Read Yamano 1 Kɔ̀léĩ́tĩ̀ã̀ 2 Bible Online

1 Kɔ̀léĩ́tĩ̀ã̀ 2 - Yamano bible

1 Kɔ̀léĩ́tĩ̀ã̀ 2

¹M lèe-gé vɔ̀, lɛ̀ lɛ́ m nu ka píé máà Wálà zì kélá-wè ɓò lòũ̀ ká ka lɛ̀ɛ, m̀ḿ gbaa à gèe wéé gbùò gbùò, ɛ̃́ɛ̃́ wɔ̃́ ká-ná ká-ná gèeè ká.

²Ƃii ma yà m gé kɛɛ m zò é ni wɔ̃́ séĩ́ ká lɛ̀ m kɛ ka píéa ká. Kɛɛ Zízɛ̀ Kɛ́lɛ̀ì wà à zì ga lɛ́ a ɓo kɔ́lɔ́sì mɔ̀ɔ lɛ́ nɔ́ m zò lɛ̀ɛ́ gbaa ni à káa.

³Lɛ̀ m nu ka píéa, m fĩ́ĩ́ e kɛ nyɛpìà, tó m mɛ́ áà tàlè túó ká kpó-kpó ɓo.

⁴Lɛ̀ m kɛ pɛ zɔ̃̀ɔ̃̀pìà, ɛ̃́ɛ̃́ máà wɔ̃́ gèè lòũ̀ ká ka lɛ̀ɛ, m̀ḿ gbaa à gèe wéé nɛ́ĩ́-nɛ̀ĩ̀ lɛ́ mia ɓéèe zì gíkã́ à zɔ̃̀ɔ̃̀ o lɛ̀ɛ ká. Kɛɛ Gɛ̀ɛ̀ Púlú zì yíkɛ̀ gáàa lɛ́ e wɔ̃́ lɛ́ m kɛ à gèepìàa, zɔ̃̀ɔ̃̀ kélɛ̀ lɛ wánà káa.

⁵E kɛ kíli kɛɛ ka zì zò-dɔ̀à-mɔ̀ gã̀ gbɛ̃̀ɛ̃̀ é kɛ à ká Wálà zì yíkɛ̀ gáàa là, kɛɛ yékɛ̀ é kɛ à ká mia ɓéèe zì gíkã́ là.

⁶Kɛɛ kóò gíkã́ wɔ̃̀ gèe mia lɛ́ o mɛ́ kpálà lɛ Wálà mɔ́ɔ̀ wɔ̃̀ yía lɛ̀ɛ. Kɛɛ ye wá gíkã́ lɛ́ e kpóṹ là zèea ká. Ɛ́ɛ̃́ ye wá mia wũ-là-mìà o kpóṹ là zèea, o zì gíkã́ ká. Míá o kília o wɔ̃̀ vɛ̀ì lɛ zɛpìà.

⁷Kɛɛ gíkã́ wɔ̃̀ lɛ́ m̀ gèea, lɛ Wálà zì gíkã́ lɛ́ lɛ́ɛ́ ɓoò lɛ̀ɛ́ gbaa kɛá làa ká. À bĩ̀ĩĩ̀ e kɛá mia mɔ̀. Lɛ gíkã́ wɔ̃̀ lɛ́ Wálà a yà mɔ́ e gé, kɛɛ kpóṹ là gã̀ é tĩã́ gbɛ̃̀ɛ ká, kɛɛ é nu ko zì lɛ̀-fɔ̀nɔ-kɔ̀ ká.

⁸Mia séĩ́ lɛ́ o mia wũ-là-mìà ká kpóṹ là zèea, o dò lɛ̀ɛ́ gbaa kɛ ɓe kɛɛ é gíkã́ e kília dɔ. È kɛ̀á wa dɔɔ, òó gɔ̃̀ ko Dàa-mì lɛ́ e lɛ̀-fɔ̀nɔɔ̀ɔ yía páà nélè ká kɔ́lɔ́sì mɔ̀.

⁹Kɛɛ zi lɛ́ à bɛ̃̀ɛ̃ɛ̃̀ lɛ à ká Wálà là kíía yía, gɛ̃̀ e ké. “Pɛ lɛ́ nyìɛ-wɛ̀lɛ̀ nɔ́ɔ fé lɛ̀ɛ́ yà do à mɔ̀, ɛ̃́ɛ̃́ wɔ̃́ lɛ́ lɛ̀ɛ́ dà do tóó gbɛɛ yí, e bɛ̀i, wɔ̃́ lɛ́ mi gbɛɛ lɛ̀ɛ́ e yɛ́lɛ́-táá do à ká kélɛ̀ lɛ́ɛ̀ bɛ̀i kɛɛ̀ɛ, ye lɛ́ e kélɛ̀ pɔɔ̀ lɛ́ Wálà aà pɛ̀ kɛ mia lɛ́ Wálà lɔ̀ kpɔ́ɔ̀ lɛ o mɔ̀ɔ lɛ̀ɛ.”

¹⁰Kɛɛ Wálà aà lɛ́ɛ́ ɓo gbaa wɔ̃́ nì o kília là à zì Gɛ̀ɛ̀ Púlú kolo là zàá. Ƃii Gɛ̀ɛ̀ Púlúa lɛ́ɛ̀ pɛ séĩ́ gé gɛ̃̀, é kɛ bɛ̃̀ɛ̃ Wálà zò-wì-tã́ã̀ wɔ̃̀ káa ká.

¹¹Deĩ̀ lɛ́ è bɛ̀i à mɔ̀ é e ɓɛ́ɛ mì zò píé wɔ̃̀ dɔ? Mí e kília dìè-tĩ́ gɛ̀ɛ̀ lɛ́ e à yía, lɛ́ è à zò-píé-wɔ̃̀ dɔɔ. Zi nɔ́ doóa káa, Wálà dìè-tĩ́ Gɛ̀ɛ̀ lɛ́ nɔ́ è à zò-píé-wɔ̃̀ dɔɔ.

¹²Gɛ̀ɛ̀ e kília, Wálà a vɔ ko píé, ɛ̃́ɛ̃́ kɔaà sɔ̀lɔ̀ ɓo. Ye wá kpóṹ là zèe zì gɛ̀ɛ̀ ká. Wálà a vɔ ko píé, kɛɛ kó pɛ séĩ́ lɛ́ Wálà aà nɔ ko lɛ̀ɛ ɓɔ̀ɔ dɔ.

¹³À mɔ́ɔ̀ wɔ̃̀ mɔ̀ɔ, kòó wɔ̃́ gèe wéé lɛ́ mia ɓéèe zì gíkã́ à zɔ̃̀ɔ̃̀ o lɛ̀ɛ ká. Kɛɛ kóò à gèe wéé lɛ́ Gɛ̀ɛ̀ Púlú à zɔ̃̀ɔ̃̀ ko lɛ̀ɛ ká, yé kɔaà Gɛ̀ɛ̀ Púlú zì wɔ̃́ wánà zɛ̀ yí ɓo mia lɛ́ Gɛ̀ɛ̀ e kília lɛ o píéa lɛ̀ɛ ká.

¹⁴Kɛɛ mi lɛ́ Gɛ̀ɛ̀ Púlú wá à píéa, bɛ̀i wá à mɔ̀ kɛ é nɔ̀-lɛ̀ɛ-pɛ̀ lɛ́ è go Wálà là Gɛ̀ɛ̀ kɛ̀lɛ̀ɛ sɔ̀lɔ̀ ɓo. Mí e kília, lɛ̀ɛ́ nɔ̀-lɛ̀ɛ-pɛ̀ e kília wɔ̃̀ yí ma. O wɔ̃́ yí gíniìa zɛ̀ ká à lɛ̀ɛ, ɓii Gɛ̀ɛ̀ Púlúa lɛ́ nɔ́ è bɛ̀i à mɔ̀ é zi lɛ́ nɔ̀-lɛ̀ɛ-pɛ̀ lɛ à ká kpànazɛ̀ɛ zɔ̃̀ɔ̃̀ mia lɛ̀ɛ.

¹⁵Mi lɛ́ Gɛ̀ɛ̀ Púlú e kília lɛ à píéa, lɛ́ɛ̀ bɛ̀i à mɔ̀ é zi lɛ́ pɛ séĩ́ lɛ à ká kpànazɛ̀ɛ wɔ̃̀ gèe. Kɛɛ mi gbɛɛ wá ɓe kɛɛ á zì kɛ̀-kpànazɛ̀ wɔ̃̀ gèe.

¹⁶Ƃii, “Dé è wɔ̃́ lɛ́ e ko Dàa-mì géa dɔ? Deĩ̀ lɛ́ aà gíkã́ zɔ̃̀ɔ̃̀ do à lɛ̀ɛ?” Kɛɛ wɔ̃́ lɛ́ lɛ Kɛ́lɛ̀ì géa, lɛ nɔ́ ko bɛ̃̀ɛ̃ ko gé nɔ́ kíli.