Read Yamano Àpɔ́sɔ̀lɔ̀ 22 Bible Online

Àpɔ́sɔ̀lɔ̀ 22 - Yamano bible

Àpɔ́sɔ̀lɔ̀ 22

¹“Gɔ̃à lɛ́ ka m ɓɛ́ĩ̀ ye-mìà nì, ɛ̃́ɛ̃́ m dàa nì káa, kà ka tóó dɔ m dìè ɓò-wɔ̃́-yí-wɔ̃̀ lɛ́ m̀ lo à gèeè ka lɛ̀ɛ mɔ̀.”

²Lɛ̀ míáa o Pɔ́ɔ̀ gɛ̃̀, áà mɛ́ĩ́ ɓò o lɛ̀ɛ Hííbúlù-wè yía, a kɛ o o lɛ̀à ga dĩĩ le. Pɔ́ɔ̀ a gèe zeĩ́ kélɛ̀,

³“Zúù mi lɛ́ e m ká. O m ye Táásà lɛ́ e Sìlísìàa mɔ̀. Kɛɛ o m tòlò Zùlúsàlɛ̀ zèe. Gɔ̀mélìà e kɛ pɛ zɔ̃̀ɔ̃̀ m lɛ̀ɛ mì ká. E ko kpɔ́ ko dàa ye dàà nì wà Lɔ́ɔ̀ɔ kɛɛ̀ ká kpeĩ le. M fã̀ã́-wàà e kɛá Wálà mɔ́ɔ̀ wɔ̃̀ mɔ̀ lɛ̀ zí nɔ́ ka séĩ́ ka à ká pɛ́nɛɛ lɛ́ ɓe.

⁴Mia lɛ́ ò to Zí e kéa píéa, m kɛ o sã̀ dɔpìà o zɛ-zì píé. M gɔ̃à wà loà nì o kṹ, máà o dùò bĩ́-kɛ̀ì.

⁵Sálà-ɓò-Wálà-mɔ̀-mìà wũ-là-mìa, ɛ̃́ɛ̃́ Zúù-mìà zì mia dìè-dìè vɔ̀ óò bɛ̀i à mɔ̀ ó à kélá-wè ɓo. O kii nɔ m lɛ̀ɛ, kɛ ḿ ló o ká ko ɓɛ́ĩ̀ Zúù-mìà lɛ́ o kɛ Dùmásàa píé. À mɔ́ɔ̀ wɔ̃̀ mɔ̀ɔ, m ló yi kɛ ḿ mia lɛ́ o kɛ tópìà Zí e kéa píéa, kɛ ḿ ɓɛ̀lɛ̀ yà o dĩ́ ḿ nu o ká Zùlúsàlɛ̀ kɛ ó wɔ̃́ nyɔ́ɔ̀ɔ gɛ̃̀.

⁶“Lɛ̀ m gbɛ̃̀ zuú máà lò Dùmásà ká kɔ̀ɛ́ɛ, nɔ́ zá lea, lɛ̀-fɔ̀nɔ-kɔ̀ púlú kpó-kpó dò e gó lɛ̀í, e lɛ̀ fɔ̀nɔ m bà nyɛ́nɛ-dɔ̀-mia-tùluù-lùò ká.

⁷M dà tã́ã̀, m wéé dò ma, áà mɛ́ĩ́ ɓò m lɛ̀ɛ weeá kélɛ̀, ‘Sɔ́ɔ̀, Sɔ́ɔ̀, mɛ́ e kɛ lɛ́ ì m sã̀ dɔ ɓe?’

⁸Lɛ̀ e kɛ kília, ma yí zṹ weeá kélɛ̀, ‘Dé e i ká, m Dàa-mì?’ E à gèe m lɛ̀ɛ, ‘Ma Zízɛ̀ lɛ́ è go Názàlɛ̀, lɛ́ ì à sã̀ dɔɔ lɛ.’

⁹Mia lɛ́ o kɛ m píéa o lɛ̀-fɔ̀nɔ-kɔ̀ɔ gɛ̃̀, kɛɛ òó gbaa mi lɛ́ e kɛ wɔ̃́ gèepìà m lɛ̀ɛ wéè ma.

¹⁰Ma gèe kélɛ̀, ‘Ḿ kɛ̀ mɔṹ kpɛ, m Dàa-mì?’ Ko Dàa-mì a gèe m lɛ̀ɛ, ‘Ì wɛ̀lɛ̀, í ló Dùmásà. À lɛ̀ mɔ̀ lɛ́ wɔ̃́ séĩ́ lɛ́ Wálà aà yà e gé ɓá kɛɛ, ò lo à gèeè i lɛ̀ɛ yía.’

¹¹Lɛ̀-fɔ̀nɔ-kɔ̀ e kília zì ɓí-kɔ̀ɔ e m nyìɛ káá. Lɛ̀ e kɛ kília, m ɓɛ́ĩ̀ nì lɛ́ kò ye nì ko kɛ lópìàa, o o kɔ̀ dà gbaa m zì, o ló gbaa m ká Dùmásà.

¹²“Gɔ̃ doó e kɛ yí, wáà sì Ánànáyà. E kɛ mí è gbìnì Wálà lɛ̀ɛ, ɛ̃́ɛ̃́ lɛ́ è Lɔ́ɔ̀ɔ kũ tã́ã̀a ká. Zúù-mìà séĩ́ lɛ́ o kɛ Dùmásàa, óò à ɓɛ̀lɛ yà.

¹³E nu m píé. E dɔ m sɔ́nɔ́, áà gèè m lɛ̀ɛ kélɛ̀, ‘M lèe-gé Sɔ́ɔ̀, i nyìɛ è lɛ̀ gɛ̃̀ gbaa.’ Lɛ̀ e kɛ nɔ́ kília, m nyìɛ lé e ɓo máà à gɛ̃̀.

¹⁴A gèe m lɛ̀ɛ, ‘Wálà lɛ́ e ko dàa ye dàà nì wà Wálà káa, aà i sí, kɛ í à gé-wɔ̃̀ dɔ, ɛ̃́ɛ̃́ kɛ í à zì Mi Kpeĩ gɛ̃̀, e bɛ̀i, kɛ í mí e kília wéè ma áà mɛ́ĩ́ ɓò i lɛ̀ɛ.

¹⁵Ƃii íì lo kɛɛ̀ là kélá ká, kɛ í wɔ̃́ séĩ́ lɛ́ ɓaà gɛ̃̀, ɛ̃́ɛ̃́ lɛ́ ɓaà maa, gèe mia séĩ́ lɛ̀ɛ.

¹⁶Dɛɛ ká gbaa, mɛ́ i yàá mɔ̀? Ì wɛ̀lɛ̀ ó i bàtáì kɛ, kɛɛ i kɛ-wɔ̃̀ yɔɔ é pɛ́lɛ́ i mɔ̀ yé ɓaà à tɔ́ súo kɛɛ ká.’

¹⁷“M ló m mɛ̀ĩ́ Zùlúsàlɛ̀. Lɛ̀ m kɛ sɛ̀nɛ ɓopìà sálà-ɓò-Wálà-lɛ̀ɛ-kà wìa, m pɛ lɛ́ lɛ kélɛ̀ mɛ̀ĩ̀a zɛ.

¹⁸À zɛɛ̀ yía, m ko Dàa-mì gɛ̃̀, áà gèè m lɛ̀ɛ kélɛ̀, ‘Ì i gã̀ kɛ táá mɔ̀, í gó Zùlúsàlɛ̀ zèe. Ƃii míá o zèea, òó ló i zì kélá-wè lɛ́ ì lo à ɓoò áà gbɛ̃̀á m mɔ̀ɔ, òó ló à naà à ká.’

¹⁹Lɛ̀ e kɛ kília, ma gèe kélɛ̀, ‘M Dàa-mì, óò à yí kpó-kpó dɔ kélɛ̀ m kɛ lópìà Zúù-mìà zì Wálà-kà wì píé, máà mia lɛ́ o o zò dɔ i mɔ̀ɔ kũ̀, máà o mɛ̀.

²⁰Ɛ́ɛ̃́ lɛ̀ lɛ́ o Tíímì lɛ́ e kɛ i zì kélá-wè ɓo-mì káa zɛɛ, m dìè-tĩ́ m kɛ yí máà wèè à zɛ-wɔ̃̀ mɔ̀, ɛ̃́ɛ̃́ tó máà m nyìɛ kɛ̀ mia lɛ́ o kɛ à zɛpìàa wà sɔ-là-sɔ̀ mɔ̀.’

²¹Ko Dàa-mì a gèe m lɛ̀ɛ, ‘Ì lo. Ƃii ḿm̀ lo i vɔɔ̀ gbèkèni sɛ́lɛ́ gbɛɛ yí-mìà kɔ́ɛ́í.’ ”

²²Míáa o tóó dɔɔ̀ e kɛá Pɔ́ɔ̀ mɔ̀ e tóá kíli e wɔ̃́ɔ lɛ̀ yé e kéa gèe. Lɛ̀ a gèe nɔ́ɔ, o gbɛ̃̀ gbaa wáà gbɛ̀ɛ̀ gágà weeá kélɛ̀, “Ò lo à ká. Ò à zɛ. Ye wá mí kɛ̀ɓe lɛ à yía ká.”

²³O kɛ gbɛ́ɛ́pìà wáà sɔ yí mɛ̀ píé, wáà mùnú sɛ́lɛ́ dùò lɛ̀í.

²⁴Sóyà vɔ̀ wũ-là-mìa a gèe ó ló Pɔ́ɔ̀ ká sóyà vɔ̀ yà-pìàa mɔ̀. A gèe o lɛ̀ɛ ó Pɔ́ɔ̀ mɛ̀ gbàtò ká, kɛ é wɔ̃́ lɛ́ míáa ò mɔ́ɔ̀ wéé ɓo sùu kɛ̀ ké zɛ̀ɛ gèe.

²⁵Kɛɛ lɛ̀ o nyɛ gbaa à yèleè mɔ̀ kɛ ó mɛ̀ɛ, Pɔ́ɔ̀ a gèe sóyà vɔ̀ líé-sí-mì lɛ́ e kɛ dɔ̀á yia lɛ̀ɛ, “Ƃáà yí dɔ lɛ kpeĩ kɛ í Wólóũ̀ mi mɛ̀ gbàtò ká, yé wɔ̃́ lɛ̀ɛ́ sìè nɛ́ à mɔ̀ɔ ká?”

²⁶Lɛ̀ gɔ̃́ɔ e wɔ̃́ e kília maa, e ló o séĩ́ o wũ-là-mìa píé, áà gèè à lɛ̀ɛ, “Mɛ́ ì à kɛ̀ ɓɛ? Gɔ̃́ e dĩ̀ĩa lɛ Wólóũ̀ mi káɔ̀.”

²⁷Lɛ̀ e kɛ kília, mia wũ-là-mìa e ló Pɔ́ɔ̀ píé, áà gèè à lɛ̀ɛ kélɛ̀, “É kɛ̀á i Wólóũ̀ ye nɛ́ káa, à gèe m lɛ̀ɛ.” Pɔ́ɔ̀ a gèe à lɛ̀ɛ, “M̀m̀. M à ká.”

²⁸Sóyà vɔ̀ wũ-là-mìa a gèe kélɛ̀, “M pɛlèe gbùò kpó-kpó nɔ kɛ ḿ tĩã́ kɛɛ̀ Wólóũ̀ mi ká.” Kɛɛ Pɔ́ɔ̀ a gèe à lɛ̀ɛ, “Wólóũ̀ mi lɛ́ e ma yee m yea-èé.”

²⁹Lɛ̀ e kɛ nɔ́ kília, mia lɛ́ o kɛ lópìà wɛ̃́ĩ́-lɔ̀ɔ kɛɛ̀ Pɔ́ɔ̀ kɛ̀lɛ̀ɛ, o o yí ɓo gbaa à mɔ̀. Ɛ́ɛ̃́ sóyà vɔ̀ wũ-là-mì e kília, lɛ̀ lɛ́ a yí dɔ gbaa kélɛ̀ Pɔ́ɔ̀ lɛ Wólóũ̀ mi ká, lɛ́ aà à dà ɓɛ̀lɛ̀ làa, túó e kɛ gbaa à kɛpìà.

³⁰Sóyà vɔ̀ wũ-là-mì e kília e kɛ wɔ̃́ kpó-kpó lɛ́ Zúù-mìà wa gèe Pɔ́ɔ̀ a kɛɛ naapìà á yí ma. À mɔ́ɔ̀ wɔ̃̀ mɔ̀ɔ, à lɛ̀ gbɛɛ kpɛ̀iì káa, a mɔ́ɔ̀ ɓɛ̀lɛ̀ ɓo ɓo Pɔ́ɔ̀ mɔ̀, ɛ̃́ɛ̃́ a gèe sálà-ɓò-Wálà-mɔ̀-mìà kpànazɛ̀ wà mɛ̀ĩ́-sà ɓo-mìà séĩ́ ó pá o kíe mɔ̀. E Pɔ́ɔ̀ sí e à dɔ o wɛlɛ mɔ̀.