Read Yamano 1 Kɔ̀léĩ́tĩ̀ã̀ 5 Bible Online

1 Kɔ̀léĩ́tĩ̀ã̀ 5 - Yamano bible

1 Kɔ̀léĩ́tĩ̀ã̀ 5

¹Maà à ma kpó-kpó ɓo kélɛ̀ mi dò lɛ ka bà áà sɔ̃̀ɔ̃ yɔɔ kɛ̀. Ɛ́ɛ̃́ zeĩ́, sɔ̃̀ɔ̃ yɔɔ e kília lɛ dóo yɔɔ, tó mia lɛ́ o wá bɛ̃̀ɛ̃ Wálà-mìà káa, òó kɛ. Wa gèe m lɛ̀ɛ kélɛ̀ ka dò lɛ e dàa na píé.

²É kɛ bɛ̃̀ɛ̃ kília, dìè-sì-gbùò lɛ tĩã́ ka yí kpànazɛ̀. Kàá gɔ̃̀ kɛɛ̀ yàá yéĩ̀zɛ̀ wɔ̃́ sùua wɛ̃́ĩ̀? Gɔ̃ lɛ́ à wɔ̃́ sùua kɛɛ̀ lɛ ka bàa, lɛ sɛ̀ ká ɓo ka bà.

³Maà m zì kɛ. M gbĩ-kpàla é kɛ bɛ̃̀ɛ̃ ka ká gbèĩa, m ka píé gɛ̀ɛ̀ yí zàá. Maà mɛ̀ĩ́-sà káá gɔ̃ lɛ́ e wɔ̃́ sùu e kília kɛɛ wĩĩ́ ko Dàa-mì Zízɛ̀ tɔ́ yí zàá, lɛ́ pɛ lɛ́ m kɛ yí.

⁴Yé kaà pá ka kíe mɔ̀, lɛ́ m zì gɛ̀ɛ̀ aà kɛ ka píé yi, ɛ̃́ɛ̃́ lɛ́ ko Dàa-mì Zízɛ̀ zì yíkɛ̀ gáàa aà kɛ kɔa píéa,

⁵lɛ ka mɔ̀ ká gɔ̃́ e kília nɔ Sétɔ̃̀ lɛ̀ɛ à zì gbĩ-kpàla yí sìè mɔ́ɔ̀ wɔ̃̀ mɔ̀, kɛɛ à gɛ̀ɛ̀ laà é kɛ à ká ko Dàa-mì zì lúóa ká.

⁶Ye wá sɛ̀ kɛɛ ká lé-gbùò-là kɛ. Kàá yí dɔ kélɛ̀ belè-kpo gbùòa pɛ́ a fɔ̀ɔ lɛ nɔ́ e ɓéĩ́ ká?

⁷Kà belè-fɔ̀ɔ-pɛ̀ zii lɛ́ e ka bàa ɓo ka bà, kɛɛ ká kɛ belè-kpo dɛɛ ká. Ƃii ka belè-kpo lɛ́ à fɔ̀ɔ-pɛ̀ gbɛɛ wá à yía ká kpó-kpó ɓo. Ƃii waà Kɛ́lɛ̀ì lɛ́ e ko zì ɓáá nyɔ̀nɔ́ ká Dìè-mia-là Kpílìa mɔ́ɔ̀ wɔ̃̀ mɔ̀ɔ, waà sálà ɓo à ká gbaa.

⁸À mɔ́ɔ̀ wɔ̃̀ mɔ̀ɔ, kɔ̀à belè lɛ́ belè-fɔ̀ɔ-pɛ̀ wá à yí, lɛ́ e kélɛ̀ zò-kɛ̀-púlú wà wánà-wɔ̃̀ɔ sí, kɔ́á kpílì kɛ à ká. Yékɛ̀ kɔ́á à kɛ belè lɛ́ belè-fɔ̀ɔ-pɛ̀ zii lɛ à yía ká. Belè-fɔ̀ɔ-pɛ̀ zii e kília lɛ́ e kélɛ̀ zò yɔɔ là, wà kɛ-wɔ̃̀ yɔɔ kɛɛ̀.

⁹M zì kíí ma bɛ̃̀ɛ̃ ka píéa, ma gèe à yí kélɛ̀ yékɛ̀ ká ka dìè dà sɔ̃̀ɔ̃ yɔɔ kɛ-mìà bà.

¹⁰Kɛɛ m̀ḿ gbaa gèe kélɛ̀ kpóṹ là zèe zì sɔ̃̀ɔ̃ yɔɔ kɛ-mìà, ɛ̃́ɛ̃́ mia lɛ́ pɛ séĩ́ zì lɔ̀-kɛ̀à-mɔ̀ lɛ o yí, e bɛ̀i kã̀ã-ɓo-mìà, ɛ̃́ɛ̃́ mia lɛ́ ò gbìnì kɛ̀ɛ̀-wɛ́lɛ́ lɛ̀ɛ. È kɛ̀á ma gèe kília, káá góò kpóṹ là zèe.

¹¹Kɛɛ wɔ̃́ ma mɔ́ɔ̀ à gèe ɓo kília, lɛ́ e kélɛ̀ yékɛ̀ ká ka dìè dà mi lɛ́ è e dìè kɛ̀ ka dò ká, tó áà sɔ̃̀ɔ̃ yɔɔ kɛ̀, ɛ̃́ɛ̃́ lɛ́ pɛ séĩ́ zì lɔ̀-kɛ̀à-mɔ̀ lɛ à yí, lɛ́ è gbìnì kɛ̀ɛ̀-wɛ́lɛ́ lɛ̀ɛ, e bɛ̀i, lɛ́ è lé-kã́ kɛ̀ mia mɔ̀, ɛ̃́ɛ̃́ mi lɛ́ yɔ-mi-wɔ̃̀ diè lɛ à zò ká, ɛ̃́ɛ̃́ à ye lɛ́ è kã̀ã ɓoa, yékɛ̀ ká ka dìè dà o bà. Yékɛ̀ bɛ̃̀ɛ̃ kà mi sùua ká pɛ ɓèlè e kíe bà.

¹²Yíkɛ̀ gáàa kpɛɛ̀ lɛ́ lɛ m kɛ̀lɛ̀ kɛ ḿ mɛ̀ĩ́-sà dɔ à ká mia lɛ́ o wá Wálà-mìà káa mɔ̀? Kɛɛ ḿ gɔ̃̀, lɛ ka mɔ̀ ká mɛ̀ĩ́-sà dɔ míá o Wálà-mìà káa mɔ̀?

¹³Wálà lɛ́ è mɛ̀ĩ́-sà dɔ mia lɛ́ o wá là mia nì káa mɔ̀ɔ. Kà mi sɔ̃̀ɔ̃ yɔɔ zɛ̀ɛ lúó é gó ka bà.