Read Yamano Wólómà 3 Bible Online

Wólómà 3 - Yamano bible

Wólómà 3

¹Yé aà kɛ mɔṹ kília, kɛ̀ Zúù-mì káa mɛ́ è bɛ̀i à mɔ̀ á kɛ Zúù-mìà lɛ̀ɛ? Ɛ́ɛ̃́ bɔ̃́ɔ̃́ síì yí gbɛɛ laa mɔ̀?

²M̀m̀, wɔ̃́ e kília, o yí lɛ o mɔ̀ kpànazɛ̀ zi nɔ́ɔ fé ká. Bèĩzɛ̀ɛ, Wálà e e lé-wè kpɔ́ Zúù-mìà kɔ̀ là.

³Yé aà kɛ kíli, lɛ́ zò-dɔ̀à-mɔ̀ wá o dò yía, ó kɛ̀ kpɛ? Wɔ̃́ sùu e kéa mɔ́ɔ̀ wɔ̃̀ mɔ̀ɔ, lɛ́ɛ̀ lo à kɛɛ̀ Wálà é gɔ̃́ kɛɛ̀ zò-dɔ̀à-mɔ̀ zɛ̀?

⁴Gbàaò, lɛ̀ɛ́ bɛ̀i kɛɛ̀ gbɛɛ ɓo kíli. Kɛɛ mia séĩ́ ó kɛ bɛ̃̀ɛ̃ nɛ̀-mìà káa, Wálà yee è kɛ wánà zɛ̀. À bɛ̃̀ɛ̃ɛ̃̀ lɛ Wálà kii yí weeá kélɛ̀, “Yé ɓaà wɔ̃́ dò gèea, lɛ à mɔ̀ ó yí dɔ kélɛ̀ i wánà zɛ̀. Yé waà kɛ i mɛ̀ĩ̀ ɓopìàa, lɛ à mɔ̀ é li i mɔ̀.”

⁵Yé wɔ̃́ yɔɔ lɛ́ kò kɛ̀ɛ aà ɓɔ Wálà zì kɛ̀-kpeĩ-kɔ̀ ká wáà-làa, kɔ́áà lo à gèeè kpɛ? Yé Wálà aà kɔa sã̀ dɔ à wɛ̃́ĩ̀a, kɔ́áà lo à gèeè aà wɔ̃́ yɔɔ kɛ? (Wéé m̀ ɓoa, ḿm̀ ɓo mi-wéé-zì ká.)

⁶Gbàaò, lɛ̀ɛ́ bɛ̀i kɛɛ̀ gbɛɛ ɓo kíli. Wálà è gɔ̃̀á kɛɛ̀ wánà zɛ̀ɛ, zi sùu kpɛɛ̀ zɛ̀ lɛ́ áá mɛ̀ĩ́-sà dɔɔ̀ à ká kpóṹ là zèe mìà mɔ̀?

⁷Yé m zì nɛ̀ kɛɛ̀ aà kɛ mia wáà Wálà zì wánà-wɔ̃̀ɔ gɛ̃̀ séĩ́-sèĩ̀ kɛ ó à tɔ́ ɓɔɔ, mɛ́ e kɛ lɛ́ ò mɛ̀ĩ́-sà kàà tĩã́ m wĩĩ́ kɛ-wɔ̃̀ yɔɔ kɛɛ̀ wɛ̃́ĩ̀?

⁸Mɛ́ e kɛ mɔṹ lɛ́ kòó wɔ̃́ yɔɔ kɛ, kɛɛ wɔ̃́ yiè é kɛ à kolo là? Wɔ̃́ lɛ́ mia dò waà nɛ̀ kpɔ́ à ká m mɔ̀ wáà gèè m wɔ̃́ yɔɔ sùua gèea, lɛ́ ɓɛ. Mɛ̀ĩ́-sà lɛ́ɛ̀ lo káà o wĩĩ́. Ɛ́ɛ̃́ lɛ à mɔ̀ é káá o wĩĩ́.

⁹Lɛ̀ lɛ kília, mia lɛ́ kɔa Zúù-mìà káa, kɔa zì kɛ̀ Zúù-mìà káa e kɔa kɛ fìa, é dieá sɛ́lɛ́ gbɛɛ yí-mìà là? Ye wá gbɛɛ ɓo kíli. Maà à zɔ̃̀ɔ̃̀ kélɛ̀ kɛ-wɔ̃̀ yɔɔ kɛɛ̀ diè lɛ mia séĩ́-séĩ́ ká, é kɛ bɛ̃̀ɛ̃ Zúù-mìà ɛ̃́ɛ̃́ sɛ́lɛ́ gbɛɛ yí-mìà káa ká.

¹⁰À bɛ̃̀ɛ̃ɛ̃̀ lɛ Wálà kii yí weeá kélɛ̀, “Mi dò nɔ́ɔ fé wá kpeĩ gbɛɛ ɓo.

¹¹Mi doó fèle wá ɓe kɛ é wɔ̃́ yí ma. Mi dò nɔ́ɔ fé wá ɓe kɛ é Wálà naa.

¹²Mia séĩ́-séĩ́ waà gó Wálà píé, o séĩ́-séĩ́ waà zi yɔɔ sí. Mi dò nɔ́ɔ fé wá ɓe kɛ é wɔ̃́ púlú kɛ. O doó ɓɔ̀ɔ wá o bà kɛ á kɛ kíli.

¹³O kpɛí-zì lɛ kélɛ̀ ɓɔ́à lé ɓoòa zɛ̀ lɛ́ ɓe. O nanà yɛɛ̀ lɛ o lɛ̀ɛ mia bèkɛ̀-ɓo-wèè gèepìà. Mɛ̀nɛ kɛ̃̀ĩ̀ lɛ o nanà là, wáà mɛ́ĩ́ ɓò à ká.

¹⁴O lé paà lɛ tɛ́í-wɛ́lɛ́ ká. Ɛ́ɛ̃́ o wéè lɛ mia tóó yí nyɔ́ɔ̀ɔ.

¹⁵O gã̀ yí lɛ tíè-tíèe lò o ká mi zɛpìà.

¹⁶Zi nɔ́ɔ fé ò to à píéa, óò pɔɔ̀ sìè, tó wáà zò-dà-zízàá tò mia mɔ̀.

¹⁷Zi lɛ́ zò-yà-gé lɛ à píéa, òó dɔ.

¹⁸Tùò Wálà lɛ̀ɛ wá bɛ̃̀ɛ̃ o zì yɛ́lɛ́-táá yí.”

¹⁹Kɔ́áà yí dɔ gbaa kélɛ̀ wɔ̃́ nɔ́ɔ fé lɛ́ lɛ Lɔ́ɔ̀ɔ yía, lɛ́ɛ̀ ɓɔ mia lɛ́ o Lɔ́ɔ̀ e kília wìa mɔ̀. Lɛ kíli kɛ kpɔu é yà mia séĩ́ lé, ɛ̃́ɛ̃́ kɛ kpóṹ là mìà séĩ́ ó ɓɔ Wálà là mɛ̀ĩ́-sà dɔ̀-mia-mɔ̀ pìà.

²⁰Wɔ̃́ lɛ́ Lɔ́ɔ̀ɔ à gèea kɛɛ̀ lɛ̀ɛ́ ló mi nɔ́ɔ fé dò kɛɛ̀ é kɛ kpeĩ Wálà nyìɛ là. Ƃii Lɔ́ɔ̀ɔ láà kɛ̀ tó mi ɓáà yí dɔ̀ kélɛ̀ íì kɛ-wɔ̃̀ yɔɔ kɛ̀.

²¹Kɛɛ zi lɛ́ Wálà è mia kɛ̀ à ká kpeĩ e dìè lɛ̀ɛ, aà dà gbaa wáà-là. Kɛ̀ kpeĩ Wálà lɛ̀ɛ e kília, à gã́ã̀ wá Lɔ́ɔ̀ɔ gbĩ mɔ̀. Kɛɛ Lɔ́ɔ̀ kiia wà dɔ̀-Wálà-lé-là-mìà wà kíía, lɛ́ ò à kélá-wè ɓoa.

²²Wálà lɛ́ɛ̀ mia kɛ̀ kpeĩ o zì zò-dɔ̀à-mɔ̀ lɛ́ e Zízɛ̀ Kɛ́lɛ̀ì yía kolo là. Wálà lɛ́ɛ̀ wɔ̃́ e kília kɛ̀ mia séĩ́ lɛ́ o zò dɔɔ̀ lɛ Kɛ́lɛ̀ì mɔ̀ɔ lɛ̀ɛ. Ƃii mia fĩ̀ã̀ ɓoò wá.

²³Mia séĩ́-séĩ́ waà kɛ-wɔ̃̀ yɔɔ kɛ, ɛ̃́ɛ̃́ o Wálà zì kɛ̀-kpànazɛ̀-kɔ̀ ká gbèkèni.

²⁴Wálà zì zò-kɛ̀-sɛ̀ kolo là zàáa láà kɛ̀, tó o séĩ́ o kpeĩ à lɛ̀ɛ ɓɔ̀ɔ. À kɛɛ̀ lɛ kíli Kɛ́lɛ̀ì Zízɛ̀ là mia wũ-mɛ́-ɓoò kolo là.

²⁵Wálà e Kɛ́lɛ̀ì dɔ mia wɛlɛ mɔ̀ kɛɛ yé mi aà e zò dɔ à mɔ̀ɔ, kɛɛ Kɛ́lɛ̀ì zì léà é kɛ pɛ́ è mi zì kɛ-wɔ̃̀ yɔɔ ɓo mi wũ mɔ̀ɔ ká. Wálà e Kɛ́lɛ̀ì dɔ mia wɛlɛ mɔ̀, kɛ é zi lɛ́ è mia kɛ̀ à ká kpeĩ e dìè lɛ̀ɛ zɔ̃̀ɔ̃̀. Bèĩ-bèĩzɛ̀ɛ, Wálà e e zò kṹ tã́ã̀, ɛ̃́ɛ̃́ e vɔ kɛ-wɔ̃̀ yɔɔ lɛ́ mia wa kɛɛ zì.

²⁶Wálà e wɔ̃́ e kéa kɛ kíli kɛɛ é e zì kɛ̀-kpeĩ-kɔ̀ zɔ̃̀ɔ̃̀ míá o ɓe yà kɔa ɓoa yía lɛ̀ɛ. Láà zɔ̃̀ɔ̃̀ mia lɛ̀ɛ kélɛ̀ à dìè-tĩ́ lɛ kpeĩ, ɛ̃́ɛ̃́ kélɛ̀ lɛ́ɛ̀ mi nɔ́ɔ fé lɛ́ à zò dɔɔ̀ lɛ Zízɛ̀ mɔ̀ɔ, kɛ̀ kpeĩ e dìè lɛ̀ɛ.

²⁷Yé lɛ kília, mɛ́ mɔṹ e tó lɛ́ ò lé gbùò kɛ̀ à là? Pɛ gbɛɛ tóà wá. Mɛɛ wɔ̃̀ lɛ́ a kɛ lɛ́ pɛ gbɛɛ tóà wá? Lɛ mi là Lɔ́ɔ̀ɔ kũ̀ tã́ã̀ wɔ̃̀ mɔ̀? Gbàaò. Lɛ zò-dɔ̀à-mɔ̀ e à yía mɔ̀.

²⁸Ƃii kóò wɔ̃́ɔ wũ kũ kélɛ̀ zò-dɔ̀à-mɔ̀ doó lɛ́ nɔ́ è bɛ̀i à mɔ̀ é mi kɛ kpeĩ Wálà lɛ̀ɛ. Lɔ́ɔ̀ɔ kɛɛ̀ lɛ̀ɛ́ bɛ̀i mi kɛɛ̀ kpeĩ.

²⁹Kéa, Wálà e kéa lɛ Zúù-mìà doó wà Wálà ká? Ye wá sɛ́lɛ́ gbɛɛ yí-mìà wà Wálà ká kíli? Gbàaò, lɛ sɛ́lɛ́ gbɛɛ yí-mìà wà Wálà ká nɔ́ kíli.

³⁰Wálà lɛ doó. Lɛ́ɛ̀ lo mia lɛ́ o bɔ̃́ɔ̃́ síì lɛɛ, kɛɛ̀ kpeĩ e dìè lɛ̀ɛ o zì zò-dɔ̀à-mɔ̀ yí zàá, ɛ̃́ɛ̃́ lɛ́ɛ̀ lo mia lɛ́ o bɔ̃́ɔ̃́ síì wáa, kɛɛ̀ kpeĩ e dìè lɛ̀ɛ o zì zò-dɔ̀à-mɔ̀ kolo là.

³¹À yí lɛ́ e kélɛ̀ kɔ́áà zò-dɔ̀à-mɔ̀ si, kɔ́áà Lɔ́ɔ̀ɔ kɛá fĩ́ĩ́-nyɛ-zɛ̀? Gbàaò, ye wá gbɛɛ ɓo kíli. Wɔ̃́ kò kɛ̀ɛ lɛ́ e kélɛ̀, kóò Lɔ́ɔ̀ɔ wɛ́lɛ́ kɛ̀ à yí.