Read Yamano 1 Kɔ̀léĩ́tĩ̀ã̀ 14 Bible Online

1 Kɔ̀léĩ́tĩ̀ã̀ 14 - Yamano bible

1 Kɔ̀léĩ́tĩ̀ã̀ 14

¹Yé lɛ kília, lɔ̀-kɛ̀à-mɔ̀ lɛ́ fã̀ã́-wàà áá kɛɛ̀ ka yí káà nààa. Nɔ̀-lɛ̀ɛ-pɛ̀ lɛ́ Gɛ̀ɛ̀ Púlú à nɔ mia lɛ̀ɛ, à mɔ́ɔ̀ wɔ̃̀ è die ka zò ká. À ye kpó-kpó lɛ́ à wɔ̃̀ è bɛ̀i à mɔ̀ é die ka zò káa lɛ́ e kélɛ̀, wɔ̃́ lɛ́ Wálà à kàà mia lé káà gèèa.

²Ƃii mi lɛ́ è wè gbɛɛ gèea, wéé e kília lɛ̀ɛ́ à gèe mia lɛ̀ɛ. Ƃii mi gbɛɛ lɛ̀ɛ́ à wéè yí ma. Kɛɛ lɛ́ɛ̀ wéé e kília gèe Wálà lɛ̀ɛ. Wɔ̃́ lɛ́ à bĩ̀ĩĩ̀ e kɛ à káa, lɛ́ è à gèe Gɛ̀ɛ̀ Púlú zì yíkɛ̀ gáàa yí zàáa.

³Kɛɛ mi lɛ́ è wɔ̃́ lɛ́ Wálà à kàà à léa gèea, lɛ́ɛ̀ à gèe mia lɛ̀ɛ. Ɛ́ɛ̃́ wɔ̃́ lɛ́ à gèe kília, lɛ́ɛ̀ mia mɛ́ kɛ̀ gágà, ɛ̃́ɛ̃́ tó áà fã̀ã́-wàà nɔ̀ o lɛ̀ɛ, e bɛ̀i, áà o zò-yà-tã́ã̀ wɔ̃̀ gèè o lɛ̀ɛ.

⁴Mi lɛ́ è wè gbɛɛ gèea, à dìè zì mɛ́ kɛ̀ gágà pɛ̀ lɛ́ɛ̀ go à dìè kɛ̀lɛ̀. Kɛɛ mi lɛ́ è wɔ̃́ lɛ́ Wálà à kàà à léa gèea, à ye lɛ́ e Wálà-mìà séĩ́ zì mɛ́ kɛ̀ gágà pɛ̀ káa.

⁵Máá naà à ká yé ka séĩ́ kaà kɛ wè gbɛɛ̀ gbɛɛ gèe-mìà káa ká. Kɛɛ máá naà ká dóo yé ka séĩ́ kaà kɛ wɔ̃́ lɛ́ Wálà à kàà mia léa, gèe-mìà káa ká kpó-kpó ɓo. Mi lɛ́ è wɔ̃́ lɛ́ Wálà à kàà à léa gèea, à kɛ-wɔ̃̀ lɛ dóo à mɔ̀ kpànazɛ̀, é diá mi yé è wè gbɛɛ̀ gbɛɛ gèea là, yé mi wá ɓe kɛɛ é wɔ̃́ lɛ́ à gèea yí ɓo mia lɛ̀ɛ, kɛɛ é Wálà-mìà séĩ́ mɛ́ kɛ gágàa ká.

⁶M lèe-gé vɔ̀, yé lɛ kília, yé maà nu ka píé máà wè gbɛɛ̀ gbɛɛ gèè ka lɛ̀ɛ, gbũ̀-mɔ̀ kpɛɛ̀ lɛ́ɛ̀ lo góò à yí kɛ é nu ka píé? Gbũ̀-mɔ̀ gbɛɛ wá à yí ka mɔ́ɔ̀ wɔ̃̀ mɔ̀, yé m̀ḿ lɛ́ɛ́ ɓo nɛ́ wɔ̃́ lɛ́ e kɛ gbòo wìa làa ká, ɛ̃́ɛ̃́ yé m̀ḿ wɔ̃́ yí-dɔ-kɔ̀ dò, ɛ̃́ɛ̃́ wɔ̃́ lɛ́ Wálà a káá m lé, ɛ̃́ɛ̃́ wà pɛ-zɔ̃̀ɔ̃̀-kɔ̀ nì, yé m̀ḿ nu nɛ́ o ká ka píéa ká.

⁷Ƃɔ̀ɔ̀ wà kɔ̃̀níì lɛ́ o wéé-pɛ̀ kɛ̀á-pɛ̀ ká, lɛ́ o wá tɛ́lɛ́-pɛ̀ káa, zi sùu kpɛɛ̀ lɛ́ ò lo tã́ lɛ́ ò ɓoa, dɔɔ̀ à ká yé òó ɓɔ̀ɔ̀ɔ pìè e pìè-zì ká, ɛ̃́ɛ̃́ yé òó kɔ̃̀níìa zɛ e zɛ-zì káa ká?

⁸E bɛ̀i, mi lɛ́ è bià-kpòò pìè gèlè wɛ̃́ĩ̀a, yé lɛ̀ɛ́ à pìè e pìè-zì káa, dé è lo e dìè pɛ̀ kɛɛ̀ gèlè wɛ̃́ĩ̀?

⁹Zi nɔ́ doóa káa, yé kaà wɔ̃́ gèe wè gbɛɛ lɛ́ mia òó yí maa yía káa, zi sùu kpɛɛ̀ lɛ́ mia ò lo wɔ̃́ kà gèea yí maà à ká? Ƃii wɔ̃́ lɛ́ kà lo à gèeè kília, fã̀ã̀ lɛ́ɛ̀ lo lóò à ká, ɓii mia òó yí maa wɛ̃́ĩ̀.

¹⁰Wè gbɛɛ̀ gbɛɛ lɛ́ mia ò gèea, lɛ búnùzɛ̀ kpóṹ là zèe. Kɛɛ à dò wá ɓe kɛ ó gèe à yí wáá mɔ̀.

¹¹Kɛɛ yé m̀ḿ wè lɛ́ mi dò à gèe m lɛ̀ɛ maa, mi lɛ́ è wè e kília gèea, lɛ́ɛ̀ lo kɛɛ̀ sɛ́lɛ́ gbɛɛ yí-mì ká m lɛ̀ɛ, ɛ̃́ɛ̃́ ma bɛ̃̀ɛ̃ ḿm̀ lo kɛɛ̀ sɛ́lɛ́ gbɛɛ yí-mì ká à bɛ̃̀ɛ̃ à lɛ̀ɛ nɔ́ kíli.

¹²Lɛ̀ lɛ́ kà nàà à ká dóo nyɔ́ɔ̀ɔ kɛɛ ká nɔ̀-lɛ̀ɛ-pɛ̀ lɛ́ è go Gɛ̀ɛ̀ Púlú kɛ̀lɛ̀ɛ sɔ̀lɔ̀ ɓoa, nɔ̀-lɛ̀ɛ-pɛ̀ nì yé ò Wálà-mìà mɛ́ kɛ̀ gágàa, ka fã̀ã́ è wàà yɛɓo kɛ̀ o ká ká é diá pɛ séĩ́ là.

¹³À mɔ́ɔ̀ wɔ̃̀ mɔ̀ɔ, mi lɛ́ è wɔ̃́ gèe wè gbɛɛ yía, lɛ sɛ̀ é sɛ̀nɛ ɓo Wálà lɛ̀ɛ kɛ é nɔ̀-lɛ̀ɛ-pɛ̀ yé è bɛ̀i à mɔ̀ é à yí ɓo mia lɛ̀ɛ nɔ à lɛ̀ɛ.

¹⁴Ƃii yé maà sɛ̀nɛ ɓo wè gbɛɛ yía, m zì gɛ̀ɛ̀ lɛ́ɛ̀ sɛ̀nɛ e kília ɓo, kɛɛ m zì yɛ́lɛ́-táá ko gbɛ̃̀ɛ̃̀ lɛ à mɔ̀.

¹⁵Ḿm̀ lo mɔṹ à kɛɛ̀ kpɛ? Ḿm̀ lo sɛ̀nɛ ɓoò m gɛ̀ɛ̀ ká, ɛ̃́ɛ̃́ tó máà ɓò zeĩ́ m zì yɛ́lɛ́-táá ká. Ḿm̀ lo tã́ ɓoò m gɛ̀ɛ̀ ká, ɛ̃́ɛ̃́ tó máà ɓò zeĩ́ m zì yɛ́lɛ́-táá ká.

¹⁶Yé ɓaà Wálà zúo ɓo i gɛ̀ɛ̀ doó káa, zi sùu kpɛɛ̀ lɛ́ mi gbɛɛ lɛ́ lɛ yàá i sɔ́nɔ́ɔ, è lo “É kɛ kíli” gèeè à ká Wálà zúo lɛ́ i ló à ɓoòa mɔ́ɔ̀ wɔ̃̀ yí? Wɔ̃́ lɛ́ ɓa gèea, à yí-ma-kɔ̀ gbɛɛ wá ɓe à lɛ̀ɛ.

¹⁷Wálà zúo lɛ́ i ló à ɓoòa, lɛ́ɛ̀ bɛ̀i à mɔ̀ é kɛ dóo sɛ̀, kɛɛ lɛ̀ɛ́ ló gɔ̃́ e kília mɛ́ kɛɛ̀ gágà gbɛɛ ɓo.

¹⁸Ḿm̀ Wálà zúo ɓo lɛ́ m̀ wè gbɛɛ̀ gbɛɛ gèe é diá ka séĩ́ ka làa.

¹⁹Kɛɛ yé maà kɛ Wálà-mìà kú yía, lɛ dóo sɛ̀ m lɛ̀ɛ kɛɛ ḿ wéé kpolà sɔ́ɔ́li zɛ̀ lɛ́ mia ò à yí maa gèe, kɛɛ é pɛ zɔ̃̀ɔ̃̀ mia gbɛɛ̀ gbɛɛ lɛ̀ɛ, é diá wéé kpolà wáá vũ̀ doó gèeè wè gbɛɛ yí là.

²⁰M lèe-gé vɔ̀, yékɛ̀ ka zì yɛ́lɛ́-táá é kɛ lɛ̀ nɔ́ɔ̀ɓé zì yɛ́lɛ́-táá-kɔ̀ lɛ́ ɓe. Kà kɛ nɔ́ɔ̀ɓé ká kɛ-wɔ̃̀ yɔɔ kɛɛ̀ yí zàá, kɛɛ ka mɛ́ kpálà è kɛ à ká ka zì yɛ́lɛ́-táá yí zàá.

²¹Wɔ̃́ lɛ́ à bɛ̃̀ɛ̃ɛ̃̀ lɛ Lɔ́ɔ̀ kiia yía gɛ̃̀ e ké. “Ḿm̀ lo mɛ́ĩ́ ɓoò míá o kéa o lɛ̀ɛ mia lɛ́ ò wè gbɛɛ̀ gbɛɛ gèea o yí, ɛ̃́ɛ̃́ ḿm̀ lo mɛ́ĩ́ ɓoò mia lɛ̀ɛ sɛ́lɛ́ gbɛɛ yí-mìà kɔ̀ yí zàá. Kɛɛ ḿ à kɛ bɛ̃̀ɛ̃ kília, òó ló o tóó dɔɔ̀ m mɔ̀. Zi lɛ́ ko Dàa-mì e à gèe à káa lɛ́ ɓɛ.”

²²À mɔ́ɔ̀ wɔ̃̀ mɔ̀ɔ, nɔ̀-lɛ̀ɛ-pɛ̀ lɛ́ e wè gbɛɛ̀ gbɛɛ gèeè káa, lɛ wɔ̃́ gɔ̃̀á ká míá o wá Wálà-mìà káa lɛ̀ɛ. Kɛɛ wɔ̃́ lɛ́ Wálà à kàà mia lé wáà gèèa, lɛ wɔ̃́ gɔ̃̀á ká Wálà-mìà lɛ̀ɛ. Ye wá wɔ̃́ gɔ̃̀á ká míá òó Wálà dɔɔ lɛ̀ɛ.

²³Lɛ̀ lɛ kília, yé Wálà-mìà séĩ́ waà pá o kíe mɔ̀, ɛ̃́ɛ̃́ tó o séĩ́ wáà wɔ̃́ gèè wè gbɛɛ̀ gbɛɛ yía, yé mia gbɛɛ ɛ̃́ɛ̃́ mia lɛ́ o wá Wálà-mìà káa, waà ɓɔ o làa, ḿ gɔ̃̀, óò lo à gèeè Wálà-mìà ka lɛ̀ɛ, bè lɛ́ɛ̀ ka kɛ̀?

²⁴Kɛɛ yé o séĩ́ waà wɔ̃́ lɛ́ Wálà a káá o lé ó à gèea, waà kɛ à gèepìà lɛ́ mi lɛ́ ye wá Wálà mi ká, ɛ̃́ɛ̃́ mi gbɛɛ aà ɓɔ o làa, wɔ̃́ séĩ́ lɛ́ è lo à maà ka léa, lɛ́ɛ̀ lo à zì kɛ-wɔ̃̀ yɔɔ lɛ́ à kɛ̀ɛ zɔ̃̀ɔ̃̀ à lɛ̀ɛ. Tó áà mɛ̀ĩ́-sà dɔ̀ à mɔ̀.

²⁵À zì yɛ́lɛ́-tàà-yí-wɔ̃̀ lɛ́ e kɛ à bĩ̀ĩ̀pìà e zò píéa, lɛ́ɛ̀ lo dàà wáà-là. Ɛ́ɛ̃́ lɛ́ɛ̀ lo káà e kpuò là áà gbìnì Wálà lɛ̀ɛ, tó áà gèè kélɛ̀, “Wálà lɛ kpó-kpó ɓo ka fĩ̀ã̀ lɛ̀ɛ mɔ̀.”

²⁶M lèe-gé vɔ̀, lɛ mɔṹ kpɛ? Yé kaà pá ka kíe mɔ̀ɔ, tã́ lɛ mi dò gé kɛ á dà. Mi dò bɛ̃̀ɛ̃, pɛ lɛ à kɛ̀lɛ̀ kɛ á zɔ̃̀ɔ̃̀. Tó mi dò bɛ̃̀ɛ̃ áà pɛ lɛ́ lɛ́ɛ́ ɓoò lɛ̀ɛ́ gbaa kɛá làa, áà lɛ́ɛ́ ɓò à là. Mi dò bɛ̃̀ɛ̃ wè gbɛɛ lɛ à lé kɛ á gèe. Ɛ́ɛ̃́ mi dò bɛ̃̀ɛ̃ wè gbɛɛ e kília yí-ɓo gíkã́ lɛ à gé. Lɛ sɛ̀ ó pɛ séĩ́ kɛ kíli kɛɛ é Wálà-mìà mɛ́ kɛ gágà.

²⁷Yé mi dò aà kɛ ɓe kɛ é wè gbɛɛ gèea, ò kɛ mia pèèlɛ ká, kɛɛ o yààka é dàá bàa, yékɛ̀ é die yí. Míá o kília, lɛ sɛ̀ yé waà naa ó wɔ̃́ gèea, ò à gèe doó doó. Ó kɛ̀á gèepìàa, à yí-ɓo-mì è kɛ yí áà yí ɓò.

²⁸Kɛɛ yé mi gbɛɛ wá yi kɛ á yí ɓoa, mi lɛ́ è wè gbɛɛ gèe kília, è e lɛ̀à ga pà-kíe-mɔ̀ e kília yí, è là wɔ̃́ gèe e dìè píé, ɛ̃́ɛ̃́ áà gèè Wálà píé.

²⁹Mia lɛ́ Wálà e wɔ̃́ káá o lé ó gèea, ò kɛ pèèlɛ, ó gɔ̃̀á kɛɛ̀ kília, ò kɛ yààka, wáà wɔ̃́ gèè pà-kíe-mɔ̀ e kília yí. Ɛ́ɛ̃́ mia yé o tóa, lɛ sɛ̀ ó lɛ̀ gɛ̃̀ wɔ̃́ lɛ́ ò lo à gèeèa yí.

³⁰Yé Wálà aà lɛ́ɛ́ ɓo wɔ̃́ dò là mi dò lɛ́ lɛ yàá pà-kíe-mɔ̀ e kília yía lɛ̀ɛ, mi lɛ́ è lo kɛɛ̀ wéé gèepìàa, lɛ sɛ̀ é tèá.

³¹Bɛ̀i lɛ ka séĩ́-séĩ́ ka mɔ̀ kɛɛ ká wɔ̃́ lɛ́ Wálà è à kàà ka léa gèe ka tɔ̀ là doó doó kɛɛ mia séĩ́ ó pɛ dã́ à mɔ̀, ɛ̃́ɛ̃́ kɛɛ é fã̀ã́-wàà nɔ o lɛ̀ɛ.

³²Nɔ̀-lɛ̀ɛ-pɛ̀ lɛ́ e wɔ̃́ lɛ́ Wálà a káá mi lé kɛ é à gèea káa, lɛ mí è wèèa zì yíkɛ̀ gágà wì.

³³Ƃii Wálà wá mí è wéé dà mia fĩ̀ã̀a ká. Kɛɛ lɛ Wálà lɛ́ lɛ zò-yà-gé zɛ̀ɛ ká. Lɛ sɛ̀ loà ó o lɛ̀à ga pà-kíe-mɔ̀ yí, lɛ̀ zí lɛ à ká Wálà-mìà zì pà-kíe-mɔ̀ séĩ́ yí lɛ̀ɛ tɛ̃̀ɛ̃́ɛ mɔ̀ɔ lɛ́ ɓe. Ye wá o mɔ̀ kɛ ó wéé. Zúù-mìà zì Lɔ́ɔ̀ɔ a gèe kélɛ̀ ó kɛ mia wì.

³⁵Yé waà naa ó wɔ̃́ dò yí dɔɔ, lɛ sɛ̀ ó o dɛ̃ nì wɛ̃́ĩ́-lɔ̀ɔ kɛ o píé kɛ́ì píé. Ƃii lɛ wɔ̃́ yɛ́lɛ̀ zɛ̀ kpó-kpó ká kɛɛ lee é wɔ̃́ gèe pà-kíe-mɔ̀ yí.

³⁶Yée. Ka lɛ́ ka Wálà lé-wè kɛɛ? Ɛ́ɛ̃́ ka doó lɛ́ e ɓɔ ka mɔ̀ɔ?

³⁷Yé mi dò aà e dìè sí mi lɛ́ Wálà e wɔ̃́ káá à lé á gèea ká, ɛ̃́ɛ̃́ Gɛ̀ɛ̀ Púlú zì nɔ̀-lɛ̀ɛ-pɛ̀ɛ dò nɔɔ̀ lɛ à lɛ̀ɛ, è à yí dɔ kélɛ̀ wɔ̃́ lɛ́ m̀ bɛ̃̀ɛ̃ ka píéa, lɛ wɔ̃́ lɛ́ ko Dàa-mì a gèe kó à kɛɛ ká.

³⁸Kɛɛ yé mí e kília lɛ̀ɛ́ e yɛ́lɛ́ kɛ wɔ̃́ lɛ́ m̀ bɛ̃̀ɛ̃ e kéa píéa, yékɛ̀ ka yɛ́lɛ́ é kɛ à bɛ̃̀ɛ̃ mɔ̀.

³⁹À mɔ́ɔ̀ wɔ̃̀ mɔ̀ɔ, m lèe-gé vɔ̀, nɔ̀-lɛ̀ɛ-pɛ̀ lɛ́ e wɔ̃́ lɛ́ Wálà à kàà mia léa gèeè káa, à wɔ̃̀ è die ka zò ká. Kɛɛ yékɛ̀ ká mi dò tèá wè gbɛɛ̀ gbɛɛ gèeè mɔ̀.

⁴⁰Lɛ sɛ̀ wɔ̃́ séĩ́ kɛɛ̀ é kɛá e kɛ-zì ká kpeĩ le.