Read Yamano 1 Kɔ̀léĩ́tĩ̀ã̀ 16 Bible Online

1 Kɔ̀léĩ́tĩ̀ã̀ 16 - Yamano bible

1 Kɔ̀léĩ́tĩ̀ã̀ 16

¹Wɔ̃́ lɛ́ m̀ lo à gèeè é gbɛ̃̀á pɛlèe lɛ́ kà lo à ɓoò Wálà là mia nì lɛ̀ɛ mɔ̀ɔ gɛ̃̀ e ké. Lɛ ka mɔ̀ ká wɔ̃́ nɔ́ doó lɛ́ ma gèe Wálà-mìà séĩ́ lɛ́ o Gɛ̀lésìàa lɛ̀ɛ ó à kɛɛ, ka bɛ̃̀ɛ̃ ká kɛ nɔ́ kíli.

²Lúó bèĩzɛ̀ lɛ́ e lɔ́ɔ́ séĩ́ yía, lɛ sɛ̀ ká pɛlèe dò sí káà kpɔ́lɔ̀ bɛ̀ì píé ka tɔ̀ là doó doó. Pɛlèe yé lɛ́ kà lo à gɛ̃̀ɛ̃̀ɛ, lɛ́ kà lo à dò síì à píéa. Kà kɛ kíli yékɛ̀ ḿ nùáa pɛlèe-ɓo-wɔ̃̀ é kɛ ɓe.

³Yé maà nua, kɛɛ ḿ mia lɛ́ kaà o sía vɔ Zùlúsàlɛ̀ ka zì nɔ̀-lɛ̀ɛ-pɛ̀ɛ ká. Ɛ́ɛ̃́ ḿm̀ lo kii nɔɔ̀ o lɛ̀ɛ ó ló à ká.

⁴É kɛ̀á dóo sɛ̀ m mɔ̀ kɛɛ ḿ lóa, kɛɛ kò ye nì kóò lo lóò.

⁵Ḿm̀ lo nuù ka píé yé maà die Masèdónàa ká. Ƃii ḿm̀ lo diè Masèdónà.

⁶Ḿm̀ lo lèĩ kɛɛ̀ ka píé lúó zààle píé. Lúó dò káa, ḿm̀ lo lèĩ lɛ̀ɛ-yíí-bã mɛnɛɛ zɛɛ̀ ka píé. Yé aà kɛ kília, tó ka m gã̀ bìnì zi là máà lò m̀ táá mɔ̀, lɛ̀ lɛ́ è lo kɛɛ̀ m mɔ̀ ḿ ló yia mɔ̀.

⁷M̀ḿ naa kɛ ḿ ka gɛ̃̀ nɔ́ máà dìè ka là. É kɛ̀á ko Dàa-mì wèèà-mɔ̀-wɔ̃̀ káa, ḿm̀ lo à naà kɛɛ kɔ̀à ɓi nì kɔ́á kɛ kɔa kíe là ɓéĩ́ ɓo gbèĩ.

⁸Kɛɛ ḿm̀ lo tóò Ɛ́fɔ́sɔ̀ zèe Pɛ̃́tékɔ̀-lúó e ɓɔ.

⁹Ƃii zi aà kɛ ɓe m lɛ̀ɛ gbaa kɛɛ ḿ yɛɓo kpànazɛ̀ lɛ́ à yí è bɛ̀i à mɔ̀ é kɛ à mɔ̀ɔ kɛ. Ɛ́ɛ̃́ mia búnùzɛ̀ o ɓe wáà gèlè gɔ̃̀ m ká.

¹⁰Yé Témɔ́tè aà nu ka píéa, ka zò è vùò kɛ ká kɛ é kɛ zò-yà-gé zɛ̀ ka bà. Ƃii yɛɓo nɔ́ doó m̀ à kɛ̀ ko Dàa-mì lɛ̀ɛ, ye lɛ́ è à dò kɛ̀ɛ.

¹¹À mɔ́ɔ̀ wɔ̃̀ mɔ̀ɔ, yékɛ̀ mi nɔ́ɔ fé nyìɛ é fɔ̃́ à yí. É kɛ̀á gópìà ka píéa, kà à dɔ zuú géli wà kpɛ̀ɛ ká kɛ é nu e mɛ̀ĩ́ m píé. Ƃii m nyìɛ lɛ wà ko lèe-gé vɔ̀ nì o gɛ̀nɛ̀.

¹²Wɔ̃́ yé e kéa gbɛ̃̀ɛ̃̀ lɛ ko lèe-gé Àpɔ́lɔ̀ mɔ̀. Maà wɔ̃́ gèe à lɛ̀ɛ kpó-kpó ɓo kɛɛ wà ko lèe-gé vɔ̀ nì ó ɓɔ ka píé. Kɛɛ làá yí kpó-kpó dɔ nɛ́ kélɛ̀ é kɛ̀á lɛ à mɔ̀ é ló dɛɛ káa ká. Kɛɛ yé lúó aà kɛ à kɛ̀lɛ̀ɛ, lɛ́ɛ̀ lo nuù.

¹³Kà ka yɛ́lɛ́ kɛ ka dìè píé. Kà dɔ ka dɔ̀lɔ̀ mɔ̀ gágà zò-dɔ̀à-mɔ̀ yí zàá. Ka zò è kɛ gágà. Ɛ́ɛ̃́ ka yí è kɛ gáàa.

¹⁴Pɛ séĩ́ lɛ́ kà lo à kɛɛ̀ɛ, kà kɛ lɔ̀-kɛ̀à-mɔ̀ ká.

¹⁵Káà wɔ̃́ lɛ́ à gbɛ̃̀ɛ̃̀ lɛ Sɛ́fínà wà e kɛ̀ì-mìà séĩ́ mɔ̀ɔ yí dɔ. O lɛ́ o kɛ mia bèĩ-bèĩzɛ̀ ká kɛɛ ó o zò dɔ Kɛ́lɛ̀ì mɔ̀ Àkéyàa. Waà o dìè nɔ Wálà-mìà lɛ̀ɛ yɛɓo kɛ̀ o lɛ̀ɛ ká kpó-kpó ɓo.

¹⁶M lèe-gé vɔ̀, ḿm̀ kpé kã ka lɛ̀ɛ ká kɛ mia lɛ́ o kélɛ̀ míá o ké, ɛ̃́ɛ̃́ mia lɛ́ wà ye nì ò yɛɓo kɛ̀ wáà gbũ̀ mia mɔ̀ɔ wì.

¹⁷M gé lɛ́ɛ̀ li nu lɛ́ Sɛ́fínà wà Fɔtùnétà, wà Àkéyákà wa ɓoa mɔ́ɔ̀ wɔ̃̀ mɔ̀. O zì nuù yí zàáa, e ka gɛ̃̀-lɔ̀ lɛ́ e kɛ m kɛpìàa wàà m ká.

¹⁸Waà kɛ m zò aà yà lɛ̀ zí nɔ́ o à kɛ à ká lɛ́ ka zò e yàa lɛ́ ɓe. Mia sùu lɛ́ o kéa, kà kɛ o tɔ́ é ɓɔ.

¹⁹Wálà-mìà séĩ́ lɛ́ o Ésìàa, óò wèè ka bà. Àkólà wà Pòlòsílà ɛ̃́ɛ̃́ Wálà-mìà lɛ́ ò pa o kíe mɔ̀ o píé kɛ́ìa, óò wèè ka bà nyɔ́ɔ̀ɔ ko Dàa-mì tɔ́ yí zàá.

²⁰Ka lèe-gé vɔ̀ séĩ́ lɛ́ o zèea, óò wèè ka bà. Kà wéé ka kíe nì píé ka bè gbɛ̃̀ ka kíe nì kpéĩ́ mɔ̀ ká lɛ̀ zí wáá kɛɛ̀áa ká.

²¹Wèè-ka-bà wè yé e kéa, ma Pɔ́ɔ̀ m dìè-tĩ́ lɛ́ ma bɛ̃̀ɛ̃ m dìè kɔ̀ káa.

²²Mi lɛ́ ko Dàa-mì lɔ̀ kpɔ́ɔ̀ wá à mɔ̀ɔ, náá è tó à mɔ̀. Ko Dàa-mì, ì nu.

²³Ko Dàa-mì Zízɛ̀ zì zò-kɛ̀-sɛ̀ɛ é kɛ ka píé.

²⁴M zì lɔ̀-kɛ̀à-mɔ̀ɔ è kɛ ka séĩ́ ka píé Kɛ́lɛ̀ì Zízɛ̀ tɔ́ yí zàá teele.