Read Yamano Wólómà 10 Bible Online

Wólómà 10 - Yamano bible

Wólómà 10

¹M lèe-gé vɔ̀, pɛ kpó-kpó lɛ́ à tíé lɛ m zò kṹpìàa, ye lɛ́ e kélɛ̀ mia lɛ́ kò ye nì kò go sɛ́lɛ́ doó yía, o la wɔ̃̀. Ḿm̀ sɛ̀nɛ ɓo Wálà lɛ̀ɛ o wɛ̃́ĩ̀ teele.

²Ḿm̀ wà kélá-wè ɓo kélɛ̀ óò fã̀ã́-wàà kɛ̀ Wálà tɔ́ wɛ̃́ĩ̀. Kɛɛ o zì fã̀ã́-wààa gã̀ gbɛ̃̀ɛ̃̀ wá pɛ wánà zɛ̀ dɔɔ̀ là.

³Zi lɛ́ Wálà è mia kɛ̀á kpeĩ e lɛ̀ɛ, òó à dɔ. Óò à kɛ-zì nàà kɛ ó o dìè zì zi kɛ ɓe. À mɔ́ɔ̀ wɔ̃̀ mɔ̀ɔ, òó gbaa o dìè kɛ zi lɛ́ Wálà è mia kɛ̀á kpeĩa wì.

⁴Ƃii Kɛ́lɛ̀ì aà Lɔ́ɔ̀ɔ wɔ̃̀ ɓo gbaa tã́ã̀, kɛɛ mi nɔ́ɔ fé lɛ́ è lo e zò dɔɔ̀ à mɔ̀ɔ, é kɛ kpeĩ Wálà lɛ̀ɛ.

⁵Wɔ̃́ lɛ́ Móózè a bɛ̃̀ɛ̃, lɛ́ à gbɛ̃̀ɛ̃̀ lɛ kɛ̀ kpeĩ Wálà lɛ̀ɛ Lɔ́ɔ̀ɔ kũ̀ tã́ã̀ kolo là zàáa, gɛ̃̀ e ké. “Mi lɛ́ è lo wɔ̃́ lɛ́ Lɔ́ɔ̀ɔ à gèea kɛɛ̀ɛ, lɛ́ɛ̀ lo kɛ̀ɓe gɛ̃̀ɛ̃̀ à kolo là.”

⁶Kɛɛ kɛ̀ kpeĩ Wálà lɛ̀ɛ zò-dɔ̀à-mɔ̀ kolo là zàáa, láà gèe kélɛ̀, “Yékɛ̀ ɓá gèe i zò píé kélɛ̀, Dé è lo lóò lɛ̀í?” (À yí lɛ́ e kélɛ̀, kɛɛ ó nu Kɛ́lɛ̀ì ká tã́ã̀ zèe.)

⁷“Ɛ́ɛ̃́ yékɛ̀ ɓá gèe kélɛ̀, Dé è lo lóò ko wì tã́ã̀ gìè?” (À yí lɛ́ e kélɛ̀, kɛɛ ó nu Kɛ́lɛ̀ì ká lɛ̀í é gó ga kɛ̀lɛ̀.)

⁸Kɛɛ wɔ̃́ lɛ́ kɛ̀ kpeĩ e kília a gèe zeĩ́a, gɛ̃̀ e ké. “Wálà lé-wèa aà ɓɔ i ká kɔ̀ɛ́. Lɛ i lé, ɛ̃́ɛ̃́ zeĩ́a, lɛ i zò píé.” (Wálà lé-wè e kília lɛ wéé lɛ́ à gbɛ̃̀ɛ̃̀ lɛ zò-dɔ̀à-mɔ̀ lɛ́ kò wɔ̃̀ gèea mɔ̀.)

⁹Yé ɓaà kã́ i lé weeá kélɛ̀ Zízɛ̀ lɛ mia mì-Dàa-mì káa, ɛ̃́ɛ̃́ ɓaà gɛ̃̀ wánà ká i zò píé kélɛ̀ Wálà a wɛ̀lɛ̀ ga kɛ̀lɛ̀ɛ, íì lo la-ɓo sɔ̀lɔ̀ ɓoò.

¹⁰Ƃii mi lɛ́ɛ̀ wɔ̃́ gɛ̃̀ wánà ká e zò píé, tó áà mí e kília kɛ̀ kpeĩ Wálà lɛ̀ɛ. Ɛ́ɛ̃́ zeĩ́a, mi lɛ́ɛ̀ wɔ̃́ kã e lé, tó wɔ̃́ lɛ́ a kã́ e lé kília, tó a kɛ e la-ɓo sɔ̀lɔ̀ ɓo.

¹¹Wálà kiia a gèe weeá kélɛ̀, “Mi nɔ́ɔ fé lɛ́ è lo e zò dɔɔ̀ à mɔ̀ɔ, à zò lɛ̀ɛ́ ló tóò lɛ̀í.”

¹²Ƃii Zúù-mìà wà sɛ́lɛ́ gbɛɛ yí-mìà o nɔ́ doó. Ko Dàa-mì doó lɛ́ nɔ́ e o séĩ́ o Dàa-mì káa. Ɛ́ɛ̃́ à zì lúà kpɔ́ɔ̀ lɛ mia séĩ́ lɛ́ ò à súo kɛ̀ɛ mɔ̀ kpànazɛ̀.

¹³Ƃii “mia séĩ́-séĩ́ lɛ́ ò ko Dàa-mì tɔ́ súo kɛ̀ɛ, óò lo la-ɓo sɔ̀lɔ̀ ɓoò.”

¹⁴Kɛɛ zi sùu kpɛɛ̀ lɛ́ ò bɛ̀i à mɔ̀ ó à súo kɛ à ká, yé òó o zò dɔ nɛ́ à mɔ̀ɔ ká? Ɛ́ɛ̃́ óò lo o zò dɔɔ̀ à mɔ̀ kpɛ yé òó à mɔ́ɔ̀ wɔ̃̀ ma nɛ́ɛ ká? Ɛ́ɛ̃́ óò lo à maà kpɛ yé mi làá gèe nɛ́ lòũ̀ káa ká?

¹⁵E bɛ̀i, óò lo à gèeè lòũ̀ ká kpɛ yé òó o vɔ nɛ́ɛ ká? Zi lɛ́ à bɛ̃̀ɛ̃ɛ̃̀ lɛ à ká Wálà kii yía, gɛ̃̀ e ké. “Mia lɛ́ ò wɔ̃́ làṹ yièa gèea, o táá gã̀ lɛ sɛ̀ nyɔ́ɔ̀ɔ.”

¹⁶Kɛɛ o séĩ́ òó wɔ̃́ làṹ yièa kṹ nɛ́ o zɔ̃̀ɔ̃̀ ká. Ƃii Ààzáyà a gèe kélɛ̀, “Ko Dàa-mì, deĩ̀ lɛ́ aà wɔ̃́ lɛ́ kɔaà gèea gɛ̃̀ wánà ká?”

¹⁷À mɔ́ɔ̀ wɔ̃̀ mɔ̀ɔ, zò-dɔ̀à-mɔ̀ lɛ́ɛ̀ go wɔ̃́ lɛ́ ɓa maa yí. Ɛ́ɛ̃́ wɔ̃́ lɛ́ ɓa maa, lɛ́ɛ̀ go wɔ̃́ lɛ́ wa gèe lɛ́ à gbɛ̃̀ɛ̃̀ lɛ Kɛ́lɛ̀ì mɔ́ɔ̀ wɔ̃̀ mɔ̀ɔ yí.

¹⁸Kɛɛ ḿm̀ wɛ̃́ĩ́-lɔ̀ɔ kɛ̀ kélɛ̀, òó à ma nɛ́? Ké, waà ma yee ɓo ɓii “O wéè aà ɓɔ kpóṹ là kɔ̀ pɔ̃́ũ̀ tɛ̃̀ɛ̃́ mɔ̀. Ɛ́ɛ̃́ o lé-wè aà ɓɔ sɛ́lɛ́ tèápìà séĩ́ mɔ̀.”

¹⁹Ḿm̀ wɛ̃́ĩ́-lɔ̀ɔ kɛ̀ zeĩ́ kélɛ̀, Éézɛ̀lɛ̀-mìà òó à yí dɔ? Bèĩzɛ̀ɛ, Móózè a gèe kélɛ̀, “Ḿm̀ lo à kɛɛ̀ tó dàa-gbe-là kɛɛ̀ e dà ka gé mia lɛ́ o wá sɛ́lɛ́ yí-mìà kpó-kpó káa o gbĩ mɔ̀. Ḿm̀ lo ka kɛɛ̀ wɔ̃́ e ka wàa sɛ́lɛ́ lɛ́ à yí-mìà yí gínià lɛɛ o píé.”

²⁰Ààzáyà lɛ̀ɛ́ túó yé aà kɛ wɔ̃́ e kéa gèepìàa ká. A gèe kéle, “Mia lɛ́ òó gbaa kɛ m naapìàa, lɛ́ o m sí tã́ã̀a. M ɓɔ mia lɛ́ òó gbaa kɛ m wɛ̃̀ĩ̀-lɔ̀ɔ kɛpìàa là.”

²¹Kɛɛ wɔ̃́ lɛ́ a gèe lɛ́ à gbɛ̃̀ɛ̃̀ e kɛá Éézɛ̀lɛ̀ mɔ̀ɔ, ye gɛ̃̀ e ké. “M m kɔ̀ zɔ̃̀ɔ̃̀ mia lɛ́ òó m wéè kɛ, lɛ́ ò nàà o dìè-tĩ́ wũ-kèlè-yí-wɔ̃̀ kɛɛ̀ káa lɛ̀ɛ, lɛ̀-kpɛ̀iì doó yíí wì nɔ́ fɛ̃̀ɛ̃̀ le.”