Read Yamano Àpɔ́sɔ̀lɔ̀ 6 Bible Online

Àpɔ́sɔ̀lɔ̀ 6 - Yamano bible

Àpɔ́sɔ̀lɔ̀ 6

¹Lúó e kília káa, lɛ̀ lɛ́ tò-Zízɛ̀-píé-mìà là e kɛ kpɔ́pìàa, wéé e kɛ Zúù-mìà yé ò Gílíì-wè gèea, wà o yé ò Zúù-wè gèea o fĩ̀ã̀. Zúù-mìà yé o kɛ Gílíì-wè gèepìàa, wa gèe kélɛ̀ òó gbaa o yɛ́lɛ́ kpeĩ kɛ o zì loà gã̀ã zɛ̀ píé sɛ̀, yé waà kɛ pɛ yí gìnìpìà mia mɔ̀ lúó séĩ́ káa ká.

²Yé e kɛ kília, àpɔ́sɔ̀lɔ̀ vɔ̀ vũ̀ doó wɛ́lɛ́ pèèlɛɛ o tò-Zízɛ̀-píé-mìàa séĩ́ súo kɛ o kíe bà, wáà gèè o lɛ̀ɛ, “Ye wá kpeĩ kɛ kó Wálà là wéa gèe wɔ̃̀ dà ko kɔ̀ mɛ̀ĩ́ pɛ yí gìniì mɔ́ɔ̀ wɔ̃̀ mɔ̀.

³À mɔ́ɔ̀ wɔ̃̀ mɔ̀ɔ, m lèe-gé vɔ̀, kà mia sálápèèlɛ lɛ́ mia ò à yí dɔ kélɛ̀ o paà lɛ Gɛ̀ɛ̀ Púlú wà gíkã́ káa, sí ka bà. Kóò lo o gbɛ̃̀ɛ̃̀ wɔ̃́ nì e kéa wũ là,

⁴kɛɛ ko bɛ̃̀ɛ̃ kó ko dìè nɔ sɛ̀nɛ ɓoò wà yɛɓo lɛ́ e Wálà là wéa gèeè káa lɛ̀ɛ.”

⁵Wɔ̃́ wa gèea e kɛ mia séĩ́ zò-dà-wɔ̃̀ ká. Lɛ̀ e kɛ kília, o Tíímì lɛ́ à paà e kɛà Gɛ̀ɛ̀ Púlú wà zò-dɔ̀à-mɔ̀ káa sí. Ɛ́ɛ̃́ o Félè, e bɛ̀i Pɔ́lɔ́kɔ̀lɔ̀, ɛ̃́ɛ̃́ zeĩ́ Nàkénà, ɛ̃́ɛ̃́ Támɔ̀, e bɛ̀i, Pámínà, ɛ̃́ɛ̃́ Níkólà lɛ́ è go Ã́téɔ̀, lɛ́ aà Zúù-mìà zì gbìnì-Wálà-lɛ̀ɛ kṹ e zɔ̃̀ɔ̃̀ káa, o o sí.

⁶O míá o kéa nɔ gbaa àpɔ́sɔ̀lɔ̀ vɔ̀ lɛ̀ɛ. Àpɔ́sɔ̀lɔ̀ vɔ̀ɔ o o kɔ̀ kpɔ́ o là, lɛ̀ lɛ́ o nyɛ sɛ̀nɛ ɓoò mɔ̀ɔ ká.

⁷Wálà zì lé-wèa e wɛ̃̀ĩ gbaa, áà lò e líé. Tò-Zízɛ̀-píé-mìà lɛ́ o kɛ Zùlúsàlɛ̀ɛ, o là e kɛ kpɔ́pìà nɔ́ teele. Ɛ́ɛ̃́ sálà-ɓò-Wálà-mɔ̀-mìà búnù-búnùzɛ̀ o zò-dɔ̀à-mɔ̀ wɔ̃̀ e kília kṹ o zɔ̃̀ɔ̃̀ ká.

⁸Tíímì paà e kɛá yíkɛ̀ gáàa wà Wálà zì zò-kɛ̀-sɛ̀ ká kpó-kpó ɓo. E kɛ wɔ̃́ kpàlé-kpàlézɛ̀, wà wɔ̃́ lé-pa zɛ̀ nì kɛpìà míáa bà.

⁹Kɛɛ mia gbṹũ̀ o kɛ yí. Míá o kília o kɛ Zúù-mìà zì Wálà-kà doó-mì wì-mìà ká. Ká e kília o kɛ à sípìà mia lɛ́ o ɓoò lɛ lùò-là yía, wà ká. Zúù-mìà yé ò go Sàlĩ́ĩ̀ wà Ɛ́lèzánìàa o kɛ à wì. Wà Zúù-mìà yé ò go Sìlísìà wà Ésìàa, o káá o kíe bà, wáà tèé dà Tíímì ká.

¹⁰Kɛɛ Gɛ̀ɛ̀ Púlú e gíkã́ nɔ Tíímì lɛ̀ɛ, ɛ̃́ɛ̃́ a kɛ tó míáa òó bɛ̀i à lé yɛ́ɛ̀.

¹¹O mia dò fɔ́nɔ́ nɔ gbaa, kɛ ó nu ó gèe kélɛ̀, “Ko à wéè ma, áà wɔ̃́ yɔɔ̀ yɔɔ̀ gèè Móózè wà Wálà o gbĩ mɔ̀.”

¹²O à kɛ gbaa tíé e kã́ míáa, wà mia dìè-dìè vɔ̀ɔ, ɛ̃́ɛ̃́ Wálà kii-dɔ-mìàa o mɔ̀. O nu Tíímì píé, wa kṹ, o ló à ká mɛ̀ĩ́-sà ɓo-mìàa píé.

¹³Lɛ̀ e kɛ kília, o nu gbaa mia lɛ́ o nɛ̀ kpɔ́ Tíímì mɔ̀ɔ ká. Nɛ̀-mìà ò kília wa gèe kélɛ̀, “Gɔ̃́ e kéa lɛ́ɛ̀ e lé si kò Wálà-kàa, wà Móózè là Lɔ́ɔ̀ɔ o yí teele.

¹⁴Ko à wéè ma, áà gèè kélɛ̀ Zízɛ̀ lɛ́ e ké, lɛ́ è go Názàlɛ̀ɛ, lɛ́ɛ̀ lo Wálà-kàa wíì tã́ã̀, ɛ̃́ɛ̃́ lɛ́ɛ̀ lo wɔ̃́ kɛ-kɔ̀ séĩ́ lɛ́ Móózè aà zɔ̃̀ɔ̃̀ mɔ́ɔ wɔ̃̀ ɓoò tã́ã̀.”

¹⁵Mɛ̀ĩ́-sà ɓo-mìà lɛ́ o kɛ yàá yia, o séĩ́-séĩ́ o nyìɛ kɛɛ̀ e kɛá Tíímì mɔ̀. O à wɛlɛ gɛ̃̀, à ɓɔɔ̀ e kɛá Wálà là vɔ-mì wɛlɛ bà.