Read Yamano Àpɔ́sɔ̀lɔ̀ 3 Bible Online

Àpɔ́sɔ̀lɔ̀ 3 - Yamano bible

Àpɔ́sɔ̀lɔ̀ 3

¹Lúó doó káa, lɛ̀ lɛ́ sɛ̀nɛ-ɓo-lùò lɛ́ e kɛ nyɛ́nɛ́-dɔ̀-mia-tóó-gbáà lùò káa e ɓɔɔ, Pílɛ̀ wà Zɔ̃̀ɔ̃́ o ló sálà-ɓò-Wálà-lɛ̀ɛ-kà wì.

²Gɔ̃ doó e kɛ yàá gàlà lɛ́ e kɛ Wálà-kà e kília mɔ̀ɔ lé doó-mì mɔ̀. Gàlà-lé e kília, óò à si Gàlà-lé Yiè. Gɔ̃́ e kília kpɔ́lɔ̀ e kɛá lɛ̀ wa yea ká. O kɛ lópìà à ká gàlà-lé e kília mɔ̀ lúó séĩ́ ká, kɛ é pɛlèe pɛ̃́ mia lɛ́ o kɛ lópìà Wálà-kà e kília wìa mɔ̀.

³Lɛ̀ e Pílɛ̀ wà Zɔ̃̀ɔ̃́ o gɛ̃̀ wáà lò kɛ́ìa, e kpé kã́ o lɛ̀ɛ ó à gba pɛ dò ká.

⁴O lɛ̀ gɛ̃̀ à wɛlɛ yí. Pílɛ̀ a gèe kélɛ̀, “Lɛ̀ gɛ̃̀ ko píé.”

⁵E lɛ̀ gɛ̃̀ o píé, ɛ̃́ɛ̃́ a yà e gé kélɛ̀ lɛ nupìà pɛ dò sɔ̀lɔ̀ ɓoò.

⁶Pílɛ̀ a gèe à lɛ̀ɛ, “Pɛlèe dò nɔ́ɔ fé wá m kɛ̀lɛ̀. Kɛɛ pɛ́ e m kɛ̀lɛ̀ɛ, lɛ́ m̀ lo à nɔɔ̀ i lɛ̀ɛ. Zízɛ̀ Kɛ́lɛ̀ì lɛ́ è go Názàlɛ̀ɛ tɔ́ yí zàáa, wɛ̀lɛ̀ í ɓà ló ɓo.”

⁷Pílɛ̀ e e kɔ̀ dà gbaa gɔ̃́ɛɛ kɔ̀ yiè kɛ̀lɛ̀, e gbũ à mɔ̀, e wɛ̀lɛ̀. Nɔ́ zá lea, gɔ̃́ɛɛ gã̀ wà à gã̀-kpɛ́ɛ̀ e kɛ gbaa gɛ̃́ĩ́-gɛ̃̀ĩ̀.

⁸E bìnì lɛ̀í, e gbɛ̃̀. E gbɛ̃̀ gbaa áà tàà píé píé. Wà ye nì o ló gbaa Wálà-kàa wì. E kɛ táápìà, áà lò vɔ̀á sí, áà Wálà tɔ́ ɓɔ̀.

⁹Mia séĩ́ lɛ́ o kɛ yía, o à gɛ̃̀, áà lò tàá sí, áà Wálà tɔ́ ɓɔ̀.

¹⁰O à dɔ gbaa gɔ̃ lɛ́ e kɛ pɛ-pɛ̃́-mì ká, lɛ́ e kɛ yàá Wálà-kàa mɔ́ɔ̀ Gàlà-lé Yièa mɔ̀ɔ ká. O lé kpó-kpó paà e kɛá wɔ̃́ lɛ́ e kɛ gɔ̃́ɛɛ káa wɛ̃́ĩ̀.

¹¹Lɛ̀ lɛ́ gɔ̃́ɛɛ e wí Pílɛ̀ wà Zɔ̃̀ɔ̃́ o mɔ̀ɔ, mia séĩ́ zò e dɔ e gã̀ mɔ̀, wáà lò bàlá o píé. O kɛ dɔ̀á gbùlù lɛ́ ò si Sɔ́lómɔ̀ yàlà-pìèa wì.

¹²Lɛ̀ Pílɛ̀ e míáa gɛ̃̀ɛ, a gèe o lɛ̀ɛ, “M ɓɛ́ĩ̀ Éézɛ̀lɛ̀-mìà, mɛ́ e kɛ lɛ́ ka lé paà lɛ wɔ̃́ e kéa mɔ́ɔ̀ wɔ̃̀ mɔ̀? Ɛ́ɛ̃́ mɛ́ e kɛ lɛ́ kà ko gɛ̃̀ wã́-wã̀-wã́ ɓe? Káà yí dɔ kélɛ̀ ko zì yíkɛ̀ gáàa wà ko zì kɛ̀-púlú lɛ́ ko gɔ̃́ɛɛ kɛá lɛ́ e tááa?

¹³Wálà lɛ́ lɛ Éɓɔ́lɔ́hã́ã̀, ɛ̃́ɛ̃́ Áázè, e bɛ̀i Zékɔ̀ nì wà Wálà ká, lɛ́ lɛ zeĩ́ ko dàa nì wà Wálà káa, aà là Yɛɓo-kɛ-mì Zízɛ̀ kɛ kpànazɛ̀. Ka à kɔ̀ nɔ mɛ̀ĩ́-sà ɓo-mìà lɛ̀ɛ. Ɛ́ɛ̃́ ka gèe Pálɛ̀ wɛlɛ mɔ̀ kélɛ̀ kàá naa à ká lɛ̀ lɛ́ Pálɛ̀ a naa kɛ é à ɓo wɔ̃́ yía ká.

¹⁴Mi lɛ́ lɛ púlú, ɛ̃́ɛ̃́ kpeĩa, ka gèe kélɛ̀ kàá naa à ká. Ɛ́ɛ̃́ ka kpé kã́ Pálɛ̀ lɛ̀ɛ kɛ é mi zɛ-mì yee ɓo wɔ̃́ yí ka lɛ̀ɛ.

¹⁵Ka mi lɛ́ è kɛ̀ɓe-zì zɔ̃̀ɔ̃̀ mia lɛ̀ɛ zɛ. Kɛɛ Wálà e à wɛ̀lɛ̀ ga kɛ̀lɛ̀. Ɛ́ɛ̃́ ko kélá ká wɔ̃́ e kília mɔ́ɔ̀ wɔ̃̀ mɔ̀.

¹⁶Zízɛ̀ tɔ́ lɛ́ a kɛ lɛ́ gɔ̃ kpɔ́lɔ̀ɔ zɛ̀ e ké lɛ́ kà gɛ̃̀, ɛ̃́ɛ̃́ káà dɔ̀ɔ, e yíkɛ̀ gáàa sɔ̀lɔ̀ ɓoa. Gɔ̃́ɛɛ zò dɔɔ̀ e kɛá Zízɛ̀ tɔ́ mɔ̀. À zì zò-dɔ̀-Zízɛ̀-mɔ̀ kolo là zàáa, ye lɛ́ a la zí e kéa ká ka séĩ́ ka nyìɛ mɔ̀ɔ.

¹⁷“Ɛ̀ɛ̀, m lèe-gé vɔ̀, wɔ̃́ lɛ́ kà ka wũ-là-mìà nì ka kɛ Zízɛ̀ káa, ka kɛ kíli, ɓii ka kɛ ka ti bà.

¹⁸Wálà e dɔ mɔ́ là dɔ̀-lé-là-mìà séĩ́ yí, áà gèè e kɛ là Kɛ́lɛ̀ì mɔ̀ é wɔ̃́ nyɔ́ɔ̀ɔ gɛ̃̀. E à kɛ e kɛ wánà zɛ̀ zi sùu e kéa ká.

¹⁹Yé lɛ kília, kà ka sɔ̃̀ɔ̃ yɔɔ mɛ́ vɔ̀ɔ, ká nìɛ̀ Wálà píé. Ká kɛá kília, lɛ́ɛ̀ lo ka kɛ-wɔ̃̀ yɔɔ sòlóò e gó ka mɔ̀.

²⁰Kà kɛ kíli, kɛɛ ko Dàa-mì zì kɛ̀-ka-píéa é lúó lɛ́ kà lo kɛɛ̀á dɛɛ à píéa, nɔ ka lɛ̀ɛ, ɛ̃́ɛ̃́ kɛ é Zízɛ̀ lɛ́ e Kɛ́lɛ̀ì lɛ́ aà sí ka lɛ̀ɛ káa, vɔ.

²¹Lɛ à mɔ̀ é tó lɛ̀í, é tóá kíli lúó lɛ́ Wálà è lo pɛ séĩ́ kɛɛ̀á dɛɛ é ɓɔ. Zi nɔ́ Wálà aà à káá mɔ́ à ká là dɔ̀-lé-là-mìà lé kɛ ó gèea, lɛ́ ɓɛ.

²²Ƃii Móózè a gèe, ‘Ƃà Wálà lɛ́ e kɔa Dàa-mì káa, lɛ́ɛ̀ lo dɔ̀-à-lé-là-mì doó vɔɔ̀ ka lɛ̀ɛ, lɛ̀ zí nɔ́ e m vɔáa ká. Lɛ́ɛ̀ lo kɛɛ̀ ka dìè ka pà mi ká. Wɔ̃́ nɔ́ɔ fé lɛ́ è lo à gèeè ka lɛ̀ɛ, kà ka tóó dɔ à mɔ̀.

²³Mi lɛ́ lɛ̀ɛ́ ló e tóó dɔɔ̀ Wálà là dɔ̀-lé-là-mì e kília mɔ̀ɔ, óò lo à ɓoò Wálà là mia nì bà, tó wa yí sìè.’

²⁴Wálà là dɔ̀-lé-là-mìà séĩ́, Sámìò wà mia lɛ́ o tó à ko mɔ̀ɔ ó dà o bàa, míá o ké lɛ́ o mɛ́ĩ́ ɓo mɔ́ɔ, o wɔ̃́ gèe e gbɛ̃̀ pɛ́nɛɛ yìì mɔ̀ nɔ́ kíli.

²⁵Ka lɛ́ ka dɔ̀-Wálà-lé-là-mìàa sùu-là-mìà káa. Ɛ́ɛ̃́ à wè lɛ́ a dɔ mɔ́ ka dàa ye dàà nì lɛ̀ɛ, kà ye nì ka dɔpìà à yí, lɛ̀ zí nɔ́ a gèe à ká Éɓɔ́lɔ́hã́ã̀ lɛ̀ɛ kélɛ̀, ‘Ḿm̀ lo lúà kpɔ́ɔ̀ mia séĩ́ lɛ́ o kpóṹ là zèea mɔ̀ i zì sùu-là-mìà tɔ́ yí zàáa’ ká.

²⁶À mɔ́ɔ̀ wɔ̃̀ mɔ̀ɔ, Wálà e là Yɛɓo-kɛ-mì lɛ́ e Zízɛ̀ káa sí, a vɔ ka píé bèĩzɛ̀, kɛ é lúà kpɔ́ ka mɔ̀, áà ka séĩ́ ka nìɛ̀, káà gò ka sɔ̃̀ɔ̃ yɔɔ kɛɛ̀ mɔ̀.”