Read Yamano Wólómà 1 Bible Online

Wólómà 1 - Yamano bible

Wólómà 1

¹Óò m si Pɔ́ɔ̀. M Kɛ́lɛ̀ì Zízɛ̀ là yɛɓo-kɛ-mì ká. Wálà aà m súo kɛ, kɛɛ ḿ kɛ àpɔ́sɔ̀lɔ̀ ká. E m yà kɔ̀ pɔ̃́ũ̀ doó mɔ̀, kɛ ḿ là wɔ̃́ làṹ yièa gèe.

²Wɔ̃́ làṹ yiè e kília, Wálà aà e wè dɔ à ká mɔ́ pɛ́lɛ̀, áà kàà là dɔ̀à-lé-là-mìà lé, wáà gèè là kíía yí.

³Wɔ̃́ e kília gbɛ̃̀ɛ̃̀ lɛ Wálà Gbe ko Dàa-mì Zízɛ̀ Kɛ́lɛ̀ì mɔ̀. À kɛ̀ mi gbunu káa, à gã̀ gbɛ̃̀ɛ̃̀ e kɛ à ká Dèɓé sùu là.

⁴Kɛɛ à gɛ̀ɛ̀ lɛ́ e kɛ gɛ̀ɛ̀ púlú káa, à zɔ̃̀ɔ̃̀ e kɛá yíkɛ̀ gáàa kpó-kpó ká kélɛ̀ lɛ Wálà Gbe ká, wɛ̀lɛ̀ a ɓo ga kɛ̀lɛ̀ɛ ká.

⁵Wálà Gbe e kília kolo là zàáa, m wɔ̃́ yiè sɔ̀lɔ̀ ɓo. Wɔ̃́ yiè e kília lɛ́ e kélɛ̀ ḿ kɛ àpɔ́sɔ̀lɔ̀ ká Kɛ́lɛ̀ì wɛ̃́ĩ̀, kɛɛ ḿ kɛ kɛɛ zò-dɔ̀à-mɔ̀ é kɛ sɛ́lɛ́ séĩ́ là mìà yí, wáà Wálà wéè kɛ̀.

⁶Mia lɛ́ Wálà aà o súo kɛ kíli, kɛɛ ó kɛ Zízɛ̀ Kɛ́lɛ̀ì là mia káa, ka bɛ̃̀ɛ̃ ka o dò ká kíli.

⁷Mia lɛ́ ka Wólóũ̀a séĩ́ lɛ́ Wálà à lɔ̀ kɛ̀ ka ká, ɛ̃́ɛ̃́ lɛ́ aà ka súo kɛ, kɛ ká kɛ là mia nì káa, ḿm̀ wèè ka bà. Kɔa Dàa Wálà, wà kɔa Dàa-mì Zízɛ̀ Kɛ́lɛ̀ì o zì zò-kɛ̀-sɛ̀ɛ é kɛ ka píé, wáà zò-yà-gé nɔ̀ ka lɛ̀ɛ.

⁸Bèĩzɛ̀ɛ, ḿm̀ m̀ Wálà zúo ɓo Zízɛ̀ Kɛ́lɛ̀ì tɔ́ yí zàá ka séĩ́ ka mɔ́ɔ̀ wɔ̃̀ mɔ̀. Ƃii mia séĩ́-séĩ́ o kpóṹ là zèea, o wɔ̃́ gèepìà áà gbɛ̃̀á kà zò-dɔ̀à-mɔ̀ wɔ̃̀ mɔ̀.

⁹Wálà lɛ́ m zò è wèè à mɔ̀ ḿ yɛɓo kɛ à lɛ̀ɛ wɔ̃́ làṹ yièa gèeè ká é gbɛ̃̀á à Gbe mɔ̀ɔ, lɛ́ e m kélá káa. Láà yí dɔ kélɛ̀ m zò lɛ́ɛ̀ vùò ka ká teele lúó nɔ́ɔ fé lɛ́ m̀ sɛ̀nɛ ɓo à káa ká.

¹⁰Ḿm̀ kpé kã Wálà lɛ̀ɛ à zì wèè-wɔ̃́-mɔ̀ yí zàáa, kɛɛ é zi kɛ ɓe kɛɛ ḿ ɓɔ ka píé lúó e kéa ká.

¹¹Ƃii ka gɛ̃̀-lɔ̀ aà m kɛ nyɔ́ɔ̀ɔ. Ḿm̀ nàà ḿ nu nɔ̀-lɛ̀ɛ-pɛ̀ lɛ́ è go Gɛ̀ɛ̀ Púlú kɛ̀lɛ̀ɛ ká ka lɛ̀ɛ, kɛ é ka gã̀ kɛ é tã́ã̀ kṹ.

¹²Wɔ̃́ m̀ wɛ̃̀ɛ̃ lɛ́ e kélɛ̀, kɔ̀à ɓi nì kɔ́á gbũ̀-mɔ̀ sɔ̀lɔ̀ ɓo e kíe ká, tó ka zì zò-dɔ̀à-mɔ̀ɔ áà gbũ̀ m mɔ̀, tó m zìa bɛ̃̀ɛ̃ áà gbũ̀ ka mɔ̀.

¹³M lèe-gé vɔ̀, ḿm̀ nàà ká yí dɔ kélɛ̀ lúó búnù-búnùzɛ̀ káa, ḿm̀ yà m gé ḿ nu ɓɔ ka píé. Kɛɛ wɔ̃́ dò lɛ́ɛ̀ m tèa teele. Ḿm̀ nàà ḿ nu kɛɛ yɛɓo m̀ nu à kɛɛ̀ɛ, yí é kɛ à mɔ̀ ka pà yi kíli, lɛ̀ zí e kɛ à ká sɛ́lɛ́ gbɛɛ yía lɛ́ ɓe.

¹⁴Mia séĩ́ mɔ́ɔ̀ wɔ̃̀ lɛ m wĩĩ́. Mia yé o kúíí káaò, ɛ̃́ɛ̃́ o yé o kɔ́nɛ̀ĩ̀-mìà káaò, e bɛ̀i, mia yé ò kii dɔɔò, ɛ̃́ɛ̃́ o yé òó kii dɔɔò, o séĩ́ o mɔ́ɔ̀ wɔ̃̀ lɛ m wĩĩ́.

¹⁵À mɔ́ɔ̀ wɔ̃̀ mɔ̀ɔ, ḿm̀ nàà ká nyɔ́ɔ̀ɔ kɛɛ ḿ wɔ̃́ làṹ yièa gèe mia lɛ́ ka Wólóũ̀a ka lɛ̀ɛ nɔ́ kíli.

¹⁶Ƃii yɛ́lɛ̀ lɛ̀ɛ́ m kɛ wɔ̃́ làṹ yièa wɛ̃́ĩ̀. Ƃii wɔ̃́ làṹ yièa lɛ Wálà zì yíkɛ̀ gágà ká, kɛɛ mia séĩ́-séĩ́ lɛ́ zò-dɔ̀à-mɔ̀ lɛ o yía, kɛ é o la. Zúù-mìà bèĩzɛ̀ lɛ́ è lo o píéa. Tó áà lò gbaa sɛ́lɛ́ gbɛɛ yí-mìà bɛ̃̀ɛ̃ píé.

¹⁷Ƃii wɔ̃́ làṹ yièa, lɛ́ɛ̀ lɛ́ɛ́ ɓo zi lɛ́ Wálà a kɛ kɛɛ mia ó kɛá kpeĩ à lɛ̀ɛ là. Kɛ̀ kpeĩ e kília, lɛ́ɛ̀ gbɛ̃̀ nɔ́ zò-dɔ̀à-mɔ̀ ká, tó e nyɛ nɔ́ zò-dɔ̀à-mɔ̀ ká. Zí Wálà kii a gèe à káa, gɛ̃̀ e ké. “Mi lɛ́ à zì zò-dɔ̀à-mɔ̀ kolo là zàáa lɛ Wálà lɛ̀ɛ kpeĩa, lɛ́ɛ̀ lo kɛ̀ɓe sɔ̀lɔ̀ ɓoò.”

¹⁸Wálà lɛ́ɛ̀ lɛ́ɛ́ ɓo là wɔ̃́à-wàa-kɔ̀ lɛ́ è go à pàa là. À zì wɔ̃́à-wàa-kɔ̀ɔ gbɛ̃̀ɛ̃̀ lɛ sɔ̃̀ɔ̃ yɔɔ séĩ́-séĩ́, ɛ̃́ɛ̃́ kɛ-wɔ̃̀ yɔɔ lɛ́ mia ò kɛ̀ɛ mɔ̀. Kɛ-wɔ̃̀ yɔɔ lɛ́ ò kɛ̀ɛ, lɛ́ɛ̀ mia tèa wɔ̃́ wánà zɛ̀ dɔɔ̀ mɔ̀.

¹⁹Wɔ̃́ à Wálà wàaà lɛ o gbĩ mɔ̀, ɓii wɔ̃́ lɛ́ ò bɛ̀i à mɔ̀ ó yí dɔ Wálà wɔ̃̀ mɔ̀ɔ, à yí bĩ̀ĩ̀ wá o mɔ̀. Wálà dìè-tĩ́ a zɔ̃̀ɔ̃̀ o lɛ̀ɛ.

²⁰É gó lúó lɛ́ Wálà e kpóṹ là zèe kɛ à ká é ɓɔá pɛ́nɛɛ mɔ̀ɔ, zi lɛ́ Wálà kɛ-kɔ̀ lɛ à ká, lɛ́ òó gɛ̃̀ɛ, waà à gɛ̃̀ séĩ́-sèĩ̀ pɛ lɛ́ aà kɛɛ kolo là. À kɛ-kɔ̀ e kília lɛ́ e tɔ́ à zì yíkɛ̀ gáàa lɛ́ à líé-nyɛ-pìà wá ɓeaò, wà zi lɛ́ lɛ à ká Wálà ká kpó-kpó ɓoa. À mɔ́ɔ̀ wɔ̃̀ mɔ̀ɔ, à ɓò-mɛ̀ĩ́-wè gbɛɛ wá o lé.

²¹Óò Wálà dɔ, kɛɛ òó ɓɛ̀lɛyà lɛ́ ò bɛ̀i à mɔ̀ ó nɔ à lɛ̀ɛ, nɔ à lɛ̀ɛ. Ɛ́ɛ̃́ òó à zúo ɓo bɛ̃̀ɛ̃. Kɛɛ o zì yɛ́lɛ́-tàà-yí-wɔ̃̀ e kɛ gbaa fèle fèle, ɛ̃́ɛ̃́ o wũ-kèlè yí lɛ́ gíkã́ gbɛɛ wá yia, aà tó bĩ́ bà ká.

²²Óò gèe o gí kã́ã̀ lɛ. Kɛɛ óò o dìè bèkɛ̀ ɓo.

²³Kɛ ó gbini Wálà kpàlézɛ̀ lɛ́ lɛ̀ɛ́ gaa lɛ̀ɛ, òó gbaa kɛ kíli. Kɛɛ o kɛ gbinipìà kɛ̀ɛ̀-wɛ́lɛ́ lɛ́ à ɓɔɔ̀ lɛ mi lɛ́ è ga, ɛ̃́ɛ̃́ mɔ̀ɔ̀, e bɛ̀i wìì, ɛ̃́ɛ̃́ wìì lɛ́ è tàà e gí làa bàa lɛ̀ɛ.

²⁴À mɔ́ɔ̀ wɔ̃̀ mɔ̀ɔ, Wálà aà o nɔ wɔ̃́ lilì kṹã̀a zɛ̀ lɛ́ o zò à nàà ká ó kɛɛ lɛ̀ɛ. Óò wɔ̃́ yɛ́lɛ̀ yɛ́lɛ̀ zɛ̀ kɛ̀ o kíe ká.

²⁵Óò kã wɔ̃́ wánà zɛ̀ lɛ́ à gbɛ̃̀ɛ̃̀ lɛ Wálà mɔ̀ɔ lɛ̀ɛ, tó wáà wɔ̃́ nɛ̀ zɛ̀ sì wánà. Óò gbìnì pɔɔ̀ lɛ́ Wálà a kɛɛ lɛ̀ɛ, tó wáà mɔ́ɔ̀ tɔ̃́ũ kũ̀ tã́ã̀. Kɛɛ òó wɔ̃́ vɔ̀ o kília kɛ Mí ké yee e pɔɔ̀ vɔ̀ o kília kɛɛ lɛ̀ɛ. Kɔ̀à pɛ séĩ́ Kɛ-mì e kília tɔ́ ɓɔ tòá kíli ká. É kɛ kíli.

²⁶Wɔ̃́ lɛ́ mia ò kɛ̀ kília mɔ́ɔ̀ wɔ̃̀ mɔ̀ɔ, Wálà aà mɔ́ɔ̀ o nɔ ɓo wɔ̃́ yɛ́lɛ̀ zɛ̀ lɛ́ à kɛ-lɔ̀ lɛ o kɛpìàa lɛ̀ɛ. É kɛ bɛ̃̀ɛ̃ loà káa, waà zi lɛ́ wáá kɛɛ̀á gɔ̃à píéa nìɛ̀, tó wáà wɔ̃́ lɛ́ ye wá mia mɔ̀ ó kɛɛ kɛ̀.

²⁷Zi nɔ́ doóa káa, gɔ̃à bɛ̃̀ɛ̃ zi lɛ́ wáá kɛɛ̀á loà píéa, waà nìɛ̀, tó kɛ̀ o ɓɛ́ĩ̀ gɔ̃̀ã̀ píé lɛ̀ lee wà gɔ̃ lɛ́ ɓea, lɔ̀ áà o kɛ̀ nyɔ́ɔ̀ɔ. Gɔ̃ã̀ óò wɔ̃́ yɛ́lɛ̀ yɛ́lɛ̀ zɛ̀ kɛ̀ o ɓɛ́ĩ̀ gɔ̃̀ã̀ ká. Wɔ̃́ sùu e kéa kɛɛ̀ kolo làa, óò nu wɔ̃́ nyɔ́ɔ̀ɔ lɛ́ wa naa kɛ-wɔ̃̀ yɔɔ kɛɛ̀ káa ká o dìè gbĩ mɔ̀.

²⁸Ƃii yé mia òó gbaa naa Wálà-wɔ̃̀ é kɛ o wũ-kèlè yía, Wálà aà mɔ́ɔ̀ o nɔ ɓo yɛ́lɛ́-táá yɔɔ lɛ̀ɛ, kɛɛ ó wɔ̃́ lɛ́ ye wá o mɔ̀ kɛ ó kɛɛ kɛ.

²⁹Kɛ-wɔ̃̀ yɔɔ doò do kɛɛ̀ diè lɛ o ká bé le. Óò sɔ̃̀ɔ̃ yɔɔ kɛ̀. Óò lɔ̀ kɛ̀ o ɓɛ́ĩ̀ gbɛɛ wà pɛ ká. O zò lɛ yɔɔ. Dàa-gbe là kɛɛ̀ diè lɛ o ká. Óò mi zɛ. O wéé zɛ̀. Óò kpàlà-kpálá kɛ̀. O sɔ̃̀ɔ̃ lɛ yɔɔ. O lùe zɛ̀.

³⁰Óò wɔ̃́ yɔɔ̀ yɔɔ̀ gèe o ɓɛ́ĩ̀ gbĩ mɔ̀. Wálà lɔ̀ nyɛɛ̀ lɛ o mɔ̀. O lé-kã́ zɛ̀. Óò o dìè si gbùò. Óò lé-gbùò-là kɛ̀. Óò o yɛ́lɛ́ tàà wɔ̃́ yɔɔ kɛ-zì gbɛɛ̀ gbɛɛ ká. Òó wɔ̃́ ma o ye-mìà wè là.

³¹O gí kã́ã̀ wá. Òó wɔ̃́ ò gèea kɛ. Òó o nyìɛ dɔ mia mɔ̀. Mi gbɛɛ yéĩ́ wá o mɔ̀.

³²Óò yí dɔ kélɛ̀ Wálà là lɔ́ɔ̀ láà gèe weeá kélɛ̀, mia lɛ́ ò wɔ̃́ sùu e kília kɛ̀ɛ, o gaà lɛ́ nɔ́ à mɛ́ kũa. Kɛɛ é kɛ bɛ̃̀ɛ̃ kília, o nɔ́ tĩã́ à kɛɛ̀ mɔ̀. E bɛ̀i zeĩ́, mia lɛ́ ò o kɛ̀ɛ, óò o tɔ́ li.