Read Yamano Àpɔ́sɔ̀lɔ̀ 7 Bible Online

Àpɔ́sɔ̀lɔ̀ 7 - Yamano bible

Àpɔ́sɔ̀lɔ̀ 7

¹Sálà-ɓò-Wálà-mɔ̀-mìà wũ-là-mìa e Tíímì wɛ̃́ĩ́-lɔ̀ɔ kɛ kélɛ̀, “Zía lɛ́ lɛ à káa?”

²Tíímì a yí zṹ weeá kélɛ̀, “M ɓɛ́ĩ̀ ye-mìà wà m dàa nì, kà ka tóó dɔ m mɔ̀. Wálà lɛ́ e lɛ̀-fɔ̀nɔɔ̀ɔ mɔ̀ɔ, e ɓíé ko dàa Éɓɔ́lɔ́hã́ã̀ là, lɛ̀ lɛ́ e kɛ Mɛsèpàtémìà, kɛ é tĩã́ lóò e pà kã́ã̀ Hɛ́lɔ̃̀ɔ ká.

³A gèe à lɛ̀ɛ, ‘Ì gó i pà, ɛ̃́ɛ̃́ ì wɛ̀lɛ̀ i píé-kɛ́ì-mìà bà, í ló lɛ̀ lɛ́ m̀ lo à zɔ̃̀ɔ̃̀ i lɛ̀ɛ mɔ̀.’

⁴Lɛ̀ e kɛ kília, e gó lɛ̀ lɛ́ ò si Kàdíàa mɔ̀, e ló, e e yàlà kṹ lɛ̀ lɛ́ ò si Hɛ́lɔ̃̀ɔ mɔ̀. Lɛ̀ lɛ́ Éɓɔ́lɔ́hã́ã̀ dàa e gaa, Wálà a kɛ Éɓɔ́lɔ́hã́ã̀ e nu sɛ́lɛ́ lɛ́ ka à yí pɛ́nɛɛ e kéa yí.

⁵Kɛɛ Wálà lɛ̀ɛ́ gbaa nɔ́ ɓɔ̀ɔ Éɓɔ́lɔ́hã́ã̀ gba à lɛ̀ dò ká à dìè là pɛ ká. Lɛ̀ɛ́ gbaa bɛ̃̀ɛ̃ gã̀-fùlùà yí doó nɔ à lɛ̀ɛ. Kɛɛ Wálà e e wè dɔ à lɛ̀ɛ kélɛ̀ lɛ́ɛ̀ lo à nɔɔ̀ à lɛ̀ɛ, ɛ̃́ɛ̃́ lɛ́ɛ̀ lo kɛɛ̀ là pɛ ká, ɛ̃́ɛ̃́ à sùu-là-mìà lɛ́ ò lo tóò à mɛ̀ĩ́a, wà pɛ ká. Lúó lɛ́ Wálà e e wè e kéa dɔá Éɓɔ́lɔ́hã́ã̀ lɛ̀ɛ, kɛɛ Éɓɔ́lɔ́hã́ã̀ lɛ̀ɛ́ nɛ́ gbɛɛ ye nɛ́.

⁶Wɔ̃́ lɛ́ Wálà a gèe à lɛ̀ɛ, gɛ̃̀ e ké. ‘I sùu-là-mìà óò lo kɛɛ̀ lɔ̀ɔ̀-mìà ká sɛ́lɛ́ gbɛɛ yí. Óò lo kɛɛ̀ lùò vɔ̀ ká yi. Mia óò lo o sã̀ wɛlɛ yɔɔ zɛ̀ dɔɔ̀ kɛ̀ɛ̀ wũ yììsɛ píé.

⁷Kɛɛ ḿm̀ lo mɛ̀ĩ́-sà káà sɛ́lɛ́ lɛ́ ò yɛɓo kɛ̀ à yí-mìà lɛ̀ɛ wĩĩ́. Yé aà kɛ kília, óò lo góò sɛ́lɛ́ e kília yí, tó wáà gbìnì m lɛ̀ɛ lɛ̀ e kéa mɔ̀.’ Wɔ̃́ lɛ́ Wálà a gèea, ye lɛ́ ɓɛ.

⁸Lɛ̀ e kɛ kília, Wálà e bɔ̃́ɔ̃́-zɛ-wɔ̃̀ kɛ wɔ̃́ gɔ̃̀á ká à wè lɛ́ a dɔ Éɓɔ́lɔ́hã́ã̀ lɛ̀ɛ, mɔ́ɔ̀ wɔ̃̀ mɔ̀. Lɛ̀ e kɛ kília, Éɓɔ́lɔ́hã́ã̀ e Áázè bɔ̃́ɔ̃́ zɛ lɛ̀ lɛ́ o la à ká, lɛ́ à lúó e die sálàkaa ká. Áázè lɛ́ e Zékɔ̀ yea. Zékɔ̀ bɛ̃̀ɛ̃ e ko gòà-yí-tɔ̃̀ũ̀ vɔ̀ vũ̀ doó wɛ́lɛ́ pèèlɛɛ ye.

⁹“Ko gòà-yí-tɔ̃̀ũ̀ vɔ̀ɔ o kɛ dàa-gbe-là kɛpìà Zósɛ̀ ká. O à lɔ̀ɔ̀ dɔ mia mɔ̀ kɛɛ é kɛ lùò ká Ízè-sɛ̀lɛ̀ yí. Kɛɛ Wálà e kɛ à píé.

¹⁰À zì wɔ̃́ nyɔ́ɔ̀ɔ gɛ̃̀ɛ̃ɛ̃̀ séĩ́ yía, Wálà e à la à kɛ̀lɛ̀. Lɛ̀ Zósɛ̀ e ɓɔ Fɛ́ɛ́lò, lɛ́ e kɛ sɛ́lɛ́ líé-sí-mì ká Ízèa wɛlɛ mɔ̀ɔ, Wálà e à kɛ gíkã́ e dà Zósɛ̀ gé. Ɛ́ɛ̃́ Fɛ́ɛ́lò zò e dà à píé. E à kɛ Ízè-mìà séĩ́ wà à píé-kɛ́ì-mìà o wũ-là-mì ká.

¹¹Lɛ̀ e kɛ kília, lɔ̀ɔ e dà Ízè ɛ̃́ɛ̃́ Kénà lɛ̀ séĩ́ mɔ̀. Mia o kɛ wɔ̃́ nyɔ́ɔ̀ɔ gɛ̃̀pìà kpó-kpó ɓo. Ko dàa ye dàà nì òó gbaa kɛ léɓèlè gɛ̃̀pìà ó ɓèlè.

¹²Kɛɛ yé Zékɔ̀ a ma kélɛ̀ léɓèlè lɛ Ízèa, e e gbe nì lɛ́ o ko dàa ye dàà nì káa, vɔ kɛ ó ló ɓɔ bèĩzɛ̀ ɓoò yi.

¹³Ló tò-ko-mɔ̀ zɛ̀ wa ɓo Ízèa, Zósɛ̀ a kɛ à lèe-gé vɔ̀ o à dɔ. À lɛ̀ mɔ̀ lɛ́ Fɛ́ɛ́lò e Zósɛ̀ mìà nì dɔɔ̀ gã̀ gbɛ̃̀ yia.

¹⁴Yé e kɛ kília, Zósɛ̀ e wè-vɔ dɔ e dàa Zékɔ̀ píé. A gèe à lɛ̀ɛ wà e píé-kɛ́ì-mìà séĩ́ ó nu Ízè. Míá o kília, o kɛ vũ̀ sálápèèlɛ wɛ́lɛ́ sɔ́ɔ́li.

¹⁵Yé e kɛ kília, Zékɔ̀ e ló gbaa Ízè. Wà ko dàa ye dàà nì o tó à lɛ̀ mɔ̀, o ga.

¹⁶O ló o bílí ká lɛ̀ lɛ́ ò si Síkɔ̀ɔ lɛ̀ mɔ̀. O o bĩ̀ĩ̀ mia bĩ̀ĩ̀pìà lɛ́ Éɓɔ́lɔ́hã́ã̀ aà lɔ́ mɔ́ Hémɔ̀ sùu-là-mìà kɛ̀lɛ̀ sévà gbá dò káa lɛ̀ mɔ̀.

¹⁷“Lúó lɛ́ e kɛ Wálà mɔ̀ kɛ é wè-dɔ-wè lɛ́ a dɔ mɔ́ Éɓɔ́lɔ́hã́ã̀ lɛ̀ɛ é à mɔ́ɔ̀ wɔ̃̀ kɛáa, lɛ̀ e ɓɔ kɔ̀ɛ́ɛ, kɛɛ ko mìà nì lɛ́ o kɛ Ízèa, kɛɛ o là aà kpɔ́ yí gbùò zɛ̀.

¹⁸Lɛ̀ à lɛ̀ e ɓo pèèlɛɛ, sɛ́lɛ́ líé-sí-mì gbɛɛ lɛ́ lɛ̀ɛ́ gbaa kɛ Zósɛ̀ dɔpìàa, e gbɛ̃̀ gbaa mia líé síì mɔ̀ Ízè.

¹⁹E kɛ ko mìà nì fùlupìà, tó à zò e kɛ yɔɔ ko dàa ye dàà nì ká. E à kɛ o wà nɔ́ɔ̀ɓé dɛɛ dùò luú, kɛɛ ó ga.

²⁰O Móózè ye lúó e kília ká. E kɛ nɛ́fú dɛɛ ɓɛ̀lɛ̀ɛ zɛ̀ kpó-kpó ká. À mìà nì o dɔ à là mɛnɛ yààka píé o píé kɛ́ì.

²¹Lɛ̀ o à dùò luúa, Fɛ́ɛ́lò lú e à sí tã́ã̀, e ló à ká, e à tòlò lɛ̀ zí áá dɔɔ̀á e dìè là nɛ́ làa lɛ́ ɓe.

²²O Ízè-mìà zì gíkã́ séĩ́ zɔ̃̀ɔ̃̀ Móózè lɛ̀ɛ. E kɛ gbaa gɔ̃ kpànazɛ̀ kpó-kpó ká e lé-wè wà e zì wɔ̃́ kɛ-kɔ̀ mɔ̀.

²³“Lɛ̀ Móózè ye-kɛ̀ɛ̀ e kɛ vũ̀ yììsɛɛ, a yà e gé kɛ é ló ɓɔɔ̀ e ɓɛ́ĩ̀ Éézɛ̀lɛ̀-mìà píé.

²⁴Lɛ̀ e lóa, e Ízè mi dò gɛ̃̀, áà wɔ̃́ niàa kɛ̀ Éézɛ̀lɛ̀-mìà doó-mì ká. Lɛ̀ e kɛ kília, e ló é gbũ e ɓɛ́ɛ e kília mɔ̀. E e ɓɛ́ɛ e kília gbɔ̀ ɓo Ízè mi e kília zɛɛ̀ ká.

²⁵Móózè a gɛ̃̀ ɓɔ̀ɔ kélɛ̀ à dìè-tĩ́ mìà nì óò lo à yí dɔɔ̀ kélɛ̀ Wálà lɛ́ɛ̀ lo kpɔ́ɔ̀ à yí, tó e o la. Kɛɛ òó gbaa wɔ̃́ e kília yí ma.

²⁶Lɛ̀ à lɛ̀ e kpɛ̀ia, e bɛ̀i e Éézɛ̀lɛ̀-mìà pèèlɛ gɛ̃̀, wáà gèlè gɔ̃̀. E à kɛ-zì naa kɛ é zò-yà-tã́ã̀ nɔ o lɛ̀ɛ. A gèe o lɛ̀ɛ, ‘Gɔ̃à ka ké ɓɛ, ka lèe-gé vɔ̀ ká. Mɛ́ e kɛ lɛ́ kà wɔ̃́ niàa kɛ̀ ka kíe nì ká ké?’

²⁷Kɛɛ mi lɛ́ e kɛ wɔ̃́ lɛ́ ye wá zi mɔ̀ɔ kɛpìà e ɓɛ́ɛ káa, e Móózè nyɔ̀ɔ e gó à gɛ̀nɛ̀, áà gèè à lɛ̀ɛ, ‘Dé e i kɛ ko wũ-là-mì wà kò mɛ̀ĩ́-sà ɓo-mì ká?

²⁸Ƃáà nàà í m zɛ lɛ̀ zí i Ízè-nɛ̀ɛ zɛ yalá à káa lɛ́ ɓe?’

²⁹Lɛ̀ Móózè e wɔ̃́ sùua maa, e wàà e gó Ízè. E kɛ gbaa sɛ́lɛ́ lɛ́ ò si Mídĩ̀ã̀a yí. E nɔ́ɔ̀ɓé gɔ̃à zɛ̀ pèèlɛ ye à lɛ̀ mɔ̀.

³⁰“Lɛ̀ kɛ̀ɛ̀ vũ̀ yììsɛ e diea, Wálà là vɔ-mì e ɓíé Móózè là. Vɔ-mì e kília, e kɛ tíé kṹã̀a lɛ́ e kɛ yílí dò wĩĩ́ dɔ̀á yɛ̀í là lɛ́ e kɛ Sáyã̀-tɔ̃̀ũ̀ sɔ́nɔ́ɔ mɔ̀.

³¹Móózè lé kpó-kpó e pa lɛ̀ lɛ́ e wɔ̃́ sùua gɛ̃̀ɛ ká. E nyɔ̀ɔ yílí e kília ká kɔ̀ɛ́, kɛ á mɛ́ nyɛ. Kɛɛ e ko Dàa-mì wéè ma weeá kélɛ̀,

³²‘Ma lɛ́ m i dàa ye dàà nì wà Wálà káa. Ma lɛ́ m Éɓɔ́lɔ́hã́ã̀, e bɛ̀i Áázè, ɛ̃́ɛ̃́ Zékɔ̀ nì wà Wálà káa.’ Móózè mɛ́ e tàle túó ká, ɛ̃́ɛ̃́ à zò lɛ̀ɛ́ gbaa kɛ gágà, kɛ é lɛ̀ gɛ̃̀ yi.

³³Ko Dàa-mì a gèe à lɛ̀ɛ, ‘Ƃà sàkpàa ɓo i gã̀ mɔ̀, ɓii lɛ̀ lɛ́ i dɔ̀á yia, lɛ m̀ lɛ̀ púlú ɓɛ ká.

³⁴Maà lɛ̀ gɛ̃̀, maà m̀ mia nì gɛ̃̀ Ízè-sɛ̀lɛ̀ yí, wáà wàa yɔɔ̀ yɔɔ̀ ɓèlè. Maà o gɔ̃́nɔ́-vĩ̀ ma. Maà nu tã́ã̀ kɛɛ ḿ o la. Nu gbaa, ḿm̀ lo i vɔɔ̀ Ízè.’

³⁵“Móózè lɛ́ Éézɛ̀lɛ̀-mìà òó gbaa naa à káa. O à gèe à lɛ̀ɛ, ‘Dé e i kɛ ko wũ-là-mì wà kò mɛ̀ĩ́-sà ɓo-mì ká?’ À ye lɛ́ Wálà e à vɔ kɛ é kɛ mia wũ-là-mì wà mia la-mì ká là vɔ-mì lɛ́ e ɓíé Móózè là yílí wĩĩ́a zì gbũ̀-mɔ̀ yí zàáa.

³⁶Móózè e míáa líé sí, o gó Ízè-sɛ̀lɛ̀ yí. E kɛ wɔ̃́ kpàlézɛ̀ ɛ̃́ɛ̃́ à lé-pa zɛ̀ nì kɛpìà Ízè, ɛ̃́ɛ̃́ Mɛ̀ĩ́ Zóló là, e bɛ̀i, yɛ̀í là píé kɛ̀ɛ̀ vũ̀ yììsɛ píé.

³⁷Móózè nɔ́ doóa lɛ́ a gèe Éézɛ̀lɛ̀-mìà lɛ̀ɛ, ‘Wálà lɛ́ɛ̀ lo dɔ̀-à-lé-là-mì doó vɔɔ̀ ka lɛ̀ɛ, lɛ̀ zí nɔ́ e m vɔáa káa. Lɛ́ɛ̀ lo kɛɛ̀ ka dìè ka pà mi ká.’

³⁸Lɛ̀ lɛ́ Éézɛ̀lɛ̀-mìà o pá o kíe mɔ̀ yɛ̀í làa, Móózè nɔ́ doóa e kɛ à lɛ̀ mɔ̀. E kɛ yí wà ko dàa ye dàà nì ká, ɛ̃́ɛ̃́ wà Wálà là vɔ-mì lɛ́ e mɛ́ĩ́ ɓo à lɛ̀ɛ Sáyã̀-tɔ̃̀ũ̀ wĩĩ́a, o kɛ yí nɔ́ kíli. Móózè e Wálà lé-wè ɓéèe ɓɛ sɔ̀lɔ̀ ɓo à lɛ̀ mɔ̀, kɛ é nuá ko píé.

³⁹“Kɛɛ ko dàa ye dàà nì wa wɔ̃̀ ɓo o tóó yí, òó gbaa naa kɛ ó à wéè kɛ. O à nyɔ̀ɔ o kɔ̀ mɛ̀ĩ́, wáà gɔ̃̀ o gé kélɛ̀ áá kɛɛ̀ dóo sɛ̀ yé zi aà kɛ ɓe ó ló o mɛ̀ĩ́ Ízèa ká.

⁴⁰Yé e kɛ kília, wa gèe Ɛ́ɛ́lɔ̀ũ̀ lɛ̀ɛ, ‘Ì wálà dò kɛ ko lɛ̀ɛ, kɛ é kɛ ko wɛlɛ mɔ̀. Ƃii gɔ̃́ ò si Móózè lɛ́ e gó ko ká Ézè-sɛ̀lɛ̀ yía, lɛ̀ lɛ́ à lé aà tó à mɔ̀ɔ, kòó à dɔ.’

⁴¹E kɛ o zì kɛ-wɔ̃̀ ká lɛ́ wa mɔ́ɔ̀ kɛ̀ɛ̀-wɛ́lɛ́ dò kɛ ɓo dìì nyɔ̀nɔ́ kpàáà yí lúó e kília káa. O kɛ sálà ɓopìà à mɔ̀. Ɛ́ɛ̃́ o kpílì kɛ, wɔ̃́ lɛ́ wa kɛ kília mɔ́ɔ̀ wɔ̃̀ mɔ̀.

⁴²Kɛɛ Wálà e e ko gbɛ̃̀ o mɔ̀, ɛ̃́ɛ̃́ e e kɔ̀ ɓo o mɔ́ɔ̀ wɔ̃̀ yí, kɛ ó wà gbini ɓo sĩ̀ã́ã̀ŋèlè vɔ̀ lɛ́ o lɛ̀ía lɛ̀ɛ gbaa. Zi lɛ́ à bɛ̃̀ɛ̃ɛ̃̀ lɛ à ká dɔ̀-Wálà-lé-là-mìà wà kíía yía, gɛ̃̀ e ké. ‘Éézɛ̀lɛ̀-mìà, wìì lɛ́ ka zɛ, lɛ́ ka sálà ɓo à ká yɛ̀í là kɛ̀ɛ̀ vũ̀ yììsɛ píéa, sálà e kília ka ɓo m lɛ̀ɛ?

⁴³E kɛ wálà lɛ́ ò si Mólɔ̀ɔ, zì sɔ-ká ká lɛ́ ka kɛ lópìà à káa. Ɛ́ɛ̃́ ka kɛ lópìà zeĩ́ kà wálà yé ò si Lífɛ̃̀a là sĩ̀ã́ã̀ŋèlè bĩ́ ká. Pɔɔ̀ e kília o kɛ kɛ̀ɛ̀-wɛ́lɛ́ lɛ́ kaà pɛ̀ kɛ, kɛ ká gbini à lɛ̀ɛ ká. À mɔ́ɔ̀ wɔ̃̀ mɔ̀ɔ, ḿm̀ lo lóò ka ká Bábɛ́lɔ́ũ̀-sɛ̀lɛ̀ mɛ̀ĩ́.’

⁴⁴“Sɔ-ká lɛ́ e kɛ Wálà zì kɛ̀-o-píé kélá káa, e kɛ ko dàa ye dàà nì kɛ̀lɛ̀ yɛ̀í là. À kɛɛ̀ e kɛá zi lɛ́ Wálà aà gèeá Móózè lɛ̀ɛ é à kɛáa ká. Móózè a kɛ à kɛ-zì lɛ́ à zɔ̃̀ɔ̃ɔ̃̀ e kɛá à lɛ̀ɛ ká.

⁴⁵Lɛ̀ à lɛ̀ e ɓo pèèlɛɛ, ko dàa ye dàà nì lɛ́ waà sɔ-ká e kília sɔ̀lɔ̀ ɓo o dàa nì kɔ̀ yí zàáa, o ló à ká lɛ̀ wà Zásùà nì o kɛ lópìàa ká. O ló à ká sɛ́lɛ́ lɛ́ Wálà aà mia lúó à yí o wɛlɛ mɔ̀ɔ yí. O o yàlà kṹ gbaa à lɛ̀ mɔ̀. Sɔ-ká e kília e tó yi Dèɓé yìì yí e ɓɔ.

⁴⁶Wálà zò dàaà e kɛá Dèɓé píé. Lɛ̀ e kɛ kília, Dèɓé a gèe Wálà lɛ̀ɛ kélɛ̀, ‘Ì à tó ḿ ká dò dɔ ɓí i Zékɔ̀ là Wálà káa lɛ̀ɛ.’

⁴⁷Kɛɛ Sɔ́lómɔ̀ lɛ́ e Wálà là ká e kília dɔɔ.

⁴⁸“Kɛɛ Wálà lɛ́ lɛ pɛ séĩ́ làa, lɛ̀ɛ́ kɛ bɛ̃̀ɛ̃ gɔ̃-dɔ-kà wì. Wɔ̃́ lɛ́ dɔ̀-Wálà-lé-là-mì à gèea, gɛ̃̀ e ké.

⁴⁹‘Ko Dàa-mì láà gèe kélɛ̀, Lɛ̀í lɛ́ e m zì dɔ-táŋáná káa. Tã́ã̀ bɛ̃̀ɛ̃ lɛ́ e m gã̀ gbɛ̃̀à-là-pɛ̀ káa. Ká sùu kpɛɛ̀ lɛ́ ì lo à dɔɔ̀ mɔṹ m lɛ̀ɛ? Lɛ̀ m̀ lo m fĩ́ĩ́ dɔɔ̀ yia, lɛ mɛ́ɛ̀ zàá?

⁵⁰Ḿ gɔ̃̀, ma lɛ́ m pɔɔ̀ e kéa séĩ́ kɛɛ?’

⁵¹“Zi lɛ́ ka wũ yí lɛ à ká gágàa, káà gɛ̃̀. Ka zò píé lɛ nɔ́ lɛ̀ mia lɛ́ òó Wálà dɔɔ, o zò píé lɛ́ ɓe. Zi nɔ́ doóa lɛ́ ka tóó bɛ̃̀ɛ̃ lɛ à káa. Wɔ̃́ nɔ́ doó lɛ́ ka dàa ye dàà nì wa kɛɛ, ye lɛ́ kà gbɛ̃̀ à píé ɓɛ. Ka bɛ̃̀ɛ̃ ka nɔ́ gèlè gɔ̃pìà Gɛ̀ɛ̀ Púlú ká nɔ́ kíli teele.

⁵²Dɔ̀-Wálà-lé-là-mìàa ye kpɛɛ̀ kpó-kpó lɛ́ ka dàa ye dàà nì òó gbaa sã̀ dɔ? Ɛ́ɛ̃́ o mia lɛ́ o Mi Kpeĩ nu-wɔ̃̀ gèe mɔ́ɔ, o o zɛ. Ka bɛ̃̀ɛ̃, mi lɛ́ e nu kília, kaà kɛ gbaa à lé-gó-mìà wà à zɛ-mìà ká.

⁵³Mia nɔ́ doó ka kéa, ka lɛ́ ka Wálà là Lɔ́ɔ̀ lɛ́ là vɔ-mìà wa nɔ mɔ́ ka lɛ̀ɛ tã́ã̀a, ka à sɔ̀lɔ̀ ɓoa. Kɛɛ kàá gbaa wéé à mɔ̀ kɛ ká kɛ.”

⁵⁴Lɛ̀ lɛ́ mɛ̀ĩ́-sà ɓo-mìàa o wɔ̃́ nì e kéa maa, wɔ̃́ e o wàa wɛlɛ yɔɔ zɛ̀, wáà o kɔ̀ kũ̀ o sɔ̃́ɔ̃́ ká.

⁵⁵Kɛɛ Tíímì, lɛ́ à paà e kɛá Gɛ̀ɛ̀ Púlú káa, e lɛ̀ gɛ̃̀ lɛ̀í, áà Wálà zì lɛ̀-fɔ̀nɔ-kɔ̀ɔ gɛ̃̀, ɛ̃́ɛ̃́ áà Zízɛ̀ gɛ̃̀ dɔ̀á Wálà kɔ̀ yiè yí.

⁵⁶A gèe, “Lɛ̀ gɛ̃̀. M lɛ̀í gɛ̃̀ e lé ɓoòa zɛ̀ ká, ɛ̃́ɛ̃́ m Mi Gbe gɛ̃̀ dɔ̀á Wálà kɔ̀ yiè yí.”

⁵⁷O o kɔ̀ kpaa o tóó mɔ̀, wáà gbɛ̀ɛ̀ gágà. O séĩ́ o fìli gbaa à là.

⁵⁸O à yí lúó e gó gbaa sɛ́lɛ́ɛ yí, wáà pà gɛ̀lɛ̀ ká. Míá o kɛ kélá ká yia, o wà sɔ-là-sɔ̀ dɔ̀ kɛ gɔ̃-nɛ̀ lɛ́ ò si Sɔ́ɔ̀ɔ kɛ̀lɛ̀.

⁵⁹O kɛ nɔ́ Tíímì pápìà gɛ̀lɛ̀ ká, lɛ̀ lɛ́ bɛ̃̀ɛ̃ e kɛ wéépìà ko Dàa-mì píéa ká. Áà gèè kélɛ̀, “Ko Dàa-mì Zízɛ̀, ì m gɛ̀ɛ̀ sí ɓà pɛ ká.”

⁶⁰Yé e kɛ kília, e káá e kpuò là, áà gbóó ɓò dóo gágà weeá kélɛ̀, “Ko Dàa-mì. Yékɛ̀ kɛ-wɔ̃̀ yɔɔ e kéa é tó i yɛ́lɛ́ píé o gbĩ mɔ̀.” Yé a gèe kília, à zò e kpɔ́ gbaa à mɔ̀.