Read Yamano Àpɔ́sɔ̀lɔ̀ 17 Bible Online

Àpɔ́sɔ̀lɔ̀ 17 - Yamano bible

Àpɔ́sɔ̀lɔ̀ 17

¹O ló o die Ãfípólè ɛ̃́ɛ̃́ Apàlónìà. O ló gbaa o ɓɔ Tɛsàlònákà. Zúù-mìà zì Wálà-kà e kɛ lɛ̀ e kília mɔ̀.

²Pɔ́ɔ̀ e ló Zúù-mìà zì Wálà-kà e kília wì, ɓii e kɛ à zì wɔ̃́ kɛ-kɔ̀ ká e zì kɛ̀ɓe là. E kɛ yí fĩ́ĩ́-dɔ-lùò yààka píé, áà pɛ zɔ̃̀ɔ̃̀ míá o kɛ yía o lɛ̀ɛ, áà gbɛ̃̀á wɔ̃́ lɛ́ lɛ Wálà là kiia yía mɔ̀.

³E kɛ wɔ̃́ e kília yí fɛ̃̀ɛ̃-fɛ̃́ɛ̃́pìà o lɛ̀ɛ, áà o sì, áà wɔ̃́ zɔ̃̀ɔ̃̀ à ká kélɛ̀ e kɛ Kɛ́lɛ̀ì mɔ̀ kɛ é wɔ̃́ nyɔ́ɔ̀ɔ gɛ̃̀, ɛ̃́ɛ̃́ kɛ é wɛ̀lɛ̀ ga kɛ̀lɛ̀. A gèe kélɛ̀, “Zízɛ̀ lɛ́ m̀ à wɔ̃̀ gèe e kéa, à ye lɛ́ lɛ Kɛ́lɛ̀ì káa.”

⁴Mia gbṹũ̀ o à wéè gɛ̃̀ wánà ká. O dà gbaa Pɔ́ɔ̀ wà Sálɛ̀ o bà. Gílíì-mìà lɛ́ ò gbìnì Wálà lɛ̀ɛ, o kù gbùò zɛ̀, é dàá loà dìè-dìè búnùzɛ̀ bàa, o wɔ̃́ nɔ́ doóa kɛ.

⁵Kɛɛ dàa-gbe-là e kɛ Zúù-mìà yí. À mɔ́ɔ̀ wɔ̃̀ mɔ̀ɔ, o mia lɛ́ o kɛ nɔ́ ɓɔ̀ɔ o dìè kɔ̀ mɔ̀, wáà dìè dìèá sí nɔ́ ɓɔ̀ɔ, o o pá o kíe mɔ̀. O à kɛ pɛ́lɛ e kília yí-mìà séĩ́ zò e dɔ e gã̀ mɔ̀. O ló, o gèlè gbini Zésĩ̀ là ká mɔ̀. O kɛ Pɔ́ɔ̀ wà Sálɛ̀ o naapìà kɛ ó nu o ká míáa píé.

⁶Kɛɛ lɛ̀ òó gbaa Pɔ́ɔ̀ nì gɛ̃̀ɛ, o Zésĩ̀ wà e ɓɛ́ĩ̀ Wálà-mìà dò o gã́ã́ tã́ã̀, wáà lò o ká pɛlɛí dɔ-mìà píé, wáà gbɛ̀ɛ̀ weeá kélɛ̀, “Míá o kéa waà kpóṹ là gbɛ̃̀ e to ká. Waà nu dɛɛ ká gbaa ko pà zèe.

⁷Ɛ́ɛ̃́ Zésĩ̀ lɛ́ à o wɔ̀lɔ̀ kpɔ́ɔ̀ lɛɛ. O séĩ́-séĩ́ o Sízà là lɔ́ɔ̀ɔ sìèpìà. Óò à gèe kélɛ̀ sɛ́lɛ́ líé-sí-mì dò lɛ zeĩ́ ɓe. À tɔ́ lɛ́ Zízɛ̀.”

⁸Wɔ̃́ nì e kéa gèeè yía, e à kɛ sɛ́lɛ́ yí-mìà séĩ́ wà pɛlɛí dɔ-mìà nì o zò e kĩ́ã́ gbaa.

⁹Pɛlɛí dɔ-mìàa o Zésĩ̀ wà e ɓɛ́ĩ̀ nì o kɛ o pɛlèe dò nɔ kɛ ó kã́ o mɔ̀. Yé e kɛ kília, o gó gbaa o mɔ̀, o wà ló ɓo.

¹⁰Lɛ̀ bĩ́ e mí nɔ́ɔ, Wálà-mìà o Pɔ́ɔ̀ wà Sálɛ̀ o vɔ Bòlíà. Lɛ̀ o ɓɔ yía, o ló Zúù-mìà zì Wálà-kàa wì.

¹¹Míá o kɛ yía, o zò píé lé ɓoò e kɛá, é dieá mia yé o kɛ Tɛsàlònákàa là. O o tóó dɔ wɔ̃́ làṹa mɔ̀ pɛ dã́ zì píé. Lúó séĩ́-séĩ́ káa, o kɛ Wálà kiia yí naapìà kɛɛ é kɛ̀á wɔ̃́ lɛ́ Pɔ́ɔ̀ e kɛ à gèepìàa lɛ wánà káa, kɛ ó à yí dɔ.

¹²À mɔ́ɔ̀ wɔ̃̀ mɔ̀ɔ, o búnùzɛ̀ o o zò dɔ Zízɛ̀ mɔ̀. Gílíì loà kpàna-kpànazɛ̀ búnùzɛ̀ wà à gɔ̃à búnùzɛ̀ o o zò dɔ Zízɛ̀ mɔ̀ nɔ́ kíli.

¹³Kɛɛ lɛ̀ Zúù-mìà lɛ́ o kɛ Tɛsàlònákàa, wa ma kélɛ̀ Pɔ́ɔ̀ aà Wálà lé-wè gèe Bòlíà bɛ̃̀ɛ̃ mɔ̀ɔ, o nu yí, o gbɛ̃̀ gbaa wáà míáa wũ-kèlè yí-sìè-wɔ̃̀ gèè o lɛ̀ɛ, kɛɛ ó gèlè gbini Pɔ́ɔ̀ nì mɔ̀.

¹⁴Lɛ̀ e kɛ nɔ́ kília, Wálà-mìàa o Pɔ́ɔ̀ vɔ yíí sɔ́nɔ́. Kɛɛ Sálɛ̀ wà Témɔ́tè o tó Bòlíà.

¹⁵Mia lɛ́ o kɛ lópìà Pɔ́ɔ̀ káa, wà ye nì o ló, o ɓɔ Átɛ̃̀. Lɛ̀ e kɛ kília, o yɛ́ o zí. Pɔ́ɔ̀ e wè-vɔ dɔ o ká, áà gèè, “Sálɛ̀ wà Témɔ́tè ò nu m píé dɛɛ ká.”

¹⁶Lɛ̀ Pɔ́ɔ̀ e kɛ yàá Sálɛ̀ wà Témɔ́tè o gɛ̀nɛ̀ Átɛ̃̀a, à zò e kɛ wàapìà à gé lɛ̀ a gɛ̃̀ lɛ́ Átɛ̃̀ paà e kɛá kɛ̀ɛ̀-wɛ́lɛ́ káa mɔ́ɔ̀ wɔ̃̀ mɔ̀.

¹⁷À mɔ́ɔ̀ wɔ̃̀ mɔ̀ɔ, wà Zúù-mìà ɛ̃́ɛ̃́ sɛ́lɛ́ gbɛɛ yí-mìà lɛ́ ò gbìnì Wálà lɛ̀ɛ, o wéé dò gèe Zúù-mìà zì Wálà-kàa wì. E bɛ̀i, Pɔ́ɔ̀ wà mia nì lɛ́ ò nu vɔ̀ lɔ́ɔ́ gbéĩ́a, wà ye nì o kɛ wɔ̃́ gèepìà lúó séĩ́ ká.

¹⁸Pɛ-zɔ̃̀ɔ̃̀-mìà dò, yé ò o si Ɛpìkélìà wà Sólówè-mìàa, wà Pɔ́ɔ̀ nì o mɛ́ĩ́ ɓo o kíe là nɔ́ kíli. Mia dò wa gèe, “Mɛ́ lé-gbùò-là kɛ-mì fèle e kéa bɛ̃̀ɛ̃ è à nàà á gèe ɓɛ?” Mia dò bɛ̃̀ɛ̃ wáà gèè, “Lɛ́ɛ̀ kɛ̀ lɛ̀ pɛ lɛ́ lɛ wɔ̃́ gèepìà é gbɛ̃̀á sɛ́lɛ́ gbɛɛ yí-mìà wà wálà vɔ̀ mɔ̀.” O wɔ̃́ e kéa gèe píé kíli, ɓii Pɔ́ɔ̀ e kɛ Zízɛ̀ wà wɛ̀lɛ̀-ga-kɛ̀lɛ̀ wɔ̃̀ gèepìà.

¹⁹À mɔ́ɔ̀ wɔ̃̀ mɔ̀ɔ, o Pɔ́ɔ̀ sí, o ló à ká wà mɛ́ĩ́ ɓo-pìà lɛ́ ò si Awèlèápogàa lɛ̀ mɔ̀. Wa gèe kélɛ̀, “Kóò nàà kó pɛ-zɔ̃̀ɔ̃̀-kɔ̀ dɛɛ lɛ́ ɓà zɔ̃̀ɔ̃̀ e kéa yí ma.

²⁰Wɔ̃́ lɛ́ ɓà gèea lɛ wɔ̃́ kòó ma doa ká. Kóò lo à naà kɛ kó à yí ma.”

²¹Ƃii mia séĩ́ lɛ́ ò go Átɛ̃̀, ɛ̃́ɛ̃́ zeĩ́ sɛ́lɛ́ gbɛɛ yí-mìà lɛ́ wà ye nì o yía, óò o zì lúó kàà tã́ã̀, wáà wɔ̃́ dɛɛ dɛɛ lɛ́ lɛ kɛpìàa gèè, wáà mà.

²²Pɔ́ɔ̀ e dɔ e gã̀ mɔ̀ mɛ́ĩ́ ɓo-pìà lɛ́ ò si Awèlèápogàa zèí, áà gèè, “Mia lɛ́ ka Átɛ̃̀-mìà ká ɓɛ. Lɛ̀ m̀ gɛ̃̀ɛ, ka gbìnì wálà vɔ̀ lɛ̀ɛ mìà ká zi séĩ́ ká.

²³Ƃii lɛ̀ m ló tàá sí kà pɛ́lɛɛ yí, tó máà lɛ̀ lɛ́ kà gbìnì wálà vɔ̀ lɛ̀ɛ gɛ̃̀ píéa, m sálà-ɓòà-là-pɛ̀ dò gɛ̃̀ yi. Pɛ dò bɛ̃̀ɛ̃ɛ̃̀ e kɛá à mɔ̀. Pɛ́ e kília lɛ́ e kélɛ̀, ‘À yé e kéa, lɛ Wálà lɛ́ kòó dɔɔ là pɛ ká.’ À yé lɛ́ kà gbìnì à lɛ̀ɛ yí, yé bɛ̃̀ɛ̃ kàá à dɔɔ káa, lɛ́ m̀ à wɔ̃̀ gèe ka lɛ̀ɛ ɓɛ.

²⁴Wálà lɛ́ e kpóṹ là zèe, wà pɛ séĩ́ lɛ́ e à yía kɛɛ, lɛ lɛ̀í-sɛ̀lɛ̀ wà kpóṹ là zèe Dàa-mì ká. Lɛ̀ɛ́ kɛ ká lɛ́ mi à dɔɔ wì.

²⁵Ɛ́ɛ̃́ pɛ lɛ́ gɔ̃ è yɛɓo kɛ̀ à wɛ̃́ĩ̀a, à zò wá à mɔ̀, kɛ á nɔ à lɛ̀ɛ. Ƃii à ye lɛ́ è kɛ̀ɓe wà mi wúú, e bɛ̀i pɛ séĩ́ nɔ mi lɛ̀ɛ.

²⁶Wálà e mia kpóló kɛ-kɔ̀ gbɛɛ̀ gbɛɛ zɛ̀ɛ kɛ gɔ̃ doó yí. E o kɛ, o o yàlà kṹ kpóṹ là zèe lɛ̀ séĩ́ mɔ̀. Wálà e pɛ séĩ́ kɛ bèĩzɛ̀. E lúó lɛ́ ò lo kɛɛ̀ à ká ɓea kpɔ́. Ɛ́ɛ̃́ e lɛ̀ lɛ́ ò lo kɛɛ̀ yia nàà dɔ.

²⁷E à kɛ kíli, kɛ ó à naa. Ɛ́ɛ̃́ kɛ ó à nàáa, ó à gɛ̃̀ lèĩ, yé waà kɛ gìli-gílípìà à naà káa ká. É kɛ bɛ̃̀ɛ̃ kília, Wálà wá ko dò nɔ́ɔ fé ká gbèĩ.

²⁸Ƃii, ‘Ko ɓéèe, ɛ̃́ɛ̃́ kóò tàà, e bɛ̀i, ko ɓe à yí zàá.’ Kà pĩ̀ã̀ bɛ̃̀ɛ̃-mìàa dò waà wɔ̃́ e kéa dò gèe do. Wa gèe kélɛ̀, ‘Ko vɔ̀ɔ ko nɔ́ là nɔ́ɔ̀ ká kíli.’

²⁹Lɛ̀ zí ko à ká Wálà là nɔ́ɔ̀ káa, yékɛ̀ kó à gɛ̃̀ ɓɔ̀ɔ kélɛ̀ Wálà lɛ kélɛ̀ kɛ̀ɛ̀-wɛ́lɛ́ lɛ́ ɓe. Mia zì gíkã́ wà o zì wɔ̃́ kɛ-kɔ̀ lɛ́ è à kɛ̀, lɛ́ kɛ̀ɛ̀-wɛ́lɛ́ vɔ̀, lɛ́ ò o kɛ̀ góò, sévà, ɛ̃́ɛ̃́ gɛ̀lɛ̀ káa è kɛ̀ sɛ̀ɛ.

³⁰Lúó lɛ́ mia òó kɛ wɔ̃́ gbɛɛ yí dɔpìà à káa, Wálà e vɔ lúó e kília zì. Kɛɛ dɛɛ káa, lɛ́ɛ̀ à gèe mia séĩ́ lɛ́ o lɛ̀ séĩ́ mɔ̀ɔ lɛ̀ɛ, ó o sɔ̃̀ɔ̃ yɔɔ mɛ́ vɔ̀ɔ.

³¹Ƃii aà lúó lɛ́ è lo mɛ̀ĩ́-sà dɔɔ̀ à ká kpeĩ le kpóṹ là zèe mìà séĩ́ mɔ̀ɔ kpɔ́. Lɛ́ɛ̀ lo kpɔ́ɔ̀ mi lɛ́ aà sía yí zàá, tó a kɛ. Aà zɔ̃̀ɔ̃̀ mia séĩ́ lɛ̀ɛ kélɛ̀ wɔ̃́ e kéa lɛ́ɛ̀ lo kɛɛ̀ wánà ká mí e kília wɛ̀lɛ̀-ga-kɛ̀lɛ̀ ká.”

³²Lɛ̀ o mi wɛ̀lɛ̀-ga-kɛ̀lɛ̀ wɔ̃̀ ma Pɔ́ɔ̀ léa, o dò o gbɛ̃̀ wáà yéí sì Pɔ́ɔ̀ mɔ̀. Mia dò bɛ̃̀ɛ̃ wa gèe kélɛ̀, “Kóò nàà kó wɔ̃́ lɛ́ ɓa gèea dò ma zeĩ́ lúó gbɛɛ ká.”

³³Lɛ̀ e kɛ kília, Pɔ́ɔ̀ e gó gbaa o bà.

³⁴Gɔ̃à gbṹũ̀ o dà gbaa Pɔ́ɔ̀ píé. O o zò dɔ gbaa Zízɛ̀ mɔ̀. Míá o kɛ o bàa dò tɔ́ lɛ́ Dàɔ́nɛ́sè, lɛ́ e kɛ mɛ́ĩ́-ɓo-mì ká Awèlèápogàa, ɛ̃́ɛ̃́ lee lɛ́ ò si Dùmálàa. Ɛ́ɛ̃́ mia gbɛɛ̀ gbɛɛ o kɛ nɔ́ yi kíli.