Read Yamano Wólómà 16 Bible Online

Wólómà 16 - Yamano bible

Wólómà 16

¹Ḿm̀ nàà ḿ kɔa lú-lɔ̀ Fííbíì, lɛ́ è yɛɓo kɛ̀ Wálà-mìà lɛ́ o Sɛ̃̀kílíyàa lɛ̀ɛ, zɔ̃̀ɔ̃̀ ka lɛ̀ɛ.

²Kà ka kɔ̀ yà à wì ko Dàa-mì tɔ́ yí zàá zí Wálà-mìà wáá kɛɛ̀ à káa ká. Ɛ́ɛ̃́ ká gbũ̀-mɔ̀ nɔ́ɔ fé lɛ́ è lo à naà ka kɛ̀lɛ̀ɛ nɔ à lɛ̀ɛ. Ƃii à dìè-tĩ́ aà gbũ mia búnùzɛ̀ mɔ̀ dóo kpànazɛ̀, ɛ̃́ɛ̃́ aà gbũ do m dìè m mɔ̀ nɔ́ kíli.

³Ḿm̀ wèè Pòlòsílà wà Àkólà lɛ́ kò ye nì kɔaà yɛɓo kɛ do e kíe là Kɛ́lɛ̀ì Zízɛ̀ tɔ́ yí zàáa o bà.

⁴Òó gbaa kpàa o dìè ga-wɔ̃̀ wɛ̃́ĩ̀ m mɔ́ɔ̀ wɔ̃̀ mɔ̀. Ḿm̀ o zúo ɓo. Ye wá m doó ká kɛ ḿ kɛ o zúo ɓopìà, kɛɛ Wálà-mìà lɛ́ o sɛ́lɛ́ gbɛɛ yí-mìà káa nì séĩ́ lɛ́ ò o zúo ɓoa.

⁵Ḿm̀ wèè Wálà-mìà yé ò pa o kíe mɔ̀ à píé kɛ́ìa o bà nɔ́ kíli. Ḿm̀ wèè mi lɛ́ à lɔ̀ kpɔ́ɔ̀ lɛ m mɔ̀, lɛ́ ò si Ipɛ̀nétɔ̀ɔ bà. À ye lɛ́ e kɛ mi bèĩzɛ̀ ká kɛ é e zò dɔ Kɛ́lɛ̀ì mɔ̀ Ésìà-sɛ̀lɛ̀ yía.

⁶Ḿm̀ wèè Melé bà. Aà yɛɓo kɛ gágà ka lɛ̀ɛ.

⁷Ḿm̀ wèè Aãdòlònákà wà Zúnìà o bà. O m pà-mìà ká. Ko kɛ bĩ́-kà doó wì ko kíe là. O dóo mia lɛ́ ò o dɔ nyɔ́ɔ̀ɔ àpɔ́sɔ̀lɔ̀ vɔ̀ bàa ká. O kɛ Kɛ́lɛ̀ì là mia nì ká líé, kɛ ḿ tĩã́ kɛɛ̀ à ká.

⁸Ḿm̀ wèè mi lɛ́ à lɔ̀ kpɔ́ɔ̀ lɛ m mɔ̀ ko Dàa-mì kolo là zàá, lɛ́ ò si Aãpìlìyétàa bà.

⁹Ḿm̀ wèè Àbénà lɛ́ kò ye nì kò yɛɓo kɛ̀ e kíe là Kɛ́lɛ̀ì tɔ́ yí zàáa bà. Ḿm̀ wèè mi lɛ́ à lɔ̀ kpɔ́ɔ̀ lɛ m mɔ̀, lɛ́ ò si Sìtákàa bà.

¹⁰Ḿm̀ wèè Àpɛ́lè bà. Aà à zɔ̃̀ɔ̃̀ kélɛ̀ lɛ dóo Kɛ́lɛ̀ì là mi ká kpó-kpó ɓo. Ḿm̀ wèè Àlèsɔ́lɔ́bìà píé-kɛ́ì-mìà séĩ́ bà.

¹¹Ḿm̀ wèè m pà-mì Hìlódìà bà. Ḿm̀ wèè Nàsísà píé-kɛ́ì-mìà lɛ́ o ko Dàa-mì là mia nì káa bà.

¹²Ḿm̀ wèè Tàfínà wà Tàfósà lɛ́ ò yɛɓo kɛ̀ ko Dàa-mì lɛ̀ɛ, o bà. Ḿm̀ wèè mi lɛ́ à lɔ̀ kpɔ́ɔ̀ lɛ m mɔ̀, lɛ́ ò si Pɔ́sèa bà. Aà yɛɓo kɛ dóo gágà ko Dàa-mì lɛ̀ɛ.

¹³Ḿm̀ wèè Wúlúfɔ̀, lɛ́ e ko Dàa-mì là mi kpeĩ ká kpó-kpó ɓo, ɛ̃́ɛ̃́ à lòóò lɛ́ lɛ kò ye ko lèe ká gbaa, o bà.

¹⁴Ḿm̀ wèè Àsĩ́kétà wà Fílígɔ̃̀, e bɛ̀i, Hɔ́mì ɛ̃́ɛ̃́ Pátóbà, e bɛ̀i Hɔ́mà, ɛ̃́ɛ̃́ ko lèe-gé vɔ̀ lɛ́ o o píéa, o bà.

¹⁵Ḿm̀ wèè Fìlólógà wà Zúlìà, ɛ̃́ɛ̃́ zeĩ́ Nílìà wà e lú-lɔ̀, e bɛ̀i zénií Òlípà, ɛ̃́ɛ̃́ Wálà-mìà séĩ́ lɛ́ o o píéa bà.

¹⁶Kà wéé ka kíe nì píé ka bè gbɛ̃̀ ka kíe nì kpéĩ́ mɔ̀ ká lɛ̀ zí wáá kɛɛ̀áa ká. Kɛ́lɛ̀ì là mia nì lɛ́ o lɛ̀ séĩ́ mɔ̀ɔ, óò wèè ka bà.

¹⁷M lèe-gé vɔ̀, ḿm̀ kpé kã ka lɛ̀ɛ nyɔ́ɔ̀ɔ, kà ka yɛ́lɛ́ kɛ yí mia lɛ́ ò mia fĩ̀ã̀ ɓo, ɛ̃́ɛ̃́ zeĩ́ lɛ́ ò mia lé to luúa mɔ́ɔ̀ wɔ̃̀ mɔ̀. O zì wɔ̃́ kɛ-kɔ̀ lɛ gbɛɛ é góá pɛ-zɔ̃̀ɔ̃̀-kɔ̀ lɛ́ wa zɔ̃̀ɔ̃̀ ka lɛ̀ɛ píé. Kà o mɛ́ kpɔ́.

¹⁸Ƃii mia lɛ́ ò wɔ̃́ sùua nì kɛ̀ɛ, o wá yɛɓo kɛpìà Kɛ́lɛ̀ì ko Dàa-mì lɛ̀ɛ. Kɛɛ óò yɛɓo kɛ̀ pɛ lɛ́ à lɔ̀ lɛ o kɛpìàa lɛ̀ɛ. Óò mia lɛ́ òó wɔ̃́ yí dɔɔ bèkɛ̀ ɓo wè nɛ́ĩ́-nɛ̀ĩ̀ wà dɔ́ŋɔ́ yà mia lɛ̀ɛ wè gèeè ká.

¹⁹Mia séĩ́-séĩ́ waà zi lɛ́ kaà Wálà lé-wè kɛáa wɔ̃̀ ma. M gé lɛ́ɛ̀ li ka mɔ́ɔ̀ wɔ̃̀ mɔ̀. Ḿm̀ nàà ka gí é kã́ wɔ̃́ lɛ́ lɛ kpeĩa mɔ́ɔ̀ wɔ̃̀ yí, ɛ̃́ɛ̃́ ḿm̀ nàà ká kɛ lɛ̀ mi lɛ́ à gí kã́ã̀ wáa lɛ́ ɓe kɛ-wɔ̃̀ yɔɔ kɛɛ̀ yí.

²⁰Ɛ́ɛ̃́ Wálà lɛ́ è zò-yà-gé nɔ mia lɛ̀ɛ, lɛ́ɛ̀ lo Sétɔ̃̀ tìli-tílíì ka gã̀ wì dɛɛ. Ko Dàa-mì Zízɛ̀ zì zò-kɛ̀-sɛ̀ɛ é kɛá ka píé.

²¹Témɔ́tè lɛ́ kò ye nì kò yɛɓo kɛ̀ e kíe làa, lɛ́ɛ̀ wèè ka bà. Lúsìà, Zésĩ̀, Sɔsìpétà lɛ́ o m pà-mìà káa, óò wèè ka bà.

²²Ma Tɔ́sà lɛ́ m̀ kii e kéa bɛ̃̀ɛ̃, ḿm̀ wèè ka bà ko Dàa-mì tɔ́ yí zàá.

²³M lɔ̀ɔ̀-mi dàa-mì lɛ́ ò si Géyà, lɛ́ à kɔ̀ yàà lɛ Wálà-mìà séĩ́ wìa, lɛ́ɛ̀ wèè ka bà. Ìlásà lɛ́ e pɛlèe kpɔ̀-tã́ã̀-mì ká pɛ́lɛ kɔa yí zèea wɛ̃́ĩ̀a, ɛ̃́ɛ̃́ wà ko lèe-gé ò si Kɔ́tɔ̀ɔ, óò wèè ka bà. [

²⁴Ko Dàa-mì Zízɛ̀ Kɛ́lɛ̀ì zì zò-kɛ̀-sɛ̀ é kɛ ka séĩ́ ka píé. É kɛ kíli.]

²⁵Kɔ̀à Wálà tɔ́ ɓɔ. Lɛ́ɛ̀ bɛ̀i à mɔ̀ é ka kɛ ká dɔ ka dɔ̀lɔ̀ mɔ̀ gágà lɛ̀ zí nɔ́ wɔ̃́ làṹ yiè lɛ́ m̀ gèea, ɛ̃́ɛ̃́ lòũ̀-ɓo-wè lɛ́ à gbɛ̃̀ɛ̃̀ lɛ Zízɛ̀ Kɛ́lɛ̀ì mɔ̀ɔ, à gèe à káa lɛ́ ɓe. Ɛ́ɛ̃́ lɛ nɔ́ zeĩ́ lɛ̀ wɔ̃́ lɛ́ mia òó gbaa kɛ à yí dɔpìà, ɓii à bĩ̀ĩĩ̀ e kɛá kɛ̀ɛ̀ búnù-búnùzɛ̀ lɛ́ aà diea píé, lɛ́ Wálà aà lɛ́ɛ́ ɓo gbaa làa, lɛ́ ɓe.

²⁶Kɛɛ wɔ̃́ e kília aà dà gbaa wáà-là kii lɛ́ dɔ̀-Wálà-lé-là-mìà wa bɛ̃̀ɛ̃ kolo là zàá. Ɛ́ɛ̃́ tòá-kíli Wálà zì wɔ̃́ gèè mia lɛ̀ɛ wáà kɛ̀ kolo là zàáa, sɛ́lɛ́ séĩ́-séĩ́ yí-mìà óò à wɔ̃̀ yí dɔ, kɛɛ zò-dɔ̀à-mɔ̀ é kɛ mia séĩ́-séĩ́ yí wáà Wálà wéè kɛ̀.

²⁷Wálà lɛ́ à doó lɛ́ nɔ́ à gí kã́ã̀ lɛ ɓɛ, é tɔ́-ɓɔ sɔ̀lɔ̀ ɓo Zízɛ̀ Kɛ́lɛ̀ì tɔ́ yí zàá tòá-kíli ká. É kɛ kíli.