Read Yamano 1 Kɔ̀léĩ́tĩ̀ã̀ 3 Bible Online

1 Kɔ̀léĩ́tĩ̀ã̀ 3 - Yamano bible

1 Kɔ̀léĩ́tĩ̀ã̀ 3

¹Kɛɛ m lèe-gé vɔ̀, zi lɛ́ m̀ mɛ́ĩ́ ɓoá mia lɛ́ Gɛ̀ɛ̀ Púlúa lɛ o píéa lɛ̀ɛ, bɛ̀i lɛ̀ɛ́ gbaa kɛ m mɔ̀ kɛ ḿ mɛ́ĩ́ ɓoá ka lɛ̀ɛ kíli. E kɛ m mɔ̀ ḿ mɛ́ĩ́ ɓo ka lɛ̀ɛ lɛ̀ zí mia ò mɛ́ĩ́ ɓoá mia fèle, ɛ̃́ɛ̃́ mia lɛ́ o tĩã́ nɛ́fú dɛɛ ká Kɛ́lɛ̀ì mɔ́ɔ̀ wɔ̃̀ yía, lɛ̀ɛ lɛ́ ɓe.

²E kɛ m mɔ̀ ḿ dìì-nyɔ́-yíí nɔ ka lɛ̀ɛ ka zì ɓèlè-pɛ̀ ká. Lɛ̀ɛ́ gbaa kɛ m mɔ̀ ḿ léɓèlè mɛ́ gágà zɛ̀ nɔ ka lɛ̀ɛ, ɓii bɛ̀i lɛ̀ɛ́ gbaa kɛ ka mɔ̀ nɛ́ kɛ ká ɓèlè. É kɛ bɛ̃̀ɛ̃ dɛɛ ká káa, bɛ̀i wá nɛ́ ka mɔ̀ à wɛ̃́ĩ̀.

³Ƃii ka tĩã́ yììpìà lɛ̀ mia fèle lɛ́ ɓe. Lɛ̀ dàa-gbe-là kɛɛ̀ lɛ tĩã́ ka yí, ɛ̃́ɛ̃́ káà wéé dɔ̀ ka kíe nì píéa, làá zɔ̃̀ɔ̃̀ kélɛ̀ ka mia fèle ká, ɛ̃́ɛ̃́ ka tópìà kpóṹ là zèe mìà kɛ-kɔ̀ kpáá yí?

⁴Yé ka doó-mì aà gèe, “M Pɔ́ɔ̀ là mi ká,” lɛ́ ka dò aà gèe, “M Àpɔ́lɔ̀ là mi káa,” kɛ ka kɛ-kɔ̀ lɛ̀ɛ́ kɛ nɛ́ lɛ̀ kpóṹ là zèe mìà kɛ-kɔ̀ lɛ́ ɓe?

⁵Yé mɔṹ aà kɛ kília, dé e Àpɔ́lɔ̀ ká? Ɛ́ɛ̃́ zeĩ́, dé e Pɔ́ɔ̀ ká? Ko nɔ́ Wálà là yɛɓo-kɛ-mìà ká, ɛ̃́ɛ̃́ kɔ́áà kɛ̀ tó káà ka zò dɔ̀ Wálà mɔ̀. Kóò yɛɓo lɛ́ ko Dàa-mì a nɔ ko lɛ̀ɛ kɛ̀ ko tɔ̀ là doò do.

⁶Ma lɛ́ m pɛ-wɛ́lɛ́ taa. Àpɔ́lɔ̀ lɛ́ e yíí kpɔ́ pɛ́ e kília làa. Kɛɛ Wálà lɛ́ à kɛ̀ lɛ́ è fàaa.

⁷Mi lɛ́ è pɛ tààa, wà à yé è yíí kpɔ à làa, o wá mia kpànazɛ̀ ká. Wálà lɛ́ lɛ mi kpànazɛ̀ káa. Ƃii à ye lɛ́ à kɛ̀ lɛ́ taa-pɛ̀ è fàaa.

⁸Mi lɛ́ e pɛ taa-mì káa, wà mí yé è yíí kpɔ à làa, o nɔ́ doó. Wálà lɛ́ɛ̀ lo o fɔ́nɔ́ nɔɔ̀ yɛɓo lɛ́ waà kɛɛ kolo là zàáa.

⁹Àpɔ́lɔ̀ lɛ m ɓɛ́ɛ ká, kò ye nì kóò yɛɓo kɛ̀ e kíe bà Wálà lɛ̀ɛ. Ka lɛ́ ka kélɛ̀ Wálà zì nyɛ́nɛ̀ĩ̀ lɛ́ lɛ à kpɔ́pìàa. Ɛ́ɛ̃́ ka lɛ́ ka tɔ́ Wálà zì dɔ-pɛ̀ lɛ́ lɛ à dɔpìàa ká zeĩ́a.

¹⁰M kélɛ̀ mi lɛ́ è ká-dɔ-yɛ̀ɓo dɔ kpó-kpó ɓoa lɛ́ ɓe. M ká gã̀ gbɛ̃̀ nɔ̀-lɛ̀ɛ-pɛ̀ lɛ́ Wálà a nɔ m lɛ̀ɛ kolo là zàá, ɛ̃́ɛ̃́ mi gbɛɛ lɛ gbaa ká dɔpìà ká gã̀ e kília là. Kɛɛ lɛ sɛ̀ mia séĩ́ ó o yɛ́lɛ́ kɛ o zì ká-dɔ-kɔ̀ píé.

¹¹Ká gã̀a gbɛ̃̀ɛ̃̀ lɛ à ká gbaa. Mi gbɛɛ lɛ̀ɛ́ bɛ̀i gbaa ká gã̀ gbɛɛ dɔɔ̀. Ká gã̀ e kília lɛ́ e Zízɛ̀ Kɛ́lɛ̀ì káa.

¹²Mia gbṹũ̀ óò lo góò wà sévà, e bɛ̀i gɛ̀lɛ̀ sɔ̃̀ɔ̃́ gbùò zɛ̀ nì síì, wáà ká dɔ̀á píé ká gã̀ e kília là. Mia gbṹũ̀ óò lo yílí, ɛ̃́ɛ̃́ sùu, e bɛ̀i ɓu zìiìa zɛ̀ tòlò síì, wáà ká dɔ̀ à ká.

¹³Zi lɛ́ mia kɛ-yɛ̀ɓo lɛ à ká doò doa, à zɔ̃̀ɔ̃̀ lɛ́ɛ̀ lo kɛɛ̀ à ká yé Lúó lɛ́ lɛ nupìàa aà kɛ waà dà wáà-làa ká. Tíé lɛ́ è lo kɛɛ̀ ɓe Lúó e kília káa, lɛ́ɛ̀ lo lɛ́ɛ́ ɓoò mia séĩ́ kɛ-yɛ̀ɓo là. Tíé e kília lɛ́ɛ̀ lo à yí dã́ã̀, áà zi lɛ́ o à káa zɔ̃̀ɔ̃̀.

¹⁴Yé dɔ-pɛ̀ lɛ́ mi à dɔ ká gã̀ e kília làa, aà tó tíé yí lɛ́ lɛ̀ɛ́ géléa, lɛ́ɛ̀ lo e fɔ́nɔ́ síì yɛɓo a kɛɛ mɔ́ɔ̀ wɔ̃̀ mɔ̀.

¹⁵Kɛɛ yé mi dò zì yɛɓo a kɛɛ, aà gélé tíé yía, kɛɛ à fɔ́nɔ́ wɔ̃̀ lɛ́ɛ̀ lo tóò à yí. À dìè-tĩ́ laà lɛ́ɛ̀ lo kɛɛ̀ à ká. Kɛɛ lá a ɓo kília, lɛ́ɛ̀ lo kɛɛ̀ lɛ̀ mi lɛ́ e ɓɔ tíé kṹũ̀a yí.

¹⁶Kàá yí dɔ kélɛ̀ ka Wálà zì ká ká, ɛ̃́ɛ̃́ kélɛ̀ Wálà zì Gɛ̀ɛ̀ yàlà kṹũ̀ lɛ ka yí?

¹⁷Yé mi dò aà Wálà zì káa sìèa, Wálà lɛ́ɛ̀ lo à bɛ̃̀ɛ̃ à sìè nɔ́ kíli. Ƃii Wálà-kà wì wɔ̃̀ lɛ wɔ̃́ púlú ká. Ɛ́ɛ̃́ ka lɛ́ nɔ́ ka ká e kília káa.

¹⁸Yékɛ̀ mi nɔ́ɔ fé é e dìè bèkɛ̀ ɓo. É kɛ̀á mi dò lɛ ka bà, áà e dìè sì mi gí kã́ã̀a zɛ̀ kpóṹ là zèe zì gíkã́ kolo làa, è kɛ mi yí gíniìa zɛ̀ ká kɛ à gí é kã́.

¹⁹Ƃii kpóṹ là zèe gíkã́ lɛ wɔ̃́ yí gíniìa zɛ̀ ká Wálà lɛ̀ɛ. Zi lɛ́ à bɛ̃̀ɛ̃ɛ̃̀ lɛ à ká Wálà là kíía yía, gɛ̃̀ e ké. “Wálà lɛ́ɛ̀ mia gí kã́ã̀a zɛ̀ kũ o zì mɛ́ kɛ̀ kpálàa kɔ̀ bà.”

²⁰À bɛ̃̀ɛ̃ɛ̃̀ lɛ zeĩ́ kélɛ̀, “Ko Dàa-mì lɛ́ɛ̀ à yí dɔ kélɛ̀ mia gí kã́ã̀a zɛ̀ zì yɛ́lɛ́-tàà-yí-wɔ̃̀ɔ lɛ wɔ̃́ fèle fèle ká.”

²¹À mɔ́ɔ̀ wɔ̃̀ mɔ̀ɔ, yékɛ̀ mi gbɛɛ é lé-gbùò-là kɛ mia zì kɛ-wɔ̃̀ là. Ƃii pɛ séĩ́ lɛ kà pɛ ká.

²²Ma Pɔ́ɔ̀, e bɛ̀i Àpɔ́lɔ̀, ɛ̃́ɛ̃́ Pílɛ̀, ɛ̃́ɛ̃́ zeĩ́ kpóṹ là zèe, ɛ̃́ɛ̃́ kɛ̀ɓe wà ga, dɛɛ ká wà líé zàá, pɔɔ̀ nì o kília o séĩ́ o kà pɛ ká.

²³Ka Kɛ́lɛ̀ì là mia nì ká. Ɛ́ɛ̃́ Kɛ́lɛ̀ì bɛ̃̀ɛ̃ lɛ Wálà là pɛ ká.