Read Yamano 1 Kɔ̀léĩ́tĩ̀ã̀ 7 Bible Online

1 Kɔ̀léĩ́tĩ̀ã̀ 7 - Yamano bible

1 Kɔ̀léĩ́tĩ̀ã̀ 7

¹Wɔ̃́ lɛ́ à gbɛ̃̀ɛ̃̀ lɛ wɔ̃́ ka bɛ̃̀ɛ̃ mɔ̀ɔ, gɛ̃̀ e ké. Lɛ sɛ̀ yékɛ̀ gɔ̃ é lee sí.

²Kɛɛ à kɛ̀ sɔ̃̀ɔ̃ yɔɔ kɛɛ̀ é kɛ gbùòa, ye lɛ́ laa wɛ̃́ĩ̀ sɛ̀ kɛɛ gɔ̃ é e dìè lèè sí, ɛ̃́ɛ̃́ kɛɛ lee é e dìè gɔ̃̀ sía.

³Lɛ sɛ̀ gɔ̃ é kɛ e na píé, lɛ̀ zí áá kɛɛ̀ à ká à píéa lɛ́ ɓe. Zi nɔ́ doóa, lɛ sɛ̀ lee bɛ̃̀ɛ̃ é kɛá e dɛ̃ píé nɔ́ kíli.

⁴Ƃii yíkɛ̀ gáàa gbɛɛ wá lee kɛ̀lɛ̀ à dìè-tĩ́ gbĩ-kpàlaa wɛ̃́ĩ̀. À dɛ̃ lɛ́ yíkɛ̀ gáàa lɛ à kɛ̀lɛ̀ à wɛ̃́ĩ̀a. Zi nɔ́ doóa káa, yíkɛ̀ gáàa gbɛɛ wá gɔ̃ bɛ̃̀ɛ̃ kɛ̀lɛ̀ e gbĩ-kpàlaa wɛ̃́ĩ̀. Lee lɛ́ yíkɛ̀ gáàa lɛ à kɛ̀lɛ̀ à wɛ̃́ĩ̀a.

⁵Yékɛ̀ ká kɛ́í kɛ ka kíe nì lɛ̀ɛ, yé ka pèèlɛɛ kàá wéé nɛ́ à mɔ̀ ká kɛ kília ká lúó kpuú píé, kɛ ká lúó e kília sí ká sɛ̀nɛ ɓo à píéa ká. Kɛɛ yé lúó e kília aà diea, lɛ sɛ̀ ká dà ka kíe píé zeĩ́, yékɛ̀ Sétɔ̃̀ é ka yí dã́ ɓii kàá bɛ̀i ka dìè kṹũ̀ tã́ã̀a mɔ́ɔ̀ wɔ̃̀ mɔ̀.

⁶Wɔ̃́ lɛ́ ma gèe ka lɛ̀ɛ e kéa, lɛ wɔ̃́ lɛ́ bɛ̀i lɛ ka mɔ̀ ká kɛɛ ká. Kɛɛ m̀ḿ gèe ká kɛ téé-tèè.

⁷Ƃii ma mì máá à naà mia séĩ́ ó kɛ lɛ̀ ma lɛ́ ɓe. Kɛɛ nɔ̀-lɛ̀ɛ-pɛ̀ lɛ́ Wálà aà nɔ mia lɛ̀ɛ o tɔ́ là doò doa lɛ gbɛɛ̀ gbɛɛ̀. Wálà aà nɔ̀-lɛ̀ɛ-pɛ̀ sùu dò nɔ mi doó-mì lɛ̀ɛ, ɛ̃́ɛ̃́ aà gbɛɛ bɛ̃̀ɛ̃ nɔ mi dò lɛ̀ɛ zeĩ́.

⁸Mia lɛ́ òó lee sí nɛ́, ɛ̃́ɛ̃́ o yé gɔ̃ aà ga o píéa, ḿm̀ à gèe o lɛ̀ɛ, lɛ dóo sɛ̀ kɛ ó tó kíli lɛ̀ zí m à káa lɛ́ ɓe.

⁹Kɛɛ yé òó bɛ̀i o dìè kṹũ̀ tã́ã̀a, lɛ sɛ̀ ó lee sí, ɛ̃́ɛ̃́ lee bɛ̃̀ɛ̃ é gɔ̃ sí. Ƃii lɛ dóo kpeĩ mia ó o kíe sí, é diá à tò-wɔ̃́-kɛ-lɔ̀ áà o gèlè lɛ̀ zí tíé è mi gèlèáa làa lɛ́ ɓe.

¹⁰Mia lɛ́ waà o kíe nì sía, wɔ̃́ dò lɛ m kɛ̀lɛ̀ ḿ gèe ó kɛ. Ye wá ma yee m ká, kɛɛ ko Dàa-mì lɛ́ è lo à gèeèa. Wɔ̃́ e kília lɛ́ e kélɛ̀, yékɛ̀ lee é e dɛ̃ tó.

¹¹Á kɛ̀á kília, yékɛ̀ é gɔ̃ gbɛɛ sí gbaa. Lɛ à mɔ̀ é tó e doó ká. É gɔ̃̀á naà á kɛ kília, è lo e mɛ̀ĩ́ e dɛ̃ zia píé, wà ye ó o fĩ̀ã̀-wɔ̃̀ yí bɛ̀i. Ɛ́ɛ̃́ yékɛ̀ gɔ̃ é e na ɓo luú.

¹²Wɔ̃́ yé m̀ nu à gèeè e kéa, ḿm̀ gèe mia yé o tóa lɛ̀ɛ. M dìè-tĩ́ m lé-wè lɛ́ e kéa. Ye wá ko Dàa-mì zì ká. Yé Wálà mi dò aà kɛ ɓe, lɛ́ à na wá Wálà mi káa, yékɛ̀ é e na e kília ɓo luú, yé léé e kília à nàà tĩã́ wà gɔ̃́ e kília ó kɛ o kíe píéa ká.

¹³Ɛ́ɛ̃́ zeĩ́, yé Wálà lee dò aà kɛ ɓe, lɛ́ à dɛ̃ wá Wálà mi káa, yékɛ̀ é e dɛ̃́ e kília tó, yé à nàà tĩã́ wà ye ó kɛ o kíe píéa ká.

¹⁴Ƃii gɔ̃ lɛ́ ye wá Wálà mi ká kília, wà e na o kɛ̀ mi doó ká yí zàáa, à kɛɛ̀ lɛ Wálà là pɛ ká. Ɛ́ɛ̃́ lee lɛ́ ye wá Wálà mi káa, wà e dɛ̃ o kɛ̀ mia doó ká yí zàáa, à kɛɛ̀ lɛ Wálà là pɛ ká. È kɛ̀á ye wá kília, kà nɔ́ɔ̀ nì òó gɔ̃̀ kɛɛ̀ Wálà là pɛ ká. Kɛɛ lɛ̀ zí lɛ à káa, Wálà là pɛ lɛ́ e o káa.

¹⁵Kɛɛ é kɛ̀á mi yé ye wá Wálà mi káa, lɛ́ à nàà é Wálà mi tóa, kà gó à lɛ̀ɛ é kɛ kíli. Wɔ̃́ nì sùu e kéa kɛɛ̀ yía, mi lɛ́ lɛ Wálà mi káa, ye wá kṹ yí. Wálà aà ka súo kɛ, kɛɛ ká kɛ zò-yà-gé zɛ̀ ka zì kɛ̀ɓe yí.

¹⁶Lee ɓi bɛ̃̀ɛ̃, zi sùu kpɛɛ̀ lɛ́ ì lo à yí dɔɔ̀á wánà ká kélɛ̀ ìí ló i dɛ̃ laà? Ɛ́ɛ̃́ gɔ̃ ɓi bɛ̃̀ɛ̃, zi sùu kpɛɛ̀ lɛ́ ì lo à yí dɔɔ̀á wánà ká kélɛ̀ ìí ló i na laà?

¹⁷Nɔ̀-lɛ̀ɛ-pɛ̀ lɛ́ ko Dàa-mì aà nɔ mia séĩ́ lɛ̀ɛ kolo là zàáa, ɛ̃́ɛ̃́ zí nɔ́ o kɛá lɛ́ Wálà e o súo kɛɛ káa, zí nɔ́ɔ káa lɛ́ wáá lóòá o zì kɛ̀ɓe yía. M zì wɔ̃́ lɛ́ m̀ gèe Wálà-mìà lɛ̀ɛ lɛ̀ séĩ́ mɔ̀ɔ, ye lɛ́ ɓɛ.

¹⁸Mi dò bɔ̃́ɔ̃́ síì e kɛ à ká lɛ̀ Wálà a súo kɛɛ ká? Yékɛ̀ é e zì kɔ̀ɛ̀à là ɓo e mɔ̀. Mi dò bɔ̃́ɔ̃́ síì lɛ̀ɛ́ gbaa kɛ à ká lɛ̀ Wálà a súo kɛɛ ká? Yékɛ̀ é bɔ̃́ɔ̃́ sí.

¹⁹Ƃii bɔ̃́ɔ̃́ síì wà yé òó bɔ̃́ɔ̃́ síaò, à yí wá à mɔ̀. Wɔ̃́ lɛ́ à yí lɛ à mɔ̀ɔ, lɛ́ e kélɛ̀ Wálà wéè kɛɛ̀.

²⁰Zi lɛ́ mi e kɛá lɛ́ Wálà a súo kɛɛ, lɛ sɛ̀ é tó nɔ́ à ká kíli.

²¹Lɛ̀ Wálà e i súo kɛɛ, i kɛ lùò ká? Yékɛ̀ í i yɛ́lɛ́ táá à mɔ́ɔ̀ wɔ̃̀ ká. Kɛɛ yé lúó aà kɛ ɓe í gó à ká lùò-lɛ̀ yía, ì gó à yí.

²²Ƃii mi lɛ́ e kɛ lùò ká lɛ̀ lɛ́ ko Dàa-mì a súo kɛ kɛɛ é kɛ là mi káa, lɛ gbaa mi lɛ́ à ɓoò lɛ lùò-lɛ̀ yía ká ko Dàa-mì lɛ̀ɛ. Zi nɔ́ doóa káa, mi lɛ́ lɛ̀ɛ́ gbaa kɛ lùò ká lɛ̀ Kɛ́lɛ̀ì a súo kɛɛ káa, lɛ gbaa lùò ká Kɛ́lɛ̀ì lɛ̀ɛ.

²³Wálà aà ka lɔ́. Ka sɔ̃̀ɔ̃́ nɔɔ̀ lɛ à ká gbaa. Yékɛ̀ ká kɛ lùò ká mia lɛ̀ɛ gbaa.

²⁴M lèe-gé vɔ̀, zi lɛ́ mia séĩ́ o kɛá lɛ̀ lɛ́ Wálà e o súo kɛɛ káa, ò tóá ká kíli wà Wálà nì wáà tàà-kíe-píé kɛ̀ à ká.

²⁵Wɔ̃́ lɛ́ à gbɛ̃̀ɛ̃̀ lɛ lee lɛ́ lɛ̀ɛ́ gɔ̃-wɔ̃̀ yí dɔ nɛ́ɛ mɔ̀ɔ, gɛ̃̀ e ké. Ko Dàa-mì lɛ̀ɛ́ gbaa wɔ̃́ gèe m lɛ̀ɛ kɛɛ ḿ gèe ka lɛ̀ɛ kɛ ká kɛ. Kɛɛ ḿm̀ lo wɔ̃́ lɛ́ m zì gíkã́ à zɔ̃̀ɔ̃̀ m lɛ̀ɛ gèeè ka lɛ̀ɛ. Ƃii ko Dàa-mì zì mia yéĩ́ kṹũ̀ a kɛ ka m gɛ̃̀ mi lɛ́ ò bɛ̀i à mɔ̀ ó o zò dɔ à mɔ̀ɔ ká.

²⁶Wɔ̃́ nyɔ́ɔ̀ɔ lɛ́ mia o à gɛ̃̀pìà dɛɛ káa mɔ́ɔ̀ wɔ̃̀ mɔ̀ɔ, ḿm̀ yí dɔ lɛ dóo sɛ̀ kɛɛ mi í tó lɛ̀ zí ɓaa káa lɛ́ ɓe.

²⁷Lee lɛ i píé? Yékɛ̀ í i dìè ɓò à píé zì naa. Ɛ́ɛ̃́ i kɔ́ɛ́á ká? É kɛ̀á lɛ kília, yékɛ̀ í lee naa.

²⁸Kɛɛ é kɛ̀á ɓaà lee sía, ye wá kɛ-wɔ̃̀ yɔɔ ká kɛ ɓá kɛò. Ɛ́ɛ̃́ yé lee lɛ́ lɛ̀ɛ́ gɔ̃-wɔ̃̀ yí dɔ nɛ́ɛ aà gɔ̃ sía, kɛɛ lɛ̀ɛ́ kɛ-wɔ̃̀ yɔɔ kɛ nɛ́ò. Kɛɛ mia lɛ́ ò o kíe nì sia, o fɔ̃̀ã̀-fɔ̃́ã́ kɛ̀ lɛ́ɛ̀ lo ɓoò kpóṹ là zèe. À mɔ́ɔ̀ wɔ̃̀ mɔ̀ɔ, ḿm̀ lo à naà kɛ ká la wɔ̃́ sùua kɛ̀lɛ̀.

²⁹M lèe-gé vɔ̀, wɔ̃́ m̀ mɔ́ɔ̀ à gèe ɓo kília, gɛ̃̀ e ké. Lúóa aà tó gbaa kɔ̀ɛ́. É gó pɛ́nɛɛ mɔ̀ é lóá líéa, lee-sí gɔ̃̀ã̀ ò kɛ lɛ̀ pɛ lɛ́ o wá lee dàa-mìà ká.

³⁰Mia lɛ́ o yàá yéĩ̀zɛ̀ɛ, ò kɛ lɛ̀ pɛ lɛ́ o yàaà wá yéĩ̀ yí. Mia lɛ́ o gé è lia, ò kɛ lɛ̀ pɛ lɛ́ o gé lɛ̀ɛ́ li. Mia lɛ́ o pɛ lɔ́-mìà káa, ò kɛ lɛ̀ pɛ lɛ́ o wá pɛ-mìà ká.

³¹Mia lɛ́ ò yɛɓo kɛ̀ kpóṹ là zèe pɔ̀ɔ̀ káa, ò kɛ lɛ̀ pɛ lɛ́ à wɔ̃̀ diè wá o zò ká. Ƃii zi lɛ́ kpóṹ là lɛ à ká dɛɛ káa, à zì yìì yí-wɔ̃̀ lɛ diepìà.

³²Ḿm̀ lo à naà ká la zò-gɔ̃́ kɛ̀lɛ̀. Gɔ̃ lɛ́ lɛ̀ɛ́ lee sí nɛ́ɛ, à yɛ́lɛ́ lɛ ko Dàa-mì wɔ̃̀ píé. Láà nàà é ko Dàa-mì zò-dà-wɔ̃̀ kɛ.

³³Kɛɛ gɔ̃ lɛ́ à lee síì lɛɛ, à zì yɛ́lɛ́ lɛ kpóṹ là zèe wɔ̃̀ píé. Láà nàà é e na zò-dà-wɔ̃̀ kɛ.

³⁴Zí e kéa káa, à zò lɛ pɛ pèèlɛ mɔ̀. Lee lɛ́ gɔ̃ wá à píéa, ɛ̃́ɛ̃́ à ye lɛ́ lɛ̀ɛ́ gɔ̃-wɔ̃̀ yí dɔ nɛ́ɛ, o zì yɛ́lɛ́ lɛ ko Dàa-mì wɔ̃̀ píé. Ƃii óò nàà o gbĩ-kpàla wà o gɛ̀ɛ̀ ó kɛ ko Dàa-mì doó kɔ̀á ká. Kɛɛ lee lɛ́ à gɔ̃ síì lɛɛ, à zì yɛ́lɛ́ lɛ kpóṹ là zèe wɔ̃̀ píé. Láà nàà é e dɛ̃ zò-dà-wɔ̃̀ kɛ.

³⁵Wɔ̃́ e kéa ḿm̀ gèe kíli kɛɛ é gbũ ka mɔ̀. Ma wá à kɛ-zì naapìà kɛ ḿ ka tèá wɔ̃́ kɛɛ̀ mɔ̀. Kɛɛ ḿm̀ nàà kɛ ká wɔ̃́ lɛ́ lɛ kpeĩa kɛ, ɛ̃́ɛ̃́ kɛ ká kɛ ko Dàa-mì zì kɔ̀-là-dɔ-mìà ká, yékɛ̀ pɛ gbɛɛ é kɛ yí kɛ é ka yɛ́lɛ́ ɓo à píé.

³⁶É kɛ̀á mi dò láà yí dɔ kélɛ̀ ye wá wɔ̃́ kɛpìà wɔ̃́ kɛ-zì ká lee-nɛ̀ lɛ́ aà e wè dɔ á sía gbĩ mɔ̀, ɛ̃́ɛ̃́ é kɛ̀á gɔ̃́ e kília zò-kũ̀-tã́ã̀ wá à kɛ̀lɛ̀, ɛ̃́ɛ̃́ é kɛ̀á bɛ̀i laa mɔ̀ é kɛ dóo kília, kà gó é wɔ̃́ kɛ lɛ̀ zí à nàà à káa ká. Kà tó ó o kíe sí. Kɛ-wɔ̃̀ yɔɔ gbɛɛ wá wɔ̃́ sùua kɛɛ̀ ká.

³⁷Kɛɛ mi lɛ́ è à yà kpó-kpó ɓo e gé kélɛ̀ lɛ̀ɛ́ ló lee síì, ɛ̃́ɛ̃́ lɛ́ pɛ gbɛɛ lɛ̀ɛ́ à kṹ gana ká kɛ é wɔ̃́ à kɛ̀ɛ kɛ, lɛ́ è e dìè-tĩ́ nàà-ká-wɔ̃̀ kũ tã́ã̀, ɛ̃́ɛ̃́ lɛ́ aà yà e gé kélɛ̀ wà lee-nɛ̀ɛ óò lo o wè dɔɔ̀ ɓɔ̀ɔ, kɛɛ a kɛ sɛ̀.

³⁸À mɔ́ɔ̀ wɔ̃̀ mɔ̀ɔ, yé gɔ̃́ɔ wà léé e kília waà o kíe sía, kɛɛ a kɛ sɛ̀. Kɛɛ yé gɔ̃́ɔ lɛ̀ɛ́ léé e kília sía, kɛɛ lɛ́ɛ̀ lo wɔ̃́ kɛɛ̀ sɛ̀ kpó-kpó ɓo.

³⁹Lee lɛ́ à gɔ̃ síì lɛɛ, lɛ e dɛ̃ kɛ̀lɛ̀ é tóá kíli à dɛ̃́ e kília é ga. Yé à dɛ̃ e kília aà gaa, bɛ̀i lɛ à mɔ̀ kɛ é gɔ̃ nɔ́ɔ fé lɛ́ à nàà à káa sí, yé lɛ ko Dàa-mì là mi káa ká.

⁴⁰Kɛɛ yé lééa aà tó lɛ̀ zí lɛ à káa lɛ́ ɓea, léé e kília gé lɛ́ɛ̀ lo liì kpó-kpó ɓo. Zi lɛ́ m zì gíkã́ à zɔ̃̀ɔ̃̀á m lɛ̀ɛ, ye lɛ́ ɓɛ. Ɛ́ɛ̃́ ḿm̀ yí dɔ kélɛ̀ Wálà zì Gɛ̀ɛ̀ lɛ m píé à gèeè yí nɔ́ kíli.