zɔ́pàa, o lé kpó-kpó paà e kɛá lɛ̀ lɛ́ Wálà e e zì nɔ̀-lɛ̀ɛ-pɛ̀ lɛ́ e Gɛ̀ɛ̀ Púlú káa, káá sɛ́lɛ́ gbɛɛ yí-mìà bɛ̃̀ɛ̃ làa ká.

⁴⁶Ƃii o sɛ́lɛ́ gbɛɛ yí-mìà wéè ma, wáà wè gbɛɛ̀-gbɛɛ gèè, tó wáà Wálà tɔ́ ɓɔ̀. Pílɛ̀ a gèe gbaa kélɛ̀,

⁴⁷“Míá o kéa waà Gɛ̀ɛ̀ Púlú sɔ̀lɔ̀ ɓo, lɛ̀ zí nɔ́ kɔaà à sɔ̀lɔ̀ ɓo à káa lɛ́ ɓe. Yé aà kɛ kília, bɛ̀i lɛ mi nɔ́ɔ fé mɔ̀ kɛ é míá o kéa tèá o bàtáì kɛ̀ yíí ká mɔ̀?”

⁴⁸E à gèe gbaa o lɛ̀ɛ ó o bàtáì kɛ Zízɛ̀ Kɛ́lɛ̀ì tɔ́ yí zàá. Yé e kɛ gbaa kília, o à gèe Pílɛ̀ lɛ̀ɛ wà ye nì ó ɓo ɓéĩ́ ɓo yí pèèlɛ.