Read Yamano 1 Kɔ̀léĩ́tĩ̀ã̀ 15 Bible Online

1 Kɔ̀léĩ́tĩ̀ã̀ 15 - Yamano bible

1 Kɔ̀léĩ́tĩ̀ã̀ 15

¹M lèe-gé vɔ̀, ḿm̀ nàà ḿ ka zò vùò wɔ̃́ làṹ yiè lɛ́ m̀ à gèe ka lɛ̀ɛ mɔ́ɔ̀ wɔ̃̀ ká. Ka à sɔ̀lɔ̀ ɓo, ɛ̃́ɛ̃́ ka ka dɔ̀lɔ̀ kṹ à mɔ̀.

²Ka laà lɛ wɔ̃́ làṹ yiè e kília kolo là zàá, yé kaà kùnù wɔ̃́ lɛ́ ma gèe ka lɛ̀ɛ mɔ̀ gágàa ká, ɛ̃́ɛ̃́ yé kaà ka zò dɔ à mɔ̀ ka dìè kɔ̀ káa ká.

³Pɛ́ ma sɔ̀lɔ̀ ɓo lɛ́ e pɛ kpànazɛ̀ kpó-kpó káa, lɛ́ maà nɔ ka lɛ̀ɛ ɓɛ. Lɛ́ e kélɛ̀ Kɛ́lɛ̀ì e ga ko kɛ-wɔ̃̀ yɔɔ wɛ̃́ĩ̀, zi lɛ́ à bɛ̃̀ɛ̃ɛ̃̀ lɛ à ká Wálà kiia yía lɛ́ ɓɛ.

⁴Ɛ́ɛ̃́ lɛ́ zeĩ́ e kélɛ̀ o à bĩ̀ĩ̀, ɛ̃́ɛ̃́ Wálà a wɛ̀lɛ̀ ga kɛ̀lɛ̀ à lɛ̀-kpɛ̀iì yààka lùò ká, zi lɛ́ à bɛ̃̀ɛ̃ɛ̃̀ lɛ à ká Wálà kiia yía lɛ́ ɓɛ.

⁵Ɛ́ɛ̃́ lɛ́ zeĩ́ e e dìè zɔ̃̀ɔ̃̀ Pílɛ̀ lɛ̀ɛ, ɛ̃́ɛ̃́ zeĩ́ àpɔ́sɔ̀lɔ̀ vɔ̀ vũ̀ doó wɛ́lɛ́ pèèlɛɛ lɛ̀ɛ.

⁶Ɛ́ɛ̃́ e e dìè zɔ̃̀ɔ̃̀ zeĩ́ là tòà-píé-mìà lɛ́ o diè e kɛá wũ sɔ́ɔ́li làa lɛ̀ɛ lúó doó ká. O búnùzɛ̀ o tĩã́ ɓe, kɛɛ o dò bɛ̃̀ɛ̃ waà ga.

⁷Ɛ́ɛ̃́ e e dìè zɔ̃̀ɔ̃̀ Zĩ́ĩ̀ lɛ̀ɛ, ɛ̃́ɛ̃́ zeĩ́ àpɔ́sɔ̀lɔ̀ vɔ̀ séĩ́ lɛ̀ɛ.

⁸Ḿ kɛ bɛ̃̀ɛ̃ lɛ̀ nɛ́fú lɛ́ à kpálà wá tó wáà yèa lɛ́ ɓea, ma lɛ́ e e dìè zɔ̃̀ɔ̃̀ mia lɛ̀ɛ léĩ́-tó m làa.

⁹Ƃii ma lɛ́ m àpɔ́sɔ̀lɔ̀ yé nɔ́ à wɔ̃̀ wá kpànazɛ̀ɛ ká àpɔ́sɔ̀lɔ̀ vɔ̀ séĩ́ píéa. Ye wá bɛ̃̀ɛ̃ mia mɔ̀ kɛ ó m sí àpɔ́sɔ̀lɔ̀, ɓii m Wálà-mìà sã̀ dɔ.

¹⁰Kɛɛ Wálà zì zò-kɛ̀-sɛ̀ɛ lɛ́ e m kɛ lɛ̀ zí m à ká lɛ́ ɓea. Ɛ́ɛ̃́ à zì zò-kɛ̀-sɛ̀ lɛ́ a kɛ m káa, lɛ̀ɛ́ gbaa nɔ m lɛ̀ɛ ɓɔ̀ɔ. Kɛɛ m yɛɓo kɛ gágà, é diá àpɔ́sɔ̀lɔ̀ vɔ̀ séĩ́ yé o tóa là. Kɛɛ lɛ̀ɛ́ gbaa kɛ m zì yíkɛ̀ gáàa ká. Kɛɛ e kɛ Wálà zì zò-kɛ̀-sɛ̀ ká, lɛ́ kò ye ko kɛ yɛɓo kɛpìà à káa.

¹¹É gó bɛ̃̀ɛ̃ m kɛ̀lɛ̀, ɛ̃́ɛ̃́ é gó bɛ̃̀ɛ̃ o kɛ̀lɛ̀ɛ, wɔ̃́ nɔ́ kò ye nì kò gèe lòũ̀ káa, ye lɛ́ ɓɛ. Ɛ́ɛ̃́ zeĩ́a, wɔ̃́ ka à gɛ̃̀ wánà káa lɛ́ ɓɛ.

¹²Kɛɛ lɛ̀ wɔ̃́ kɔ̀à gèe lòũ̀ káa lɛ́ e kélɛ̀ Kɛ́lɛ̀ì e wɛ̀lɛ̀ ga kɛ̀lɛ̀ɛ, lɛ́ɛ̀ dɔ kpɛɛ̀ lɛ́ ka dò à gèe kélɛ̀ mia wɛ̀lɛ̀ ga kɛ̀lɛ̀ wɔ̃̀ wá ɓe?

¹³É kɛ̀á lɛ wánà káa, kɛɛ à yí lɛ́ e kélɛ̀ Kɛ́lɛ̀ì lɛ̀ɛ́ gbaa wɛ̀lɛ̀ ga kɛ̀lɛ̀.

¹⁴Kɛɛ é kɛ̀á Kɛ́lɛ̀ì lɛ̀ɛ́ gbaa wɛ̀lɛ̀ ga kɛ̀lɛ̀ɛ, kɛɛ wɔ̃́ lɛ́ kò à gèe lòũ̀ káa lɛ wɔ̃́ fèle ká, ɛ̃́ɛ̃́ ka zì zò-dɔ̀à-mɔ̀ lɛ wɔ̃́ ɓɔ̀ɔ ɓɔ̀ɔ ká.

¹⁵Ɛ́ɛ̃́ zeĩ́a, ko zɔ̃̀ɔ̃̀ lɛ nɛ̀-kɛ-mìà ká Wálà gbĩ mɔ̀, ɓii ko kélá-wè ɓo Wálà lɛ̀ɛ kélɛ̀ e Kɛ́lɛ̀ì wɛ̀lɛ̀ ga kɛ̀lɛ̀. Kɛɛ lɛ̀ɛ́ gbaa à wɛ̀lɛ̀ ga kɛ̀lɛ̀ yé ye wá wánà ká kélɛ̀ mia óò bɛ̀i wɛ̀lɛ̀ ga kɛ̀lɛ̀ɛ ká.

¹⁶Ƃii é kɛ̀á mia òó wɛ̀lɛ̀ ga kɛ̀lɛ̀ɛ, kɛɛ Wálà lɛ̀ɛ́ gbaa Kɛ́lɛ̀ì wɛ̀lɛ̀ ga kɛ̀lɛ̀.

¹⁷Ɛ́ɛ̃́ é kɛ̀á Wálà lɛ̀ɛ́ gbaa Kɛ́lɛ̀ì wɛ̀lɛ̀ ga kɛ̀lɛ̀ɛ, kɛɛ ka zì zò-dɔ̀à-mɔ̀ɔ lɛ̀ɛ́ ló wɔ̃́ dò kɛɛ̀ ka lɛ̀ɛ, ɛ̃́ɛ̃́ ka gíniì lɛ tĩã́ ka zì kɛ-wɔ̃̀ yɔɔ yí.

¹⁸Ɛ́ɛ̃́ zeĩ́, kɛɛ mia lɛ́ o zò dɔɔ̀ e kɛá Kɛ́lɛ̀ì mɔ̀ lɛ́ o gaa, kɛɛ o gíniìà lɛ.

¹⁹È kɛ̀á ko zì zò-kɛ̀-Kɛ́lɛ̀ì-mɔ̀ lɛ nɔ́ kɛ̀ɓe yé e kpóṹ là zèea wɛ̃́ĩ̀a, kɛɛ ko yéĩ́ áá mia kɛɛ̀ é diá mi nɔ́ɔ fé lɛ́ e kpóṹ là zèea là.

²⁰Kɛɛ à wánà zɛ̀ lɛ́ e kélɛ̀ Wálà e Kɛ́lɛ̀ì wɛ̀lɛ̀ ga kɛ̀lɛ̀. Kɛ́lɛ̀ì zì wɛ̀lɛ̀-ga-kɛ̀lɛ̀ɛ lɛ Wálà wè-wɛ́lɛ́ ká kélɛ̀ mia séĩ́ lɛ́ o wɔɔ̀ lɛ tã́ã̀a óò lo wɛ̀lɛ̀ ga kɛ̀lɛ̀.

²¹Lɛ̀ lɛ́ gɔ̃ doó a kɛ lɛ́ ga è ɓɔ mia mɔ̀ɔ, zi nɔ́ doóa lɛ́ gɔ̃ doó bɛ̃̀ɛ̃ a kɛá lɛ́ mi è wɛ̀lɛ̀ ga kɛ̀lɛ̀ɛ.

²²Lɛ̀ lɛ́ mia séĩ́ ò ga, ɓii wà Ádã̀ nì o kɛ̀ mi doó káa wɛ̃́ĩ̀a, zi nɔ́ doóa káa, mia séĩ́ óò lo wɛ̀lɛ̀ ga kɛ̀lɛ̀ wà Kɛ́lɛ̀ì nì o kɛ̀ mi doó káa mɔ́ɔ̀ wɔ̃̀ mɔ̀.

²³Kɛɛ mia séĩ́ o o zì mɔ̀ doò do. Kɛ́lɛ̀ì lɛ́ e o séĩ́ o bèĩzɛ̀ káa. À tò-ko-mɔ̀ lɛ́ e là mia nì ká Kɛ́lɛ̀ì zì nu-lùò káa.

²⁴Tó zeĩ́, pɛ séĩ́ líé-nyɛ-lùò lɛ́ɛ̀ lo nuù. Kɛ́lɛ̀ì kɔ̀ lɛ́ɛ̀ lo diè mia nɔ́ɔ fé lɛ́ o mia làa là, ɛ̃́ɛ̃́ tó zeĩ́ e die mia zì kɛ̀-mia-là là, e bɛ̀i yíkɛ̀ gáàa séĩ́ là. Ɛ́ɛ̃́ lɛ́ɛ̀ lo e zì tó-mia-làa síì, tó a nɔ Wálà lɛ́ e à Dàa káa lɛ̀ɛ.

²⁵Ƃii lɛ Kɛ́lɛ̀ì mɔ̀ é kɛ mia là é tóá kíli Wálà é à zì dàa-gbe vɔ̀ séĩ́ wàà à gã̀ wì.

²⁶Dàa-gbe yé à tóò lɛ zízàá kpó-kpó mɔ̀ lɛ́ à kɔ̀ è lo diè à làa, lɛ́ e ga káa.

²⁷Ƃii à bɛ̃̀ɛ̃ɛ̃̀ lɛ Wálà kii yí kélɛ̀, “Wálà aà pɛ séĩ́ wàà à gã̀ wì.” Kɛɛ óò yí ma dóo kélɛ̀ pɛ séĩ́ lɛ́ ò wɛ̃̀ɛ̃ kília, Wálà lɛ́ è pɛ séĩ́ wàà Kɛ́lɛ̀ì gã̀ wì kília, ye wá pɛ́ e kília bà.

²⁸Kɛɛ yé Wálà aà pɛ séĩ́ kɛ Kɛ́lɛ̀ì wìa, Kɛ́lɛ̀ì lɛ́ e Wálà Gbe ká kília, lɛ́ɛ̀ lo e dìè kɛɛ̀ Wálà lɛ́ e pɛ séĩ́ kɛ e Gbe wìa wì, ɛ̃́ɛ̃́ Wálà lɛ́ɛ̀ lo líé síì mia séĩ́ ká wánà kpó-kpó ká.

²⁹Ɛ̀ɛ̀, mia lɛ́ ò o bàtáì kɛ̀ mia yé o gaà lɛɛ lɛ̀ɛ, o mɔ́ɔ̀ wɔ̃̀ lɛ́ɛ̀ lo dɔɔ̀ kpɛ? Lɛ̀ lɛ́ mɔṹ mia yé o gaà lɛɛ òó ló wɛ̀lɛ̀ ga kɛ̀lɛ̀ɛ, mɛ́ e kɛ lɛ́ mɔṹ ò mia bàtáì kɛ̀ o lɛ̀ɛ?

³⁰Ɛ́ɛ̃́ zeĩ́, mɛ́ e kɛ lɛ́ wɔ̃́ gbíní-gbínízɛ̀ è ɓɔ mɔṹ ko là lɛ̀-kpɛ̀iì yíí wì séĩ́ ká?

³¹M lèe-gé vɔ̀, ḿm̀ ɓɔ ga là lúó séĩ́ ká. Lé-gbùò-là lɛ́ m̀ kɛ̀ ka mɔ́ɔ̀ wɔ̃̀ mɔ̀ Kɛ́lɛ̀ì Zízɛ̀ ko Dàa-mì tɔ́ yí zàáa, lɛ́ à kɛ̀ lɛ́ m̀ wɔ̃́ sùua gèea.

³²Gèlè lɛ́ ma gɔ̃ Ɛ́fɔ́sɔ̀ zèea, e kɛ lɛ̀ mi lɛ́ wà wìì nyaàa vɔ̀ ò gèlè gɔ̃. Yé maà kɛ kíli mi gbunu mɔ́ɔ̀ wɔ̃̀ mɔ̀ɔ, mɛ́ m̀ lo à gɛ̃̀ɛ̃̀ à kɛɛ̀ kolo là zàá? É kɛ̀á mia lɛ́ o gaà lɛɛ òó ló wɛ̀lɛ̀ ga kɛ̀lɛ̀ɛ, kɔ̀à kɔ̀à ló ɓo pɛ ɓèleè wà mi-pɛ̀ miì ká kɔa líé, ɓii kɔ́áà lo gaà tòòa wɛ̃́ĩ̀. Zi lɛ́ mia ò gèe à káa lɛ́ ɓɛ.

³³Yékɛ̀ ká kɛ mí ò bèkɛ̀ ɓoa ká. “Yé kà i ɓɛ́ɛ kɛ-pɛ̀ yɔɔ zɛ̀ kaà kɛ ka kíe píéa, lɛ́ɛ̀ lo i zì kɛ-kɔ̀ kɛɛ̀ yɔɔ.”

³⁴Lɛ sɛ̀ ká ka yɛ́lɛ́ kpeĩ táá zeĩ́, ɛ̃́ɛ̃́ ká tèá kɛ-wɔ̃̀ yɔɔ kɛɛ̀ mɔ̀. Ka dò lɛ̀ɛ́ Wálà dɔ. Ma gèe kíli kɛɛ yɛ́lɛ̀ é kpɔ́ ka là.

³⁵Mi dò lɛ́ɛ̀ lo lèĩ wɛ̃́ĩ́-lɔ̀ɔ kɛɛ̀ weeá kélɛ̀, “Zi sùu kpɛɛ̀ lɛ́ mia lɛ́ waà gaa, ò lo wɛ̀lɛ̀ à ká ga kɛ̀lɛ̀? Ɛ́ɛ̃́ o gbĩ-kpàla lɛ́ɛ̀ lo kɛɛ̀ kpɛ?”

³⁶Bè lɛ i mɔ̀ kɛ̀è? Pɛ lɛ́ ɓà tààa, yé lɛ̀ɛ́ ga nɛ́ɛ, lɛ̀ɛ́ ló ɓɔɔ̀ kɛ é kɛ ɓe.

³⁷Pɛ wɛ́lɛ́ lɛ́ ɓà tààa, lɛ pɛ wɛ́lɛ́ ɓɔ̀ɔ ká. Aà kɛɛ lɛ dĩ́ĩ́, ɛ̃́ɛ̃́ ɓu sùu gbɛɛ dò ká píé. Kɛɛ ìí à taa e yìlì ká.

³⁸Wálà lɛ́ɛ̀ gbĩ-kpàla lɛ́ è à nàà é kɛ pɛ wɛ́lɛ́ e kília mɔ̀ɔ nɔ à lɛ̀ɛ. Wálà lɛ́ɛ̀ gbĩ-kpàla lɛ́ è bɛ̀i à mɔ̀ é kɛ pɛ wɛ́lɛ́ mɔ̀ɔ nɔ o lɛ̀ɛ doó doó.

³⁹Pɛ séĩ́ nɔ̀ɛ wá doó. Mi gbunu zì nɔ̀ɛ lɛ ɓe. Wìì zì lɛ ɓe. Ɛ́ɛ̃́ mɔ̀ɔ̀ zì lɛ ɓe, e bɛ̀i, é kɛ bɛ̃̀ɛ̃ kpã̀ã́ káa, à zì lɛ ɓe.

⁴⁰Lɛ̀í-pɔ̀ɔ̀ lɛ ɓe, lɛ́ tã́ã̀ zèe pɔ̀ɔ̀ lɛ ɓea. Lɛ̀í-pɔ̀ɔ̀ zì li-kɔ̀ lɛ gbɛɛ, lɛ́ tã́ã̀ zèe pɔ̀ɔ̀ bɛ̃̀ɛ̃ zì li-kɔ̀ lɛ gbɛɛ.

⁴¹Ɛ́ɛ̃́ zeĩ́, nyɛ́nɛ́ zì li-kɔ̀ lɛ gbɛɛ, lɛ́ zeĩ́ mɛnɛ zì li-kɔ̀ lɛ gbɛɛ. Lɛ́ sĩ̀ã́ã̀ŋèlè vɔ̀ zì li-kɔ̀ lɛ gbɛɛ. Ɛ́ɛ̃́ sĩ̀ã́ã̀ŋèlè vɔ̀ o kília, o zì li-kɔ̀ lɛ gbɛɛ̀ gbɛɛ o kíe nì píé.

⁴²Zi lɛ́ è lo kɛɛ̀ à ká kɛɛ mia lɛ́ waà gaa o wɛ̀lɛ̀pìàà à ká ga kɛ̀lɛ̀ɛ, ye lɛ́ ɓɛ. Gbĩ-kpàla lɛ́ ò à dà gìèa, lɛ vúú-pɛ̀ ká. Kɛɛ yé aà wɛ̀lɛ̀ ga kɛ̀lɛ̀ɛ, kɛɛ lɛ̀ɛ́ ló gbaa vúù.

⁴³Yé waà à dà gìèa, kɛɛ aà kɛ gbaa yɔɔ. Kɛɛ yé aà wɛ̀lɛ̀ ga kɛ̀lɛ̀ɛ, kɛɛ aà kɛ gbaa dóo sɛ̀ e kpànazɛ̀ ká. Kɛɛ yé waà à dà gìèa, à mɛ́ lɛ yɔ̃́ṹ-yɔ̃̀ũ̀. Kɛɛ yé aà wɛ̀lɛ̀ ga kɛ̀lɛ̀ɛ, à mɛ́ lɛ gágà.

⁴⁴Gbĩ-kpàla yé lɛ́ ò dà gìèa, lɛ mi gbĩ-kpàla ká. Kɛɛ à yé è wɛ̀lɛ̀ ga kɛ̀lɛ̀ɛ, lɛ gɛ̀ɛ̀ zì gbĩ-kpàla ká. Mi gbĩ-kpàla lɛ ɓe dóo wánà ká. Lɛ̀ lɛ kília, lɛ à mɔ̀ gɛ̀ɛ̀ zì gbĩ-kpàla é kɛ ɓe.

⁴⁵Ƃii à bɛ̃̀ɛ̃ɛ̃̀ lɛ Wálà kii yí kélɛ̀, “Gɔ̃ bèĩzɛ̀ lɛ́ ò si Ádã̀a, Wálà e à kɛ mi gbunu ká.” Kɛɛ Ádã̀ tò zízàá zɛ̀ɛ, lɛ Gɛ̀ɛ̀ lɛ́ è kɛ̀ɓe nɔ mia lɛ̀ɛ ká.

⁴⁶Gɛ̀ɛ̀ zì gbĩ-kpàlaa lɛ̀ɛ́ nu bèĩzɛ̀. Kɛɛ mi zì gbĩ-kpàlaa lɛ́ è nu líé, tó gɛ̀ɛ̀ zì gbĩ-kpàlaa áà tò à ko mɔ̀ɔ.

⁴⁷O Ádã̀ yé e kɛ bèĩzɛ̀ɛ kɛ mùnú sɛ́lɛ́ ká. Kɛɛ Ádã̀ tò-ko-mɔ̀ zɛ̀ɛ, e gó Wálà pà.

⁴⁸Mia lɛ́ o sɛ́lɛ́ e tã́ã̀ zèea yí-mìà káa, o kélɛ̀ mí wa kɛ sɛ́lɛ́ káa lɛ́ ɓe. Míá o Wálà-pà mìà káa, o kélɛ̀ mi lɛ́ e gó Wálà pàa lɛ́ ɓe.

⁴⁹Zi nɔ́ ko ɓɔɔ̀ lɛ à ká gɔ̃ lɛ́ wa kɛ sɛ́lɛ́ káa bàa, zi nɔ́ doóa lɛ́ kò lo ɓɔɔ̀ à ká Gɔ̃ lɛ́ e gó Wálà pàa bàa.

⁵⁰M lèe-gé vɔ̀, wɔ̃́ lɛ́ m̀ gèea ye lɛ́ e kélɛ̀, nɔ̀ɛ wà léà òó bɛ̀i o yàlà gɛ̃̀ɛ̃̀ Wálà zì tò-mia-là yí. Ɛ́ɛ̃́ pɛ lɛ́ lɛ̀ɛ́ vúúa, lɛ̀ɛ́ bɛ̀i à mɔ̀ é kɛ pɛ́ è vùùa là pɛ ká.

⁵¹Kà ka tóó dɔ ḿ wɔ̃́ lɛ́ à bĩ̀ĩĩ̀ e kɛáa gèe ka lɛ̀ɛ. Ko séĩ́ kòó ló gaà, kɛɛ ko séĩ́ ko gbĩ-kpàla mɛ́ lɛ́ɛ̀ lo vɔ̀ɔɔ̀ nɔ́ zá le,

⁵²kɛ bɛ̃̀ɛ̃ kó tĩã́ ko nyìɛ mɛ̀ɛ̀ lúó lɛ́ túlú léĩ́-tó è lo wéè à káa ká. Ƃii yé à wéè aà dɔɔ, mia lɛ́ o gaà lɛɛ, óò lo wɛ̀lɛ̀ ga kɛ̀lɛ̀ gbĩ-kpàla lɛ́ lɛ̀ɛ́ vúúa yí. Ɛ́ɛ̃́ ko séĩ́-séĩ́ ko mɛ́ lɛ́ɛ̀ lo vɔ̀ɔɔ̀.

⁵³Ƃii pɛ lɛ́ è vùùa, lɛ à mɔ̀ é pɛ lɛ́ lɛ̀ɛ́ vúúa sí, é à wàà e mɔ̀. Ɛ́ɛ̃́ zeĩ́, pɛ́ è gaa, lɛ à mɔ̀ é pɛ́ lɛ̀ɛ́ gaa sí, á wàà e mɔ̀.

⁵⁴Yé pɛ́ è vùùa aà pɛ lɛ́ lɛ̀ɛ́ vúúa wàà e mɔ̀, tó zeĩ́ pɛ yé è gaa aà pɛ lɛ́ lɛ̀ɛ́ gaa wàà e mɔ̀ɔ, kɛɛ wɔ̃́ lɛ́ à bɛ̃̀ɛ̃ɛ̃̀ lɛ Wálà kii yía, à kɛ̀ wánà zɛ̀ lé lɛ́ɛ̀ lo paà. Wɔ̃́ e kília lɛ́ e kélɛ̀, “Wálà kɔ̀ diè lɛ ga là. Ga aà nyɛ tã́ã̀ gbaa kɔ̀lɔ́-kɔ̀lɔ́ le.”

⁵⁵“Ga i bɛ̃̀ɛ̃, ɓàá gèe i kɔ̀ diè lɛ mia là? Ga, i zì yíkɛ̀ gáàa lɛ́ ì mia gèlè à káa, lɛ mɛ́ gbaa?”

⁵⁶Ga lɛ́ɛ̀ e zì yíkɛ̀ gáàa lɛ́ è mia gèlè à káa gɛ̃̀ kɛ-wɔ̃̀ yɔɔ kɛɛ̀ kɛ̀lɛ̀. Ɛ́ɛ̃́ kɛ-wɔ̃̀ yɔɔ bɛ̃̀ɛ̃ lɛ́ɛ̀ e zì yíkɛ̀ gáàa sɔ̀lɔ̀ ɓo Lɔ́ɔ̀ɔ kɛ̀lɛ̀.

⁵⁷Kɔ̀à Wálà lɛ́ è à kɛ̀ tó ko kɔ̀ áà dìè pɛ là ko Dàa-mì Zízɛ̀ Kɛ́lɛ̀ì tɔ́ yí zàáa, zúo ɓo nyɔ́ɔ̀ɔ.

⁵⁸À mɔ́ɔ̀ wɔ̃̀ mɔ̀ɔ, m lèe-gé vɔ̀ lɛ́ ka lɔ̀ kpɔ́ɔ̀ lɛ m mɔ̀ɔ, kà dɔ ka dɔ̀lɔ̀ mɔ̀ kpɛ̃ĩ le. Yékɛ̀ ká mìi-míí. Kà kɛ yɛɓo píé ka Dàa-mì lɛ̀ɛ teele, lɛ̀ kà yí dɔ kélɛ̀ yɛɓo nɔ́ɔ fé kà kɛ̀ ka Dàa-mì lɛ̀ɛ, ye wá wɔ̃́ dà tã́ã̀ zɛ̀ káa ká.