Read Yamano 1 Kɔ̀léĩ́tĩ̀ã̀ 8 Bible Online

1 Kɔ̀léĩ́tĩ̀ã̀ 8 - Yamano bible

1 Kɔ̀léĩ́tĩ̀ã̀ 8

¹Wɔ̃́ lɛ́ à gbɛ̃̀ɛ̃̀ lɛ léɓèlè lɛ́ ò kóná ɓo kɛ̀ɛ̀-wɛ́lɛ́ mɔ̀ɔ mɔ̀ɔ gɛ̃̀ e ké. Kóò à yí dɔ kélɛ̀ ko séĩ́ ko zò wɔ̃́-yí-dɔ lɛ yí. Kɛɛ wɔ̃́ yí-dɔ-kɔ̀ sùu e kéa, lɛ́ɛ̀ mi pa dìè-sì-gbùò ká. Kɛɛ lɔ̀-kɛ̀à-mɔ̀ lɛ́ɛ̀ mia yí kɛ̀ gágà.

²Mi lɛ́ è e dìè gɛ̃̀ pɛ-dɔ-mì káa, lɛ̀ɛ́ pɛ dɔ nɛ́, lɛ̀ zí áá dɔɔ̀ à káa ká nɛ́.

³Kɛɛ yé Wálà lɔ̀ aà kpɔ́ mi dò mɔ̀ɔ, Wálà lɛ́ɛ̀ à mɔ́ɔ̀ mì dɔ.

⁴Ɛ̀ɛ̀, wɔ̃́ yé à gbɛ̃̀ɛ̃̀ lɛ léɓèlè lɛ́ ò à kóná ɓo kɛ̀ɛ̀-wɛ́lɛ́ mɔ̀ɔ à ɓèlè wɔ̃̀ mɔ̀ɔ, gɛ̃̀ e ké. Kóò à yí dɔ kélɛ̀ pɛ lɛ́ lɛ kɛ̀ɛ̀-wɛ́lɛ́ɛ yí-pɛ̀ káa, ye wá pɛ́ lɛ ɓea ká. Kóò à yí dɔ kélɛ̀ Wálà doóa lɛ́ nɔ́ lɛ ɓea.

⁵Pɔɔ̀ doò do lɛ́ mia ò si o zì wálà lɛ́ lɛ lɛ̀í wà tã́ã̀ o mɔ̀ɔ, ɛ̃́ɛ̃́ wálà e kília wà mia dàa-mìà nì o kù lɛ gbùò. Pɔɔ̀ nì o kília ó kɛ bɛ̃̀ɛ̃ kília,

⁶kɛɛ Wálà doó lɛ́ nɔ́ e Wálà ká ko yee ko lɛ̀ɛ. À ye lɛ́ e ko Dàa lɛ́ e pɛ séĩ́ kɛ, ɛ̃́ɛ̃́ lɛ́ ko ɓe à lɛ̀ɛ káa. Ɛ́ɛ̃́ zeĩ́a, mia dàa-mì lɛ nɔ́ doó. Ye lɛ́ nɔ́ e Zízɛ̀ Kɛ́lɛ̀ì káa. Wálà e pɛ séĩ́ kɛ à kɔ̀ yí zàá, ɛ̃́ɛ̃́ ko ɓe à tɔ́ yí.

⁷Kɛɛ mia séĩ́ òó wɔ̃́ e kéa yí dɔ. Kɛ̀ɛ̀-wɛ́lɛ́ wɔ̃̀ aà yà mia dò yí lúó gbèkèni píé. À mɔ́ɔ̀ wɔ̃̀ mɔ̀ɔ, yé waà léɓèlè ɓèlèa, léɓèlè e kília lɛ tĩã́ o lɛ̀ɛ lɛ̀ pɛ lɛ́ à kóná ɓoò lɛ kɛ̀ɛ̀-wɛ́lɛ́ mɔ̀. O zì gíkã́ mɛ́ wá gáàa, ɛ̃́ɛ̃́ gíkã́ e kília lɛ́ɛ̀ à zɔ̃̀ɔ̃̀ o lɛ̀ɛ kélɛ̀ o zò píé lilì kṹũ̀ lɛ léɓèlè lɛ́ wa ɓèlèa mɔ́ɔ̀ wɔ̃̀ mɔ̀.

⁸Léɓèlè lɛ̀ɛ́ ló ko nyɔ̀ɔɔ̀ Wálà mɔ̀ kɔ̀ɛ́. Yé kɔaà gɔ̃́ pɛ ɓèlèa, kòó ló kɔ̃́ɔ̃̀ wɔ̃́ nɔ́ɔ fé dò yí ká. Ɛ́ɛ̃́ kó pɛ ɓèlèáa, kòó ló wɔ̃́ nɔ́ɔ fé gɛ̃̀ɛ̃̀ à kolo là.

⁹Kɛɛ kà ka yɛ́lɛ́ kɛ ka dìè píé, yékɛ̀ gó ka ɓo kɛ̀ɛ̀-wɛ́lɛ́ zì yíkɛ̀ gáàa wìa, á kɛ mia lɛ́ o mɛ́ wá gágàa ó pèlè.

¹⁰Yé mi lɛ́ à zì gíkã́ mɛ́ wá gágàa, aà ɓi lɛ́ i zò wɔ̃́-yí-dɔ lɛ yía gɛ̃̀, ɓáà pɛ ɓèlè kɛ̀ɛ̀-wɛ́lɛ́-kà wìa, lɛ̀ɛ́ ló fã̀ã́-wàà nɔɔ̀ à lɛ̀ɛ, kɛ é léɓèlè lɛ́ à kóná ɓoò lɛ kɛ̀ɛ̀-wɛ́lɛ́ mɔ̀ɔ ɓèlè?

¹¹À mɔ́ɔ̀ wɔ̃̀ mɔ̀ɔ, gɔ̃ lɛ́ à mɛ́ wá gágà e kíli lɛ́ e i lèe-gé ká, lɛ́ Kɛ́lɛ̀ì a mɔ́ɔ̀ ga ɓoa, à yí lɛ́ɛ̀ lo sìè i zì wɔ̃́ yí-dɔ-kɔ̀ kolo là.

¹²Yé kaà kɛ-wɔ̃̀ yɔɔ kɛ ka lèe-gé gbĩ mɔ̀ zi sùua káa, ɛ̃́ɛ̃́ yé kaà kɛ o zò gíkã́ lɛ́ à yí wá gáàa gĩ̀ĩpìàa, kɛɛ ka kɛ-wɔ̃̀ yɔɔ kɛpìà Kɛ́lɛ̀ì gbĩ mɔ̀.

¹³À mɔ́ɔ̀ wɔ̃̀ mɔ̀ɔ, yé léɓèlè aà kɛ m lèe-gé aà pèlèa, m̀ḿ ló gbaa wìì nɔ́ɔ fé ɓèlè, yékɛ̀ á kɛ m lèe-gé é pèlè.