Read Yamano Àpɔ́sɔ̀lɔ̀ 23 Bible Online

Àpɔ́sɔ̀lɔ̀ 23 - Yamano bible

Àpɔ́sɔ̀lɔ̀ 23

¹Pɔ́ɔ̀ e lɛ̀ gɛ̃̀ mɛ̀ĩ́-sà ɓo-mìàa wɛlɛ yí áà gèè, “M ɓɛ́ĩ̀ ye-mìà, m zò lɛ̀ɛ́ mɛ̀ m mɔ̀ Wálà wɛlɛ mɔ̀ m zì kɛ̀ɓe séĩ́ là, é ɓɔá pɛ́nɛɛ mɔ̀.”

²Sálà-ɓò-Wálà-mɔ̀-mìà wũ-là-mì lɛ́ ò si Ánànáyàa, a gèe mia lɛ́ o kɛ dɔ̀á Pɔ́ɔ̀ sɔ́nɔ́ɔ lɛ̀ɛ ó Pɔ́ɔ̀ mɛ̀ e lé.

³Lɛ̀ e kɛ kília, Pɔ́ɔ̀ a gèe à lɛ̀ɛ, “Ƃí i ká gbĩ ká lɛ́ ɓɛlɛ púlú lɛ i mɔ̀ɔ, Wálà lɛ́ɛ̀ lo i mɛ̀ɛ̀. I yàá yi kɛ í mɛ̀ĩ́-sà dɔ m mɔ̀ Lɔ́ɔ̀ɔ ká. É kɛ bɛ̃̀ɛ̃ kília, i dìè bɛ̃̀ɛ̃ ɓáà Lɔ́ɔ̀ nɔ́ doóa sìè à gèe ɓa ɓo míáa lɛ̀ɛ ó m mɛ̀ɛ kolo là zàá.”

⁴Míá o kɛ Pɔ́ɔ̀ sɔ́nɔ́ɔ wa gèe à lɛ̀ɛ, “Lé-kã́ lɛ́ ɓà kɛ̀ Wálà là sálà-ɓòà-mɔ̀-mìà wũ-là-mì mɔ̀ ɓɛ?”

⁵Pɔ́ɔ̀ a gèe, “M ɓɛ́ĩ̀ ye-mìà, m̀ḿ gbaa dɔ mia wũ-là-mì sùua ká. À bɛ̃̀ɛ̃ɛ̃̀ lɛ Wálà là kíía yí kélɛ̀, ‘Yékɛ̀ í mɛ́ĩ́ yɔɔ ɓo i mìà nì wũ-là-mì gbĩ mɔ̀.’ ”

⁶Lɛ̀ Pɔ́ɔ̀ a yí dɔ gbaa kélɛ̀ míáa dò o Sáyúsíì-mìà ká, ɛ̃́ɛ̃́ o dò bɛ̃̀ɛ̃ o Fálásíì-mìà káa, e e wè wɛ̀lɛ̀ lɛ̀í mia fĩ̀ã̀a mɔ̀ áà gèè, “M ɓɛ́ĩ̀ ye-mìà, Fálásíì lɛ́ e m káa. Ɛ́ɛ̃́ zeĩ́, Fálásíì mi gbe lɛ́ e m káa. O mɛ̀ĩ́-sà dɔpìà pɛ́nɛɛ m mɔ̀, ɓii m zò lɛ à mɔ̀ kélɛ̀ mia lɛ́ waà gaa, óò lo wɛ̀lɛ̀ ga kɛ̀lɛ̀ɛ mɔ́ɔ̀ wɔ̃̀ mɔ̀.”

⁷Yé Pɔ́ɔ̀ a gèe nɔ́ kília, wéé e kã́ gbaa Fálásíì-mìà wà Sáyúsíì-mìà o kɛ yía o fĩ̀ã̀. Mia gbũ e kília yí e gìnì gbaa.

⁸(Ƃii Sáyúsíì-mìà wa gèe kélɛ̀ mia òó ló wɛ̀lɛ̀ ga kɛ̀lɛ̀. Ɛ́ɛ̃́ óò gèe zeĩ́ Wálà là vo-mìà vɔ̀, ɛ̃́ɛ̃́ là pɛ nɔ́ɔ fé wá ɓe. Kɛɛ Fálásíì-mìà óò wɔ̃́ yààka e kéa mɔ́ɔ̀ wɔ̃̀ gɛ̃̀ wánà ká.)

⁹Mia gbɛ́ɛ́-wèa e gbɛ̃̀ gbaa áà kɛ̀ gágà. Wálà kii dɔ-mìà yé o kɛ Fálásíì-mìà káa, o dò o dɔ o gã̀ mɔ̀ wáà gèè mɛ́ gágà zɛ̀ kélɛ̀, “Wɔ̃́ yɔɔ lɛ́ gɔ̃́ e kéa a kɛɛ, ko wá à gɛ̃̀pìà. Lúó dò káa, Wálà là vɔ-mì, e bɛ̀i là pɛ dò e mɛ́ĩ́ dò ɓo lèĩ à lɛ̀ɛ.”

¹⁰Wééa kã́ã̀ e kɛá yí gbùò zɛ̀, a kɛ sóyà vɔ̀ wũ-là-mìa áà tùò, a gɛ̃̀ ɓɔ̀ɔ kélɛ̀ míáa óò lo Pɔ́ɔ̀ pɛ́ɛ̀ kpĩ́ĩ̀-kpĩ́ĩ̀ le. À mɔ́ɔ̀ wɔ̃̀ mɔ̀ɔ, a gèe sóyà vɔ̀ lɛ̀ɛ ó ló míáa fĩ̀ã̀ ó Pɔ́ɔ̀ kṹ é gó míáa fĩ̀ã̀, ó ló à ká o yà-pìàa mɔ̀.

¹¹À bĩ́míà tò-ko-mɔ̀ zɛ̀ɛ káa, ko Dàa-mì e dɔ Pɔ́ɔ̀ sɔ́nɔ́ áà gèè, “I zò è kɛ gágà. Ƃaà m̀ kélá-wè ɓo Zùlúsàlɛ̀ zèe. Lɛ i mɔ̀ í wɔ̃́ nɔ́ doóa kɛ Wólóũ̀ bɛ̃̀ɛ̃ mɔ̀ nɔ́ kíli.”

¹²Lɛ̀ lɛ̀ e kpɛ̀ia, Zúù-mìà dò o ló o kíe là ó o kíe gɛ̃̀ wɔ̃́ dò kɛ-wɔ̃̀ ká. O o náá kpɔ́ wáà gèè, “Kòó ló ɓèlè-pɛ̀ nɔ́ɔ fé ɓèlè, ɛ̃́ɛ̃́ mi-pɛ̀ nɔ́ɔ fé miì, é tóá kíli kó Pɔ́ɔ̀ zɛ.”

¹³Mia lɛ́ o o kíe gɛ̃̀ wɔ̃́ e kéa kɛ-wɔ̃̀ káa, o diè e kɛá mia vũ̀ yììsɛ là.

¹⁴Lɛ̀ e kɛ kília, o ló sálà-ɓò-Wálà-mɔ̀-mìà kpànazɛ̀ɛ wà mia dìè-dìè vɔ̀ɔ o píé, wa gèe o lɛ̀ɛ, “Ko ko náá kpɔ́ e kíe là dóo gágà kélɛ̀ yékɛ̀ kó pɛ nɔ́ɔ fé ɓèlè yé kòó Pɔ́ɔ̀ zɛ nɛ́ɛ ká.

¹⁵À mɔ́ɔ̀ wɔ̃̀ mɔ̀ɔ, kà mɛ̀ĩ́-sà ɓo-mìàa nì kà wè-vɔ dɔ sóyà vɔ̀ wũ-là-mìa lɛ̀ɛ é nu Pɔ́ɔ̀ ká ka píé, ká à kɛ lɛ̀ pɛ lɛ́ ka nupìà wɔ̃́ lɛ́ à gbɛ̃̀ɛ̃̀ lɛ à mɔ̀ɔ yí kpó-kpó naà. Kɛɛ ko yee, ko pɛ̀ kɛɛ̀ lɛ́ɛ̀ lo kɛɛ̀ à ká kó à zɛ, kɛ bɛ̃̀ɛ̃ é tĩã́ ɓɔɔ̀ ka wɛlɛ mɔ̀.”

¹⁶Kɛɛ Pɔ́ɔ̀ lú-lɔ̀ gbe e wɔ̃́ lɛ́ míáa wa yà o gé ó kɛɛ ma. E ló gbaa, e wàà sóyà vɔ̀ yà-pìàa mɔ̀. E à wɔ̃̀ gèe Pɔ́ɔ̀ lɛ̀ɛ gbaa.

¹⁷Lɛ̀ e kɛɛ, Pɔ́ɔ̀ e sóyà vɔ̀ líé-sí-mìà doó-mì súo kɛ, a gèe à lɛ̀ɛ, “Gɔ̃-nɛ̀ e kéa, lo à ká ka wũ-là-mì píé. Wɔ̃́ dò lɛ à gé á gèe à lɛ̀ɛ.”

¹⁸Lɛ̀ e kɛ kília, gɔ̃́ɔ e ló nɛ́fúa ká o wũ-là-mì píé, áà gèè à lɛ̀ɛ, “Gɔ̃ lɛ́ e bĩ́-kɛ̀ì dĩ̀ĩ lɛ́ ò si Pɔ́ɔ̀ɔ, e m súo kɛ, áà gèè m lɛ̀ɛ ḿ nu nɛ́fú e kéa ká i píé, ɓii wɔ̃́ dò lɛ à gé á gèe i lɛ̀ɛ mɔ́ɔ̀ wɔ̃̀ mɔ̀.”

¹⁹Sóyà vɔ̀ wũ-là-mìa e gɔ̃-nɛ̀fúa kɔ̀-kpɛí kṹ, wà ye o ló o pèèlɛ là píà, e à wɛ̃́ĩ́-lɔ̀ɔ kɛ weeá kélɛ̀, “Mɛ́ e i gé ɓá gèe m lɛ̀ɛ?”

²⁰A gèe kélɛ̀, “Zúù-mìà waà wéé à mɔ̀ kɛ ó gèe i lɛ̀ɛ í ló Pɔ́ɔ̀ ká mɛ̀ĩ́-sà ɓo-mìà píé tòò, kɛɛ ó à kɛ lɛ̀ pɛ lɛ́ o lópìà à mɔ̀ wɔ̃̀ yí kpó-kpó naà.

²¹Kɛɛ yékɛ̀ í i tóó dɔ o mɔ̀, ɓii mia lɛ́ o bĩ̀ĩĩ̀ è lo kɛɛ̀ à ká à gɛ̀nɛ̀ɛ, o diè lɛ vũ̀ yììsɛ là. Waà o náá kpɔ́ kélɛ̀ òó ló pɛ gbɛɛ ɓèlè, ɛ̃́ɛ̃́ pɛ gbɛɛ miì, é tóá kíli ó à zɛ. Waà o dìè pɛ̀ kɛ dɛɛ ká kɛ ó à kɛ. O yàà lɛ gbaa í i wè ɓo o là.”

²²Mia wũ-là-mì e kília, a gèe kélɛ̀, “Yékɛ̀ ɓá gèe mi nɔ́ɔ fé lɛ̀ɛ kélɛ̀ ɓaà wɔ̃́ e kéa gèe m lɛ̀ɛ.” Lɛ̀ e kɛ kília, e gɔ̃-nɛ̀fúa vɔ gbaa.

²³Lɛ̀ e kɛ kília, sóyà vɔ̀ wũ-là-mìa e sóyà vɔ̀ líé-sí-mìà pèèlɛ súo kɛ, áà gèè o lɛ̀ɛ, “Kà sóyà vɔ̀ wũ pèèlɛ, ɛ̃́ɛ̃́ sòo táá-mìà vũ̀ sálápèèlɛ sí ká kpɔ́ dí-dùò-mìà wũ pèèlɛ mɔ̀, ká o pɛ̀ kɛ kɛ ó ló Sízàlíà. Óò lo wɛ̀lɛ̀ zèe zɔ́ɔ́-yì-káá lùò ká.

²⁴Kà sòo dò pɛ̀ kɛ yí kɛ Pɔ́ɔ̀ é yà à là, ɛ̃́ɛ̃́ ká ló à ká é ɓɔ mia wũ-là-mì Fílè mɔ̀ e yiè ká.”

²⁵Sóyà vɔ̀ wũ-là-mìa e kii dò bɛ̃̀ɛ̃. Kíí e kília yí-wè lɛ́ e kéa.

²⁶“Ma Kɔ́lɔ́dìà Lísìà, ḿm̀ kii e kéa bɛ̃̀ɛ̃ mia wũ-là-mì kpànazɛ̀ Fílè píé. Ḿm̀ wèè i bà.

²⁷Zúù-mìà o gɔ̃́ e kéa kṹ, o kɛ à kɛpìà ó zɛ. Ma ma kélɛ̀ lɛ Wólóũ̀ mi ká. Ye lɛ́ ma mɔ́ɔ̀ ló ɓo m̀ sóyà vɔ̀ ká, lɛ́ ma ɓo o kɛ̀lɛ̀ɛ.

²⁸M kɛ à naapìà ḿ wɔ̃́ lɛ́ ò à gèe a kɛɛ yí ma. Ma mɔ́ɔ̀ à sí ɓo, m ló à ká o zì mɛ̀ĩ́-sà ɓo-mìà wɛlɛ mɔ̀.

²⁹M̀ḿ gbaa wɔ̃́ lɛ́ è bɛ̀i à mɔ̀ á mɔ́ɔ̀ ga ɓo, ɛ̃́ɛ̃́ kɛ bɛ̃̀ɛ̃ ó à dùò bĩ́-kɛ̀ìa gɛ̃̀. Wɔ̃́ wa gèe a kɛɛ, à gbɛ̃̀ɛ̃̀ e kɛá o dìè-tĩ́ wà lɔ́ɔ̀ɔ wɔ̃̀ mɔ̀.

³⁰Kɛɛ lɛ̀ ma ma kélɛ̀ Zúù-mìà dò o kɛ wààpìà à kílí yía, ma yà gbaa m gé ḿ à vɔ i píé. Kɛɛ ma gèe mia lɛ́ wa gèe e wɔ̃́ kɛɛ lɛ̀ɛ ó nu i píé, ó wɔ̃́ e kília gèe i wɛlɛ mɔ̀.”

³¹Sóyà vɔ̀ɔ o wɔ̃́ lɛ́ o wũ-là-mì a gèe o lɛ̀ɛ kɛ. Bĩ́míà e kília káa, o Pɔ́ɔ̀ sí o ló o ɓɔ à ká Ãtèpátè.

³²À zì lɛ̀-kpɛ̀iì káa, sóyà vɔ̀ yé o kɛ táápìà tã́ã̀a o yɛ́ o zí, o ló o yà-pìà. O sòo táá-mìàa tó gbaa yí kɛ ó ló Pɔ́ɔ̀ ká.

³³O ló gbaa à ká Sízàlíà. O kíía nɔ mia wũ-là-mìa lɛ̀ɛ. O Pɔ́ɔ̀ dɔ̀ kɛ gbaa à kɛ̀lɛ̀.

³⁴Mia wũ-là-mì e kília, e kíía gèe. E Pɔ́ɔ̀ wɛ̃́ĩ́-lɔ̀ɔ kɛ é sɛ́lɛ́ lɛ́ è go à yía tɔ́ gèe. Lɛ̀ a yí dɔ gbaa kélɛ̀ Pɔ́ɔ̀ lɛ́ɛ̀ go Sìlísìàa,

³⁵a gèe kélɛ̀, “Mia lɛ́ ò gèe i wɔ̃́ kɛɛ ó nùáa, lɛ́ m̀ lo m tóó dɔɔ̀ i mɔ̀ɔ.” E à gèe gbaa mia lɛ̀ɛ ó o nyìɛ kɛ Pɔ́ɔ̀ mɔ̀ Hɛ́lɔ̀ yà-pìà.