Read Yamano Àpɔ́sɔ̀lɔ̀ 13 Bible Online

Àpɔ́sɔ̀lɔ̀ 13 - Yamano bible

Àpɔ́sɔ̀lɔ̀ 13

¹Dɔ̀-Wálà-lé-là-mìà wà pɛ-zɔ̃̀ɔ̃̀-mìà dò o kɛ Wálà-mìà lɛ́ o kɛ Ã́téɔ̀ɔ bà. O tɔ́ lɛ́ e kéa. Bánábà, Símìà lɛ́ o kɛ à sípìà Náyàaò, e bɛ̀i Lúsìà lɛ́ è go Sàlĩ́ĩ̀a, ɛ̃́ɛ̃́ Mànéyà lɛ́ o wà Hɛ́lɔ̀ lɛ́ lɛ mia líé-sí-mì káa, o tòlò lɛ̀ doó mɔ̀ɔò, ɛ̃́ɛ̃́ zeĩ́ Sɔ́ɔ̀.

²Lɛ̀ o kɛ yɛɓo kɛpìà ko Dàa-mì lɛ̀ɛ, wáà lò sṹũ yía, Gɛ̀ɛ̀ Púlú a gèe o lɛ̀ɛ kélɛ̀, “Kà Bánábà wà Sɔ́ɔ̀ o ɓo ka bà, kɛ ó yɛɓo lɛ́ maà mɔ́ɔ̀ o súo kɛɛ kɛ.”

³O ló sṹũ yí wáà sɛ̀nɛ ɓò, o o kɔ̀ kpɔ́ gbaa o là, o o vɔ gbaa.

⁴Lɛ̀ gbaa Gɛ̀ɛ̀ Púlú e Bánábà wà Sɔ́ɔ̀ o vɔɔ, o ló gbaa sɛ́lɛ́ lɛ́ ò si Sùlúsìàa yí, o yà gbaa gɔɔ yí, o ló sɛ́lɛ́ yé yíí nìɛ̀ lɛ à mɔ̀, lɛ́ ò si Sápàa yí.

⁵Lɛ̀ lɛ́ o ɓɔ Sàlámìa, o Wálà lé-wè gèe lòũ̀ ká Zúù-mìà zì Wálà-kà lɛ́ e kɛ yía wì píé píé. Zɔ̃̀ɔ̃́ e kɛ o píé, kɛ é gbũ o mɔ̀ yɛɓo e kília kɛɛ̀ yí.

⁶O gó sɛ́lɛ́ɛ lɛ̀ yé o kɛ yía mɔ̀, o ló à lɛ̀ yé ò si Péfɔ̀ɔ yí. Lɛ̀ o lóa, o ɓe-kɛ-mì doó lɛ́ ò si Bà-Zízɛ̀ɛ gɛ̃̀ yi. E kɛ Zúù mi lɛ́ e e dìè kɛ dɔ̀-Wálà-lé-là-mì káa ká.

⁷Gɔ̃́ e kília e kɛ sɛ́lɛ́ e kília wũ-là-mì lɛ́ ò si Sɔ́zà Pólàa, à píé mi ká. Sɔ́zà Pólà e kília e kɛ dóo gɔ̃ wũ-kɛ̀à-mɔ̀ zɛ̀ kpó-kpó ká. E Bánábà wà Sɔ́ɔ̀ o súo kɛ, ɓii a naa é Wálà là wééa ma.

⁸Kɛɛ ɓe-kɛ-mì e kília tɔ́ dò lɛ́ Ɛ́lémà Gílíì-wè yí zàá. Ɛ́lémà e kília e kɛ yàpìà o wéè mɔ̀. E kɛ à kɛ-zì naapìà, kɛɛ é sɛ́lɛ́ wũ-là-mì e kília zì yɛ́lɛ́-táá ɓo zò-dɔ̀à-mɔ̀ wɔ̃̀ e kília píé.

⁹Yé e kɛ kília Sɔ́ɔ̀, lɛ́ o kɛ à sípìà zeĩ́ Pɔ́ɔ̀ɔ, à paà e kɛá Gɛ̀ɛ̀ Púlú ká. E ɓe-kɛ-mìa gɛ̃̀ sĩ́ĩ́ le,

¹⁰áà gèè kélɛ̀, “Ƃí i ké lɛ́ i Dɛ́ɓò gbe ká ɓɛ. Ƃí i kéa, i pɛ séĩ́ lɛ́ lɛ kpeĩa dàa-gbe ká. I paà lɛ yɛ̀ì-yɛ́í wà kɛ-wɔ̃̀ yɔɔ kɛɛ̀ ká. Ìí ló tèáà ko Dàa-mì là zi kpeĩ ɓɛ kpɛ́nɛ̀ mɔ̀?

¹¹Ko Dàa-mì kɔ̀ lɛ i là dɔ́ ɓa ɓoa ká. I nyìɛ lɛ́ɛ̀ lo káà. Ìí ló lɛ̀ púlú gɛ̃̀ɛ̃̀ lúó zààle píé.” Nɔ́ zá lea, à nyìɛ là e tilɛ̀ gbaa lúé-lúé ká. E ló gbaa mi nàá sí, kɛ é à kɔ̀ kṹ é ló à ká.

¹²Lɛ̀ sɛ́lɛ́ wũ-là-mìa e wɔ̃́ lɛ́ e kɛɛ gɛ̃̀ɛ, e e zò dɔ Zízɛ̀ mɔ̀. À lé kpó-kpó paà e kɛá lɛ̀ lɛ́ e pɛ-zɔ̃̀ɔ̃̀-kɔ̀, lɛ́ à gbɛ̃̀ɛ̃̀ lɛ ko Dàa-mì mɔ̀ɔ gɛ̃̀ɛ ká.

¹³Pɔ́ɔ̀ nì o yà gɔɔ yí, o gó gbaa Péfɔ̀, wáà lò pɛ́lɛ lɛ́ ò si Pɔ́gà, lɛ́ lɛ sɛ́lɛ́ lɛ́ ò si Pã̀fílíyàa yía yí. Kɛɛ Zɔ̃̀ɔ̃́ e o tó gbaa yí, e ló e mɛ̀ĩ́ Zùlúsàlɛ̀.

¹⁴O gó gbaa Pɔ́gà, o ló o líé, o ɓɔ gbaa pɛ́lɛ lɛ́ ò si Ã́téɔ̀, lɛ́ lɛ sɛ́lɛ́ lɛ́ ò si Pìsílìàa yía yí. Lɛ̀ lɛ́ fĩ́ĩ́-dɔ-lùò e ɓɔ à mɔ̀ɔ, o ló Zúù-mìà zì Wálà-kà wì. O yà tã́ã̀.

¹⁵Lɛ̀ lɛ́ mia dò o nyɛ gbaa Móózè là Lɔ́ɔ̀ɔ dò, ɛ̃́ɛ̃́ dɔ̀-Wálà-lé-là-mìà wà kiia dò gèeè mɔ̀ɔ, Wálà-kà e kília wũ-là-mìà o wè-vɔ dɔ gbaa Pɔ́ɔ̀ nì ká weeá kélɛ̀, “Ko lèe-gé vɔ̀, é kɛ̀á mia fã̀ã́-wàà-wè nɔ́ɔ fé dò lɛ ka kɛ̀lɛ̀ɛ, lúó nɔɔ̀ lɛ ka lɛ̀ɛ à gèeè mɔ́ɔ̀ wɔ̃̀ mɔ̀.”

¹⁶Pɔ́ɔ̀ e wɛ̀lɛ̀ e dɔ. E e kɔ̀ vĩ́ ɓo, áà gèè, “M ɓɛ́ĩ̀ Éézɛ̀lɛ̀-mìà, ɛ̃́ɛ̃́ mia lɛ́ kà tùò Wálà lɛ̀ɛ, kà ka tóó dɔ.

¹⁷Éézɛ̀lɛ̀-mìà ko kéa, ko zì Wálà e ko dàa ye dàà nì sí, ɛ̃́ɛ̃́ e o kɛ o ɓo o yí, lúó lɛ́ o kɛá lɔ̀ɔ̀-mìà ká Ízè-sɛ̀lɛ̀ yía ká. Wálà e gó o ká Ízè à zì yíkɛ̀ gáàa kpànazɛ̀ ɓɛ ká.

¹⁸Kɛ̀ɛ̀ vũ̀ yììsɛ píéa, e o kɛ-wɔ̃̀ káá à ká e píé lɛ̀ lɛ́ wà ye nì o kɛ yɛ̀í làa ká.

¹⁹Wálà e kília e sɛ́lɛ́ kpolà sálápèèlɛ zɛ̀ yí sìè Kénà-sɛ̀lɛ̀ yí. Ɛ́ɛ̃́ e là mia nì kɛ sɛ́lɛ́ e kília dàa-mìà ká vɔ̀ kɛ̀ɛ̀ wũ yììsɛ là vũ̀ sɔ́ɔ́li píé.

²⁰“Lɛ̀ lɛ́ lúó e kília e diea, Wálà e mɛ̀ĩ́-sà ɓo-mìà nɔ o lɛ̀ɛ kɛ ó kɛ o là, é tóá kíli dɔ̀-Wálà-lé-là-mì lɛ́ ò si Sámìòa là lúó é ɓɔ à mɔ̀.

²¹Lɛ̀ lɛ́ o sɛ́lɛ́ líé-sí-mì dò pɛ̃́ Wálà mɔ̀ɔ, Wálà e gɔ̃ lɛ́ ò si Sɔ́ɔ̀, lɛ́ à dàa e kɛ Kéè ká, lɛ́ è go Bɛ̃́zímà sùu làa, nɔ o lɛ̀ɛ kɛ̀ɛ̀ vũ̀ yììsɛ mɔ̀.

²²Lɛ̀ Wálà e à ɓo kɛ̀-mia-là yɛ̀ɓo yía, Wálà e Dèɓé kɛ o líé-sí-mì ká. Wɔ̃́ lɛ́ Wálà a gèe é gbɛ̃̀á Dèɓé mɔ̀ɔ, gɛ̃̀ e ké. ‘Maà gɛ̃̀ gbaa kélɛ̀ Dèɓé lɛ́ à dàa lɛ Zɛ́sè káa, ye lɛ́ e mi lɛ́ à lià lɛ m lɛ̀ɛ káa. À ye lɛ́ e mi lɛ́ è lo wɔ̃́ séĩ́ lɛ́ m̀ nàà á kɛɛ, kɛɛ̀ɛ.’

²³E kɛ Dèɓé e kéa sùu-là-mìà doó-mì lɛ́ ò si Zízɛ̀ɛ ká, lɛ́ Wálà a kɛ Éézɛ̀lɛ̀-mìà La-mì ká, lɛ̀ zí aà e wè dɔ à káa lɛ́ ɓea.

²⁴Kɛ Zízɛ̀ é tĩã́ gbɛ̃̀ɛ̃̀ e kɛ-yɛ̀ɓo mɔ̀ɔ, Zɔ̃̀ɔ̃́ a gèe lòũ̀ ká Éézɛ̀lɛ̀-mìà séĩ́ lɛ̀ɛ kélɛ̀ ó o sɔ̃̀ɔ̃ yɔɔ mɛ́ vɔ̀ɔ, ɛ̃́ɛ̃́ ó o bàtáì kɛ.

²⁵Lɛ̀ Zɔ̃̀ɔ̃́ zì lúó e kɛ nyɛpìàa, a gèe míáa lɛ̀ɛ kélɛ̀, ‘Káà m gɛ̃̀ deĩ̀ ká? Ma wá mí è lo nuùa ká. Kɛɛ kà ka yɛ́lɛ́ kɛ yí, lɛ́ɛ̀ lo tóò m ko mɔ̀. Bɛ̀i wá bɛ̃̀ɛ̃ m mɔ̀ kɛ ḿ là bàá fèle ɓo à gã̀ mɔ̀.’

²⁶“M lèe-gé vɔ̀, yé lɛ́ ka Éɓɔ́lɔ́hã́ã̀ sùu-là-mìà ká, é dàá ka yé ka lɛ̀ɛ mɔ̀ɔ bà, lɛ́ kà tùò Wálà lɛ̀ɛ ɓɛ. Ko lɛ́ waà la-ɓo mɔ́ɔ̀ wè-vɔ e kéa vɔ ko píéa.

²⁷Ƃii mia lɛ́ o Zùlúsàlɛ̀, é dàá o wũ-là-mìà bàa, òó gbaa à dɔ mia La-mì ká. Ɛ́ɛ̃́ kɛ bɛ̃̀ɛ̃, ó dɔ̀-Wálà-lé-là-mìà wà wéé lɛ́ ò à gèe fĩ́ĩ́-dɔ-lùò séĩ́ káa, yí ma. É kɛ bɛ̃̀ɛ̃ kília, o wéé nì e kília kɛ o kɛ wɔ̃́ wánà zɛ̀ ká, mɛ̀ĩ́-sà lɛ́ wa káá Zízɛ̀ wĩĩ́a kolo là.

²⁸Yé bɛ̃̀ɛ̃ òó gbaa wɔ̃́ yɔɔ lɛ́ a kɛ, kɛ ó mɔ́ɔ̀ à zɛ ɓoa gɛ̃̀ɛ, wa gèe nɔ́ tĩã́ Pálɛ̀ lɛ̀ɛ kɛ ó à zɛ.

²⁹Lɛ̀ lɛ́ o wɔ̃́ séĩ́ lɛ́ Wálà kiia a gèe é gbɛ̃̀á à mɔ̀ɔ, o nyɛ à kɛɛ̀ mɔ̀ɔ, o à ɓeí gbaa kɔ́lɔ́sì mɔ̀, o ló wa bĩ̀ĩ̀.

³⁰Kɛɛ Wálà e à wɛ̀lɛ̀ ga kɛ̀lɛ̀.

³¹Lúó búnù-búnùzɛ̀ píéa, e ɓíé mia lɛ́ wà ye nì o gó Gálàlíì, lɛ́ o nu Zùlúsàlɛ̀ɛ là. Míá o kília, o gbaa à kélá ká Éézɛ̀lɛ̀-mìà bà.

³²Ko bɛ̃̀ɛ̃ ko gbaa zèe kɛ kó nu wɔ̃́ làṹ yièa ká ka lɛ̀ɛ. Wɔ̃́ lɛ́ Wálà e e wè dɔ à ká ko dàa ye dàà nì lɛ̀ɛ kélɛ̀ lɛ́ɛ̀ lo à kɛɛ̀ɛ,

³³aà à kɛ gbaa mia lɛ́ ko o zì sùu-là-mìà káa lɛ̀ɛ Zízɛ̀ wɛ̀lɛ̀-ga-kɛ̀lɛ̀ ká. Wéé e kéa bɛ̃̀ɛ̃ɛ̃̀ lɛ tã́ tò-ko-mɔ̀ zɛ̀ lɛ́ e Tã́-kiia yía bà. Wéé e kília lɛ́ e kélɛ̀, ‘I m Gbe ká. Maà kɛ gbaa i Dàa ká pɛ́nɛɛ.’

³⁴Wɔ̃́ lɛ́ Wálà a gèe, é gbɛ̃̀á à wɛ̀lɛ̀ a ɓo ga kɛ̀lɛ̀, lɛ́ à yɛ̀-zí-wɔ̃̀ wá ɓe kɛ é vúú gbaa mɔ̀ɔ gɛ̃̀ e ké. ‘Ḿm̀ lo lúà púlú wà à zò-dɔ̀à-mɔ̀ zɛ̀ lɛ́ m m wè dɔá Dèɓé lɛ̀ɛ, kpɔ́ɔ̀ ka mɔ̀.’

³⁵A gèe zeĩ́ Wálà kiia lɛ̀ dò mɔ̀ kélɛ̀, ‘Ìí ló à tóò kɛ mi lɛ́ lɛ i kɔ̀á káa é vúú.’

³⁶Wɔ̃́ lɛ́ Wálà a yà e gé kɛɛ Dèɓé á kɛɛ, Dèɓé e à kɛ à zì kɛ̀-à-yí lùò ká. Lɛ̀ e kɛ kília, e ga gbaa. O à bĩ̀ĩ̀ e dàa nì sɔ́nɔ́, ɛ̃́ɛ̃́ e vúú.

³⁷Kɛɛ mi yé Wálà e à wɛ̀lɛ̀ ga kɛ̀lɛ̀ɛ, lɛ̀ɛ́ gbaa vúú.

³⁸M lèe-gé vɔ̀, ka séĩ́ kà yí dɔ kélɛ̀ Zízɛ̀ tɔ́ yí zàá lɛ́ wɔ̃́ lɛ́ à gbɛ̃̀ɛ̃̀ lɛ mia kɛ-wɔ̃̀ yɔɔ ɓò-mia-wũ-mɔ̀ mɔ̀ɔ, lɛ́ à gèeè lɛ ka lɛ̀ɛ. Kà à yí dɔ kélɛ̀ mia séĩ́ lɛ́ ò o zò dɔ à mɔ̀ɔ, o laà lɛ kɛ-wɔ̃̀ yɔɔ kɛɛ̀ séĩ́ lɛ́ Móózè là Lɔ́ɔ̀ɔ lɛ̀ɛ́ bɛ̀i ka laà à kɛ̀lɛ̀ɛ kɛ̀lɛ̀.

³⁹

⁴⁰Yé mɔṹ lɛ kília, kà ka yɛ́lɛ́ kɛ ka dìè píé, yékɛ̀ wɔ̃́ lɛ́ dɔ̀-Wálà-lé-là-mìàa wa gèea, é kɛ ka ká. Wɔ̃́ wa gèea, gɛ̃̀ e ké.

⁴¹‘Mia lɛ́ ka nyìɛ fɔ̃́ɔ̃̀ lɛ wɔ̃́ yí e ké ɓɛ. Kà lɛ̀ gɛ̃̀. Kà ka zò gɔ̃́, káà gà. Ƃii m wɔ̃́ dò kɛpìà ka zì yìì e kéa yí. Lɛ wɔ̃́ lɛ́ kàá ló à gɛ̃̀ɛ̃̀ wánà káa ká, yé bɛ̃̀ɛ̃ mi gbɛɛ á yí fɛ̃̀ɛ̃-fɛ̃́ɛ̃́ ka lɛ̀ɛ ká.’ ”

⁴²Lɛ̀ lɛ́ Pɔ́ɔ̀ wà Bánábà o kɛ gópìà Zúù-mìà zì Wálà-kàa wìa, míáa o kpé kã́ o lɛ̀ɛ, kɛ ó nu o mɛ̀ĩ́ fĩ́ĩ́-dɔ-lùò yé è nua ká, kɛ ó wɔ̃́ nì e kília dò gèe zeĩ́ o lɛ̀ɛ.

⁴³Lɛ̀ mia séĩ́ o gó gbaa pà-kíe-mɔ̀ e kília mɔ̀ɔ, Zúù-mìà wà mia yé waà Zúù-mìà zì gbìnì-Wálà-lɛ̀ɛ kṹ o zɔ̃̀ɔ̃̀ káa, búnùzɛ̀ o tó Pɔ́ɔ̀ wà Bánábà o píé. O mɛ́ĩ́ ɓo míá o kília lɛ̀ɛ o fã̀ã́-wàà-wè ká kélɛ̀ ó kùnù Wálà zì zò-kɛ̀-sɛ̀ɛ mɔ̀ teele.

⁴⁴Lɛ̀ fĩ́ĩ́-dɔ-lùò gbɛɛ e ɓɔɔ, míá o kɛ pɛ́lɛɛ yía, o séĩ́ o nu kɛ ó o tóó dɔ Wálà là wééa mɔ̀. Kɛɛ o wɛ́lɛ́ ɓéĩ́ lɛ́ nɔ́ o tóa.

⁴⁵Lɛ̀ Zúù-mìà o mia kù sùua gɛ̃̀ɛ, o paà e kɛá dàa-gbe-là ká. O kɛ tèé dàpìà Pɔ́ɔ̀ ká, wáà à tɔ́ sì.

⁴⁶Kɛɛ Pɔ́ɔ̀ wà Bánábà o kɛ nɔ́ tĩã́ mɛ́ĩ́ ɓopìà nyìɛ-gágà-là ká weeá kélɛ̀, “E kɛ ko mɔ̀ kɛ kó Wálà là wééa gèe ka lɛ̀ɛ bèĩzɛ̀. Kɛɛ yé ka ka wũ ɓo à wìa, lɛ́ kàá gbaa ka dìè sí kpànazɛ̀ kɛɛ ká kɛ̀ɓe wɔ́lɔ́-wɔ́lɔ́ sɔ̀lɔ̀ ɓoa, kóò lo góò ka lɛ̀ɛ, tó ko kò ló ɓo sɛ́lɛ́ gbɛɛ yí-mìà píé.

⁴⁷Wɔ̃́ lɛ́ ko Dàa-mì aà gèe ko lɛ̀ɛ, gɛ̃̀ e ké. ‘Maà i yà kɛ í kɛ lɛ̀-fɔ̀nɔ-pɛ̀ ká sɛ́lɛ́ gbɛɛ yí-mìà lɛ̀ɛ, ɛ̃́ɛ̃́ kɛ í kɛ zi lɛ́ sɛ́lɛ́ séĩ́ è lo tóò à píé kɛ é la-ɓo sɔ̀lɔ̀ ɓoa ká.’ ”

⁴⁸Lɛ̀ lɛ́ sɛ́lɛ́ gbɛɛ yí-mìà o wɔ̃́ e kéa maa, o gé kpó-kpó e li, wáà ko Dàa-mì lé-wèa tɔ́ ɓɔ̀. Mia lɛ́ o síì e kɛá kɛ ó kɛ̀ɓe wɔ́lɔ́-wɔ́lɔ́ sɔ̀lɔ̀ ɓoa, o o zò dɔ Zízɛ̀ mɔ̀ gbaa.

⁴⁹Ko Dàa-mì lé-wèa e wɛ̃̀ĩ gbaa sɛ́lɛ́ e kília lɛ̀ séĩ́ mɔ̀.

⁵⁰Kɛɛ Zúù-mìàa o ló sɛ́lɛ́ɛ líé-sí-mìà, wà loà kpàna-kpànazɛ̀ lɛ́ ò gbìnì Wálà lɛ̀ɛ píé. O à kɛ o zò e dɔ e gã̀ mɔ̀. O gbɛ̃̀ gbaa Pɔ́ɔ̀ wà Bánábà o sã̀ dɔɔ̀ mɔ̀, o o lúó, o gó sɛ́lɛ́ e kília yí gbaa.

⁵¹Àpɔ́sɔ̀lɔ̀ vɔ̀ɔ o o gã̀ yí zɛ, kɛɛ mùnú lɛ́ e tó à mɔ̀ yia, kɛ é gó o gã̀ mɔ̀, kɛ é kɛ wɔ̃́ míáa wa kɛ àpɔ́sɔ̀lɔ̀ vɔ̀ɔ gbĩ mɔ̀ɔ gɔ̃̀á ká. Lɛ̀ e kɛ kília, o ló gbaa Àkónìà.

⁵²Tò-Zízɛ̀-píé-mìàa o paà e kɛá géli wà Gɛ̀ɛ̀ Púlú ká.