Read Yamano Àpɔ́sɔ̀lɔ̀ 11 Bible Online

Àpɔ́sɔ̀lɔ̀ 11 - Yamano bible

Àpɔ́sɔ̀lɔ̀ 11

¹Àpɔ́sɔ̀lɔ̀ vɔ̀ɔ wà o ɓɛ́ĩ̀ Wálà-mìà lɛ́ o kɛ Zùdíà lɛ̀ séĩ́ mɔ̀ɔ, wa ma kélɛ̀ sɛ́lɛ́ gbɛɛ yí-mìà waà Wálà lé-wè sɔ̀lɔ̀ ɓo nɔ́ kíli.

²Lɛ̀ Pílɛ̀ e ló Zùlúsàlɛ̀ɛ, mia lɛ́ o kɛ à naapìà sɛ́lɛ́ gbɛɛ yí-mìà ó bɔ̃́ɔ̃́ sía, o wéé yà à mɔ̀,

³wáà gèè kélɛ̀, “Ḿ gɔ̃̀, ɓi lɛ́ i wàà sɛ́lɛ́ gbɛɛ yí-mìà, lɛ́ o bɔ̃́ɔ̃́ síì lɛ̀ɛ́ gbaa kɛ à káa píé kɛ́ì, ɛ̃́ɛ̃́ lɛ́ kà ye nì ka pɛ ɓèlè e kíe bàa?”

⁴Lɛ̀ e kɛ kília, Pílɛ̀ e gbɛ̃̀ gbaa wɔ̃́ lɛ́ aà kɛɛ gã̀-gbɛ̃̀pìà, áà séĩ́ yí ɓò o lɛ̀ɛ. Wɔ̃́ a gèea, gɛ̃̀ e ké.

⁵“M kɛ sɛ̀nɛ ɓopìà pɛ́lɛ lɛ́ ò si Zɔ́pàa yí. Yé e kɛ kília, m pɛ lɛ́ lɛ kélɛ̀ mɛ̀ĩ̀ lɛ́ ɓea zɛ. M pɛ dò gɛ̃̀, áà nù tã́ã̀. À ɓɔɔ̀ e kɛá sɔ pɛ̃́ɛ̃́ gbùò dò bà. E kɛ lɛ̀ pɛ lɛ́ mia kɔ̀ e kɛ à tóó yììsɛ mɔ̀, áà gò lɛ̀í, wáà nùá tã́ã̀. E nu m píé kpeĩ le.

⁶M à mɛ́ nyɛ kpó-kpó ɓo. M wìì vɔ̀, ɛ̃́ɛ̃́ à nyaàa zɛ̀ nì, e bɛ̀i, à yé ò tàà o gí làa nì, ɛ̃́ɛ̃́ mɔ̀ɔ̀ nì gɛ̃̀ à yí, lɛ̀ ma mɛ́ nyɛɛ ká.

⁷Lɛ̀ e kɛ kília, m wéé dò ma, áà gèè m lɛ̀ɛ, ‘Pílɛ̀, wɛ̀lɛ̀ í pɛ zɛ ɓá ɓèlè.’

⁸Kɛɛ ma gèe kélɛ̀, ‘É, gbàaò, m Dàa-mì. Pɛ lɛ́ è mia mɛ́ lilì kũ, ɛ̃́ɛ̃́ pɛ lɛ́ lɛ yɔɔ ɓèlè wɛ̃́ĩ̀a, à dò nɔ́ɔ fé lɛ̀ɛ́ ɓɔ do m lé.’

⁹Wéé e kília, e bɛ̀i, e mɛ́ĩ́ ɓo, à wéè áà gò lɛ̀í weeá kélɛ̀, ‘Pɛ lɛ́ Wálà aà à kɛ ɓèlè-pɛ̀ yiè káa, yékɛ̀ ɓá sí pɛ yɔɔ.’

¹⁰Pɛ nɔ́ doóa, e kɛ e kíe yí kpolà yààka zɛ̀. Yé e kɛ gbaa kília, pɛ́ e kília séĩ́ gã́ã̀ e kɛá, wáà lòá lɛ̀í zeĩ́.

¹¹Lúó téé-tèè e kília káa, kɛɛ gɔ̃à yààka, lɛ́ o o vɔ m píé, lɛ́ o gó Sízàlíàa, kɛɛ waà ɓɔ ká lɛ́ m kɛ à wìa lé mɔ̀.

¹²Gɛ̀ɛ̀ Púlú a gèe m lɛ̀ɛ kò ye nì kó ló yékɛ̀ ḿ dɔ̀-dɔ̀ ɓèlè ko ló-wɔ̃̀ yí. M lèe-gé vɔ̀ sáláádo o kéa, kò ye nì ko ló Sízàlíà, ɛ̃́ɛ̃́ ko ló Kɔ̀nélìà píé kɛ́ì.

¹³E zi lɛ́ aà Wálà là vɔ-mì gɛ̃̀á dɔ̀á e píé kɛ́ìa, wɔ̃̀ gèe ko lɛ̀ɛ. Vɔ-mì e kília a gèe à lɛ̀ɛ, ‘Ì mi vɔ Zɔ́pà é ló gɔ̃ lɛ́ ò si Sáímɔ̀ Pílɛ̀ɛ, súo kɛɛ̀.

¹⁴Lɛ́ɛ̀ lo wéé lɛ́ kà i píé-kɛ́ì-mìà séĩ́ kà lo laà à kolo làa, gèeè i lɛ̀ɛ.’

¹⁵Lɛ̀ m gbɛ̃̀ máà mɛ́ĩ́ ɓòa, Gɛ̀ɛ̀ Púlú e nu o là lɛ̀ zí nɔ́ e nuá ko là wɔ̃́ gã̀-gbɛ̃̀pìàa lɛ́ ɓe.

¹⁶Yé e kɛ kília, m zò e vùò gbaa wɔ̃́ lɛ́ ko Dàa-mì aà gèea ká. A gèe kélɛ̀, ‘Zɔ̃̀ɔ̃́ e mia bàtáì kɛ yíí ká. Kɛɛ ka bàtáì kɛɛ̀ lɛ́ɛ̀ lo kɛɛ̀ à ká Gɛ̀ɛ̀ Púlú ká.’

¹⁷Wálà e nɔ̀-lɛ̀ɛ-pɛ̀ nɔ́ doó lɛ́ a nɔ ko lɛ̀ɛ, lɛ̀ lɛ́ ko ko zò dɔ ko Dàa-mì Zízɛ̀ Kɛ́lɛ̀ì mɔ̀ɔ káa, nɔ̀-lɛ̀ɛ-pɛ̀ nɔ́ doó e kília a nɔ sɛ́lɛ́ gbɛɛ yí-mìà bɛ̃̀ɛ̃ lɛ̀ɛ nɔ́ kíli. Yé lɛ kília, dé e m ká, kɛ ḿ Wálà tèá e kɛ-yɛ̀ɓo kɛɛ̀ mɔ̀?”

¹⁸Lɛ̀ o wɔ̃́ e kéa maa, o tèá gbaa wéé dɔɔ̀ ká, wáà Wálà tɔ́ ɓɔ̀ weeá kélɛ̀, “Wálà aà zi kɛ ɓe sɛ́lɛ́ gbɛɛ yí-mìà lɛ̀ɛ, kɛ ó o sɔ̃̀ɔ̃ yɔɔ mɛ́ vɔ̀ɔ, kɛ ó kɛ̀ɓe sɔ̀lɔ̀ ɓo nɔ́ kíli.”

¹⁹Sã̀-dɔ lɛ́ e kɛ ɓe, lɛ̀ lɛ́ o Tíímì zɛɛ káa, a kɛ Wálà-mìà o kã́ o kíe mɔ̀. O dò o ló vɔ̀ sɛ́lɛ́ yí gbèĩ gbèĩ píé. O ló Fìnísìà, wà Sápà, e bɛ̀i Ã́téɔ̀ yí píé. O kɛ Wálà lé-wè gèepìà Zúù-mìà doó lɛ̀ɛ.

²⁰Kɛɛ Wálà-mìà dò lɛ́ o kɛ gópìà Sápà wà Sàlĩ́ĩ̀a, o ló Ã́téɔ̀, wáà Wálà lé-wèa gèè sɛ́lɛ́ gbɛɛ yí-mìà lɛ̀ɛ nɔ́ kíli. O kɛ wɔ̃́ làṹ yiè lɛ́ à gbɛ̃̀ɛ̃̀ lɛ ko Dàa-mì Zízɛ̀ mɔ̀ɔ gèepìà.

²¹Ko Dàa-mì là yíkɛ̀ gáàa e kɛ o yí. Mia kù gbùò zɛ̀ o o zò dɔ ko Dàa-mì mɔ̀, wáà nìɛ̀ à píé.

²²Wɔ̃́ e kéa làṹ e ɓɔ Wálà-mìà lɛ́ o kɛ Zùlúsàlɛ̀ɛ mɔ̀. O à mɔ́ɔ̀ Bánábà vɔ ɓo Ã́téɔ̀.

²³Lɛ̀ e ɓɔ yía, e wɔ̃́ lɛ́ Wálà zì zò-kɛ̀-sɛ̀ aà kɛ mia lɛ̀ɛ gɛ̃̀. Yé e kɛ kília, à gé e li, ɛ̃́ɛ̃́ e o fã̀ã́-wàà-wè dò gèe o lɛ̀ɛ. A gèe o lɛ̀ɛ o zò é kɛ gágà, kɛ ó o dìè nɛ̀ɛ ko Dàa-mì mɔ̀ zàá.

²⁴Bánábà e kɛ gɔ̃ sɔ̃̀ɔ̃ yiè zɛ̀ ká. À paà e kɛá Gɛ̀ɛ̀ Púlú wà zò-dɔ̀à-mɔ̀ ká tĩĩ-tĩĩ le. Mia búnùzɛ̀ dàaà e kɛá ko Dàa-mì bà.

²⁵Yé e kɛ kília, Bánábà e ló Táásà-pɛlɛí Sɔ́ɔ̀ naapìà.

²⁶Lɛ̀ a gɛ̃̀ɛ, e nu à ká Ã́téɔ̀. Yé e kɛ kília, wà Wálà-mìà lɛ́ o kɛ yía o pá o kíe mɔ̀ kɛ̀ɛ̀ doó púlú píé, wáà pɛ zɔ̃̀ɔ̃̀ mia búnù-búnùzɛ̀ lɛ̀ɛ. Lɛ̀ bèĩzɛ̀ lɛ́ o Kɛ́lɛ̀ì là tòà-píé-mìàa tɔ́ kpɔ́ yi, wáà o sì Kɛ́lɛ̀ì là mia nìa, lɛ́ e kɛ Ã́téɔ̀ káa.

²⁷Lúó e kília káa, dɔ̀-Wálà-lé-là-mìà dò o gó Zùlúsàlɛ̀, wáà lò Ã́téɔ̀.

²⁸O doó-mì lɛ́ o kɛ à sípìà Àgábàa, e wɛ̀lɛ̀ e dɔ, áà wɔ̃́ lɛ́ e kɛ lópìà kɛɛ̀ líéa, áà gèè Gɛ̀ɛ̀ Púlú zì yíkɛ̀ gáàa kolo là zàá. A gèe kélɛ̀ lɔ̀ɔ gbùò lɛ nupìà dàà sɛ́lɛ́ séĩ́ yí. (Wɔ̃́ e kéa e kɛ Kɔ́lɔ́dìà kɛ̀-mia-là-lùò ká.)

²⁹Tò-Zízɛ̀-píé-mìàa o séĩ́ wa yà o gé kɛ ó pɛ vɔ zí e kɛá o mɔ̀ ó vɔáa ká, kɛɛ ó gbũá o lèe-gé vɔ̀ lɛ́ o kɛ Zùdíàa mɔ̀.

³⁰Wa kɛ kíli. O pɛlèe e kília dɔ̀ kɛ Bánábà wà Sɔ́ɔ̀ o kɛ̀lɛ̀. O ló à ká mia dìè-dìè vɔ̀ɔ píé.