Read Yamano Àpɔ́sɔ̀lɔ̀ 5 Bible Online

Àpɔ́sɔ̀lɔ̀ 5 - Yamano bible

Àpɔ́sɔ̀lɔ̀ 5

¹Kɛɛ gɔ̃ doó e kɛ yía, o kɛ à sípìà Ánànáyà. À na tɔ́ lɛ́ Sòfáyà. Gɔ̃́ e kília e tã́ã̀ lɛ́ e kɛ o kɛ̀lɛ̀ɛ lɔ̀ɔ̀ dɔ.

²Kɛɛ e à pɛ̀lèe dò sí à yí. À na e wɔ̃́ e kília yí dɔ. E nu pɛlèea yé e tóa ká, áà dɔ̀ kɛ̀ àpɔ́sɔ̀lɔ̀ vɔ̀ɔ kɛ̀lɛ̀.

³Pílɛ̀ a gèe à lɛ̀ɛ, “Ánànáyà, mɛ́ e kɛ lɛ́ ɓà to Sétɔ̃̀ áà e yàlà kũ̀ i yí, áà kɛ̀, tó ɓáà nɛ̀ kɛ̀ Gɛ̀ɛ̀ Púlú lɛ̀ɛ, tó ɓáà tã́ã̀ lɛ́ ɓa lɔ̀ɔ̀ dɔɔ pɛ̀lèe dò sì à yí ké ɓe?

⁴Kɛ bɛ̃̀ɛ̃ í tĩã́ tã́ã̀a lɔ̀ɔ̀ dɔɔ̀ɔ, ḿ gɔ̃̀, e kɛ ɓà pɛ ká? Ɛ́ɛ̃́ bɛ̃̀ɛ̃, lɛ̀ lɛ́ ɓa lɔ̀ɔ̀ dɔɔ, à pɛ̀lèea e kɛ nɔ́ tĩã́ ɓà pɛ ká? Mɛ́ e kɛ lɛ́ ɓa yà i gé, kɛ í wɔ̃́ sùua kɛ? Nɛ̀ ɓa kɛɛ, ìí gbaa kɛ mia lɛ̀ɛ. Wálà lɛ́ ɓa kɛ à lɛ̀ɛ.”

⁵Yé nɔ́ Ánànáyà e wɔ̃́ e kéa ma nɔ́ɔ, e dà tã́ã̀ e bílí ká. Mia séĩ́ lɛ́ o wɔ̃́ ma lɛ́ e gbɛ̃̀ à mɔ̀ɔ, o paà e kɛá túó ká.

⁶Gɔ̃à nɛ̀ĩ́ o ɓɔ gbaa, o sɔ kpɛ́nɛ́ à ká, o ló à ká, wa bĩ̀ĩ̀.

⁷Lɛ̀ pɛ́ e kélɛ̀ áwà yààkaa e diea, à na bɛ̃̀ɛ̃ áà wàà kɛ́ì. Kɛɛ lɛ̀ɛ́ gbaa wɔ̃́ lɛ́ à kɛɛ̀ e kɛáa yí dɔ.

⁸Pílɛ̀ a gèe à lɛ̀ɛ, “Wɔ̃́ gèe m lɛ̀ɛ. Pɛlèe lɛ́ ka sɔ̀lɔ̀ ɓo tã́ã̀ ka lɔ̀ɔ̀ dɔɔ mɔ̀ɔ, ye lɛ́ nɔ́ɔ?” A gèe gbaa à lɛ̀ɛ, “M̀m̀, à séĩ́ lɛ.”

⁹Pílɛ̀ a gèe gbaa à lɛ̀ɛ, “Mɛ́ e kɛ lɛ́ kà i dɛ̃ ka yà ka gé kɛɛ ká ko Dàa-mì zì Gɛ̀ɛ̀ yí dã́ ɓɛ? Mia lɛ́ o i dɛ̃ bĩ̀ĩ̀a, o dɔ̀á káa lé mɔ̀ dɛɛ ká. O nɔ́ nupìà lóò ɓi bɛ̃̀ɛ̃ i ká nɔ́ kíli.”

¹⁰Yé e kɛ nɔ́ kília, lééa e dà gbaa Pílɛ̀ gã̀ dṹɔ̃̀ e bílí ká. Gɔ̃à nɛ̀ĩ́ o wàà gbaa kɛ́ì. Wa gɛ̃̀ gbaa dàá e bílí ká. Wa sí gbaa, o ló à ká, wa bĩ̀ĩ̀ e dɛ̃ sɔ́nɔ́.

¹¹Wálà-mìà séĩ́, ɛ̃́ɛ̃́ mia séĩ́ yé o tó lɛ́ o wɔ̃́ e kéa maa, o paà e kɛá túó kpó-kpó ká.

¹²Àpɔ́sɔ̀lɔ̀ vɔ̀ɔ o wɔ̃́ kpàlézɛ̀ ɛ̃́ɛ̃́ à lé-pa zɛ̀ nì kɛ búnùzɛ̀ míáa nyìɛ́. Mia séĩ́ lɛ́ o zò dɔɔ̀ e kɛá Zízɛ̀ mɔ̀ɔ, óò pa o kíe mɔ̀ gbùlù lɛ́ ò si Sɔ́lómɔ̀ yàlà-pìèa wì.

¹³Yé bɛ̃̀ɛ̃ míáa o kɛ o tɔ́ yiè gèepìàa, o dò zò lɛ̀ɛ́ gbaa kɛ gágà kɛ é dà wà pà-kíe-mɔ̀ɔ bà.

¹⁴Kɛɛ mia lɛ́ o zò dɔɔ̀ e kɛá ko Dàa-mì mɔ̀ɔ, o là e kɛ kpɔ́pìà gɔ̃à wà loà nì o bòò kíe ká zɛ̀ ká teele.

¹⁵Wɔ̃́ e kéa kɛɛ̀ yía, mia o kɛ lópìà mia kɔ̃́ṹ-kɔ̃̀ũ̀ ká zi ɓɛ̀lɛ̀ĩ̀-fĩ̀ã̀ píé, wáà o wɔ̀ɔ̀ kpĩ̀ĩ̀ wà sàa nì o là píé. Wa kɛ kíli, kɛɛ yé vɔ̀ Pílɛ̀ aà kɛ diepìàa, kɛɛ à bĩ́ é ló míá o kília o dò là.

¹⁶Mia gbũ e kɛ gópìà sɛ́lɛ́ kélé kélé lɛ́ e Zùlúsàlɛ̀ɛ yí píé, wáà nù yáá-mìà wà mia lɛ́ pɛ yɔɔ e kɛ o píéa ká. O séĩ́-séĩ́ o la yáá lɛ́ e kɛ o kɛpìàa bà.

¹⁷Yé e kɛ kília, sálà-ɓò-Wálà-mɔ̀-mìà wũ-là-mì, ɛ̃́ɛ̃́ mia séĩ́ lɛ́ o kɛ à píé, lɛ́ o kɛ Sáyúsíì-mìà dò káa, o paà e kɛá dàa-gbe-là ká. O wɛ̀lɛ̀ gbaa,

¹⁸o àpɔ́sɔ̀lɔ̀ vɔ̀ɔ kṹ, o o dùò gòmɛ́nɛ̀ bĩ́-kɛ̀ì.

¹⁹Bĩ́ e kília míàa, ko Dàa-mì là vɔ-mì e bĩ́-kà e kília lé ɓo, e àpɔ́sɔ̀lɔ̀ vɔ̀ɔ ɓɔ pɛlɛí, áà gèè o lɛ̀ɛ,

²⁰“Kà lo ká dɔ sálà-ɓò-Wálà-lɛ̀ɛ-kàa wì, káà kɛ̀ɓe dɛɛ e kéa séĩ́ wɔ̃̀ gèè mia lɛ̀ɛ.”

²¹Àpɔ́sɔ̀lɔ̀ vɔ̀ɔ o à ma. Yé lɛ̀-kpɛ̀i gànà e ɓɔɔ, o ló gbaa Wálà-kàa wì, wáà pɛ zɔ̃̀ɔ̃̀ míáa lɛ̀ɛ. Sálà-ɓò-Wálà-mɔ̀-mìà wũ-là-mìa wà mia lɛ́ o kɛ à píéa, o mɛ̀ĩ́-sà ɓo-mìà séĩ́, lɛ́ o Zúù-mìà dìè-dìè vɔ̀ káa, o o súo kɛ, kɛ ó pá o kíe mɔ̀. Lɛ̀ e kɛ kília, o nɛ́ vɔ bĩ́-kàa wì, kɛ é ló á gèe mia lɛ̀ɛ ó nu àpɔ́sɔ̀lɔ̀ vɔ̀ɔ ká.

²²Kɛɛ lɛ̀ lɛ́ vɔ-mìàa o ɓɔ yía, òó gbaa àpɔ́sɔ̀lɔ̀ vɔ̀ɔ gɛ̃̀ yi. O yɛ́ o zí, o nu, wa gèe,

²³“Lɛ̀ lɛ́ ko ɓɔ bĩ́-kàa mɔ̀ɔ, à lé dùoò e kɛá. Ɛ́ɛ̃́ nyìɛ-kɛ̀-bĩ́-kàa-mɔ̀-mìàa o kɛ dɔ̀á à lé mɔ̀. Kɛɛ lɛ̀ lɛ́ ko káa lé ɓoa, kòó gbaa mi nɔ́ɔ fé dò gɛ̃̀ yi.”

²⁴Lɛ̀ lɛ́ nyìɛ-kɛ̀-Wálà-kà-mɔ̀-mìà wũ-là-mìa, wà sálà-ɓò-Wálà-mɔ̀-mìà kpànazɛ̀ɛ wa maa, o kɛ o yɛ́lɛ́ táápìà wɔ̃́ lɛ́ e kɛ àpɔ́sɔ̀lɔ̀ vɔ̀ɔ káa yí.

²⁵Lɛ̀ e kɛɛ, gɔ̃ dò e wàà kɛ́ì, áà gèè o lɛ̀ɛ, “Kà lɛ̀ gɛ̃̀. Gɔ̃à lɛ́ ka o dùò bĩ́-kɛ̀ìa, o dɔ̀á Wálà-kà wì, wáà pɛ zɔ̃̀ɔ̃̀ mia lɛ̀ɛ.”

²⁶Yé e kɛ kília, nyìɛ-kɛ̀-Wálà-kà-mɔ̀-mìà wà o wũ-là-mìa, o ló o nu àpɔ́sɔ̀lɔ̀ vɔ̀ɔ ká. Òó gbaa nu o ká gana ká. Ƃii o kɛ túópìà yékɛ̀ míáa ó o pá gɛ̀lɛ̀ ká.

²⁷O nu àpɔ́sɔ̀lɔ̀ vɔ̀ɔ ká, o o kɛ o dɔ mɛ̀ĩ́-sà ɓo-mìàa wɛlɛ mɔ̀. Sálà-ɓò-Wálà-mɔ̀-mìà wũ-là-mìa e o wɛ̃́ĩ́-lɔ̀ɔ kɛ.

²⁸Ɛ́ɛ̃́ a gèe o lɛ̀ɛ, “Kɔa gèe ka lɛ̀ɛ kpó-kpó ɓo kélɛ̀ yékɛ̀ ká pɛ zɔ̃̀ɔ̃̀ gɔ̃́ e kéa tɔ́ yí. Kɛɛ kà lɛ̀ gɛ̃̀, kaà ka zì pɛ́ kà zɔ̃̀ɔ̃̀ɔ, kɛ aà wɛ̃̀ĩ Zùlúsàlɛ̀ lɛ̀ séĩ́ mɔ̀. Káà nàà ká gɔ̃́ e kéa léà-káá-wɔ̃̀ kpɔ́ ko wĩĩ́.”

²⁹Pílɛ̀ wà àpɔ́sɔ̀lɔ̀ vɔ̀ yé o tóa wa là nìɛ̀ weeá kélɛ̀, “Lɛ ko mɔ̀ kɛ kó Wálà wéè kɛ. Ko wá zèe mia wéè kɛɛ̀ wɛ̃́ĩ̀.

³⁰Lɛ̀ lɛ́ ka Zízɛ̀ zɛ à pà kɔ́lɔ́sì mɔ̀ káa, Wálà lɛ́ e ko dàa ye dàà nì wà Wálà káa, e à wɛ̀lɛ̀ ga kɛ̀lɛ̀.

³¹Wálà e à sí, e lóá lɛ̀í, kɛ é kɛ à kɔ̀ yiè yí, ɛ̃́ɛ̃́ kɛ é kɛ mia wũ-là-mì wà mia La-mì ká. A kɛ kíli, kɛɛ é zi kɛ ɓe Éézɛ̀lɛ̀-mìà lɛ̀ɛ, kɛ ó o sɔ̃̀ɔ̃ yɔɔ mɛ́ vɔ̀ɔ, ɛ̃́ɛ̃́ kɛ o zì kɛ-wɔ̃̀ yɔɔ é ɓo o wũ mɔ̀.

³²Ko wɔ̃́ nì e kéa kélá ká. Ɛ́ɛ̃́ Gɛ̀ɛ̀ Púlú lɛ́ Wálà à nɔ mia lɛ́ ò à wéè kɛ̀ɛ lɛ̀ɛ bɛ̃̀ɛ̃ lɛ nɔ́ wɔ̃́ e kília kélá ká nɔ́ kíli.”

³³Lɛ̀ míáa o wɔ̃́ nì e kéa maa, wɔ̃́ e o wàa kpó-kpó ɓo, tó wáà nàà ó àpɔ́sɔ̀lɔ̀ vɔ̀ɔ zɛ.

³⁴Kɛɛ gɔ̃à lɛ́ o kɛ yía, o doó-mì e wɛ̀lɛ̀ e dɔ. E kɛ Fálásíì mi dò lɛ́ ò si Gɔ̀mélìàa ká. E kɛ Wálà là lɔ́ɔ̀ɔ zɔ̃̀ɔ̃̀-mì lɛ́ mia séĩ́ o kɛ ɓɛ̀lɛyà nɔpìà à lɛ̀ɛ ká. A gèe mia lɛ̀ɛ ó ɓɔ àpɔ́sɔ̀lɔ̀ vɔ̀ɔ ká pɛ́lɛ̀ zèí e ɓéĩ́ ká.

³⁵Lɛ̀ e kɛ kília, a gèe mɛ̀ĩ́-sà ɓo-mìàa lɛ̀ɛ kélɛ̀, “M ɓɛ́ĩ̀ Éézɛ̀lɛ̀-mìà, kà ka líé dɔ wɔ̃́ lɛ́ kà nàà ká kɛ gɔ̃à o kéa káa kɛɛ̀ ká.

³⁶Lúó dò káa, Túdà e ɓɔ, áà e dìè kɛ̀ mi kpànazɛ̀ dò ká. Lɛ̀ e kɛ kília, gɔ̃à lɛ́ o kɛ vɔ̀ kélɛ̀ mia wũ yììsɛ lɛ́ ɓea, o kɛ tò-à-píé-mìà ká. Kɛɛ wa zɛ, là tòà-píé-mìàa o wɛ̃̀ĩ gbaa, ɛ̃́ɛ̃́ à zì kɛ-wɔ̃̀ nì e kɛ gbaa wɔ̃́ fɛ́í-fɛ̀ì ká.

³⁷Yé à bɛ̃̀ɛ̃ e kɛ kília, gɔ̃ lɛ́ ò à si Zúdà lɛ́ è go Gálàlíìa, e kɛ ɓe lúó lɛ́ o kɛ mia lónípìà à káa ká. À bɛ̃̀ɛ̃ e mia gbũ vũ nɔ́ e mɔ̀ kíli. Kɛɛ o à bɛ̃̀ɛ̃ zɛ nɔ́ kíli. Là tòà-píé-mìà séĩ́ o wɛ̃̀ĩ gbaa.

³⁸À mɔ́ɔ̀ wɔ̃̀ mɔ̀ɔ, wɔ̃́ e kéa yía, ḿm̀ nàà ḿ gèe ka lɛ̀ɛ, yékɛ̀ ká wɔ̃́ nɔ́ɔ fé dò kɛ gɔ̃à o kéa ká. Kà gó o mɔ̀. Ƃii é kɛ̀á wɔ̃́ lɛ́ waà yà o gé, ɛ̃́ɛ̃́ o zì yɛɓo ò kɛ̀ɛ, é kɛ̀á lɛ mia wũ-kèlè-yí-wɔ̃̀ káa, wɔ̃́ e kília lɛ̀ɛ́ ló sólóó-tùò ɓoò.

³⁹Kɛɛ é kɛ̀á lɛ́ɛ̀ go Wálà kɛ̀lɛ̀ɛ, ka kɔ̀ lɛ̀ɛ́ ló nɔ́ ɓɔ̀ɔ diè o là. Ká gɔ̃̀á ka líé dɔɔ̀ɔ, káà lo lèĩ kɛɛ̀ gèlè-gɔ̃̀-Wálà-ká mìà ká.”

⁴⁰Mɛ̀ĩ́-sà ɓo-mìàa, o wéé gbaa à wéè mɔ̀. O àpɔ́sɔ̀lɔ̀ vɔ̀ɔ súo kɛ gbaa kɛ́ì. O o mɛ̀, wáà gèè o lɛ̀ɛ yékɛ̀ ó gbaa wɔ̃́ gèe Zízɛ̀ tɔ́ ká. O kã́ gbaa o mɔ̀, o ló.

⁴¹Àpɔ́sɔ̀lɔ̀ vɔ̀ɔ o gó gbaa míáa sã́ã́-kɔ̀ yí. O gé áà lì kélɛ̀ Wálà aà o sí, kɛɛ bɛ̀i é kɛ o mɔ̀, kɛɛ wɔ̃́ yɛ́lɛ̀ zɛ̀ é kɛ o ká Zízɛ̀ tɔ́ wɛ̃́ĩ̀a mɔ́ɔ̀ wɔ̃̀ mɔ̀.

⁴²Lúó séĩ́ káa, o gbɛ̃̀ wáà pɛ zɔ̃̀ɔ̃̀, wáà wɔ̃́ làṹ yiè, lɛ́ à gbɛ̃̀ɛ̃̀ e kɛá Zízɛ̀ Kɛ́lɛ̀ì mɔ̀ɔ, gèè sálà-ɓò-Wálà-lɛ̀ɛ-kàa wì ɛ̃́ɛ̃́ mia píé kɛ́ì píé.