Read Yamano Àpɔ́sɔ̀lɔ̀ 15 Bible Online

Àpɔ́sɔ̀lɔ̀ 15 - Yamano bible

Àpɔ́sɔ̀lɔ̀ 15

¹Gɔ̃à gbṹũ̀ o gó Zùdíà, o nu Ã́téɔ̀. O gbɛ̃̀ gbaa, wáà pɛ zɔ̃̀ɔ̃̀ o ɓɛ́ĩ̀ Wálà-mìàa lɛ̀ɛ weeá kélɛ̀, “Wɔ̃́ lɛ́ Móózè aà zɔ̃̀ɔ̃̀ mɔ́ ko lɛ̀ɛ lɛ́ e kélɛ̀, lɛ ko mɔ̀ kó bɔ̃́ɔ̃́ sí. Yé ka bɛ̃̀ɛ̃ ka bɔ̃́ɔ̃́ síà wáa, bɛ̀i wá ka mɔ̀ kɛ ká la-ɓo sɔ̀lɔ̀ ɓo.”

²Pɔ́ɔ̀ wà Bánábà o kɛ à mɔ́ɔ̀ tèé kpó-kpó dàpìà o ká, ɛ̃́ɛ̃́ wà míáa o wúú sã́ã̀ e kɛá e kíe ká. Yé e kɛ kília, míáa wa yà o gé kɛɛ Pɔ́ɔ̀ wà Bánábà, ɛ̃́ɛ̃́ mia lɛ́ o kɛ Ã́téɔ̀ɔ dò ó ló Zùlúsàlɛ̀, kɛ ó ló àpɔ́sɔ̀lɔ̀ vɔ̀, ɛ̃́ɛ̃́ mia dìè-dìè vɔ̀ gɛ̃̀ɛ̃̀ wɔ̃́ e kília mɔ́ɔ̀ wɔ̃̀ mɔ̀.

³Wálà-mìàa o ló, o o dɔ zuú. Lɛ̀ o kɛ diepìà Fìnísìà wà Sɛ̀mɛ́lìàa, o zi lɛ́ sɛ́lɛ́ gbɛɛ yí-mìà waà nìá, wáà nù Wálà píéa, wɔ̃̀ gèe o lɛ̀ɛ. Wɔ̃́ e kéa gèeè e nu géli kpó-kpó ká o lèe-gé vɔ̀ lɛ́ o kɛ sɛ́lɛ́ o kília yía là.

⁴Lɛ̀ o ɓɔ Zùlúsàlɛ̀ɛ, Wálà-mìà wà àpɔ́sɔ̀lɔ̀ vɔ̀, ɛ̃́ɛ̃́ mia dìè-dìè vɔ̀ lɛ́ o kɛ yía, o o sɛ́nɛ́ ɓo. O wɔ̃́ lɛ́ wà Wálà nì wa kɛɛ séĩ́ gèe o lɛ̀ɛ.

⁵Kɛɛ Fálásíì-mìà yé waà o zò dɔ Zízɛ̀ mɔ̀ɔ, dò e kɛ yí. O wɛ̀lɛ̀ o dɔ wáà gèè, “Lɛ o mɔ̀ ó bɔ̃́ɔ̃́ sí, ɛ̃́ɛ̃́ lɛ à mɔ̀ ó gèe o lɛ̀ɛ ó Móózè là Lɔ́ɔ̀ɔ kṹ tã́ã̀.”

⁶Àpɔ́sɔ̀lɔ̀ vɔ̀ɔ wà mia dìè-dìè vɔ̀ɔ o pá o kíe mɔ̀ kɛ ó lɛ̀ gɛ̃̀ wɔ̃́ e kília yí.

⁷Lɛ̀ o wɔ̃́ɔ yí naa e kíe là ɓɛ̀lɛ̀-píé gbèĩ zɛ̀ɛ, Pílɛ̀ e wɛ̀lɛ̀ e dɔ, áà gèè, “M lèe-gé vɔ̀, káà yí dɔ Wálà aà m sí mɔ́ ka bà, kɛ ḿ wɔ̃́ lɛ́ wɔ̃́ làṹ yièa a gèea gèe sɛ́lɛ́ gbɛɛ yí-mìà lɛ̀ɛ, kɛ ó ma, ɛ̃́ɛ̃́ ó o zò dɔ Zízɛ̀ mɔ̀.

⁸Ɛ́ɛ̃́ Wálà lɛ́ è mia zò-píé-wɔ̃̀ dɔɔ, a zɔ̃̀ɔ̃̀ kélɛ̀ à kɔ̀ yàà lɛ sɛ́lɛ́ gbɛɛ yí-mìà wì, à zì Gɛ̀ɛ̀ Púlúa nɔ̀ o lɛ̀ɛ ká, lɛ̀ zí nɔ́ a nɔá ko lɛ̀ɛ lɛ́ ɓe.

⁹Wálà lɛ̀ɛ́ gbaa kò ye nì ko fĩ̀ã̀-ɓo-pɛ̀ gbɛɛ kɛ. E o zò píé kɛ é kɛ púlú, o zì zò-dɔ̀à-mɔ̀ kolo là zàá.

¹⁰Vũ gbííni lɛ́ ko dàa ye dàà nì, ɛ̃́ɛ̃́ ko dìè-tĩ́ kòó gbaa bɛ̀i à mɔ̀ kɛ kó sía, ka pɛ́nɛɛ à yàpìà tò-Zízɛ̀-píé-mìàa wĩĩ́. Mɛ́ e kɛ lɛ́ kà nàà ká Wálà yí dã́ zí e kéa ká ɓɛ?

¹¹Kɛɛ kóò gɛ̃̀ wánà ká kélɛ̀ ko Dàa-mì Zízɛ̀ zì zò-kɛ̀-sɛ̀ɛ lɛ́ e ko laa, zí nɔ́ doóa lɛ́ e o bɛ̃̀ɛ̃ o la à káa.”

¹²Mia séĩ́ lɛ́ o kɛ yía, o lɛ̀à gaà e kɛá, wáà o tóó dɔ̀ Bánábà wà Pɔ́ɔ̀ o mɔ̀. O kɛ wɔ̃́ lé-pa zɛ̀, wà à kpàlézɛ̀ lɛ́ Wálà aà kpɔ́ o yí zàá, lɛ́ aà kɛ sɛ́lɛ́ gbɛɛ yí-mìà fĩ̀ã̀a, wɔ̃̀ gèepìà o lɛ̀ɛ.

¹³Lɛ̀ o nyɛ mɛ́ĩ́ ɓoò mɔ̀ɔ, Zĩ́ĩ̀ a gèe kélɛ̀, “M lèe-gé vɔ̀, kà ka tóó dɔ m mɔ̀.

¹⁴Wálà aà ɓɔ bèĩzɛ̀ ɓo gbaa sɛ́lɛ́ gbɛɛ yí-mìà mɔ̀, kɛ é mia sí o bà, kɛ ó kɛ à dìè-tĩ́ là mia nì ká. Wɔ̃́ lɛ́ Sáímɔ̀ a gèe nɔ́ kɔa lɛ̀ɛ dɛɛ káa, lɛ́ ɓɛ.

¹⁵Wɔ̃́ lɛ́ dɔ̀-Wálà-lé-là-mìàa wa gèea, à gèeè yía o wéé wɔ̃́ nì e kéa mɔ̀. Zi lɛ́ à bɛ̃̀ɛ̃ɛ̃̀ lɛ à ká Wálà là kiia yía, gɛ̃̀ e ké.

¹⁶‘Yé wɔ̃́ yé e kéa aà diea, ḿm̀ lo yɛ́ɛ̀ m zí. Ɛ́ɛ̃́ ḿm̀ lo Dèɓé là ká lɛ́ à wíà lɛ tã́ã̀a dɔɔ̀. Ḿm̀ lo là ká wíàa zɛ̀ e kília dɔɔ̀ zeĩ́. Ḿm̀ lo à wɛ̀lɛ̀ e dɔ e gã̀ mɔ̀.

¹⁷Ɛ́ɛ̃́ mia yé o tóa, óò lo ko Dàa-mì naà. Míá o kília o lɛ́ o sɛ́lɛ́ gbɛɛ yí-mìà séĩ́ lɛ́ maà o súo kɛ, kɛ ó kɛ m dìè-tĩ́ m̀ mia nì káa káa.

¹⁸Ko Dàa-mì lɛ́ e wɔ̃́ e kéa kɛ mɔ́ mia yí-dɔ-wɔ̃̀ káa, zí a gèe à káa, lɛ́ ɓɛ.’

¹⁹“À mɔ́ɔ̀ wɔ̃̀ mɔ̀ɔ, m zì yɛ́lɛ́-táá lɛ́ e kélɛ̀, sɛ́lɛ́ gbɛɛ yí-mìà lɛ́ o nìɛ̀pìà wáà nù Wálà píéa, yékɛ̀ kó o fɔ̃̀ã̀-fɔ̃́ã́ kɛ.

²⁰Kɛɛ lɛ kɔa mɔ̀ kɔ́á kii bɛ̃̀ɛ̃ o píé, kɔ́áà gèè o lɛ̀ɛ, léɓèlè lɛ́ ye wá sɛ̀ ɓèlè wɛ̃́ĩ̀, ɓii à kóná ɓoò lɛ kɛ̀ɛ̀-wɛ́lɛ́ mɔ̀ɔ mɔ́ɔ̀ wɔ̃̀ mɔ̀ɔ, yékɛ̀ ó à ɓèlè. Ɛ́ɛ̃́ zeĩ́, kɔ́á gèe o lɛ̀ɛ ó o dìè ɓo sɔ̃̀ɔ̃ yɔɔ kɛɛ̀ bà. Ɛ́ɛ̃́ yékɛ̀ ó wìì nɔ́ɔ fé lɛ́ wa kṹ e kpɛí lɛ́ e gaa ɓèlè. E bɛ̀i, yékɛ̀ ó léà nɔ́ɔ fé dò ɓèlè.

²¹Ƃii waà Móózè là Lɔ́ɔ̀ɔ gèe ɓɛ̀lɛ̀-píé gbèĩ zɛ̀ Zúù-mìà zì Wálà-kà wì fĩ́ĩ́-dɔ-lùò nɔ́ɔ séĩ́ ká. Ɛ́ɛ̃́ óò à zì wééa gèe pɛ́lɛ séĩ́ yí.”

²²Yé e kɛ kília àpɔ́sɔ̀lɔ̀ vɔ̀ɔ wà mia dìè-dìè vɔ̀ɔ, ó dàá Wálà-mìà séĩ́ bàa, wa yà o gé kɛ ó gɔ̃à dò sí o bà, kɛ ó o vɔ, kɛɛ wà Pɔ́ɔ̀ ɛ̃́ɛ̃́ Bánábà nì ó ló Ãtéɔ̀. O Zúdà lɛ́ ò si Bàsábàa, wà Sálɛ̀ o sí. Gɔ̃à pèèlɛ o kéa ɓɛ̀lɛyà nɔɔ̀ e kɛá o lɛ̀ɛ o ɓɛ́ĩ̀ Wálà-mìà bà.

²³O kii e kéa nɔ o lɛ̀ɛ. Kíí e kília yí-wè gɛ̃̀ e ké. “Mia lɛ́ ko àpɔ́sɔ̀lɔ̀ vɔ̀, e bɛ̀i mia dìè-dìè vɔ̀, lɛ́ ko ka lèe-gé vɔ̀ káa, kóò wèè ko lèe-gé vɔ̀ yé ka sɛ́lɛ́ gbɛɛ yí-mìà ká, lɛ́ ka Ã́téɔ̀ ɛ̃́ɛ̃́ Sílìà, e bɛ̀i Sìlísìàa, ka bà.

²⁴Kɔaà à ma kélɛ̀ ko dò o gó ko bà o nu ka píé, o ka zò ɓò ka gé wɔ̃̀, e bɛ̀i, o ka lè píé lò gbèĩ wɔ̃̀ gèe. Ó kɛ bɛ̃̀ɛ̃ kília, ko wáá ká kɛ kó gèe o lɛ̀ɛ ó kɛ.

²⁵À mɔ́ɔ̀ wɔ̃̀ mɔ̀ɔ, kɔaà ko kíe gɛ̃̀, ɛ̃́ɛ̃́ ko séĩ́ kɔaà wéé à mɔ̀ kɛ kó nɛ́ vɔ ka píé. Míá o kília wà mia lɛ́ o lɔ̀ kpɔ́ɔ̀ lɛ ko mɔ̀, lɛ́ o Bánábà wà Pɔ́ɔ̀ o káa, lɛ́ wà ye nì ò lo nuùa.

²⁶Bánábà wà Pɔ́ɔ̀ lɛ́ òó gbaa kpàa o dìè ga-wɔ̃̀ wɛ̃́ĩ̀ ko Dàa-mì Zízɛ̀ Kɛ́lɛ̀ì mɔ́ɔ̀ wɔ̃̀ mɔ̀ɔ.

²⁷Ko gbaa Zúdà wà Sálɛ̀ o vɔpìà ka píé. Óò lo wéé nɔ́ doó lɛ́ à bɛ̃̀ɛ̃ɛ̃̀ lɛ e kéa gèeè ka lɛ̀ɛ.

²⁸Kò Gɛ̀ɛ̀ Púlú nì kɔaà wéé à mɔ̀ kélɛ̀ yékɛ̀ kó vũ gbííni gbɛɛ yà ka wĩĩ́. Wɔ̃́ nɔ́ kò lo à yàà ka wĩĩ́ ká kɛɛ, lɛ́ lɛ wɔ̃́ lɛ́ lɛ kɛ-wɔ̃̀ káa káa. O lɛ́ o kélɛ̀,

²⁹yékɛ̀ ká léɓèlè nɔ́ɔ fé lɛ́ à kóná ɓoò lɛ kɛ̀ɛ̀-wɛ́lɛ́ mɔ̀ɔ ɓèlè. Yékɛ̀ ká léà nɔ́ɔ fé dò ɓèlè. E bɛ̀i, yékɛ̀ ká wìì nɔ́ɔ fé lɛ́ wa kṹ e kpɛí lɛ́ e gaa ɓèlè. Ɛ́ɛ̃́ ká ka dìè ɓo sɔ̃̀ɔ̃ yɔɔ kɛɛ̀ bà. Ká ka dìè ɓòá wɔ̃́ nì e kéa kɛɛ̀ bàa, káà lo kɛɛ̀ wɔ̃́ kpeĩ kɛ-mìà ká. Kɔa làa píé-èé.”

³⁰Lɛ̀ e kɛ kília, o vɔ-mìàa gã̀ bìnì zi là, wáà lò Ã́téɔ̀. Lɛ̀ o ɓɔ yía, o Wálà-mìà séĩ́ pá o kíe mɔ̀. O kíí e kília nɔ gbaa o lɛ̀ɛ.

³¹Lɛ̀ míáa o kíía gèea, mia fã̀ã́-wàa-wè lɛ́ e kɛ kíía yía, a kɛ o gé áà lì.

³²Zúdà wà Sálɛ̀ o kɛ dɔ̀-Wálà-lé-là-mìà ká. O mia fã̀ã́-wàà-wè búnùzɛ̀ gèe o ɓɛ́ĩ̀ Wálà-mìà lɛ́ o kɛ yía lɛ̀ɛ, tó wáà o mɛ́ kɛ̀ gágà.

³³Lɛ̀ o ɓo ɓéĩ́ ɓo yí pèèlɛɛ, o ɓɛ́ĩ̀ Wálà-mìà o o vɔ gbaa o mɛ̀ĩ́ zò-yà-gé yí, wáà lò mia lɛ́ o o vɔɔ píé. [

³⁴Kɛɛ Sálɛ̀ a yà e gé é tó yi.]

³⁵Pɔ́ɔ̀ wà Bánábà o tó Ã́téɔ̀ lúó zààle píé. Wà mia búnù-búnùzɛ̀ o pɛ zɔ̃̀ɔ̃̀ mia lɛ̀ɛ, ɛ̃́ɛ̃́ wáà ko Dàa-mì lé-wèa gèè.

³⁶Lɛ̀ à lɛ̀ e ɓo pèèlɛɛ, Pɔ́ɔ̀ a gèe Bánábà lɛ̀ɛ, “Kò lo ko mɛ̀ĩ́ kó ló ɓɔɔ̀ ko lèe-gé vɔ̀ lɛ́ kɔaà ko Dàa-mì lé-wèa gèe o lɛ̀ɛ píé sɛ́lɛ́ séĩ́ lɛ́ kɔaà à gèe à yía yí, kɛ kó zi lɛ́ o à ká gbaa dɔ.”

³⁷Bánábà a naa kɛɛ wà Zɔ̃̀ɔ̃́ Máà nì ó ló.

³⁸Kɛɛ Pɔ́ɔ̀ lɛ̀ɛ́ gbaa à gɛ̃̀ wánà ká kɛ ó ló à ká, ɓii aà o tó do Pã̀fílíyà. Lɛ̀ɛ́ gbaa à naa kɛ é tó o píé yɛɓoa líé-nyɛ-lùò é ɓɔ.

³⁹Pɔ́ɔ̀ wà Bánábà o wéé ɓéĩ́ kṹ o kíe nì lé. E à kɛ, o o fĩ̀ã̀ ɓo gbaa. Lɛ̀ e kɛ kília, Bánábà e Máà sí, wà ye o yà gɔɔ yí, wáà lò Sápà.

⁴⁰Kɛɛ Pɔ́ɔ̀ e Sálɛ̀ sí. O ɓɛ́ĩ̀ Wálà-mìàa o o nɔ ko Dàa-mì lɛ̀ɛ, kɛɛ à zì zò-kɛ̀-sɛ̀ɛ é kɛá o píé. Yé e kɛ kília, o ló gbaa.

⁴¹Pɔ́ɔ̀ nì o ló gbaa Sílìà ɛ̃́ɛ̃́ Sìlísìà, wáà lò Wálà-mìà lɛ́ o yí píéa, mɛ́ kɛ̀á sí gágà.