Read Yamano 2 Kɔ̀léĩ́tĩ̀ã̀ 10 Bible Online

2 Kɔ̀léĩ́tĩ̀ã̀ 10 - Yamano bible

2 Kɔ̀léĩ́tĩ̀ã̀ 10

¹Ma Pɔ́ɔ̀ lɛ́ ò gèe maà kɛ mɛ́ĩ́ ɓopìà ka wɛlɛ mɔ̀ɔ, m kpɔ́lɔ́ṹ-kpɔ̀lɔ̀ũ̀, tó yé ma wá ka wɛlɛ mɔ̀ɔ tó máà mɛ́ĩ́ ɓò gágàa, m dìè ḿm̀ kpé kã ka lɛ̀ɛ. Ḿm̀ kpé kã ka lɛ̀ɛ Kɛ́lɛ̀ì zì kpóló-kpɔ̀à-mɔ̀, e bɛ̀i à zì sɔ̃̀ɔ̃-kɛ̀-sɛ̀ kolo là zàá.

²Yékɛ̀ ká m kṹ gágà mɛ́ĩ́ gágà ɓò ka lɛ̀ɛ mɔ́ɔ̀ wɔ̃̀ mɔ̀ yé maà nua ká. Ƃii ḿm̀ yí dɔ kélɛ̀ ḿm̀ bɛ̀i à mɔ̀ ḿ mɛ́ĩ́ ɓo gágà mia lɛ́ ò gèe kélɛ̀ kóò tàà kpóṹ là zèe mìà kpáá yía lɛ̀ɛ.

³Ko kɛɛ̀ lɛ ɓe kpóṹ là zèe wánà ká. Kɛɛ ko wá tã́ã̀ zèe gèlè gɔ̃pìà.

⁴Gèlè-gɔ̃-pɔ̀ɔ̀ lɛ́ kò gèlè gɔ̃áa, ye wá kpóṹ là zèe zì gèlè-gɔ̃-pɔ̀ɔ̀ ká. Kɛɛ lɛ gèlè-gɔ̃-pɔ̀ɔ̀ lɛ́ Wálà zì yíkɛ̀ gáàa lɛ à yía ká. Kóò dɔ-pɛ̀ mɛ́ gágà zɛ̀ doò do yí sìè à ká.

⁵Kóò tèé lɛ́ mia ɓéèe ò dàa yí sìè. Kóò dìè-sì-gbùò pɛ̀ lɛ́ è dɔ mia gɛ̀nɛ̀, lɛ́ à kɛ̀ lɛ́ òó Wálà dɔɔ yí sìè. Kóò yɛ́lɛ́-tàà-yí-wɔ̃̀ séĩ́ kɛ̀ kò lùò ká, tó kɔ́áà kɛ̀ áà Kɛ́lɛ̀ì wéè kɛ̀.

⁶Yé kaà wéé dóo kpó-kpó ɓo ko wéè mɔ̀ɔ, ko pɛ̀ kɛɛ̀ lɛ́ɛ̀ lo kɛɛ̀á kɛ kó wɔ̃́ nyɔ́ɔ̀ɔ kɛ mi nɔ́ɔ fé lɛ́ làá naa kɛ é wéé ko wéè mɔ̀ɔ ká.

⁷Zi lɛ́ pɛ lɛ à ká ka nyìɛ gɛ̀nɛ̀ɛ, lɛ́ kà gɛ̃̀ à káa. Mi lɛ́ aà e dìè sí Kɛ́lɛ̀ì là mia lɛ ka bà? É kɛ̀á yia, è lɛ̀ gɛ̃̀ e dìè là zeĩ́. Ƃii ko nɔ́ Kɛ́lɛ̀ì là mi ká, lɛ̀ zí nɔ́ lɛ à káa lɛ́ ɓe.

⁸É kɛ bɛ̃̀ɛ̃ zi lɛ́ maà lé-gbùò-là kɛá ɓéĩ́ ɓo e gbùò ká yíkɛ̀ gáàa lɛ́ e ko kɛ̀lɛ̀ɛ mɔ́ɔ̀ wɔ̃̀ mɔ̀ɔ, yɛ́lɛ̀ lɛ̀ɛ́ m kɛ. Yíkɛ̀ gáàa e kília, ko Dàa-mì aà nɔ ko lɛ̀ɛ kɛ é ka dɔ. Kɛɛ lɛ̀ɛ́ gbaa à nɔ kɛ é ka wí tã́ã̀.

⁹M̀ḿ naa kɛ é kɛ ka gé kélɛ̀ m̀ kii lɛ́ ma bɛ̃̀ɛ̃ ka píéa, ma bɛ̃̀ɛ̃ kɛ é ka mɛ́ túó.

¹⁰Ƃii óò à gèe kélɛ̀, “Pɔ́ɔ̀ zì kii lɛ́ à bɛ̃̀ɛ̃ lɛ kpeĩ-kpeĩ, ɛ̃́ɛ̃́ lɛ gágà, kɛɛ yé lɛ ko píé zèe e gbĩ-kpàla káa, à yí lɛ́ɛ̀ ga, ɛ̃́ɛ̃́ à zì mɛ́ĩ́ à ɓoa mɛ́ wá gágà bɛ̃̀ɛ̃.”

¹¹Mia sùu lɛ́ ò wèè kília, ò à yí dɔ kélɛ̀ pɛ lɛ́ kò à bɛ̃̀ɛ̃ kíí kò bɛ̃̀ɛ̃ yí yé ko wá ka píéa káa, lɛ wɔ̃́ nɔ́ kò lo à kɛɛ̀ yé kɔaà kɛ ka píé yia káa ká.

¹²Bɛ̀i wá bɛ̃̀ɛ̃ ko mɔ̀ kɛ kó ko dìè dà, ɛ̃́ɛ̃́ kɛ bɛ̃̀ɛ̃ kó ko dìè gɔ̃́ bɛ̃̀ɛ̃ mia lɛ́ ò o dìè tɔ́ lia bà, ɛ̃́ɛ̃́ o mɔ̀. Óò o dìè gɔ̃ zi lɛ́ ò nàà ó o dìè gɔ̃́áa ká. Ɛ́ɛ̃́ óò o yɛ́lɛ́ tàà o dìè mɔ́ɔ̀ wɔ̃̀ yí lɛ̀ zí lɛ́ waà o dìè gɔ̃́ à káa lɛ́ ɓe. Zi sùu kpɛɛ̀ lɛ́ o yí gíniì lɛ à ká ké.

¹³Kɛɛ ko yee, kò lé-gbùò-là lɛ́ kò kɛ̀ɛ, lɛ̀ɛ́ ló ɓɔɔ̀ lɛ̀ lɛ́ è bɛ̀i à mɔ̀ é tèá yia mɔ̀. Yɛɓo lɛ́ kò à kɛ̀ɛ, Wálà aà à tèá-pìà kɛ ɓe, ɛ̃́ɛ̃́ kóò lo tóò nàà e kília gílì kò lé-gbùò-là kɛɛ̀ɛ ká. Ko zì yɛɓo lɛ́ ko à píé ka bàa, lɛ yɛɓo e yía bà.

¹⁴Ɛ́ɛ̃́ yé mɔṹ ka nàà e kília gílìa, lɛ̀ lɛ́ ko nu ka píé wɔ̃́ làṹ yiè lɛ́ à gbɛ̃̀ɛ̃̀ lɛ Kɛ́lɛ̀ì mɔ̀ɔ káa, kòó gbaa vɔ ko tèá-pìà e kília zì.

¹⁵À mɔ́ɔ̀ wɔ̃̀ mɔ̀ɔ, kòó lé-gbùò-là kɛ yɛɓo lɛ́ mia gbɛɛ waà à kɛ, lɛ́ lɛ nàà lɛ́ Wálà a kpɔ́ ko lɛ̀ɛ mɛ̀ĩ́a, kɛ kó die à ká à là. Kɛɛ ko zò lɛ à mɔ̀ kɛ ka zì zò-dɔ̀à-mɔ̀ là é kpɔ́. Ɛ́ɛ̃́ kɛ kó yɛɓo lɛ́ à diè lɛ à yé kɔaà kɛ ka fĩ̀ã̀a làa, kɛ kó kɛ. Ɛ́ɛ̃́ ko nɔ́ nàà lɛ́ Wálà a kpɔ́ ko lɛ̀ɛ mɛ̀ĩ́ teele.

¹⁶Yé aà kɛ kília, kóò bɛ̀i à mɔ̀ kó wɔ̃́ làṹ yièa gèe sɛ́lɛ́ gbɛɛ lɛ́ lɛ ka kpòò mɛ̀ĩ́a yí. Ɛ́ɛ̃́ lɛ̀ɛ́ ló kɛɛ̀ ko mɔ̀ kɛ kó lé-gbùò-là kɛ yɛɓo lɛ́ à kɛɛ̀ lɛ mi gbɛɛ zì yɛɓo-kɛpìàa là.

¹⁷Kɛɛ “Mi lɛ́ è lé-gbùò-là kɛ̀ɛ, è à kɛ wɔ̃́ lɛ́ ko Dàa-mì aà kɛɛ là.”

¹⁸Ƃii mi lɛ́ ko Dàa-mì zò è dà à píéa, ye lɛ́ è e kɔ̀ yà à wìa. Ye wá mí à zò è dà e dìè píéa ká.