Read Yamano Àpɔ́sɔ̀lɔ̀ 4 Bible Online

Àpɔ́sɔ̀lɔ̀ 4 - Yamano bible

Àpɔ́sɔ̀lɔ̀ 4

¹Lɛ̀ Pílɛ̀ wà Zɔ̃̀ɔ̃́ o kɛ tĩã́ mɛ́ĩ́ ɓopìà míáa lɛ̀ɛ, sálà-ɓò-Wálà-mɔ̀-mìà, e bɛ̀i, nyìɛ-kɛ̀-Wálà-kà-mɔ̀-mìà wũ-là-mì, ɛ̃́ɛ̃́ zeĩ́ Sáyúsíì-mìà o nu o píé.

²O zò kpó-kpó dàaà e kɛá zízàá lɛ̀ lɛ́ àpɔ́sɔ̀lɔ̀ vɔ̀ pèèlɛɛ o kɛ pɛ zɔ̃̀ɔ̃̀pìà, áà gbɛ̃̀á Zízɛ̀ wɛ̀lɛ̀ ga kɛ̀lɛ̀ wɔ̃̀, lɛ́ a zɔ̃̀ɔ̃̀ kélɛ̀ mia lɛ́ o gaà lɛɛ óò lo wɛ̀lɛ̀ ga kɛ̀lɛ̀ɛ mɔ̀ɔ ká.

³À mɔ́ɔ̀ wɔ̃̀ mɔ̀ɔ, o o kṹ, o o dùò bĩ́-kɛ̀ì e tóá kíli lɛ̀ e kpɛ̀i, ɓii lɛ̀ɛ kɛɛ, kɛɛ lúó aà die.

⁴Kɛɛ mia búnùzɛ̀ lɛ́ o wɔ̃́ lɛ́ wa gèea maa, o o zò dɔ à mɔ̀. Gɔ̃à lɛ́ o o zò dɔ Zízɛ̀ mɔ̀ gbaa, o kɛ lèĩ wáá sɔ́ɔ́li.

⁵Lɛ̀ lɛ̀ e kpɛ̀ɛ, Zúù-mìà wũ-là-mìà, ɛ̃́ɛ̃́ mia dìè-dìè vɔ̀, e bɛ̀i Wálà kii-dɔ-mìàa, o pá o kíe mɔ̀ Zùlúsàlɛ̀.

⁶Wà sálà-ɓò-Wálà-mɔ̀-mìà wũ-là-mì lɛ́ ò si Aná, e bɛ̀i, Káyáfà, ɛ̃́ɛ̃́ zeĩ́ Zɔ̃̀ɔ̃́, ɛ̃́ɛ̃́ Ɛ́lèzánà, e bɛ̀i mia yé o tó lɛ́ o kɛ Aná là mia nì káa, lɛ́ wà ye nì o pá o kíe mɔ̀ɔ.

⁷O àpɔ́sɔ̀lɔ̀ vɔ̀ɔ o kɛ o dɔ o wɛlɛ mɔ̀, wáà o wɛ̃́ĩ́-lɔ̀ɔ kɛ̀ kélɛ̀, “Zi sùu kpɛɛ̀ lɛ́ ka wɔ̃́ɔ kɛ à ká? Yíkɛ̀ gáàa kpɛɛ̀ lɛ́ lɛ ka kɛ̀lɛ̀, ɛ̃́ɛ̃́ deĩ̀ tɔ́ lɛ́ ka wɔ̃́ɔ kɛ à yí?”

⁸Pílɛ̀ paà e kɛá Gɛ̀ɛ̀ Púlú ká, áà yí ɓò o lɛ̀ɛ kélɛ̀, “Mia wũ-là-mìà, e bɛ̀i mia dìè-dìè vɔ̀,

⁹yé kaà ko wɛ̃́ĩ́-lɔ̀ɔ kɛ pɛ́nɛɛ wɔ̃́ yiè lɛ́ à kɛɛ̀ e kɛá gɔ̃ kpɔ́lɔ̀ɔ zɛ̀ɛ lɛ̀ɛ, ɛ̃́ɛ̃́ zeĩ́, zí e la-ɓo sɔ̀lɔ̀ ɓoáa wɛ̃́ĩ̀a,

¹⁰wɔ̃́ lɛ́ kà Éézɛ̀lɛ̀-mìà séĩ́ káá à yí dɔɔ̀ɔ, gɛ̃̀ e ké. Zízɛ̀ Kɛ́lɛ̀ì lɛ́ è go Názàlɛ̀, lɛ́ ka pá nélè ká kɔ́lɔ́sì mɔ̀, lɛ́ Wálà a wɛ̀lɛ̀ ga kɛ̀lɛ̀ɛ, à tɔ́ lɛ́ a kɛ lɛ́ gɔ̃́ e dɔ ka wɛlɛ mɔ̀ɔ kéa, e la-ɓo sɔ̀lɔ̀ ɓoa.

¹¹Zízɛ̀ lɛ́ e gbaa gɛ̀lɛ̀ lɛ́ ká-dɔ-mìà ka dà ka kɔ̀ mɛ̀ĩ́, lɛ́ gɛ̀lɛ̀ e kília aà kɛ gbaa gɛ̀lɛ̀ kpànazɛ̀ ká, é dieá gɛ̀lɛ̀ séĩ́ làa káa.

¹²Zízɛ̀ lɛ́ nɔ́ mi è bɛ̀i à mɔ̀ é la-ɓo sɔ̀lɔ̀ ɓo à tɔ́ yía. Ƃii tɔ́ lɛ́ à nɔɔ̀ lɛ mia lɛ̀ɛ kpóṹ là zèea, à gbɛɛ wá ɓe, kɛɛ kó la-ɓo sɔ̀lɔ̀ ɓo à kolo là.”

¹³Mia lɛ́ o kɛ gbṹ e kília yía, o lé e pa zi lɛ́ Pílɛ̀ wà Zɔ̃̀ɔ̃́ o zò e kɛá gágàa wɔ̃̀ yí, ɛ̃́ɛ̃́ o lé paà e kɛá zeĩ́ lɛ̀ lɛ́ wa yí dɔ kélɛ̀ Pílɛ̀ wà Zɔ̃̀ɔ̃́ o nɔ́ mia ɓɔ̀ɔ lɛ́ òó kii dɔɔ dò káa ká. Wa yí dɔ gbaa kélɛ̀ wà Zízɛ̀ nì waà tàà-kíe-píé kɛ do.

¹⁴Kɛɛ wɔ̃́ gbɛɛ lɛ̀ɛ́ gbaa kɛ ɓe kɛ ó gèe, lɛ̀ lɛ́ gɔ̃ lɛ́ aà la-ɓo sɔ̀lɔ̀ ɓoa, e kɛ dɔ̀á yi àpɔ́sɔ̀lɔ̀ vɔ̀ɔ sɔ́nɔ́ɔ ká.

¹⁵Wa gèe gbaa Pílɛ̀ wà Zɔ̃̀ɔ̃́ o lɛ̀ɛ ó gó gbaa lɛ̀ lɛ́ mia páà e kɛá o kíe mɔ̀ yia mɔ̀. O gbɛ̃̀ gbaa, wáà wɔ̃́ gèè o kíe nì lɛ̀ɛ,

¹⁶wáà gèè, “Mɛ́ kɔ̀à lo à kɛɛ̀ gɔ̃à o kéa ká? Mia séĩ́ lɛ́ o Zùlúsàlɛ̀-mìà káa, óò yí dɔ kélɛ̀ gɔ̃à o kéa waà wɔ̃́ kpàlézɛ̀ kpàna-kpànazɛ̀ e kéa kɛ. Kòó bɛ̀i à mɔ̀ kó tèé dà à yí.

¹⁷Kɛɛ kɔ̀à lìè-wè dɔ gɔ̃à o kéa lɛ̀ɛ yékɛ̀ ó mɛ́ĩ́ ɓo gbaa mi nɔ́ɔ fé lɛ̀ɛ Zízɛ̀ tɔ́ yí, ɓii yékɛ̀ à mɛ̀ĩ̀ é ɓɔ gbaa mi nɔ́ɔ fé dò mɔ̀.”

¹⁸Lɛ̀ e kɛ kília, o o súo kɛ, wáà gèè o lɛ̀ɛ kpó-kpó ɓo kélɛ̀ yékɛ̀ ó mɛ́ĩ́ ɓo, ɛ̃́ɛ̃́ ó pɛ zɔ̃̀ɔ̃̀ gbaa Zízɛ̀ tɔ́ yí gbɛɛ ɓo.

¹⁹Kɛɛ Pílɛ̀ wà Zɔ̃̀ɔ̃́ wa gèe o lɛ̀ɛ kélɛ̀, “Ƃiò, Wálàò, dé lɛ kpeĩ kɛ kó à wéè kɛ? À yé lɛ kpeĩ Wálà lɛ̀ɛ, ka dìè kà lɛ̀ gɛ̃̀ à yí.

²⁰Ƃii wɔ̃́ lɛ́ kɔaà gɛ̃̀, ɛ̃́ɛ̃́ lɛ́ kɔaà maa, kòó bɛ̀i tèáà à wɔ̃̀ gèeè mɔ̀.”

²¹Mia gbũ e kília, o bɛ̀i o lìè-wè dɔ zeĩ́ o lɛ̀ɛ yí gágà zɛ̀. O à tó gbaa o ló. Òó gbaa zi gbɛɛ gɛ̃̀ kɛ ó wɔ̃́ nyɔ́ɔ̀ɔ kɛ o ká. Ƃii mia séĩ́-séĩ́ o kɛ Wálà tɔ́ ɓɔpìà wɔ̃́ lɛ́ à kɛɛ̀ e kɛáa mɔ́ɔ̀ wɔ̃̀ mɔ̀.

²²Gɔ̃ lɛ́ waà wɔ̃́ kpàlézɛ̀ e kéa kɛá à laà káa, à ye-kɛ̀ɛ̀ diè e kɛá vũ̀ yììsɛ là.

²³Lɛ̀ lɛ́ o kã́ gbaa Pílɛ̀ wà Zɔ̃̀ɔ̃́ o mɔ̀ɔ, o ló gbaa o ɓɛ́ĩ̀ píé, wáà wɔ̃́ lɛ́ sálà-ɓò-Wálà-mɔ̀-mìà kpànazɛ̀, e bɛ̀i, mia dìè-dìè vɔ̀ɔ wa gèea, wáà gèè o lɛ̀ɛ.

²⁴Lɛ̀ wa maa, o séĩ́ o nu gbaa o kíe là, wáà sɛ̀nɛ ɓò Wálà lɛ̀ɛ weeá kélɛ̀, “Ko Wũ-là-mì, lɛ́ i lɛ̀í wà tã́ã̀ zèe, ɛ̃́ɛ̃́ mɛ̀ĩ́ kɛ, lɛ́ i pɔɔ̀ séĩ́ lɛ́ e o yía kɛ ɓaa,

²⁵i dɔ ko dàa Dèɓé lɛ́ e kɛ ɓà yɛɓo-kɛ-mì káa, yí ɓà Gɛ̀ɛ̀ Púlú ká, áà gèè kélɛ̀, ‘Mɛ́ e kɛ lɛ́ wɔ̃́ e sɛ́lɛ́ gbɛɛ yí-mìà wàa? Mɛ́ e kɛ lɛ́ míáa o wàà à kílí yí ɓɔ̀ɔ?

²⁶Kpóṹ là zèe líé-sí-mìà o o dìè pɛ̀ kɛ, ɛ̃́ɛ̃́ mia wũ-là-mìà o pá o kíe mɔ̀, kɛ ó gèlè gbini ko Dàa-mì wà là Kɛ́lɛ̀ìa o mɔ̀.’

²⁷Lɛ wánà kpó-kpó ká kélɛ̀ Hɛ́lɔ̀ wà Pɔ̃́sɔ̀ Pálɛ̀, wà sɛ́lɛ́ gbɛɛ yí-mìà, ɛ̃́ɛ̃́ Éézɛ̀lɛ̀-mìà o pá o kíe mɔ̀ pɛ́lɛ gbùò e kéa yí, kɛ ó gèlè gbini Zízɛ̀ lɛ́ e ɓà Yɛɓo-kɛ-mì púlú, lɛ́ ɓa kɛ Kɛ́lɛ̀ì káa mɔ̀ɔ.

²⁸O pá o kíe mɔ̀, kɛ ó wɔ̃́ séĩ́ lɛ́ ɓaà yà i gé kɛ é kɛɛ, kɛ ó à kɛ. Ƃa yà i gé é kɛ kíli i zì wɔ̃́ kɛ̀ i dìè zò ká wà i zì yíkɛ̀ gáàa yí zàá.

²⁹Ko Dàa-mì, ɛ̀ɛ̀, ko mɛ́-túó-wɔ̃̀ séĩ́ lɛ́ waà gèe ko lɛ̀ɛ, à gɛ̃̀, ɛ̃́ɛ̃́ kɛ í wéé à mɔ̀ kɛɛ mia lɛ́ ko ɓà yɛɓo-kɛ-mìà káa, kó i lé-wè gèe zò kɛ̀-gágà-là ká.

³⁰Ì i kɔ̀ fàa kɛ í mia la yáá bà. Ì wéé à mɔ̀, kɛɛ wɔ̃́ lé-pa zɛ̀ ɛ̃́ɛ̃́ à kpàlézɛ̀ nì kɛɛ̀ é kɛá ɓà Yɛɓo-kɛ-mì púlú lɛ́ e Zízɛ̀ káa, tɔ́ yí zàá.”

³¹Lɛ̀ o nyɛ sɛ̀nɛ ɓoò mɔ̀ɔ, lɛ̀ lɛ́ o páà e kɛá o kíe mɔ̀ yia, e vĩ́ ɓo. O séĩ́-séĩ́ o paà e kɛá Gɛ̀ɛ̀ Púlú ká, wáà Wálà là wéa gèè gbaa zò-gágà-là ká.

³²Mia gbũ lɛ́ o zò dɔɔ̀ e kɛá Zízɛ̀ mɔ̀ɔ, o séĩ́-séĩ́ o zò wà o zì yɛ́lɛ́-tàà-yí-wɔ̃̀ e kɛ doó. O dò gbɛɛ lɛ̀ɛ́ gbaa gèe, m̀ pɛ́ e m kɛ̀lɛ̀ɛ, m doó m̀ pɛ lɛ. Kɛɛ o séĩ́-séĩ́ o dɔ pɛ lɛ́ e kɛ o kɛ̀lɛ̀ɛ yí déĩ́ le.

³³Wɛ̀lɛ̀ lɛ́ ko Dàa-mì Zízɛ̀ a ɓo ga kɛ̀lɛ̀ɛ, àpɔ́sɔ̀lɔ̀ vɔ̀ɔ wa kélá-wè ɓo yíkɛ̀ gáàa ká kpó-kpó ɓo. Ɛ́ɛ̃́ Wálà zì zò-kɛ̀-sɛ̀ bɔ́nɔ̀ e kɛá o ká.

³⁴Pɛ sã̀ã̀ gbɛɛ lɛ̀ɛ́ gbaa kɛ o dò nɔ́ɔ fé mɔ̀. Mia yé tã́ã̀ wà ká nì e kɛ o kɛ̀lɛ̀ɛ, o à lɔ̀ɔ̀ dɔ, wáà nù à pɛ̀lèe ká,

³⁵wáà dɔ̀ kɛ̀ àpɔ́sɔ̀lɔ̀ vɔ̀ɔ kɛ̀lɛ̀. O pɛlèe e kília yí gìniì sí pɛ́ lɛ i mɔ̀ ɓá sɔ̀lɔ̀ ɓoa mɔ̀ doó doó.

³⁶Gɔ̃ doó e kɛ yía, à tɔ́ e kɛ Zósɛ̀. E kɛ Lííváì gɔ̃ ká. Wa ye sɛ́lɛ́ lɛ́ ò si Sápàa yí. Àpɔ́sɔ̀lɔ̀ vɔ̀ɔ o kɛ à sípìà Bánábà. Bánábà yí lɛ́ e kélɛ̀, fã̀ã́-wàà nɔ̀-mia-lɛ̀ɛ mì.

³⁷Gɔ̃́ e kéa tã́ã̀ dò e kɛ à kɛ̀lɛ̀. A lɔ̀ɔ̀ dɔ, e nu à pɛ̀lèe ká, áà dɔ̀ kɛ̀ àpɔ́sɔ̀lɔ̀ vɔ̀ɔ kɛ̀lɛ̀.