Read Yamano Wólómà 5 Bible Online

Wólómà 5 - Yamano bible

Wólómà 5

¹Yé kɔaà kɛ gbaa kpeĩ Wálà lɛ̀ɛ ko zì zò-dɔ̀à-mɔ̀ kolo là zàáa, kɛɛ zò-yà-gé aà kɛ gbaa kò Wálà nì ko fĩ̀ã̀ ko Dàa-mì Zízɛ̀ Kɛ́lɛ̀ì tɔ́ yí zàá.

²À ye lɛ́ a kɛ lɛ́ yíkɛ̀ gáàa lɛ ko kɛ̀lɛ̀, kɛ kó wàà lɛ̀ lɛ́ Wálà è bɛ̀i à mɔ̀ é zò-kɛ̀-sɛ̀ kɛ ko ká, lɛ̀ lɛ́ ko dɔ̀á yi gbaa mɔ̀ɔ mɔ̀ɔ. Lɛ̀ e kília, kóò wàà yi ko zì zò-dɔ̀à-mɔ̀ kolo là. Kóò géli kɛ̀ gbaa pɛ lɛ́ ko zò laa mɔ̀ɔ wɛ̃́ĩ̀. Pɛ́ e kília tɔ́ lɛ́ Wálà zì lɛ̀-fɔ̀nɔɔ̀ɔ lɛ́ kò à ye nì kò lo tàà-kíe-píé kɛɛ̀ à yía káa.

³Ye wá bɛ̃̀ɛ̃ à doó ká. Kɛɛ kóò géli kɛ̀ yé wɔ̃́ nyɔ́ɔ̀ɔ aà ɓɔ ko làa ká. Ƃii kóò yí dɔ kélɛ̀ wɔ̃́ nyɔ́ɔ̀ɔ gɛ̃̀ɛ̃ɛ̃̀ lɛ́ɛ̀ fã̀ã́-wàà nɔ mi lɛ̀ɛ.

⁴Zéniía, fã̀ã́-wàà e kília láà zɔ̃̀ɔ̃̀ kélɛ̀ mi ɓaà die yí-dã́-wɔ̃̀ doò do yí. Wɔ̃́ e kília lɛ́ à kɛ̀ lɛ́ zò-kɛ̀-pɛ-mɔ̀ è kɛ̀ mi yía.

⁵Zò-kɛ̀-pɛ-mɔ̀ e kéa, lɛ̀ɛ́ ko zò dà do zízàá. Ƃii Wálà aà ko zò píé pa e zì lɔ̀-kɛ̀á ká. Wálà lɛ́ɛ̀ wɔ̃́ e kéa kɛ̀ kíli là Gɛ̀ɛ̀ Púlú lɛ́ a nɔ ko lɛ̀ɛ ká.

⁶Ƃii lɛ̀ lɛ́ yíkɛ̀ gáàa gbɛɛ lɛ̀ɛ́ gbaa kɛ nɛ́ ko yía, Kɛ́lɛ̀ì e ga mia lɛ́ ò wɔ̃́ yɔɔ kɛ̀ Wálà gbĩ mɔ̀ɔ wɛ̃́ĩ̀, lɛ̀ à lúó kpó-kpó e ɓɔɔ ká.

⁷Lɛ dóo gágà kɛ mi dò é ga mi kpeĩ wɛ̃́ĩ̀. Mi dò lɛ́ɛ̀ bɛ̀i à mɔ̀ lèĩ à zò é kɛ gágà é ga mi zò yiè zɛ̀ mɔ́ɔ̀ wɔ̃̀ mɔ̀ lúó dò ká lèĩ.

⁸Kɛɛ Kɛ́lɛ̀ì e ga ko wɛ̃́ĩ̀ lɛ̀ lɛ́ ko kɛ tĩã́ kɛ-wɔ̃̀ yɔɔ kɛ-mìà káa ká. Zi lɛ́ Wálà e ko zì lɔ̀-kpɔ̀à-mɔ̀ e à yía zɔ̃̀ɔ̃̀áa, lɛ́ ɓɛ.

⁹Yé kɔaà kɛ kpeĩ gbaa Wálà lɛ̀ɛ Kɛ́lɛ̀ì zì léà kolo là zàáa, lɛ à mɔ̀ ko laà é kɛá mɔṹ kpó-kpó ɓo kpɛɛ̀ Wálà zì wɔ̃́à-wàa-kɔ̀ kɛ̀lɛ̀ Kɛ́lɛ̀ì tɔ́ yí zàá?

¹⁰Ko kɛ gèlè gɔ̃pìà Wálà ká. Kɛɛ a kɛ kò à ye nì ko li ko kíe nì lɛ̀ɛ à Gbe zì gá a ɓoa kolo là zàá. Yé kò Wálà nì kɔaà li gbaa kília, lɛ à mɔ̀ ko laà é kɛá mɔṹ kpó-kpó ɓo kpɛɛ̀ Kɛ́lɛ̀ì zì kɛ̀ɓe yí?

¹¹Kɛɛ à séĩ́ wá bɛ̃̀ɛ̃. Kóò géli kɛ̀ Wálà yí ko Dàa-mì Zízɛ̀ Kɛ́lɛ̀ì lɛ́ a kɛ lɛ́ kò Wálà nì ko li ko kíe nì lɛ̀ɛ tɔ́ yí zàá.

¹²Gɔ̃ doó lɛ́ a kɛ lɛ́ kɛ-wɔ̃̀ yɔɔ kɛɛ̀ e nu kpóṹ là zèea. Ɛ́ɛ̃́ kɛ-wɔ̃̀ yɔɔ kɛɛ̀ e kília, e nu ga ká mia gbĩ mɔ̀. À mɔ́ɔ̀ wɔ̃̀ mɔ̀ɔ, ga e pɛ̃̀ɛ̃̀ mia séĩ́ yí, ɓii mia séĩ́ waà kɛ-wɔ̃̀ yɔɔ kɛ.

¹³Kɛ-wɔ̃̀ yɔɔ kɛɛ̀ e kɛ kpóṹ là zèe kɛ Wálà é tĩã́ Lɔ́ɔ̀ɔ nɔɔ̀ mia lɛ̀ɛ. Kɛɛ lɛ̀ lɛ́ lɔ́ɔ̀ wá yia, òó mia kṹ kɛ-wɔ̃̀ yɔɔ kɛɛ̀ wɛ̃́ĩ̀ yi.

¹⁴Kɛɛ é kã́ lúó lɛ́ Ádã̀ e kɛá ɓea mɔ̀, é ló é ɓɔá Móózè kɛ̀à-yí-lùò mɔ̀ɔ, ga e kɛ mia séĩ́ là, yé bɛ̃̀ɛ̃ mia yé òó gbaa kɛ-wɔ̃̀ yɔɔ lɛ́ Ádã̀ a kɛɛ, kɛɛ ká. Wɔ̃́ a kɛɛ, lɛ́ e Wálà wéè a tóa ká. Ádã̀ e kɛ mi lɛ́ e kɛ à mɔ̀ é nua gɔ̃̀á ká.

¹⁵Kɛɛ pɛ lɛ́ Wálà a nɔ mia lɛ̀ɛ ɓɔ̀ɔ, ye wá kélɛ̀ kɛ-wɔ̃̀ yɔɔ lɛ́ Ádã̀ a kɛɛ lɛ́ ɓe. Mia búnùzɛ̀ o ga gɔ̃ doó e kília zì kɛ-wɔ̃̀ yɔɔ kɛɛ̀ kolo là. Kɛɛ Wálà zì zò-kɛ̀-sɛ̀ɛ lɛ dóo kpànazɛ̀, é diá Ádã̀ zì kɛ-wɔ̃̀ yɔɔ a kɛɛ là. E bɛ̀i, pɛ lɛ́ mia búnù-búnùzɛ̀ ò sɔ̀lɔ̀ ɓo ɓɔ̀ɔ gɔ̃ doó lɛ́ e Zízɛ̀ Kɛ́lɛ̀ì káa zì zò-kɛ̀-sɛ̀ kolo là zàáa, lɛ dóo kpánazɛ̀ nɔ́ kíli.

¹⁶Ɛ́ɛ̃́ zeĩ́a, kòó bɛ̀i à mɔ̀ kɛ kó pɛ lɛ́ Wálà à nɔ mia lɛ̀ɛ ɓɔ̀ɔ gɔ̃́ gɔ̃ doó zì kɛ-wɔ̃̀ yɔɔ mɔ̀. Ƃii mɛ̀ĩ́-sà ɓoò lɛ́ e tó kɛ-wɔ̃̀ yɔɔ doó e kília píéa, e nu mɛ̀ĩ́-sà kàà-mia-wĩĩ́ ká. Kɛɛ pɛ lɛ́ Wálà à nɔ mia lɛ̀ɛ ɓɔ̀ɔ, lɛ́ è to kɛ-wɔ̃̀ yɔɔ búnùzɛ̀ píéa, lɛ́ɛ̀ nu mɛ̀ĩ́-sà lì-mi-mɔ̀ ká.

¹⁷Gɔ̃ doó zì kɛ-wɔ̃̀ yɔɔ kɛɛ̀ kolo là zàáa, ga a mɔ́ɔ̀ yà ɓo mia là gɔ̃ doó e kília mɔ́ɔ̀ wɔ̃̀ mɔ̀. Kɛɛ wɔ̃́ lɛ́ e kɛ gɔ̃ doó lɛ́ e Zízɛ̀ Kɛ́lɛ̀ì káa kolo là zàáa, lɛ dóo kpànazɛ̀. Wɔ̃́ e kília lɛ́ e kélɛ̀ mia séĩ́ lɛ́ ò wɔ̃́ búnùzɛ̀ sɔ̀lɔ̀ ɓo Wálà zì zò-kɛ̀-sɛ̀ yí zàá, ɛ̃́ɛ̃́ ò pɛ lɛ́ Wálà à nɔ mia lɛ̀ɛ ɓɔ̀ɔ, lɛ́ e kélɛ̀ à zì kɛ̀-kpeĩ-kɔ̀ɔ, ò à sɔ̀lɔ̀ ɓoa, óò lo kɛɛ̀ ɓe, ɛ̃́ɛ̃́ óò lo kɛɛ̀ pɔɔ̀ wũ-là-mìà ká.

¹⁸À mɔ́ɔ̀ wɔ̃̀ mɔ̀ɔ, kɛ-wɔ̃̀ yɔɔ doó lɛ́ e nu mɛ̀ĩ́-sà kàà-mia-wĩĩ́ ká mia séĩ́ wĩĩ́a. Zí nɔ́ doóa káa, wɔ̃́ kpeĩ doó kɛɛ̀ láà kɛ̀ mɛ̀ĩ́-sà áà lì mia séĩ́ mɔ̀, ɛ̃́ɛ̃́ áà kɛ̀ɓe nɔ̀ o lɛ̀ɛ.

¹⁹Zi lɛ́ gɔ̃ doó zì Wálà wéè tóò a mɔ́ɔ̀ à kɛ ɓo lɛ́ mia búnùzɛ̀ wa mɔ́ɔ̀ kɛ ɓo kɛ-wɔ̃̀ yɔɔ kɛ-mìà káa, zí nɔ́ doóa káa, gɔ̃ doó zì Wálà wéè kɛɛ̀ lɛ́ɛ̀ lo à kɛɛ̀ tó mia búnùzɛ̀ o kɛ kpeĩ Wálà lɛ̀ɛ.

²⁰Lɔ́ɔ̀ɔ e nu, kɛɛ é kɛ-wɔ̃̀ yɔɔ là kpɔ́. Kɛɛ lɛ̀ lɛ́ kɛ-wɔ̃̀ yɔɔ là kpɔ́ɔ̀ lɛ yía, Wálà zì zò-kɛ̀-sɛ̀ là kpɔ́ɔ̀ lɛ gbùò yi, é diá à là.

²¹À mɔ́ɔ̀ wɔ̃̀ mɔ̀ɔ, zi lɛ́ kɛ-wɔ̃̀ yɔɔ kɛɛ̀ e yà à ká mia là ga káa, zí nɔ́ doóa lɛ́ Wálà zì zò-kɛ̀-sɛ̀ɛ à tóò lɛ à ká mia là à zì kɛ̀-kpeĩ-kɔ̀ɔ kolo là zàá, áà lò ko ká lɛ̀ lɛ́ kɛ̀ɓe wɔ́lɔ́-wɔ́lɔ́ lɛ yía mɔ̀ ko Dàa-mì Zízɛ̀ Kɛ́lɛ̀ì tɔ́ yí zàáa.