Read Yamano Àpɔ́sɔ̀lɔ̀ 25 Bible Online

Àpɔ́sɔ̀lɔ̀ 25 - Yamano bible

Àpɔ́sɔ̀lɔ̀ 25

¹Lɛ̀ Fɛ́sɔ̀ e ɓɔ lɛ̀ e kília mɔ̀ lɛ́ e ɓo yí yààkaa, e gó Sízàlíà e ló Zùlúsàlɛ̀.

²Lɛ̀ e kɛ yía, sálà-ɓò-Wálà-mɔ̀-mìà kpànazɛ̀, wà Zúù-mìà kpànazɛ̀ o wɔ̃́ lɛ́ e kɛ o gé Pɔ́ɔ̀ gbĩ mɔ̀ɔ gèe à lɛ̀ɛ. O kpé kã́ Fɛ́sɔ̀ lɛ̀ɛ,

³kɛ é wɔ̃́ dò kɛ o lɛ̀ɛ. Wa gèe à lɛ̀ɛ é Pɔ́ɔ̀ vɔ Zùlúsàlɛ̀. Wa gèe á kɛ kíli, ɓii waà yà o gé kɛ ó zɛ yé aà kɛ nupìàa ká.

⁴Fɛ́sɔ̀ a gèe o lɛ̀ɛ, “O o nyìɛ kɛpìà Pɔ́ɔ̀ mɔ̀ Sízàlíà bĩ́-kɛ̀ì. Ɛ́ɛ̃́ m dìè m nɔ́ nupìà lóò yi dɛɛ ká.

⁵Kò ɓà mia gbùò gbùò vɔ̀ kò lo Sízàlíà kɛ ó ló ó wɔ̃́ lɛ́ Pɔ́ɔ̀ aà kɛɛ gèe yí, é kɛ̀á à wɔ̃́ yɔɔ kɛɛ̀ lɛɛ ká.”

⁶Fɛ́sɔ̀ e kɛ lèĩ o píé lúó sálàka ɛ̃́ɛ̃́ vũ̀ doó píé. Lɛ̀ e kɛ kília, e ló gbaa Sízàlíà. À zì lɛ̀-kpɛ̀iì gbɛɛ káa, e ló e yà e zì mɛ̀ĩ́-sà ɓo-pìà. A gèe ó nu Pɔ́ɔ̀ ká.

⁷Lɛ̀ o nu Pɔ́ɔ̀ ká yia, Zúù-mìà yé o góò e kɛá Zùlúsàlɛ̀ɛ o nìɛɛ̀ e kɛá Pɔ́ɔ̀ mɔ̀. O gbɛ̃̀ gbaa wáà wɔ̃́ gbùò gbùò búnùzɛ̀ lɛ́ à wánà pìè wá à mɔ̀ɔ kpɔ̀ Pɔ́ɔ̀ wĩĩ́.

⁸Kɛɛ Pɔ́ɔ̀ e dɔ e dìè là áà gèè kélɛ̀, “M̀ḿ wɔ̃́ yɔɔ gbɛɛ kɛ nɛ́ Zúù-mìà zì Lɔ́ɔ̀ɔ, ɛ̃́ɛ̃́ sálà-ɓò-Wálà-lɛ̀ɛ-kàaò, e bɛ̀i Sízà ká.”

⁹Fɛ́sɔ̀ a naa é Zúù-mìà zò-dà-wɔ̃̀ kɛ. A mɔ́ɔ̀ Pɔ́ɔ̀ wɛ̃́ĩ́-lɔ̀ɔ kɛ áà gèè kélɛ̀, “Íì lo wéè à mɔ̀ kɛ í ló Zùlúsàlɛ̀ kɛɛ ó ló mɛ̀ĩ́-sà e kéa ɓoò yi m wɛlɛ líé?”

¹⁰Pɔ́ɔ̀ a gèe kélɛ̀, “M dɔ̀á Sízà là mɛ̀ĩ́-sà ɓo-pìà. Lɛ o mɔ̀ ó mɛ̀ĩ́-sà dɔ m mɔ̀ yi. M̀ḿ wɔ̃́ gbɛɛ kɛ nɛ́ Zúù-mìà ká. I dìè ɓáà yí dɔ e yiè ká.

¹¹È kɛ̀á m lɔ́ɔ̀ɔ sìè, ɛ̃́ɛ̃́ m wɔ̃́ lɛ́ waà kɛɛ ò mia zɛ à wɛ̃́ĩ̀a kɛɛ, m̀ḿ gɔ̃̀ wàà gá e kília ɓoò mɔ̀. Kɛɛ yé wɔ̃́ ò gèe ma kɛɛ ye wá wánà káa, mi gbɛɛ lɛ̀ɛ́ bɛ̀i m nɔɔ̀ o lɛ̀ɛ. Ḿm̀ à gèe, ká m vɔ Sízà píé.”

¹²Fɛ́sɔ̀ wà là lìè-wè dɔ-mìà o mɛ́ĩ́ ɓo e kíe là. Lɛ̀ e kɛ kília, a gèe kélɛ̀, “Ƃaà i vɔ̀ Sízà píé wɔ̃̀ gèe. À mɔ́ɔ̀ wɔ̃̀ mɔ̀ɔ, Sízà dè píé lɛ́ ì lo lóò yia.”

¹³Lɛ̀ à lɛ̀ e ɓo pèèlɛɛ, sɛ́lɛ́ líé-sí-mì lɛ́ ò si Àgélépàa, wà Bɛ̀níì o nu wéè Fɛ́sɔ̀ bà Sízàlíà.

¹⁴Lɛ̀ o kɛ yí lúó zààle píéa, Fɛ́sɔ̀ e wɔ̃́ lɛ́ à gbɛ̃̀ɛ̃̀ lɛ Pɔ́ɔ̀ mɔ̀ɔ gã̀ pɛ́ɛ́ Àgélépà lɛ̀ɛ weeá kélɛ̀, “Fílè e gɔ̃ doó tó bĩ́-kɛ̀ì zèe.

¹⁵Lɛ̀ m ló Zùlúsàlɛ̀ɛ, sálà-ɓò-Wálà-mɔ̀-mìà kpànazɛ̀, ɛ̃́ɛ̃́ Zúù-mìà dìè-dìè vɔ̀ lɛ́ o kɛ yía, o wɔ̃́ doò do gèe gɔ̃́ e kília gbĩ mɔ̀. Wa gèe m lɛ̀ɛ ḿ wɔ̃́ e kília káá à wĩĩ́.

¹⁶Kɛɛ ma gèe o lɛ̀ɛ kélɛ̀ Wólómà-mìà òó mi lɛ́ wɔ̃́ kpɔ́ɔ̀ lɛ à wĩĩ́a, nɔ nɔ́ ɓɔ̀ɔ mia lɛ̀ɛ, yé wà mi lɛ́ e wɔ̃́ kpɔ́ à wĩĩ́a, òó ɓɔ nɛ́ o kíe mɔ̀ɔ ká. Wólómà-mìà zì wɔ̃́ kɛ-kɔ̀ lɛ kíli, kɛɛ bɛ̀i é kɛ mi mɔ̀ kɛ é wɔ̃́ lɛ́ ò gèe a kɛɛ, ɓò-e-wũ-mɔ̀ wɔ̃̀ gèe.

¹⁷Lɛ̀ wa mɔ́ɔ̀ nu ɓo zèea, m̀ḿ gbaa lúó káá tã́ã̀. À zì lɛ̀-kpɛ̀iì gbɛɛ káa, m yà m̀ mɛ̀ĩ́-sà ɓo-pìà. Ɛ́ɛ̃́ ma gèe mia lɛ̀ɛ ó nu gɔ̃́ e kília ká.

¹⁸Mia lɛ́ o kɛ wɔ̃́ kpɔ́pìà à wĩĩ́a, o wɛ̀lɛ̀ o dɔ. Òó gbaa wɔ̃́ yɔɔ lɛ́ ma gɛ̃̀ kélɛ̀ óò lo à gèeè a kɛɛ gbɛɛ gèe.

¹⁹O zì tèé nɔ́ o kɛ à dàpìàa, à gbɛ̃̀ɛ̃̀ e kɛá o dìè-tĩ́ wà gbìnì-Wálà-lɛ̀ɛ kɔ̀ mɔ̀. Ɛ́ɛ̃́ zeĩ́, à gbɛ̃̀ɛ̃̀ e kɛá gɔ̃ lɛ́ ò si Zízɛ̀ lɛ́ aà ga, lɛ́ Pɔ́ɔ̀ e wéé à kɛ̀ zeĩ́ ɓe wɔ̃̀ mɔ̀ɔ mɔ̀.

²⁰Wɔ̃́ e kéa zi lɛ́ wáá à yí naà à káa, m̀ḿ gbaa à dɔ. Yé e kɛ kília m Pɔ́ɔ̀ wɛ̃́ĩ́-lɔ̀ɔ kɛ, é kɛ̀á lɛ́ɛ̀ lo wéè à mɔ̀ kɛ é ló Zùlúsàlɛ̀, kɛ ó mɛ̀ĩ́-sà e kília ɓo yía.

²¹Kɛɛ Pɔ́ɔ̀ a gèe é tó bĩ́-kɛ̀ì, é tóá kíli Sízà é là mɛ́ĩ́a ɓo. Yé e kɛ kília, ma gèe ó o nyìɛ kɛ à mɔ̀, é tóá kíli ḿ à vɔ kò sɛ́lɛ́ dàa-mì Sízà píé.”

²²Àgélépà a gèe Fɛ́sɔ̀ lɛ̀ɛ, “Ḿm̀ lo à naà kɛ m dìè ḿ gɔ̃́ e kéa wéè ma.” Fɛ́sɔ̀ a gèe à lɛ̀ɛ, “Íì lo à wéè maà tòò.”

²³À zì lɛ̀ gbɛɛ kpɛ̀iì káa, míáa o Àgélépà wà Bɛ̀níì o kpɛ̀ɛ̀ kɛ lɛ̀ o kɛ nupìàa ká yí gbùò zɛ̀. Wà sóyà vɔ̀ wũ-là-mìà, ɛ̃́ɛ̃́ sɛ́lɛ́ yí-mìà gbùò gbùò vɔ̀ɔ o wàà mia yà-pìàa mɔ̀. Lɛ̀ e kɛ kília, Fɛ́sɔ̀ e à gèe ó nu Pɔ́ɔ̀ ká. O ló o nu à ká.

²⁴Fɛ́sɔ̀ a gèe, “Mia wũ-là-mì Àgélépà, é dàá mia séĩ́ lɛ́ o zèe ko píéa bàa, káà gɔ̃́ e kéa gɛ̃̀. Zúù-mìà séĩ́ lɛ́ o zèe, é dàá o yé ò go Zùlúsàlɛ̀ɛ bàa, waà wɔ̃́ gèe gɔ̃́ e kéa gbĩ mɔ̀ m lɛ̀ɛ. O gbɛ́ɛ́ wáà gèè, yékɛ̀ gɔ̃́ e kéa é kɛ ɓe.

²⁵Kɛɛ m̀ḿ gbaa pɛ lɛ́ mi à kɛ̀, tó wáà mɔ́ɔ̀ à zɛ ɓòa, gɛ̃̀ nɛ́ kɛ á kɛ. Lɛ̀ à dìè aà gèe kélɛ̀ ó à vɔ kò sɛ́lɛ́ dàa-mì Sízà píéa, maà wéé à mɔ̀ kɛ ḿ à vɔ.

²⁶Kɛɛ wɔ̃́ kpó-kpó lɛ́ m̀ lo à bɛ̃̀ɛ̃ɛ̃̀ à gbĩ mɔ̀ ḿ vɔá m dàa-mì Sízà píéa, m̀ḿ à gɛ̃̀ nɛ́. À mɔ́ɔ̀ wɔ̃̀ mɔ̀ɔ, m nuù lɛ à ká ka wɛlɛ líé. É kɛ bɛ̃̀ɛ̃ ka séĩ́ ka wɛlɛ líéa, lɛ ɓi mia wũ-là-mì Àgélépà i líé. M à kɛ kíli, kɛɛ pɛ dò é kɛ m kɛ̀lɛ̀ ḿ bɛ̃̀ɛ̃, yé kɔaà nyɛ mɛ́ĩ́ e kília yí naà mɔ̀ɔ ká.

²⁷Ƃii lɛ m lɛ̀ɛ wɔ̃́ niàa ká kɛ ḿ mi vɔ Sízà píé, yé m̀ḿ wɔ̃́ lɛ́ wa kpɔ́ à wĩĩ́a gã̀ pɛ́ɛ́ e yiè káa ká.”