Read Yamano Wólómà 14 Bible Online

Wólómà 14 - Yamano bible

Wólómà 14

¹Mi lɛ́ à mɛ́ wá gágà zò-dɔ̀à-mɔ̀ yía, kà à kɛ ka doó-mì ká. Kɛɛ yékɛ̀ kà ye nì ká wɔ̃́ lɛ́ laa zì yɛ́lɛ́-táá yía tèé dà.

²Mi doó zì zò-dɔ̀à-mɔ̀ láà kɛ̀ tó áà pɛ nɔ́ɔ fé ɓèlè. Kɛɛ mi lɛ́ à mɛ́ wá gágà zò-dɔ̀à-mɔ̀ yía, pɛ́ nɔ́ à ɓèlèa, lɛ́ e tɔ́ ɓòo ò tààa.

³Mi lɛ́ è lo pɛ nɔ́ɔ fé ɓèlèa, yékɛ̀ à nyìɛ é fɔ̃́ mí lɛ̀ɛ́ à ɓèlèa yí. Ɛ́ɛ̃́ mi lɛ́ à bɛ̃̀ɛ̃ è lo kɛɛ̀ nɔ́ ɓòo lɛ́ ò tààa ɓèlè-mì káa, yékɛ̀ é wɔ̃́ káá mi lɛ́ è pɛ séĩ́ ɓèlèa wĩĩ́. Ƃii Wálà aà à kɛ e mì dò ká.

⁴Dé e i ká kɛ í wɔ̃́ káá mi gbɛɛ zì yɛɓo-kɛ-mì wĩĩ́? É pèlèáò, ɛ̃́ɛ̃́ é dɔ̀á e gã̀ mɔ̀ɔò, à dàa-mì lɛ́ nɔ́ là wɔ̃́ lɛɛ. Lɛ́ɛ̀ lo kɛɛ̀ dɔ̀-gã̀-mɔ̀-mì ká. Ƃii yíkɛ̀ gáàa lɛ ko Dàa-mì kɛ̀lɛ̀ kɛ á kɛ é dɔ e gã̀ mɔ̀.

⁵Mi dò lɛ́ɛ̀ e yɛ́lɛ́ tàà kélɛ̀ lúó dò lɛ kpànazɛ̀ à lɛ̀ɛ, é diá à yé e tóa là. Tó mi dò bɛ̃̀ɛ̃ zì yɛ́lɛ́-táá yía, lɛ́ɛ̀ à zɔ̃̀ɔ̃̀ à lɛ̀ɛ kélɛ̀ lúó séĩ́ lɛ nɔ́ doó. Lɛ sɛ̀ mia séĩ́ ó wɔ̃́ lɛ́ ò lo o yɛ́lɛ́ táà yía yà o gé dóo gágà.

⁶Mi lɛ́ è lo lúó dò síì gbùòa, lɛ́ɛ̀ lo à kɛɛ̀ kíli kɛɛ é ɓɛ̀lɛyà nɔ ko Dàa-mì lɛ̀ɛ. Ɛ́ɛ̃́ mi lɛ́ è lo pɛ nɔ́ɔ fé ɓèlèa, lɛ́ɛ̀ lo à kɛɛ̀ kíli kɛɛ é ɓɛ̀lɛyà nɔ ko Dàa-mì lɛ̀ɛ, ɓii e Wálà zúo ɓo léɓèlèa wɛ̃́ĩ̀. Mi lɛ́ làá zṹ é léɓèlè dò lɛ yía ɓèlèa, láà kɛ̀ nɔ́ kíli kɛɛ é ɓɛ̀lɛyà nɔ ko Dàa-mì lɛ̀ɛ. Ɛ́ɛ̃́ à bɛ̃̀ɛ̃, lɛ́ɛ̀ Wálà zúo ɓo nɔ́ kíli.

⁷Míá ko kéa, ko dò nɔ́ɔ fé wá ɓe e dìè kɔ̀ mɔ̀. Ɛ́ɛ̃́ ko dò nɔ́ɔ fé gbɛɛ wá ɓe, kɛ é ga e dìè kɔ̀ mɔ̀.

⁸Kó kɛ̀á ɓea, kɛɛ ko Dàa-mì mɔ́ɔ̀ kɛ lɛ́ kɔa ɓo ɓea. Ɛ́ɛ̃́ kó gàáa, kɛɛ ko Dàa-mì lɛ́ kɔa mɔ́ɔ̀ ga ɓoa. À mɔ́ɔ̀ wɔ̃̀ mɔ̀ɔ, kó kɛ bɛ̃̀ɛ̃ ɓeaò, ɛ̃́ɛ̃́ kó gàá bɛ̃̀ɛ̃, ko ko Dàa-mì là mia nì ká.

⁹Ƃii Kɛ́lɛ̀ì e ga, ɛ̃́ɛ̃́ e wɛ̀lɛ̀ ga kɛ̀lɛ̀, kɛɛ é kɛ mia lɛ́ waà gaa, ɛ̃́ɛ̃́ o yé lɛ́ òó ga nɛ́ɛ o Dàa-mì ká.

¹⁰Mɛ́ ɓi bɛ̃̀ɛ̃ ɓà mɔ́ɔ̀ wɔ̃́ káá ɓo i lèe-gé wĩĩ́? Ɛ́ɛ̃́ ɓi bɛ̃̀ɛ̃, mɛ́ e kɛ lɛ́ i nyìɛ fɔ̃́ɔ̃̀ lɛ i lèe-gé yí? Ƃii ko séĩ́-séĩ́ kóò lo dɔɔ̀ Wálà wɛlɛ mɔ̀, áà mɛ̀ĩ́-sà dɔ̀ ko mɔ̀.

¹¹Ƃii à bɛ̃̀ɛ̃ɛ̃̀ lɛ Wálà là kíía yí kélɛ̀, “Yé m tĩã́ ɓea, mia séĩ́-séĩ́ óò lo káà o kpuò là m wɛlɛ mɔ̀, ɛ̃́ɛ̃́ mia séĩ́ óò lo à kã́ã̀ o lé kélɛ̀ ma lɛ́ m Wálà káa. Zí ko Dàa-mì a gèe à káa lɛ́ ɓɛ.”

¹²À mɔ́ɔ̀ wɔ̃̀ mɔ̀ɔ, míá ko kéa séĩ́ kóò lo mɛ́ĩ́ ɓoò ko dìè wũ mɔ̀ wɔ̃̀ gèeè Wálà wɛlɛ mɔ̀.

¹³Yé lɛ kília, kɔ̀à tèá wɔ̃́ kàà kɔa ɓɛ́ĩ̀ nì wĩĩ́ mɔ̀. Kɛɛ wɔ̃́ lɛ́ káá yàà ka géa, gɛ̃̀ e ké. Ye lɛ́ e kélɛ̀, pɛ lɛ́ è bɛ̀i à mɔ̀ é à kɛ ka lèe-gé é sã́, ɛ̃́ɛ̃́ é pèlèa, yékɛ̀ ká kpɔ́ à gɛ̀nɛ̀.

¹⁴Lɛ̀ kò m Dàa-mì Zízɛ̀ ko doóa, ḿm̀ à yí dɔ, ɛ̃́ɛ̃́ lɛ wánà ká kélɛ̀ pɛ lɛ́ lɛ yɔɔ ɓèlè wɛ̃́ĩ̀ dóo kpó-kpó ɓoa, ye wá ɓe. Kɛɛ yé mi dò aà gɛ̃̀ wánà ká kélɛ̀ pɛ dò lɛ à lɛ̀ɛ yɔɔ ɓèlè wɛ̃́ĩ̀a, kɛɛ aà kɛ gbaa yɔɔ à lɛ̀ɛ.

¹⁵Yé ɓaà kɛ i lèe-gé zò aà dà zízàá pɛ́ ɓà ɓèlèa wɛ̃́ĩ̀a, kɛɛ ɓi wá gbaa táápìà lɔ̀-kɛ̀à-mɔ̀ kpáá yí. Yékɛ̀ ɓá tó léɓèlè ɓà ɓèlèa á kɛ mi lɛ́ Kɛ́lɛ̀ì a mɔ́ɔ̀ ga ɓoa, wɔ̃̀ é à zò píé sìè.

¹⁶Yékɛ̀ ká tó pɛ́ e ka lɛ̀ɛ sɛ̀ɛ, ó à tɔ́ yɔɔ gèe.

¹⁷Ƃii Wálà zì tò-mia-làa ye wá pɛ́ ò ɓèlèaò, ɛ̃́ɛ̃́ à yé ò mia mɔ̀. Kɛɛ lɛ kɛ̀-kpeĩ-kɔ̀, e bɛ̀i zeĩ́, zò-yà-gé kɔ̀ ɛ̃́ɛ̃́ géli kɛ-kɔ̀ lɛ́ Wálà zì Gɛ̀ɛ̀ Púlúa è o nɔɔ, lɛ́ lɛ à mɔ̀ɔ.

¹⁸Mi lɛ́ è lo yɛɓo kɛɛ̀ Kɛ́lɛ̀ì lɛ̀ɛ zi yé e kéa káa, Wálà zò lɛ́ɛ̀ dà à píé, tó mia ɓɔ̀ɔ wáà wèè à kɛ̀-kpeĩ-wɔ̃̀ mɔ̀.

¹⁹À mɔ́ɔ̀ wɔ̃̀ mɔ̀ɔ, kɔ̀à kɔa yɛ́lɛ́ kɛ pɛ lɛ́ è nu zò-yà-gé ká, ɛ̃́ɛ̃́ lɛ́ à kɛ̀ lɛ́ kò yíkɛ̀ gáàa nɔ ko kíe nì lɛ̀ɛ mɔ̀.

²⁰Yékɛ̀ í pɛ lɛ́ Wálà aà kɛɛ yí sìè léɓèlè wɔ̃̀ wɛ̃́ĩ̀. Léɓèlè séĩ́ lɛ sɛ̀ ɓèlè wɛ̃́ĩ̀ wánà ká. Kɛɛ lɛ dóo yɔɔ kɛ í pɛ lɛ́ è bɛ̀i à mɔ̀ é i ɓɛ́ĩ̀ nì pèlèa ɓèlè.

²¹Lɛ sɛ̀ yékɛ̀ í wìì ɓèlè, ɛ̃́ɛ̃́ í wã́ã́ĩ̀ mi, ɛ̃́ɛ̃́ í pɛ nɔ́ɔ fé lɛ́ è bɛ̀i à mɔ̀ é à kɛ i lèe-gé é pèlèa kɛ.

²²Pɛ lɛ́ ɓà gɛ̃̀ wánà ká lɛ́ à gbɛ̃̀ɛ̃̀ lɛ wɔ̃́ e kéa mɔ̀ɔ, è kɛ nɔ́ kà Wálà ka pèèlɛ ka fĩ̀ã̀. Mi lɛ́ è wɔ̃́ lɛ́ lɛ à lɛ̀ɛ sɛ̀ɛ kɛ̀, lɛ́ wɔ̃́ a kɛ kília lɛ̀ɛ́ mɛ̀ĩ́-sà káá à wĩĩ́a, lɛ géli zɛ̀.

²³Kɛɛ é kɛ̀á mi dò zò lɛ́ɛ̀ mɛ̀ à mɔ̀ léɓèlè dò wɛ̃́ĩ̀a, é léɓèlè e kília ɓèlèáa, kɛɛ mɛ̀ĩ́-sà aà káá à wĩĩ́. Ƃii wɔ̃́ e à kɛɛ à gã̀ gbɛ̃̀ɛ̃̀ wá zò-dɔ̀à-mɔ̀ là. Ɛ́ɛ̃́ pɛ nɔ́ɔ fé lɛ́ à gã̀ gbɛ̃̀ɛ̃̀ wá zò-dɔ̀à-mɔ̀ làa, lɛ kɛ-wɔ̃̀ yɔɔ ká.