Read Yamano Wólómà 12 Bible Online

Wólómà 12 - Yamano bible

Wólómà 12

¹M lèe-gé vɔ̀, yé mɔṹ Wálà à ko yéĩ̀ kṹũ̀ lɛ kpànazɛ̀ɛ, ye gɛ̃̀ m̀ nu à mɔ́ɔ̀ wɔ̃́ e kéa gèeè ka lɛ̀ɛ ɓɛ. Kà ka dìè nɔ Wálà lɛ̀ɛ kɛ ká kɛ sálà-ɓo-pɛ̀ ɓéèe ká à lɛ̀ɛ, ɛ̃́ɛ̃́ kɛ ká kɛ à doó là mia nì ká, kɛɛ é kɛ à zò-dà-wɔ̃̀ ká. Tò-Wálà-píé kɔ̀ wánà zɛ̀ káá à kɛɛ̀ɛ, ye lɛ́ e kília.

²Yékɛ̀ ka kɛ-kɔ̀ é kɛ lɛ̀ míá o kpóṹ là zèea kɛ-kɔ̀ lɛ́ ɓe. Kɛɛ kà wéé à mɔ̀ kɛɛ Wálà é ka zì yɛ́lɛ́-táá-pìà kɛ pɛ dɛɛ ká, kɛ ka zì sɔ̃̀ɔ̃ nì séĩ́ mɛ́ é vɔ̀ɔ. Yé aà kɛ kília, káà lo pɛ lɛ́ Wálà à nàà à káa dɔɔ̀ gbaa. Káà lo wɔ̃́ lɛ́ lɛ sɛ̀, ɛ̃́ɛ̃́ wɔ̃́ lɛ́ à zò dà, e bɛ̀i wɔ̃́ lɛ́ lɛ kpeĩ kpó-kpó ɓoa dɔɔ̀.

³Kɛɛ pɛ lɛ́ Wálà aà nɔ m lɛ̀ɛ à zì zò-kɛ̀-sɛ̀ kolo là zàáa mɔ́ɔ̀ wɔ̃̀ mɔ̀ɔ, ye lɛ́ m̀ mɔ́ɔ̀ wɔ̃́ e kéa gèe ɓo ka séĩ́ ka lɛ̀ɛ. Yékɛ̀ ká ka yɛ́lɛ́ táá zi lɛ́ kaa ká kpànazɛ̀ɛ yí, lɛ̀ zí káá ka yɛ́lɛ́ táà à káa lɛ́ ɓe. Kɛɛ yɛ́lɛ́-táá kpeĩ è kɛ ka mɔ̀, kɛ ká ka yɛ́lɛ́ táá à ká é gbɛ̃̀á ka dìè ka mɔ̀ doó doó zò-dɔ̀à-mɔ̀ yé Wálà aà nɔ ka lɛ̀ɛ kolo là zàá.

⁴Mi gbĩ-kpàla gbɛ̃ĩ̀-pɛ lɛ à mɔ̀ gbùò. À gbɛ̃ĩ̀-pɛ e kília, o séĩ́-séĩ́ o kɛ-yɛ̀ɓo lɛ doò do.

⁵Zi nɔ́ doóa káa, kó kɛ bɛ̃̀ɛ̃ gbùò lɛ̀ zí kɔaa káa, ko gbĩ-kpàla lɛ nɔ́ doó Kɛ́lɛ̀ì tɔ́ yí zàá. Ko séĩ́ ko gbĩ-kpàla e kília ko à gbɛ̃ĩ̀-pɛ ká doó doó, ɛ̃́ɛ̃́ ko gbɛ̃̀ɛ̃̀ lɛ ko kíe nì mɔ̀.

⁶À mɔ́ɔ̀ wɔ̃̀ mɔ̀ɔ, lɛ ko mɔ̀ kó yɛɓo kɛ nɔ̀-lɛ̀ɛ-pɛ̀ doò do, lɛ́ Wálà aà nɔ ko lɛ̀ɛ là zò-kɛ̀-sɛ̀ kolo là zàáa ká. É kɛ̀á ko zì nɔ̀-lɛ̀ɛ-pɛ̀ɛ lɛ́ e kélɛ̀ kɔ́áà dɔ̀ Wálà lé làa, kɔ́áá kɛɛ̀ à gèepìà zi lɛ́ zò-dɔ̀à-mɔ̀ lɛ à ká ko yía mɔ̀.

⁷É kɛ̀á ko zì nɔ̀-lɛ̀ɛ-pɛ̀ɛ lɛ gbũ̀-mɔ̀ nɔ̀ mia lɛ̀ɛ káa, lɛ à mɔ̀ kó gbũ̀-mɔ̀ nɔ mia lɛ̀ɛ. É kɛ̀á lɛ pɛ zɔ̃̀ɔ̃ɔ̃̀ káa, lɛ sɛ̀ kɔ́á zɔ̃̀ɔ̃̀.

⁸É kɛ̀á lɛ fã̀ã́-wàà nɔ̀ mia lɛ̀ɛ káa, lɛ sɛ̀ kɔ́á kɔa kɔ̀ kɛ à mɔ̀. Mi lɛ́ è lo pɛ nɔɔ̀ mia lɛ̀ɛ, lɛ sɛ̀ á nɔ mia lɛ̀ɛ zò wɛ́lɛ́-wɛ̀lɛ̀-là ká. Mi nɔ́ɔ fé lɛ́ yíkɛ̀ gáàa lɛ à kɛ̀lɛ̀ɛ, lɛ à mɔ̀ é yɛɓo kɛ gágà. Mi lɛ́ è mi yéĩ̀ kũa, lɛ sɛ̀ á kɛ géli ká.

⁹Ka zì mi-lɔ̀-kpɔ̀ ka mɔ̀ɔ, è kɛ dóo wánà zɛ̀. Wɔ̃́ yɔɔ lɔ̀ è nyɛ ka mɔ̀. Kà ka kɔ̀ kùnù wɔ̃́ lɛ́ e sɛ̀ɛ mɔ̀.

¹⁰Kà lɔ̀ kɛ ka kíe nì ká lɛ̀ zí ye-mìà wɔ̃̀ diè lɛ à ká o kíe nì zò káa lɛ́ ɓe. Ka yí è kɛ tíè-tíèe ɓɛ̀lɛyà nɔ̀ ka kíe nì lɛ̀ɛ pìà.

¹¹Kà yɛɓo kɛ gágà, yékɛ̀ ká fíá. Ka zò è gélé ka gé yɛɓo kɛ̀ ko Dàa-mì lɛ̀ɛ wɛ̃́ĩ̀.

¹²Pɛ lɛ́ ka zò laa mɔ̀ɔ, è ka kɛ géli zɛ̀. Kà ka zò kṹ tã́ã̀ ka zì wɔ̃́ nyɔ́ɔ̀ɔ gɛ̃̀ɛ̃ɛ̃̀ yí. Kà sɛ̀nɛ ɓo lúó séĩ́ ká.

¹³Kà gbũ̀-mɔ̀ nɔ ka ɓɛ́ĩ̀ Wálà-mìà lɛ́ lɛ o mɔ̀ ó gbũ̀-mɔ̀ sɔ̀lɔ̀ ɓoa lɛ̀ɛ. Kà kɛ lɔ̀ɔ̀-mìà wɔ̀lɔ̀-kpɔ́-mìà ká teele.

¹⁴Kà lúà kpɔ́ mia lɛ́ ò ka sã̀ dɔɔ mɔ̀. Kà lúà kpɔ́ o mɔ̀. Kɛɛ yékɛ̀ ká o náá kpɔ́.

¹⁵Mia lɛ́ o gé lɛ lipìàa, kà ye nì kà géli kɛ. Mia lɛ́ o gbóó ɓopìàa, kà ye nì kà gbóó ɓo.

¹⁶Lɛ sɛ̀ ka zì yɛ́lɛ́ kɛ̀ mia mɔ̀ zì doóa ká ka yɛ́lɛ́ kɛá mia séĩ́ píé. Yékɛ̀ ká ka dìè sí gbùò. Kà ka dìè kɛ̀ yéĩ̀zɛ̀ yɛ̀ɓo kɛ. Yékɛ̀ ká ka yɛ́lɛ́ táá ka dìè ká kélɛ̀ ka gí kã́ã̀ lɛ.

¹⁷Yékɛ̀ ká kɛ-wɔ̃̀ yɔɔ kɛɛ̀ dɛ̀í dà kɛ-wɔ̃̀ yɔɔ kɛɛ̀ ká. Kà ka yɛ́lɛ́ táá wɔ̃́ lɛ́ mia séĩ́ ò lo à gɛ̃̀ɛ̃̀ wáà gèè lɛ sɛ̀ɛ, káà kɛ̀.

¹⁸Kà wɔ̃́ nɔ́ɔ fé lɛ́ kà bɛ̀i à mɔ̀ ká kɛɛ, kà kɛ ka dìè gbĩ mɔ̀ zàá, kɛɛ kà mia séĩ́-séĩ́ ká kɛ ɓe zò-yà-gé yí zàá.

¹⁹M̀ lɔ̀-kɛ̀á-mìà, yékɛ̀ ká wɔ̃́ yɔɔ dɛ̀í dà wɔ̃́ yɔɔ ká. Kɛɛ kà tó Wálà zì wɔ̃́à-wàa-kɔ̀ á dɛ̀í dà. Ƃii à bɛ̃̀ɛ̃ɛ̃̀ lɛ Wálà là kíía yí kélɛ̀, “Ḿm̀ lo wɔ̃́ dɛ̀í dàà. Ḿm̀ lo wɔ̃́ kèlè ɓoò. Zi lɛ́ ko Dàa-mì a gèe à káa lɛ́ ɓɛ.”

²⁰Kɛɛ “mi lɛ́ è gèlè gɔ̃ i káa, lɔ̀ɔ é kɛ̀á kɛpìàa, léɓèlè nɔ à lɛ̀ɛ. Yíí-mi-lɔ̀ é kɛ̀á kɛpìàa, yíí nɔ à lɛ̀ɛ á mi. Ƃii wɔ̃́ nì e kéa kɛɛ̀ kolo là zàáa, kɛɛ i tíé-kèĩ̀ gbũ dɔpìà à wĩĩ́.”

²¹Yékɛ̀ ká tó wɔ̃́ yɔɔ kɛɛ̀ zì yíkɛ̀ gáàa é die ka là. Kɛɛ ka kɔ̀ è die wɔ̃́ yɔɔ kɛɛ̀ là wɔ̃́ yiè kɛɛ̀ ká.